Lukasi 22

Poliwona Iudasiꞌ mampobaluꞌ Iesu

(Mat. 26:1-5,14-16; Mrk. 14:1-2,10-16; Ioh. 11:45-53)

1Hungkuꞌ miꞌi alo mahileraꞌ toIahudiꞌ to rahangaꞌ Posusa Rótiꞌ to Tiꞌara Raragiꞌi hai to rauliꞌ woꞌo Alo Posusa Paska.#22:1 Posusa Rótiꞌ to Tiꞌara Raragiꞌi hai Alo Posusa Paska: Hangkani i lalu hampare, handaꞌheꞌ toIahudiꞌ lao i Ierusale bona mamposusaiheꞌ pambuhinaona karakábáháꞌáraꞌ toioruraꞌ hangko i tampoꞌ Másiriꞌ hangkoia. 2Kapalaꞌ-kapalaꞌ tadulako menómbá hai guru-guru agama mampeliꞌheꞌ rárá ngkániiꞌ-niiꞌ bona Iesu rahuku mate, láwiꞌ mampokalááꞌheꞌ tauna to handaꞌ ina mabukoꞌ.

3Roo onoꞌ, Datu Tokadake mampesuaꞌi Iudasiꞌ#22:3 Mouláꞌ Iesu, marue miꞌi Iudasiꞌ nakeloꞌ Datu Tokadake. Básá Iohane 6:70-71. to rauliꞌ woꞌo Isikarioꞌ. Ia miꞌi hadua hangko i topeguruna Iesu to hampuloꞌ hai rodua. 4Onoꞌ miꞌi haneꞌi lao miꞌi Iudasiꞌ i kapalaꞌ-kapalaꞌ tadulako menómbá hai kapalaꞌ-kapalaꞌ topokámpái Támbina Pueꞌ Ala.#22:4 kapalaꞌ-kapalaꞌ topokámpái Támbina Pueꞌ Ala: Hiramoheꞌ toLewi, pemuleꞌána Lewi ánáꞌna Iako. Napolaluitaꞌáheꞌ noumbá rárána mohuhuꞌ Iesu i hira. 5Góeꞌheꞌ mohádi tunggáiána Iudasiꞌ iti, hai rapodándiá ina rapoweꞌi dóiꞌ. 6Napokana miꞌi Iudasiꞌ laluitaraꞌ, haneꞌi napeliꞌ tempó to maroꞌa mohuhuꞌ Iesu i hira bona rahakaꞌ ngkániiꞌ-niiꞌ.

Iesu mandeꞌ pandeꞌ Posusa Paska hingkakani hai topeguruNaheꞌ

(Mat. 26:17-29; Mrk. 14:12-25; Ioh. 13:21-30; 1 Kor. 11:23-25)

7Haweꞌ miꞌi alo Popatimama Posusa Rótiꞌ to Tiꞌara Raragiꞌi, hai mouláꞌ ádá ágámáraꞌ toIahudiꞌ, hantámbi-hantámbi hangaa-ngaa moánti hambaꞌa dimbá bona rasambale {i Támbina Pueꞌ Ala} i alo iti#22:7 Mantepuꞌuheꞌ mandeꞌ i katámpuna alo. bona raꞌandeꞌ i Posusa Paska. 8Onoꞌ miꞌi haneꞌi Iesu mohuoꞌ Peturuꞌ hai Iohane, Nauliꞌ, “Laomokou mopatimama apa to ina taꞌandeꞌ deiná i Posusa Paska.”

9Rapekuneꞌ, “Pueꞌ, iumbá peundeꞌáMu kipatimama pandeꞌ iti?”

10Nahániki Iesu, “Ane mesuaꞌkou i lalu kótá Ierusale,#22:10 Posusa Paska hangaa-ngaa mewaliꞌ i kótá Ierusale, tiꞌara peisá raposusai i katoroꞌá ntániꞌna. ina nilámbiꞌ hadua tobaleilo to moánti gumbaꞌ to moꞌóntóꞌ uwai.#22:10 Tiꞌara biásá tobaleilo moánti gumbaꞌ to moꞌóntóꞌ uwai láwiꞌ bágóꞌna towawine. Meuláꞌmokou i hia haweꞌ i támbina. 11Ane mesuaꞌkou i lalu támbina, nihángáꞌá pueꞌ támbi iti, ‘Napekuneꞌ Guru: Ba iumbá peisáꞌAꞌ mandeꞌ pandeꞌ Posusa Paska hingkakani hai topeguruNgkuꞌheꞌ?’ 12Pueꞌ támbi iti ina motudeꞌáꞌákou hambuaꞌ lintuꞌ to mahile to i wongko. I lintuꞌ iti upu-upu to taparaluu timama miꞌi,#22:12 upu-upu to taparaluu: Rápáꞌna, álónga, mangku, hai báná to bulá bona rótiꞌ peisá rawuni. mewaliꞌ ionoꞌ miꞌi nikádipuráꞌákeꞌ pandeꞌ Paska.”#22:12 pandeꞌ Paska - Rápáꞌna: bauꞌ dimbá, tulu manuꞌ, rutuꞌ to rabábehi hangko i wuaꞌngkau to rapabangi, rampaꞌ-rampaꞌ to mapaiꞌ, uwai to raburei, rótiꞌ to ratunu, hai mainuheꞌ anggoroꞌ. Upu-upu ara lempóna.

13Lao mpuꞌumoheꞌ Peturuꞌ hai Iohane i lalu kótá. Kahaweꞌraꞌ ionoꞌ, upu-upu mewaliꞌ hintotoꞌ hai apa to nahángáꞌáheꞌ Iesu, hai mopatimamaheꞌ pandeꞌ Posusa Paska.

14Haweꞌ miꞌi tempóraꞌ mandeꞌ pandeꞌ Paska, mehodamoheꞌ Iesu hai suroNa. 15Tangaꞌraꞌ mandeꞌ, nahángáꞌáheꞌ Iesu, “Kuꞌundeꞌ ntepuꞌu mandeꞌ hingkakani hai kómu i Posusa Paska deꞌe hangko tiꞌara maniAꞌ molámbiꞌ kapári, 16láwiꞌ toꞌu ntepuꞌu to Kuhángáꞌákou deꞌe: tiꞌara piꞌi ina Kuandeꞌ pandeꞌ Paska, hangko tiꞌara mani tebukeki lempóna Posusa Paska deꞌe i kahaweꞌna popárentána Pueꞌ Ala i duniáꞌ.”#22:16 Ina ara posusa mahile i lalu surugáꞌ. Upu-upu taunána Pueꞌ Ala ina ara ionoꞌ, tepasuaꞌ Burahima, Isakiꞌ hai Iako. Básá Matiu 8:11.

17Roo onoꞌ, Iesu moala miꞌi hambuaꞌ painuá to bukeꞌ anggoroꞌ, haneꞌi mekakae i Pueꞌ Ala. Nahángáꞌáheꞌ topeguruNa, “Niala miꞌi haneꞌi niꞌinu hadua-hadua. 18Bona niꞌisá: mantepuꞌu deꞌe-deꞌe, tiꞌara piꞌi ina Kuinu anggoroꞌ, duuꞌna haweꞌ popárentána Pueꞌ Ala i duniáꞌ.”#22:18 Mandeꞌ rótiꞌ hai mainu anggoroꞌ mopándiriꞌ kamatena Iesu. I alo to ina haweꞌ, Ia ina mainu wopiꞌi anggoroꞌ i kagóeꞌ-góeꞌ i posusa mahile i lalu surugáꞌ.

19Roo onoꞌ, Naꞌala wopiꞌi Iesu rótiꞌ hai mekakae i Pueꞌ Ala haneꞌi Nabiseꞌ-biseꞌ rótiꞌ iti hai Nagáláꞌ-gáláꞌáheꞌ, Nauliꞌ, “Deꞌe miꞌi wátáNgkuꞌ to Kuhuhuꞌ mosulewátáikou. Nibábehi miꞌi ádá deꞌe bona nibuhinao oaꞌ apa to Kubábehi.” 20Noꞌonoꞌ woꞌo, karooraꞌ mandeꞌ pandeꞌ Paska iti, Naꞌala wopiꞌi painuá anggoroꞌ, Nahángáꞌáheꞌ, “Óntóꞌna painuá anggoroꞌ deꞌe, lempóna podándina Pueꞌ Ala to woꞌu,#22:20 Básá Ieremia 31:31-34; Iberani 9:15. to mopahintuwuꞌ Pueꞌ Ala hai tauna. Dándi iti ina Napakaróhó hai waheꞌKuꞌ to ina mabubu i kamateNgkuꞌ. 21Agáiáná nipehádingi sieruꞌ! Hadua hangko i oloꞌmi to tapohingkakaniá mandeꞌ, deꞌe-deꞌe ina mohuhuꞌAꞌ i ewálingkuꞌ! 22Kódóꞌ Ánáꞌ Mánusiá bateꞌna ina mate nodo to napakanótó miꞌi ami Pueꞌ Ala. Agáiáná ina rumihi karahukuna tauna to mohuhuꞌAꞌ i ewálingkuꞌ!”

23Karahádina topeguruNa laluitaNa, mombekuneꞌmoheꞌ hadua hai hadua, ba heáná to ina mobábehi bábehiá to kadake iti.

Heáná to mahile tueꞌraꞌ

24Hangko ionoꞌ, mombeheheꞌmoheꞌ topeguruna Iesu, ba heáná hangko i oloꞌraꞌ to melumbuꞌ kamahilena tueꞌna. 25Onoꞌ miꞌi haneꞌi nahángáꞌáheꞌ Iesu, “Datu-datu i duniáꞌ paka mopasimbuku tauna bona mampeuláꞌi hawaꞌraꞌ, hai rauliꞌ woꞌo kahirana miꞌi to mampeámpárái tauna to handaꞌ. 26Agáiáná kómu, ineeꞌkou noꞌonoꞌ! Rángina miꞌi tauna to i reá tueꞌna hangaa-ngaa mengkaiwóiꞌ, noꞌonoꞌ woꞌo tauna to mohawaꞌ hangaa-ngaa mewaliꞌ sieruꞌ nodo topekádipurá. 27Mewaliꞌ Kupekuneꞌ: heáná to tepaireá tueꞌna: tauna to mehoda-hoda mandeꞌ, ba tauna to merórá? Taisá miꞌi: i duniáꞌ deꞌe, to mahile tueꞌna ia miꞌi to mehoda-hoda. Agáiáná Kódóꞌ to mewaliꞌ pándiriꞌ i kómu láwiꞌ Kódóꞌ to mokádipurákou.

28NiporángáMoꞌ oaꞌ i upu-upu kamapáriNgkuꞌ, 29onoꞌ miꞌi haneꞌi Kuhángáꞌákou: nodo UmáNgkuꞌ mampoweꞌiAꞌ kuasaꞌ mepárentá, Kódóꞌ woꞌo mampoweꞌikou kuasaꞌ mepárentá, 30bona ina mandeꞌ hai mainukeꞌ hingkakani i mejáNgkuꞌ i lalu popárentáNgkuꞌ. Hai ina mehodakou woꞌo i pehodaꞌá kadatuá to hampuloꞌ hai rombuaꞌ mopárentá toSáráeliꞌ to hampuloꞌ hai rontina.”#22:30 toSáráeliꞌ to hampuloꞌ hai rontina: Babilaꞌ to natunggái Iesu ia miꞌi upu-upu tauna to mepoinálái, to peisá woꞌo rauliꞌ toSáráeliꞌ to woꞌu. Básá woꞌo Lukasi 13:29; Galatia 3:26-29.

Iesu mampolaluita kaꞌina mesápuákana Peturuꞌ

(Mat. 26:31-35; Mrk. 14:27-31; Ioh. 13:36-38)

31Roo onoꞌ, Iesu mampolaluitaꞌá Simoꞌ Peturuꞌ, Nauliꞌ, “Simoꞌ! Nupehádingi: Pueꞌ Ala mopatodáhi Datu Tokadake mokeloꞌkou upu-upu. Nodo pare to ratápiꞌi, ina napehukáꞌkou Datu Tokadake. 32Agáiáná Kupekakaeámokoꞌ#22:32 Bágóꞌna Iesu deꞌe-deꞌe mampekakaeá taunáNa (básá Roma 8:34) hai motangaꞌ-tangaꞌiheꞌ i lindoꞌna Pueꞌ Ala (básá Iberani 4:14-15; 7:25; 9:25). Simoꞌ, bona tiꞌara maledeꞌ pepoináláimu. Mewaliꞌ, ane menosoꞌmokoꞌ deiná hai mesuleꞌmokoꞌ i Kódóꞌ, hangaa-ngaa nupakaróhó laluraꞌ halalumu.”

33Nahániki Peturuꞌ, “Pueꞌ, kehapiꞌaꞌ ratarungku ba mate hingkakani hai Io, tiꞌaraKoꞌ ina kupálehi!”

34Nauliꞌ Iesu, “Peturuꞌ, toꞌu ntepuꞌu to Kuhángáꞌáꞌákoꞌ: alo deꞌe, hangko tiꞌara mani motuturuꞌuá manuꞌ, tálu miꞌi kánina nusápuákaꞌAꞌ.”

Dompeꞌ hai pihoꞌ

35Roo onoꞌ, Iesu mohángáꞌáheꞌ topeguruNa, “Iaꞌo, i kaKuhuoꞌmi lao moánti Ngkóráꞌ Marasa, tiꞌarakou Kupaliu moánti dóiꞌ ba tasi ba ropári sandale. I tempó iti, ba arai kamakuraꞌmi?”#22:35 Básá Lukasi 9:1-6; 10:3-4.

36Rahániki, “Tiꞌara ara.”

Nauliꞌ Iesu, “Agáiáná mantepuꞌu deꞌe-deꞌe, ane arai dóiꞌ ba tasi, hangaa-ngaa niánti. Hai ane tiꞌara ara pihoꞌmi, nipobaluꞌ kumbámi nipopehóló pihoꞌ,#22:36 To natunggái Iesu, hangaa-ngaa timamaheꞌ mantódihá kapári. Básá Epesu 6:10-18. 37láwiꞌ teukiꞌ miꞌi i lalu Sura Magasaꞌ node: ‘Ia ina rarekeꞌ tauna to kadake.’#22:37 Básá Iesaia 53:12. Hai apa to teukiꞌ deꞌe hangaa-ngaa mewaliꞌ i Kódóꞌ, láwiꞌ upu-upu to teukiꞌ i lalu Sura Magasaꞌ kana i Kódóꞌ, bateꞌna ina tebukeki.”

38Rauliꞌ topeguruNa, “Pueꞌ, demiꞌe pihoꞌ romata.”

Nahániki Iesu, “Gáná miꞌi.”

Iesu mekakae i Buluꞌ Saitu

(Mat. 26:36-46; Mrk. 14:32-42)

39Nodo biásáNa, Iesu pohuꞌ miꞌi hangko i kótá lao i Buluꞌ Saitu hingkakani hai topeguruNa. 40Kahaweꞌraꞌ ionoꞌ, Nahángáꞌáheꞌ, “Mekakaemokou bona tiꞌarakou molámbiꞌ pekeloꞌ.” 41Roo onoꞌ, Nakaraohimoheꞌ topeguruNa rekeꞌ-rekeꞌna tálu puloꞌna mete, haneꞌi molingkudu mekakae. 42Nauliꞌ, “UmáNgkuꞌ, ane peisái, Nupakaraoꞌ hangko i Kódóꞌ kapári to ina morampeAꞌ. Agáiáná tiꞌara peundeꞌáNgkuꞌ to ina mewaliꞌ, ngkáliꞌna riꞌi peundeꞌáMu Umaꞌ.” [ 43Roo onoꞌ, haweꞌ miꞌi hadua malaꞌeka hangko i surugáꞌ to mopakaróhó laluNa. 44Mapári ntepuꞌu Nahádi, onoꞌ miꞌi haneꞌi Ia mekakae hangko i laluNa ntepuꞌu, hai lolaNa mogalo waheꞌ, tudoꞌ i tampoꞌ.]#22:43-44 I surana Lukasi i lalu básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ. 45Roo mekakae, meángkáꞌ miꞌi Iesu haneꞌi mesuleꞌ lao i topeguruNa. Nahumbaheꞌ tangaꞌraꞌ letaꞌ láwiꞌ masusa ntepuꞌu laluraꞌ. 46Nahángáꞌáheꞌ, “Moapa riꞌi haneꞌi letaꞌ pekou? Pearó hai mekakaekou bona tiꞌarakou molámbiꞌ pekeloꞌ.”

Iesu rahakaꞌ

(Mat. 26:47-56; Mrk. 14:43-50; Ioh. 18:1-11)

47Tangaꞌna mani Iesu molaluita, hangkaꞌ-hangkaꞌ perái haweꞌmoheꞌ tauna to handaꞌ. Tauna iti naꞌántiheꞌ Iudasiꞌ, hadua hangko i topeguruna Iesu. Kahaweꞌraꞌ ionoꞌ, lao miꞌi Iudasiꞌ i Iesu, natabe hai naꞌángki. 48Agáiáná nauliꞌ Iesu, “Iudasiꞌ, moapa riꞌi haneꞌiAꞌ nuángki? Ba ina nuhuhuꞌ Ánáꞌ Mánusiá i ewáliNa?”

49Karaitána topeguruNa apa to ina mewaliꞌ, rauliꞌ, “Noumbá miꞌi Pueꞌ? Ba kiewaꞌheꞌ hai pihoꞌ?”

50Hadua hangko i oloꞌraꞌ topeguruna Iesu#22:50 hadua hangko i oloꞌraꞌ topeguruna Iesu: ia miꞌi Peturuꞌ. Básá Iohane 18:10. kásáliu mobutuꞌ pihoꞌna, motárási hadua hawiꞌna Tadulako Menómbá Mahile, agáiáná kana peá talinga kuánána hai mawehángi. 51Nauliꞌ Iesu, “Gáná miꞌi! Ineeꞌ!” hai Natibaaꞌ talingana tauna iti haneꞌi Napatakaꞌ huleꞌ.

52Roo onoꞌ, Iesu mohángáꞌáheꞌ kapalaꞌ-kapalaꞌ tadulako menómbá, topokámpái Támbina Pueꞌ Ala hai totosaeraꞌ toIahudiꞌ to ntániꞌna to lao mohakaꞌ, Nauliꞌ, “Moapa riꞌi haneꞌi maiAꞌ nihakaꞌ moántikou pihoꞌ hai pebóbáꞌ? Ba niuliꞌ ripaꞌi tauna to kadakeAꞌ noeneꞌ? 53Alo-alona araꞌAꞌ hingkakani hai kómu mepaturoꞌ i Támbina Pueꞌ Ala. Moapa riꞌi haneꞌi tiꞌaraꞌAꞌ nihakaꞌ i tempó iti? Agáiáná deꞌe miꞌi tempó to napakanótó ami Pueꞌ Ala, bona kómu hai Datu Tokadake mobábehi upu-upuna deꞌe i Kódóꞌ!”

Peturuꞌ mosápuáka peuláꞌna i Iesu

(Mat. 26:57-58,69-75; Mrk. 14:53-54,66-72; Ioh. 18:12-18,25-27)

54Hangko ionoꞌ, Iesu rahakaꞌ mpuꞌu miꞌi haneꞌi raꞌánti lao i támbina Tadulako Menómbá Mahile. Peturuꞌ meuláꞌ ngkaraoꞌ peá. 55I tangabaa támbi iti, araheꞌ bahangapa tauna to mopatueꞌ api rapenenei. Peturuꞌ lao miꞌi woꞌo mehoda hingkakani hai hira. 56Hadua towawine to mobágóꞌ i támbina Tadulako Menómbá Mahile mampelenggeꞌ Peturuꞌ tangaꞌna menene, haneꞌi nauliꞌ, “Tauna deꞌe ara hingkakani hai Iesu!”

57Nasápuáka Peturuꞌ, nauliꞌ, “Tiꞌara kuisá tauna iti!”

58Tiꞌara marue hangko ionoꞌ, hadua wopiꞌi moita Peturuꞌ, haneꞌi nakuneꞌ, “Io woꞌo hadua topeguruNa.”

Nasápuáka wopiꞌi Peturuꞌ, nauliꞌ, “Tiꞌara! Tiꞌara kódóꞌ!”

59Rekeꞌ-rekeꞌna hajaa hangko ionoꞌ, ara wopiꞌi hadua to manguliꞌ, “Kuisá ia woꞌo meuláꞌ i Iesu, láwiꞌ ia woꞌo toGalilea!”#22:59 Tongawaꞌ katoGalileana láwiꞌ polaluitana montaniꞌ.

60Nahániki Peturuꞌ, “Tiꞌara! Tiꞌara mpuꞌu kuisá apa to nuꞌuliꞌ iti!”

Tangaꞌna mani molaluita, motuturuꞌuá miꞌi manuꞌ, 61hai mehaileꞌ miꞌi Pueꞌ Iesu motótói Peturuꞌ. I tempó iti, nabuhinao miꞌi Peturuꞌ laluitana Pueꞌ Iesu to manguliꞌ, “Hangko tiꞌara mani motuturuꞌuá manuꞌ, tálu miꞌi kánimu ina mosápuákaꞌAꞌ.”#22:61 Básá Lukasi 22:34. 62I kanaisána Peturuꞌ apa to nabábehi, pohuꞌ miꞌi lao i rawa hai teriaꞌ láwiꞌ nahohoꞌ inaona.

Iesu rapakóiꞌ hai rapapahái

(Mat. 26:63-68; Mrk. 14:60-65; Ioh. 18:19-24)

63Roo onoꞌ, tauna to mokámpái Iesu#22:63 tauna to mokámpái Iesu: iamoheꞌ topokámpái Támbina Pueꞌ Ala. Hira toIahudiꞌ, tiꞌara toRoma. mopakóiꞌ hai mopapaháiheꞌ oaꞌ wátáNa. 64Rapiriꞌ mátáNa haneꞌi rahángáꞌá, “Ane toꞌu-toꞌu Io toMásehi, Nuꞌuliꞌ ba heánái to motampedaꞌKoꞌ!”#22:64 Rapiriꞌ mátáNa, haneꞌi rahángáꞌá,…: Rabábehi noꞌonoꞌ bona rapampeitai ba toꞌu-toꞌu tauna iti Datu Topehómpóꞌ ba tiꞌara. Pampehukáꞌ iti mentóáꞌ hangko i Iesaia 11:3. 65Haneꞌi ratitibei woꞌo hai mampopengaa laluita to kadake.

Iesu i lindoꞌna tadulako agama

66Kahalona mepulo-pulo,#22:66 Mouláꞌ áturáraꞌ toIahudiꞌ, tiꞌaraheꞌ peisá mopáresáꞌ hai mobutusi kara-kara tauna ane káindi. upu-upu kapalaꞌ tadulako menómbá, guru-guru agama, hai totosaeraꞌ toIahudiꞌ to ntániꞌna, hirámpuheꞌ i Támbi Pogómbóá Topepáresáꞌ Mahile Agama Iahudiꞌ,#22:66 Topepáresáꞌ Mahile Agama Iahudiꞌ - I lalu básá Indonesia: Mahkama Agama. Hira pitu puloꞌna hai isáꞌ totosae toIahudiꞌ to i reá ntepuꞌu, tepasuaꞌ toSaduki hai hangkani-hangkani toParisi. hai Iesu raꞌánti i lindoꞌraꞌ. 67Mekuneꞌheꞌ tadulako iti i Iesu, “Nuhángáꞌáꞌangkaiꞌ deꞌe-deꞌe, ba Io mpuꞌui Datu Topehómpóꞌ?”

Nahániki Iesu, “Kehapiꞌkou Kuhániki, bateꞌna tiꞌaraꞌAꞌ ina nipoinálái. 68Hai ane mekuneꞌAꞌ i kómu, bateꞌna tiꞌaraꞌAꞌ ina nihániki. 69Mewaliꞌ, deꞌe miꞌi pehániꞌKuꞌ: mantepuꞌu deꞌe-deꞌe, Ánáꞌ Mánusiá ina mehoda tándáꞌ i kuánána Pueꞌ Ala to Makuasaꞌ.”

70Rauliꞌ wopiꞌi upu-upu tadulako iti i Iesu, “Ba Ánáꞌna mpuꞌuKoꞌ Pueꞌ Ala?”

Nahániki Iesu, “Kómu haduduámi to manguliꞌ noꞌonoꞌ.”

71Hangko ionoꞌ, rauliꞌ miꞌi, “Tiꞌara piꞌi mobunduꞌ ara sabiꞌ! Tahádi miꞌi polaluitaNa haduduáNa to mopahibali wátáNa hai Pueꞌ Ala!”#22:71 To nauliꞌ Iesu, kaꞌIana miꞌi Ánáꞌ Mánusiá, lempóna, Ia miꞌi toMásehi ba Datu Topehómpóꞌ. Hai Nauliꞌ woꞌo, Ia to ina mehoda tándáꞌ i kuánána Pueꞌ Ala. Mouláꞌ toIahudiꞌ, Ia mopahibali wátáNa hai Pueꞌ Ala, onoꞌ miꞌi haneꞌi Ia hintotoꞌ rahuku mate. Básá Áturá Menómbá 24:16.

Currently Selected:

Lukasi 22: NTBEP

Highlight

Copy