Matiu 9

Kuasaꞌna Iesu moámpungi dósá tongawaꞌ hangko i kamopakauriꞌNa hadua topaluꞌ

(Mrk. 2:1-12; Luk. 5:17-26)

1Hangko ionoꞌ, mengkaheꞌ miꞌi Iesu i duanga hingkakani hai topeguruNa, haneꞌi mengkalimbamoheꞌ mesuleꞌ lao i katoroꞌáraꞌ i wánuá Kapenau. 2Kahaweꞌraꞌ ionoꞌ, araheꞌ tauna to mopakowaꞌ hadua topaluꞌ to rapopaturu i aleꞌ, laoheꞌ motunggái Iesu. Kanaitána Iesu kamahilena pehárungáraꞌ kaꞌina mauriꞌna rángáraꞌ iti, Ia molaluita miꞌi i topaluꞌ iti, Nauliꞌ, “ÁnáꞌKuꞌ, nupakaróhó lalumu! Teámpungi miꞌi dósámu.”

3Bahangapa guru agama to mohádi laluitana Iesu iti manguliꞌ i laluraꞌ, “Tauna deꞌe mopahibali kuasaꞌNa hai Pueꞌ Ala! {Bateꞌna peá Pueꞌ Ala to mobuku moámpungi dósá.}”

4Agáiáná naisá ntepuꞌu Iesu apa to ara i laluraꞌ, onoꞌ miꞌi haneꞌi Nahángáꞌáheꞌ, “Moapa riꞌi haneꞌi kadake ntepuꞌu pekirimi? 5Umbána to magampaꞌ rauliꞌ, ‘Teámpungi miꞌi dósámu,’ ba ‘Pearó, molumaomokoꞌ’. 6Deꞌe-deꞌe ina Kupatongawaꞌákou kaꞌárána kuasaꞌna Ánáꞌ Mánusiá moámpungi dósá i duniáꞌ.” Hangko ionoꞌ, mehaileꞌ miꞌi Iesu i topaluꞌ iti, haneꞌi Nahángáꞌá, “Mearómokoꞌ, nulóló miꞌi aleꞌmu hai mesuleꞌmokoꞌ lao i támbimu!” 7Mearó mpuꞌu miꞌi topaluꞌ iti, haneꞌi mesuleꞌ lao i támbina.

8Karaitána tauna to handaꞌ apa to pewaliꞌ iti, rapotingkáráꞌ haneꞌi motóiáheꞌ Pueꞌ Ala, rauliꞌ, “Kipomahile Pueꞌ Ala láwiꞌ Ia mopatongawaꞌ kuasaꞌNa i tauna!”

Iesu mokióꞌ Matiu mewaliꞌ topeguruNa

(Mrk. 2:13-17; Luk. 5:27-32)

9Roo onoꞌ, pohuꞌ miꞌi Iesu hangko ionoꞌ. I tangaꞌ rárá, Ia moita hadua tauna to rahangaꞌ Matiu#9:9 Matiu: rauliꞌ woꞌo Lewi. Básá Marakusi 2:14. Ia miꞌi to moukiꞌ sura deꞌe. i lalu kantóróna. Matiu iti tangaꞌna mampopolumao bágóꞌna moróróꞌ ásele.#9:9 moróróꞌ ásele: Toperóróꞌ ásele rauliꞌ topehubiꞌ ba “tauna to madósá” láwiꞌ mobágóꞌheꞌ modurei toRoma, ewáliraꞌ toIahudiꞌ. Nauliꞌ Iesu i hia, “Meuláꞌmokoꞌ i Kódóꞌ!” Kásáliu meángkáꞌ miꞌi Matiu, haneꞌi meuláꞌ i Iesu.

10Roo onoꞌ, Iesu hai topeguruNa laoheꞌ i támbina Matiu bona mandeꞌheꞌ hingkakani. Tangaꞌraꞌ mandeꞌ, handaꞌ toperóróꞌ ásele hai tauna ntániꞌna haweꞌheꞌ woꞌo hai mandeꞌheꞌ hingkakani. Tauna iti rarekeꞌheꞌ tauna to tiꞌara maroꞌa.#9:10 tauna to tiꞌara maroꞌa - I lalu básá Iunani: tomadósá. 11Araheꞌ toParisi to moitaheꞌ mandeꞌ hingkakani, onoꞌ miꞌi haneꞌi rapekuneꞌ i topeguruna Iesu to ntániꞌna, rauliꞌ, “Moapa riꞌi haneꞌi gurumi mandeꞌ hingkakani hai tauna to tiꞌara maroꞌa?”

12Nahádi Iesu pekuneꞌraꞌ iti, onoꞌ miꞌi haneꞌi Nahángáꞌáheꞌ, “Tauna to tiꞌara maduꞌa, tiꞌara paraluu mampeliꞌ sando. Ngkáliꞌna riꞌi, tauna to maduꞌa to paraluu mampeliꞌ sando. 13Mewaliꞌ, hangaa-ngaa nipekiri maroꞌa apa lempóna ngkóráꞌna Pueꞌ Ala to teukiꞌ node:

‘Tiꞌara binataꞌ to Kuꞌundeꞌ nipopenómbá i Kódóꞌ,

agáiáná to Kuꞌundeꞌ ia miꞌi bona maꞌahiꞌkou i hángká rángámi.’ ” (Hosea 6:6)

Lempóna: tiꞌaraꞌAꞌ mai mokióꞌ tauna to mampekiri manótó bábehiáraꞌ, agáiáná maiAꞌ mokióꞌ tauna to moisá kamadósáraꞌ hai menosoꞌheꞌ.

Topeguruna Iesu tiꞌaraheꞌ mopuasaꞌ tempóna mani Ia ara hingkakani hai hira

(Mrk. 2:18-22; Luk. 5:33-39)

14Hangko ionoꞌ, haweꞌmoheꞌ bahangapa topeguruna Iohane Toperiu, laoheꞌ mekuneꞌ i Iesu, rauliꞌ, “Moapa riꞌi haneꞌi kaiꞌ hai toParisi pakaꞌangkaiꞌ mopuasaꞌ, agáiáná topeguruMu tiꞌara?”

15Iesu mohánikiheꞌ moliu ngkóráꞌ pándiriꞌ, Nauliꞌ node: “Tauna to i posusaꞌá petauna, ba masusa laluraꞌ i tempóna tobaleilo to ratauna ara mani i oloꞌraꞌ? Tiꞌara. Agáiáná ina haweꞌ tempóna, tobaleilo to ratauna ina raꞌala hangko i oloꞌraꞌ. I tempó iti riꞌi hangko ina mopuasaꞌraheꞌ.”#9:15 Lempóna, topeguruNa tiꞌara maniheꞌ paraluu mopuasaꞌ láwiꞌ Iesu mamporángá maniheꞌ.

16Roo onoꞌ, Iesu mopahaweꞌ wopiꞌi rompákáꞌ ngkóráꞌ pándiriꞌ, Nauliꞌ, “Tiꞌara ara hadua tauna to motámpelei badu to sae hai báná to woꞌu, láwiꞌ báná to woꞌu ina mengkuruꞌ duuꞌna mohepaꞌ badu to sae iti, álána mantámbái riꞌi kamahepaꞌna. 17Noꞌonoꞌ woꞌo, tiꞌara maroꞌa mokándó anggoroꞌ to woꞌu i pemboliá to sae to rabábehi hangko i koliꞌ binataꞌ, láwiꞌ ane háwóái, ina mahepaꞌ pemboliá to sae iti, álána mabubu anggoroꞌ, hai marugiꞌ woꞌo pemboliána. Mewaliꞌ anggoroꞌ to woꞌu hangaa-ngaa rakándó i pemboliá to woꞌu, bona anggoroꞌ hai pamboliána maroꞌa.”#9:16-17 Lempóna: paturoꞌna Iesu paturoꞌ to woꞌu. Tiꞌara hintotoꞌ ane paturoꞌna Iesu ragalo hai ádá agama Iahudiꞌ to sae.

Iesu mopatueꞌ hadua ánángkóiꞌ, hai mopakauriꞌ hadua towawine to mampetóbóꞌ baduNa

(Mrk. 5:21-43; Luk. 8:40-56)

18Tangaꞌna mani Iesu molaluita hai topeguruna Iohane Toperiu, haweꞌ miꞌi hadua tadulako támbi penómbáꞌáraꞌ toIahudiꞌ#9:18 tadulako támbi penómbáꞌáraꞌ toIahudiꞌ: Bágóꞌna, mokádipurá támbi penómbáꞌá hai mourusi to mampopolumao bágóꞌna Pueꞌ. lao molingkudu i bitina Iesu membiáꞌ tulungi. Nahángáꞌá, “Pueꞌ! Ánáꞌkuꞌ towawine hangko kamatena. Kupembiáꞌ bona laokeꞌ i támbingkuꞌ, Nupekamaꞌ bona tueꞌ huleꞌ.” 19Mewaliꞌ meuláꞌ mpuꞌu miꞌi Iesu i hia, hingkakani hai topeguruNaheꞌ.

20-21Tangaꞌraꞌ molumao, hadua towawine mohungkuki Iesu hangko i taleuꞌNa bona motóbóꞌ wuntu kumbáNa. Towawine iti, hampuloꞌ miꞌi hai rompare nahumba oaꞌ.#9:20-21 Hakiꞌ towawine iti metitidiꞌi i toIahudiꞌ. Mouláꞌ ágámáraꞌ, rarekeꞌ kedái, haneꞌi tiꞌara peisá mohintuwuꞌ hai tauna. Básá Áturá Menómbá 15:19-30.

22Iesu mampehaileꞌ towawine iti haneꞌi Nahángáꞌá, “ÁnáꞌKuꞌ, nupakaróhó lalumu! Ánti pepoináláimu i Kódóꞌ, mauriꞌmokoꞌ.” Tempó iti woꞌo, towawine iti mauriꞌ.

23Roo onoꞌ, Iesu mopaliliu polumaoNa lao i támbina tadulako támbi penómbáꞌá. KahaweꞌNa ionoꞌ, Naita handaꞌmoheꞌ tauna to rasaro bona motulali, hai araheꞌ woꞌo tauna to handaꞌ to metatangi. 24Molaluita miꞌi Iesu, Nauliꞌ, “Mesuwuꞌmokou upu-upu hangko ieneꞌ! Ánángkóiꞌ iti tiꞌara mate, agáiáná letaꞌ peá.” Karahádina peá laluitaNa iti, rapatawai riꞌi. 25KaNapopesuwuꞌraꞌ hangko i támbi, mesuaꞌ miꞌi Iesu i lintuꞌna ánángkóiꞌ iti, haneꞌi Natibaaꞌ taena.#9:25 Mouláꞌ Paturoꞌna Musa, tauna to motibaaꞌ wátámandoꞌ rapakedái. Básá Poimbaꞌ 19:11-22. Ánángkóiꞌ iti kásáliu mearó láwiꞌ tueꞌ miꞌi huleꞌ. 26Tandaꞌ kuasaꞌ to nabábehi Iesu iti tebámbári i humalele tampoꞌ Galilea.

Iesu mopakauriꞌ rodua tobilo

27Kapohuꞌna Iesu hangko ionoꞌ, ara rodua tobilo to meuláꞌ bókóꞌ hai mekióꞌ-kióꞌheꞌ oaꞌ, rauliꞌ, “Pemuleꞌána Datu Daudiꞌ,#9:27 Pemuleꞌána Datu Daudiꞌ: Laluita iti molempónga toMásehi, ba Datu Topehómpóꞌ láwiꞌ ara miꞌi to nadándi Pueꞌ Ala to ina mopárentái kadatuána Datu Daudiꞌ haweꞌ i rue-ruena. Básá to teukiꞌ i Kahirámpuá Laluita. Nupokaꞌahiꞌ wongkaiꞌkaa!”

28I pesuaꞌna Iesu i lalu támbi, haweꞌmoheꞌ tobilo to rodua iti. Nakuneꞌheꞌ Iesu, “Ba nipoinálái kaꞌárána kuasaꞌKuꞌ mopakauriꞌkou?”

Rahániki, “Kipoinálái, Pueꞌ!”

29Hangko ionoꞌ, Nakamaꞌ miꞌi mátáraꞌ haneꞌi Nahángáꞌáheꞌ, “Ánti pepoináláimi, mauriꞌmokou.” 30Kásáliu meitaheꞌ. Agáiáná napaingáꞌiheꞌ Iesu, Nauliꞌ, “Ineeꞌ nipolaluita i heáná peá apa to Kubábehi deꞌe.”#9:30 Iesu mokóntó tauna mopahaweꞌ apa to Nabábehi láwiꞌ: 1) salaꞌ pekiriraꞌ mokana i Datu Topehómpóꞌ. 2) Naisá ara to mosápuáka kaꞌIana Datu Topehómpóꞌ. 3) tiꞌara mani tempóna rapapate. 31Agáiáná kehapiꞌheꞌ Nakóntó, bateꞌna peá lao rabámbári i humalele tampoꞌ iti apa to nabábehi Iesu i hira.

Iesu mopakauriꞌ tauna to tiꞌara peisá molaluita

32Kapohuꞌraꞌ peá tobilo iti, ara hadua tauna to raꞌánti lao i Iesu. Tauna iti tiꞌara peisá molaluita ánti kanapesuaꞌina setáꞌ. 33I kanapopesuwuꞌna miꞌi Iesu setáꞌ iti, tauna iti mantepuꞌu molaluita. Rapotingkáráꞌ ntepuꞌu tauna to handaꞌ moita apa to pewaliꞌ iti, rauliꞌ, “Ee! Maróhó ntepuꞌu kuasaꞌNa! Tiꞌara mani hangkani mewaliꞌ to nodeꞌe i tampoꞌ Sáráeliꞌ!” 34Agáiáná toParisi tiꞌaraheꞌ mampoinálái kahangko i Pueꞌ Alana kuasaꞌna Iesu. Rauliꞌ, “Tauna iti mopakeꞌ peá kuasaꞌna daturaꞌ setáꞌ mampopelóhóꞌ setáꞌ.”

Kamaꞌahiꞌna Iesu i tauna to handaꞌ

35Hangko ionoꞌ, Iesu hai topeguruNa molumao wopaheꞌ lao i kótá-kótá hai wánuá-wánuá {i tampoꞌ Galilea}. Iesu mopahaweꞌ Ngkóráꞌ Marasa mokana i popárentána Pueꞌ Ala, hai mepaturoꞌ i támbi penómbáꞌá. Ia mopakauriꞌ woꞌo upu-upu tauna to maduꞌa hai to tiꞌara masilolonga wátáraꞌ. 36Maꞌahiꞌ laluNa moita tauna to handaꞌ iti, láwiꞌ handaꞌ kamapáriraꞌ. Tiꞌaraheꞌ ara to motulungi, nodoheꞌ dimbá#9:36 dimbá: Handaꞌ kánina taunána Pueꞌ Ala rapándiriꞌ nodo dimbá, hai Pueꞌ Ala Ia miꞌi Topoewuraꞌ. Básá Poimbaꞌ 27:15-17; Sura Petóiá 23; Iesaia 53:6; Ieheskie gáláꞌna ka-34. to tiꞌara rapoewu. 37Nauliꞌ Iesu i topeguruNaheꞌ, “Handaꞌheꞌ tauna to peisá rapándiriꞌ nodo pare to mangka láwiꞌ timamamoheꞌ mepoinálái i Kódóꞌ, agáiáná tiꞌara handaꞌ to peisá motulungiheꞌ mai i Kódóꞌ. 38Mewaliꞌ mekakaekou i Pueꞌ Ala bona mantámbái tauna to ina moánti Ngkóráꞌ Marasa bona handaꞌ tauna to ina mepoinálái i Kódóꞌ.”

Currently Selected:

Matiu 9: NTBEP

Highlight

Copy