Lukasi 21

Popenómbána hadua tobembaꞌ

(Mrk. 12:41-44)

1I lalu tangabaa Támbina Pueꞌ Ala, Iesu mampeita bahangapa tauna to pebuku mopusaꞌ dóiꞌraꞌ to handaꞌ i lalu petiꞌ pemboliá dóiꞌ popenómbá. 2Naita miꞌi woꞌo hadua towawine to bembaꞌ to meahiahiꞌ tueꞌna, mopusaꞌ popenómbána, ia miꞌi rompepaꞌ dóiꞌ tembaga to hantóiꞌ ntepuꞌu imbaꞌna. 3Nauliꞌ Iesu, “Toꞌu ntepuꞌu to Kuhángáꞌákou: tobembaꞌ to meahiahiꞌ tueꞌna iti, melumbuꞌ popenómbána haneꞌi popenómbá to rahuhuꞌ upu-upu tauna ntániꞌna. 4Hira mampeweꞌiheꞌ hangko i pelábiána dóiꞌraꞌ, agáiáná towawine iti, kehapiꞌ meahiahiꞌ tueꞌna, ia mampeweꞌi upu-upu to ara i hia to naparaluu woia i lalu katueꞌna alo-alona.”

Kaꞌina magerona Támbina Pueꞌ Ala

(Mat. 24:1-2; Mrk. 13:1-2)

5Roo onoꞌ, ara bahangapa topeguruNa to mohángáꞌá Iesu, rauliꞌ, “Maroꞌa ntepuꞌu Támbina Pueꞌ Ala deꞌe, láwiꞌ rabungaꞌ-bungaꞌi hai watu-watu to mababe hai párewá to rapopenómbá i Pueꞌ Ala.”

Mewaliꞌ nauliꞌ Iesu, 6“Kuhángáꞌákou: ina haweꞌ tempóna, upu-upu to niꞌita i Támbina Pueꞌ Ala deꞌe ina magero, hai tiꞌara piꞌi ina ara haweꞌ hambuaꞌ watu to mentárá i katoroꞌána, bateꞌna ina ragero upu-upu.”#21:6 Támbina Pueꞌ Ala ragero rekeꞌ-rekeꞌna iba puloꞌna parena hangko ionoꞌ, pare pitu puloꞌna roo karapoánákana Iesu (70M).

Kapári hai pepopeahiahiꞌ

(Mat. 24:3-14; Mrk. 13:3-13)

7Hangko ionoꞌ, topeguruNa Iesu mekuneꞌmoheꞌ i Hia, rauliꞌ, “Guru, impirá pewaliꞌána to Nuꞌuliꞌ ininá? Hai tandaꞌ apa to ina mewaliꞌ ane haweꞌ miꞌi tempó pewaliꞌána?”

8Nauliꞌ Iesu, “Maingáꞌ-ingáꞌkou, bona tiꞌarakou rapakanawoꞌ, láwiꞌ handaꞌ tauna ina haweꞌ hai ina mokábeláiheꞌ hangaꞌKuꞌ. Ina rauliꞌ kahirana mpuꞌu Datu Topehómpóꞌ. Araheꞌ woꞌo to ina manguliꞌ kahaweꞌna miꞌi kahópóꞌána duniáꞌ. Agáiáná ineeꞌheꞌ nipoinálái. 9Ane mohádikou bámbári pombeala, ineeꞌkou malááꞌ, láwiꞌ upu-upuna iti hangaa-ngaa mewaliꞌ sieruꞌ, agáiáná tiꞌara mani haweꞌ kahópóꞌána duniáꞌ.”

10Hangko ionoꞌ, napaliliu miꞌi Iesu laluitaNa, Nauliꞌ, “I tempó iti, tampoꞌ ina mombeala hai tampoꞌ ntániꞌna, hai kadatuá ina moewaꞌ kadatuá ntániꞌna. 11Iumbá-umbá peá ina ara rimi, linu to rumihi, hai hakiꞌ to humalele. Hai i langiꞌ bateꞌna ina ara tandaꞌ to meriringkuꞌi. 12Agáiáná hangko tiꞌara mani upu-upu iti mewaliꞌ, ina rahakaꞌkou hai rapopeahiahiꞌkou. Ina rasalaꞌikou i lalu támbi penómbáꞌá, hai ina ratarungkukou. Ina rahuhuꞌkou i datu hai i topopárentá ánti peuláꞌmi i Kódóꞌ. 13I tempó iti, ina raweꞌikou lógá mopahaweꞌáheꞌ kana i pepoináláimi i Kódóꞌ. 14Hangaa-ngaa nipakaróhó lalumi, hai ineeꞌkou malááꞌ ba noumbá pehániꞌmi, 15láwiꞌ Kódóꞌ haduduáNgkuꞌ to ina mopakanótóákou apa to hintotoꞌ ntepuꞌu ina nipopohánikiheꞌ, álána mapánde ntepuꞌukou. Onoꞌ miꞌi haneꞌi tiꞌara ina rabuku ewálimi mosápuáka apa to niuliꞌ. 16I tempó iti, kómu ina rapehuhuꞌákou i ewálimi. Ina rapobaluꞌkou tosaemi, halalumi, hantámbiámi, hai rángámi, hai arakou woꞌo to ina rapapate. 17Ánti peuláꞌmi i Kódóꞌ, ina rakáhihiꞌkou upu-upu tauna. 18Agáiáná kehapiꞌ noꞌonoꞌ, Pueꞌ Ala ina mokámpáikou duuꞌna i rue-ruena.#21:18 I lalu básá Iunani: Mogalo riꞌi hangkau weluáꞌmi, tiꞌara ara to ina matántá. 19Onoꞌ miꞌi haneꞌi hangaa-ngaa nipakaróhó pepoináláimi, bona peisákou mantaha i lalu kapári, hai ina molámbiꞌkou katueꞌ to maroꞌa to tiꞌara mokahópóꞌá.”

Iesu mampolaluita kamagerona kótá Ierusale

(Mat. 24:15-21; Mrk. 13:14-19)

20Iesu mopaliliu wopiꞌi laluitaNa, Nauliꞌ, “Ane niꞌita surudadoꞌraꞌ ewálimi motolelingi kótá Ierusale deꞌe, ina niꞌisá katiꞌárána piꞌi marue Ierusale ina ragero. 21I tempó iti, tauna to toroꞌ i tampoꞌ Iudá, rángina miꞌi melangkaheꞌ lao i buluꞌ. Tauna to toroꞌ i kótá, rángina miꞌi melangkaheꞌ mopálehi kótá. Hai tauna to ara i rawa kótá, ineeꞌheꞌ mesuaꞌ i kótá, 22láwiꞌ i alo-alo iti, ina mewaliꞌ tempó pehukuána Pueꞌ Ala, bona tebukeki miꞌi upu-upu to teukiꞌ i lalu Sura Magasaꞌ. 23Ina mapári ntepuꞌu pehádiraꞌ towawine to tangaꞌraꞌ morodua ba mopahuhu ánáꞌraꞌ, láwiꞌ i tempó iti tauna ina narampe kapári hai pehukuna Pueꞌ Ala to rumihi ntepuꞌu. 24Araheꞌ toIerusale to ina rapapate hai pihoꞌ. Araheꞌ woꞌo to ina ratawani hai rahawuꞌ-hawuꞌheꞌ iumbá-umbá peá i humalele duniáꞌ. Hai kótá Ierusale deꞌe ina ranangi#21:24 kótá Ierusale deꞌe ina ranangi: Mouláꞌ Iosepu, hadua tauna to moukiꞌ daritakáná toIahudiꞌ, tempóraꞌ toRoma mombeala hai toIahudiꞌ, hajuta lábi toIahudiꞌ rapapate hai hangatu sáburaꞌ rapohawiꞌ. hai rakuasaꞌi tauna to tiꞌara toIahudiꞌ duuꞌna hópóꞌ tempó to napakanótó Pueꞌ Ala.”

Kaꞌina haweꞌna huleꞌ Ánáꞌ Mánusiá

(Mat. 24:29-35; Mrk. 13:24-31)

25“Ina ara tandaꞌ-tandaꞌ to metingkáráki to mewaliꞌ i wulá, alo, hai betue. Upu-upu tauna i duniáꞌ ina malááꞌ hai wuliheꞌ moita tahiꞌ to meriringkuꞌi hai mohádi pewoona bálumbá. 26Araheꞌ tauna to ina malimpu ánti kamalááꞌraꞌ moita upu-upu to pewaliꞌ i humalele duniáꞌ, láwiꞌ upu-upu to ara i langiꞌ ina moenggo. 27I tempó iti, tauna ina moita Ánáꞌ Mánusiá mendáulu mai napótóꞌ gawu. Ina tongawaꞌ ntepuꞌu kuasaꞌNa hai peawaꞌna tueꞌNa. 28Ane niꞌita pantepuꞌuána tandaꞌ-tandaꞌ deꞌe, nipakaróhó lalumi hai mengoaꞌmokou, láwiꞌ hungkuꞌ miꞌi tempóna ina tekábáhákou hangko i kapárimi.”

Ngkóráꞌ pándiriꞌ kana i tandaꞌ

29Iesu mopahaweꞌ ngkóráꞌ pándiriꞌ deꞌe i topeguruNaheꞌ, Nauliꞌ, “Hangaa-ngaa nipailalu paturoꞌKuꞌ deꞌe mokana i katueꞌna kau: 30Ane moitakou kau mohehe, niꞌisá kaꞌina mowuaꞌna. 31Noꞌonoꞌ woꞌo, ane niꞌita upu-upu to Kuhángáꞌákou ininá, niꞌisá kaꞌina haweꞌna miꞌi popárentána Pueꞌ Ala i duniáꞌ.

32Toꞌu ntepuꞌu to Kuhángáꞌákou: upu-upu to Kuꞌuliꞌ ininá, bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe. 33Langiꞌ hai duniáꞌ hai upu-upu óntóꞌna ina magero hai tiꞌara piꞌi ina ara, agáiáná laluitaNgkuꞌ bateꞌna ina ara oaꞌ haweꞌ i rue-ruena.”

Hangaa-ngaa maingáꞌ-ingáꞌkeꞌ

34“Maingáꞌ-ingáꞌkou, bona tiꞌarakou mosusa-susa hai malangu-langu oaꞌ. Maingáꞌ-ingáꞌkou, bona tiꞌarakou mampepekiri oaꞌ katueꞌmi i duniáꞌ deꞌe, álána mampomaleꞌakou. 35Láwiꞌ alo kahaweꞌána huleꞌ Ánáꞌ Mánusiá#21:34-35 Básá wátiꞌna ka-27. hangkaꞌ-hangkaꞌ perái ina haweꞌ, hai ina rapotingkáráꞌ tauna i humalele duniáꞌ to tiꞌara timama.#21:34-35 I lalu básá Iunani: KahaweꞌKuꞌ huleꞌ peisá rapándiriꞌ nodo tilobuꞌ to mopakanawoꞌ tauna to mampomáleꞌá. 36Mewaliꞌ, hangaa-ngaa timamakou oaꞌ. Mekakaekou i Pueꞌ Ala, bona kehapiꞌ narampekou kapári, ina maróhókou oaꞌ i pepoináláimi. Ane noꞌonoꞌi, i alo kahópóꞌána duniáꞌ, peisákou meángkáꞌ i lindoꞌna Ánáꞌ Mánusiá láwiꞌ tiꞌarakou paraluu mahili.”

37Ane mabaa, Iesu mepaturoꞌ i tangabaa Támbina Pueꞌ Ala. Ane káindi, Ia lao hambengi i rawa kótá i Buluꞌ Saitu. 38Mepulo-pulo, handaꞌ tauna hirámpu i tangabaa Támbina Pueꞌ Ala bona mampehádingi paturoꞌNa.

Currently Selected:

Lukasi 21: NTBEP

Highlight

Copy