Iohane 14
14
Iesu Ia miꞌi rárá lao i Pueꞌ Ala
1Iesu mopaliliu wopiꞌi laluitaNa i topeguruNaheꞌ, Nauliꞌ, “Ineeꞌ karaoꞌ inaomi! Mepoináláimokou i Pueꞌ Ala, hai mepoináláimokou woꞌo i Kódóꞌ. 2I támbina UmáNgkuꞌ, handaꞌ katoroꞌá. Ane ketiꞌarai noꞌonoꞌ, ketiꞌarakou ina Kuhángáꞌá. Ina laoAꞌ mopatimamaꞌákou katoroꞌámi. 3Ane upu miꞌi Kupatimama katoroꞌámi, ina mesuleꞌ wopaꞌAꞌ maikou Kuala, hai ina Kuántikou i katoroꞌáNgkuꞌ, bona iumbá peá kaꞌaraꞌáNgkuꞌ, ionoꞌkou woꞌo hingkakani hai Kódóꞌ.#14:3 Laluitana Iesu deꞌe hibali hai apa to nauliꞌ tobaleilo i towawine to ina mewaliꞌ toinána. Tobaleilo hangaa-ngaa mopatimama sieruꞌ támbi to ina rakatoroꞌi. Ane timama miꞌi hangko lao riꞌi moala towawine napohambokoá. 4Kómu, niꞌisá miꞌi iumbá rárá lao i katoroꞌáNgkuꞌ.”
5Nauliꞌ Tómá, “Pueꞌ, tiꞌara wongkaiꞌkaa moisá iumbá kalaoáMu. Mewaliꞌ, noumbá kakiꞌisáꞌána rárána?”
6Nauliꞌ Iesu, “Kódóꞌ miꞌi deꞌe rárá lao i surugáꞌ,
Kódóꞌ miꞌi deꞌe to mopakanótóákou apa to toꞌu mokana i Pueꞌ Ala,
hai Kódóꞌ miꞌi deꞌe to mampoweꞌikou katueꞌ to maroꞌa to tiꞌara mokahópóꞌá.
Tiꞌara ara haweꞌ hadua to peisá haweꞌ i UmáNgkuꞌ, ane tiꞌara moliu i Kódóꞌ. 7Ane niꞌisáꞌAꞌ, niꞌisá woꞌo UmáNgkuꞌ. Mantepuꞌu deꞌe-deꞌe, niꞌisá miꞌi hai nodomokou woꞌo moita Pueꞌ Ala.”
8Nauliꞌ Pilipu, “Pueꞌ, Nutudeꞌáꞌangkaiꞌ UmáMu. Iti peá to kipembiáꞌ.”
9Nauliꞌ Iesu, “Pilipu, tiꞌara maniAꞌ paꞌi nuisá? Maruemokeꞌ hingkakani! Heáná to moitaꞌAꞌ, hibali miꞌi woꞌo moita UmáNgkuꞌ. Mewaliꞌ, moapa riꞌi haneꞌi nupembiáꞌ mani bona Kutudeꞌákou UmáNgkuꞌ? 10Ba tiꞌara mani nupoinálái kamohintuwuꞌKuꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ? Apa to Kuhángáꞌákou deꞌe, tiꞌara Kuꞌuliꞌ mouláꞌ peundeꞌáNgkuꞌ haduduáNgkuꞌ, agáiáná laluitaNgkuꞌ mentóáꞌ hangko i UmáNgkuꞌ to mohintuwuꞌ hai Kódóꞌ. Ia miꞌi pentóáꞌána kuasaꞌ, haneꞌi Kubuku mampopolumao bágóꞌNa. 11Mepoináláimokou i Kódóꞌ láwiꞌ mohintuwuꞌAꞌ hai UmáNgkuꞌ, hai UmáNgkuꞌ mohintuwuꞌ hai Kódóꞌ. Ane tiꞌarakou peisá mampoinálái apa to Kuꞌuliꞌ iti, hangaa-ngaa mepoináláikou i Kódóꞌ, láwiꞌ niꞌita miꞌi upu-upu to Kubábehi.
12Toꞌu ntepuꞌu laluitaNgkuꞌ deꞌe: tauna to mepoinálái i Kódóꞌ, peisáheꞌ mobábehi nodo to Kubábehi, ba melumbuꞌ riꞌi hangko i to Kubábehi,#14:12 Babilaꞌ to natunggái Iesu ia miꞌi mopaturoꞌ tauna i humalele duniáꞌ mokana i pepoinálái hai rárá mohintuwuꞌ hai Pueꞌ Ala. Iti peisá mewaliꞌ láwiꞌ Iesu mesuleꞌ miꞌi lao i surugáꞌ hai mohuoꞌ mai Inao to Magasaꞌ. Deꞌe-deꞌe Inao to Magasaꞌ to mokale i laluna tauna hai mampoweꞌiheꞌ kuasaꞌ mampopolumao bágóꞌna Pueꞌ Ala. Básá Iohane 14:16-17,26; 15:26; 16:13. láwiꞌ ina laoAꞌ toroꞌ hingkakani hai UmáNgkuꞌ. 13Hai apa peá to nipembiáꞌ i lalu hangaꞌKuꞌ, ina Kuweꞌikou bona UmáNgkuꞌ rapomahile ánti kaKódóꞌna. 14Apa peá to nipembiáꞌ i lalu hangaꞌKuꞌ, bateꞌna ina Kubábehi.”
Iesu modándi kaꞌina Naweꞌiraꞌ Inao to Magasaꞌ
15Iesu mopaliliu laluitana, Nauliꞌ, “Ane nipokaꞌahiꞌAꞌ, ina nipeuláꞌi hawaꞌKuꞌ. 16Hai ina Kupembiáꞌ i UmáNgkuꞌ, bona Naweꞌikou hadua Topetulungi to ntániꞌna, bona Ia mamporángákou oaꞌ duuꞌna i rue-ruena. 17Topetulungi iti, Ia miꞌi Inaona Pueꞌ Ala to ina moteteꞌkou i paturoꞌ to toꞌu. Tauna to tiꞌara mepoinálái, tiꞌaraheꞌ peisá motarima Inaona Pueꞌ Ala, láwiꞌ tiꞌaraheꞌ moisá hai mohádiá pokalena Inaona Pueꞌ Ala. Agáiáná kómu, niꞌisá miꞌi, láwiꞌ Naporángákou deꞌe-deꞌe, hai Ia ina ara oaꞌ i lalumi.
18I tempóNgkuꞌ pohuꞌ, tiꞌarakou ina Kupálehi nodo ánángkóiꞌ to ilu. Ina mesuleꞌ wopaꞌAꞌ mai i kómu moliu Inao to Magasaꞌ. 19Tiꞌara piꞌi marue, tiꞌaraPoꞌ ina raita tauna i duniáꞌ. Agáiáná kómu, ina niꞌitaꞌAꞌ, hai ánti katueꞌKuꞌ ina tueꞌkou woꞌo haweꞌ i rue-ruena. 20Ane haweꞌ tempó iti, ina niꞌisá Kódóꞌ mohintuwuꞌ hai UmáNgkuꞌ, kómu ina mohintuwuꞌ hai Kódóꞌ, hai Kódóꞌ ina mohintuwuꞌ hai kómu.
21Tauna to motarima hai mampeuláꞌi hawaꞌKuꞌ, hira miꞌi to mampokaꞌahiꞌAꞌ. UmáNgkuꞌ ina mampokaꞌahiꞌ tauna to mampokaꞌahiꞌAꞌ, hai Kódóꞌ woꞌo ina mampokaꞌahiꞌheꞌ, hai ina Kupatongawaꞌáheꞌ kaheánáNgkuꞌ.”
22Iudasiꞌ, tiꞌara Iudasiꞌ Isikarioꞌ, mekuneꞌ i Iesu, “Pueꞌ, noumbá haneꞌi ina Nupatongawaꞌ kaheánáMu i kaiꞌ peá, hai tiꞌara i upu-upu tauna to ara i duniáꞌ?”#14:22 Babilaꞌ to rapekiri topeguruna Iesu, Ia ina mesuaꞌ i Ierusale haneꞌi mewaliꞌ datu i upu-upuna.
23Nauliꞌ Iesu, “Tauna to mampokaꞌahiꞌAꞌ hai mampeuláꞌi laluitaNgkuꞌ, hira miꞌi to napokaꞌahiꞌ UmáNgkuꞌ. UmáNgkuꞌ hai Kódóꞌ ina maiaNgkaiꞌ i hira hai toroꞌ hingkakani hai hira.#14:23 Hangkoia nábiꞌna Pueꞌ Ala manguliꞌ ina haweꞌ tempóna Pueꞌ Ala ina toroꞌ hingkakani hai tauna. (Básá Iesaia 57:15, Ieheskie 37:26-28; Sakaria 2:10.) I wátiꞌ deꞌe taisá hantódiꞌ apa to ratunggái láwiꞌ ina mewaliꞌ mpuꞌu i surugáꞌ. (Básá Pampetudeꞌá 21:3; 1 Iohane 4:12,16.) 24Tauna to tiꞌara mampokaꞌahiꞌAꞌ, tiꞌaraheꞌ mampeuláꞌi laluitaNgkuꞌ. Laluita to nihádi hangko i Kódóꞌ, katoꞌuána tiꞌara hangko i Kódóꞌ, ngkáliꞌna riꞌi hangko i UmáNgkuꞌ to mohuoꞌAꞌ mai.
25Upu-upu deꞌe Kuhángáꞌáꞌákou i tempóNgkuꞌ mani ieneꞌ hingkakani hai kómu. 26Agáiáná ane haweꞌ miꞌi Inao to Magasaꞌ, Ia ina mopaturoꞌákou upu-upuna, hai ina Napopambuhinaoákou upu-upu to Kuhángáꞌámokou, láwiꞌ Ia miꞌi Topetulungi to ina nahuoꞌ mai UmáNgkuꞌ mopaháwángiAꞌ.
27Katinda lalu Kuwoliákou. Katinda lalu hangko i Kódóꞌ, iti miꞌi to Kuweꞌikou.#14:27 Katinda lalu: Lempóna laluitana Iesu deꞌe ia miꞌi podame to mewaliꞌ i tauna hai Pueꞌ Ala, bona peisáheꞌ mohintuwuꞌ. Katinda lalu deꞌe mewaliꞌ ane dósáraꞌ tauna naꞌámpungi miꞌi Pueꞌ Ala. Básá Poimbaꞌ 6:26; Sura Petóiá 29:11; Iesaia 9:6-7 hai Ieheskie 37:26. Básá woꞌo Suro 10:36 hai Roma 5:1. To Kuweꞌikou deꞌe, tiꞌara nodo to nilámbiꞌ hangko i duniáꞌ. Ineeꞌ karaoꞌ inaomi, hai ineeꞌkou malááꞌ. 28Nihádi miꞌi laluitaNgkuꞌ ininá to manguliꞌ: ‘Ina pohuꞌAꞌ, agáiáná ina mesuleꞌ wopaꞌAꞌ mai i kómu.’ Ane kenipokaꞌahiꞌ ntepuꞌuAꞌ, kehangaa-ngaa góeꞌkou láwiꞌ ina mesuleꞌAꞌ lao i UmáNgkuꞌ, láwiꞌ melumbuꞌ peawaꞌna UmáNgkuꞌ i surugáꞌ hangko i Kódóꞌ deꞌe-deꞌe i duniáꞌ. 29Kuhángáꞌámokou ami hangko tiꞌara mani mewaliꞌ, bona ane mewaliꞌ miꞌi, ina nipoinálái.
30Tiꞌara piꞌi handaꞌ tempóNgkuꞌ molaluita hai kómu, láwiꞌ ina haweꞌ miꞌi Datu Tokadake. Ia miꞌi to mokuasaꞌi duniáꞌ deꞌe, kehapiꞌ tiꞌara ara kuasaꞌna i Kódóꞌ. 31Upu-upuna iti hangaa-ngaa mewaliꞌ, bona upu-upu tauna ina moisá kaKupokaꞌahiꞌna UmáNgkuꞌ hai kaKupeuláꞌina upu-upu to NahawaꞌáꞌAꞌ.
Meángkáꞌmokou, pohuꞌmokeꞌ hangko ieneꞌ.”
Currently Selected:
Iohane 14: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
