Iohane 20
20
Iesu tueꞌ huleꞌ
(Mat. 28:1-10; Mrk. 16:1-8; Luk. 24:1-12)
1Mebabaeaꞌ i alo Minggu, Maria toMadalena lao i popatawuá. Haweꞌ ionoꞌ, ia moita watu petuko babaꞌ popatawuá tegesuꞌ miꞌi. 2Mewaliꞌ, ia melangka lao i Simoꞌ Peturuꞌ hai hadua topeguruna Iesu to Napokaꞌahiꞌ ntepuꞌu, nahángáꞌáheꞌ Maria, “Wátámandoꞌna Pueꞌ raꞌala miꞌi hangko i popatawuáNa, hai tiꞌara kiꞌisá kaꞌiumbáꞌána rawoli!”
3Mewaliꞌ lao mpuꞌumoheꞌ Peturuꞌ hai hadua rángána iti i popatawuá. 4Hira iti melangkaheꞌ hingkakani, agáiáná melumbuꞌ kamagásiꞌna topeguruna Iesu to ntániꞌna haneꞌi Peturuꞌ, onoꞌ miꞌi haneꞌi ioru haweꞌ i popatawuá, 5agáiáná ia tiꞌara sieruꞌ mesuaꞌ i lalu, napeloga peá. Ia moita báná to rapopobungkuhi Iesu aranto ionoꞌ. 6Roo onoꞌ, haweꞌ miꞌi Simoꞌ Peturuꞌ hai kásáliu mesuaꞌ. Ia woꞌo moita miꞌi báná popobungkuhina Iesu, 7agáiáná báná to rapopowewehi wuáꞌNa, tepilóló hai tepataniꞌ hangko i báná to ntániꞌna.#20:7 Ara lempóna to kaladu ntepuꞌu: ina mesuleꞌ huleꞌ Iesu! 8I pesuaꞌna Peturuꞌ i lalu popatawuá, topeguruna Iesu to ioru haweꞌ, mesuaꞌ woꞌo. Kanaitána apa to ara i lalu popatawuá iti, napoinálái katueꞌna miꞌi huleꞌ Iesu. 9Duuꞌna haweꞌ i alo iti, tiꞌara maniheꞌ moisá lempóna apa to teukiꞌ hangkoia i lalu Sura Magasaꞌ to mopakanótó kaꞌina tueꞌna huleꞌ Iesu hangko i kapate.#20:9 Básá Sura Petóiá 16:10-11; Iesaia 53:10-11; Hosea 6:2. 10Roo onoꞌ, mesuleꞌmoheꞌ lao i támbiraꞌ.
Iesu mopatongawaꞌ wátáNa i Maria toMadalena
11Maria toMadalena meángkáꞌ i rawa popatawuá, teriaꞌ oaꞌ. Tangaꞌna teriaꞌ, ia meloga i lalu popatawuá 12hai moita rodua malaꞌeka to mebadu to bulá, mehodaheꞌ i karawoliána wátámandoꞌna Iesu hangkoia, hadua tándáꞌ i wuáꞌNa, hai hadua tándáꞌ i bitiNa. 13Mekuneꞌheꞌ malaꞌeka iti i Maria, rauliꞌ, “Inaꞌ, apa riꞌi to nuteriahi?”
Nahániki Maria, “Wátámandoꞌna Pueꞌkuꞌ raꞌala miꞌi hangko ieneꞌ, hai tiꞌara kuisá kaꞌiumbáꞌána rawoli.”
14Hangko ionoꞌ, mehaileꞌ miꞌi Maria hai moita Iesu meángkáꞌ i taleuꞌna, agáiáná tiꞌara naisá kaꞌIesuna. 15Mekuneꞌ miꞌi Iesu i hia, “Inaꞌ, apa riꞌi to nuteriahi? Heáná to nupeliꞌ?”
Nauliꞌ ripaꞌi Maria tauna iti topokádipurá hinoe, onoꞌ miꞌi haneꞌi nahángáꞌá, “Tuá, ane Io to moala wátámandoꞌNa, Nutudeꞌáꞌáꞌaꞌ iumbá kaNuwoliána. Ina lao kuala {bona ratawu maroꞌa}.”
16Nauliꞌ Iesu, “Maria.”
Mehaileꞌ miꞌi Maria i Iesu haneꞌi molaluita i lalu básá Iberani, “Rabuni!” Lempóna, “Guru.”
17Nauliꞌ Iesu i Maria, “IneeꞌAꞌ nutibaaꞌ, láwiꞌ tiꞌara maniAꞌ mesuleꞌ lao i UmáNgkuꞌ. Laomokoꞌ i halaluNgkuꞌ, nuhángáꞌáꞌáheꞌ kaꞌina laoNgkuꞌ i UmáNgkuꞌ hai Umámi woꞌo, Pueꞌ AlaNgkuꞌ hai Pueꞌ Alami woꞌo.”
18Lao miꞌi Maria toMadalena mampohidupaꞌáheꞌ topeguruna Iesu, haneꞌi nauliꞌ, “Kuita miꞌi Pueꞌ ininá!” hai napahaweꞌáheꞌ woꞌo upu-upu to nauliꞌ Iesu.
Iesu mopatongawaꞌ wátáNa i topeguruNaheꞌ
(Luk. 24:36-39,47-49)
19Káindina i alo Minggu iti, topegurunaheꞌ Iesu hirámpu i támbi to tegili babaꞌna, láwiꞌ mampokalááꞌheꞌ tadulakoraꞌ toIahudiꞌ. Hangkaꞌ-hangkaꞌ perái Iesu haweꞌ, meángkáꞌ i tangaꞌraꞌ hai Natabeheꞌ, Nauliꞌ, “Katinda lalu haweꞌ i kómu.” 20Roo onoꞌ, Natudeꞌáꞌámoheꞌ taeNa hai lompeNa. Góeꞌ ntepuꞌu laluraꞌ moita Pueꞌraꞌ. 21Nauliꞌ wopiꞌi Iesu, “Katinda lalu haweꞌ i kómu. Nodo UmáNgkuꞌ mohuoꞌAꞌ mai, noꞌonoꞌ woꞌo Kódóꞌ mohuoꞌkou.” 22Roo onoꞌ, Natawueꞌámoheꞌ inaoNa haneꞌi Nauliꞌ, “Nitarima miꞌi Inao to Magasaꞌ. 23Heáná to niámpungi dósána, teámpungi miꞌi dósána. Heáná to tiꞌara niámpungi dósána, Pueꞌ Ala woꞌo tiꞌara moámpungi.”
Iesu mopatongawaꞌ wátáNa i Tómá
24Tómá to rauliꞌ woꞌo Didimu, lempóna Toporopaꞌ, hadua hangko i topeguruna Iesu to hampuloꞌ hai rodua, tiꞌara ara hingkakani hai hira i popatongawaꞌna Iesu rungu-runguna. 25Onoꞌ miꞌi haneꞌi rahángáꞌá, “Tómá, kiꞌita miꞌi Pueꞌ!”
Agáiáná nauliꞌ Tómá, “Ane tiꞌara mani kuita pepakuꞌá i taeNa hai kupetóbóꞌ to rapakuꞌna iti, hai ane tiꞌara mani kupereraꞌ to ratohuꞌ i lompeNa, bateꞌna tiꞌara kupoinálái.”
26Haminggu hangko ionoꞌ, hirámpu wopaheꞌ i lalu támbi iti. I tempó iti, Tómá ara miꞌi hingkakani hai hira. Ragili miꞌi upu-upu babaꞌ, agáiáná hangkaꞌ-hangkaꞌ perái Iesu meángkáꞌ i tangaꞌraꞌ, Nahángáꞌáheꞌ, “Katinda lalu haweꞌ i kómu.” 27Roo onoꞌ, Ia mohángáꞌá Tómá, “Nupeita miꞌi taeNgkuꞌ hai nupetóbóꞌ popakuꞌána. Nupereraꞌ miꞌi woꞌo petohuꞌá to i lompeNgkuꞌ hai ineeꞌ miꞌi bata-bata lalumu. Mepoináláimokoꞌ, láwiꞌ tueꞌMoꞌ huleꞌ!”
28Nauliꞌ Tómá, “Io miꞌi Pueꞌkuꞌ hai Pueꞌ Alangkuꞌ!”
29Nauliꞌ Iesu i Tómá, “Mepoináláimokoꞌ láwiꞌ nuitaMoꞌ. Morasiꞌheꞌ tauna to mepoinálái i Kódóꞌ, kehapiꞌ tiꞌaraꞌAꞌ raita.”
Tunggáiána sura deꞌe
30Katoꞌuána handaꞌ mani tandaꞌ kuasaꞌ to nabábehi Iesu
to raita mata topeguruNa
to tiꞌara teukiꞌ i lalu sura deꞌe.
31Agáiáná upu-upu to kuꞌukiꞌ deꞌe,
kuꞌukiꞌ bona nipoinálái kaꞌIesuna Datu Topehómpóꞌ,
Ánáꞌna Pueꞌ Ala,
hai bona ánti pepoináláimi i Hia,
ina molámbiꞌkou katueꞌ to maroꞌa to tiꞌara mokahópóꞌá.
Currently Selected:
Iohane 20: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
