Surona Pueꞌ Iesu 2

Noumbá rárána tauna i Ierusale mantepuꞌu mepoinálái i Iesu (2:1–6:7)

Pendáuluna Inao to Magasaꞌ

1Haweꞌ miꞌi tempó alo posusáraꞌ toIahudiꞌ to rahangaꞌ Alo Pentakosta,#2:1 Alo Pentakosta: Posusa mahile toIahudiꞌ deꞌe mewaliꞌ lima puloꞌna alona hangko i Posusa Rótiꞌ to Tiꞌara Raragiꞌi, tempóna Iesu woꞌo rapapate nodo dimbá to rasambale. Pentakosta i lalu básá Iunani, lempóna “to kalima puloꞌna”. Básá Áturá Menómbá 23:15. Deꞌe-deꞌe rahangaꞌ woꞌo Alo Pendáuluána Inao to Magasaꞌ. I Pototowiá to Sae rauliꞌ woꞌo Posusa Minggu (Pesuwuꞌá 34:22) hai Posusa Pandeꞌ Pare (Pesuwuꞌá 23:16; Áturá Menómbá 23:15-21). I sábuna toIahudiꞌ ina lao i kótá Ierusale bona peisáheꞌ mosusa hingkakani. upu-upu tauna to mepoinálái i Iesu hirámpu i hambuaꞌ katoroꞌá. 2Iaperái rahádi to nodo wui to rumihi hangko i langiꞌ. Pokániꞌ iti rahádi i humalele támbi kahirámpuáraꞌ.#2:2 támbi kahirámpuáraꞌ: Babilaꞌ támbi to ratunggái deꞌe ia miꞌi Támbina Pueꞌ Ala, láwiꞌ mahile hai ara woꞌo handaꞌ pembahoꞌá i rawana bona tauna peisá rariu. 3Hai moitaheꞌ roreꞌ api#2:3 api: Iti mopándiriꞌ kaꞌárána Pueꞌ Ala ionoꞌ. Rápáꞌna, básá Pewaliꞌána 15:17; Pesuwuꞌá 3:2-5; 13:21-22; 19:18; 40:38. to nodo lilaꞌ, mendele hai mengkatóá i tutuꞌraꞌ hadua-hadua. 4Roo onoꞌ, upu-upu tauna iti nakuasaꞌimoheꞌ Inao to Magasaꞌ, haneꞌi mantepuꞌuheꞌ molaluita i lalu handaꞌ pákáꞌna básá to tiꞌara raisá, mouláꞌ apa to napakanótóáheꞌ Inao to Magasaꞌ.

5I tempó iti, handaꞌheꞌ woꞌo toIahudiꞌ hangko i tampoꞌ ntániꞌna to toroꞌ i Ierusale. Upu-upuheꞌ mengkoruꞌ i Pueꞌ Ala. 6Karahádina iti pokániꞌ to nodo wui ininá, handaꞌ tauna to lao meromu láwiꞌ wuliheꞌ mohádi surona Pueꞌ Iesu molaluita i lalu básáraꞌ tauna ntániꞌna. 7Tingkáráꞌ ntepuꞌuheꞌ, rauliꞌ, “Apa to mewaliꞌ deꞌe? Tiꞌara paꞌi topolaluitaheꞌ iti paka toGalileantoheꞌ?#2:7 toGalilea: Mouláꞌ pekiriraꞌ toIahudiꞌ to toroꞌ i kótá Ierusale, toGalilea to i buluꞌ. 8Noumbá haneꞌi peisáheꞌ molaluitaheꞌ i lalu básántaꞌ hadua-hadua? 9Arakeꞌ to hangko i tampoꞌ Patia, Media, Ela, Mesopotamia,#2:9 Pare lima átuna hahioꞌ puloꞌna hai pitu hangko tiꞌara mani Iesu rapoánáka (597sM), handaꞌheꞌ toIahudiꞌ ratawani raꞌánti lao i tampoꞌ ntániꞌna. Tempóraꞌ peisá mesuleꞌ lao i tampoꞌraꞌ pare lima átuna tálu puloꞌna hai uwalu (538sM), handaꞌheꞌ to tiꞌara mau mesuleꞌ. Toroꞌheꞌ oaꞌ i tampoꞌ to teukiꞌ ieneꞌ, ba raꞌánti lao i tampoꞌ ntániꞌna. Ionoꞌ, meguruheꞌ básá to rapakeꞌ i tampoꞌ katoroꞌáraꞌ. Iudá hai Kapadokia. Arakeꞌ woꞌo to hangko i poropensi Pontu hai Asia, 10hangko i Perigia, Pampilia, Másiriꞌ#2:10 Tampoꞌ Másiriꞌ nakuasaꞌi toRoma pare 30sM-324M. hai hangko i tampoꞌ Libia to hungkuꞌ i kótá Kirene. Arakeꞌ to hangko i kótá Roma. 11Hantángáꞌkeꞌ toIahudiꞌ, hai araheꞌ woꞌo tauna ntániꞌna to mesuaꞌ i agama Iahudiꞌ.#2:11 mesuaꞌ i agama Iahudiꞌ: Ane tauna moundeꞌ mesuaꞌ i agama Iahudiꞌ, hangaa-ngaa rariu i lindoꞌraꞌ bahangapa sabiꞌ, moánti popenómbána i Támbina Pueꞌ Ala, hai ane tobaleilo, hangaa-ngaa woꞌo ratileꞌ. Arakeꞌ woꞌo to hangko i tampoꞌ Kereta hai tampoꞌ Áráꞌ. Agáiáná kitaꞌ upu-upu mohádiheꞌ molaluita i lalu básántaꞌ hadua-hadua, hai mampolaluitaheꞌ tandaꞌ kuasaꞌ to nabábehi Pueꞌ Ala.” 12Tingkáráꞌ hai wulimoheꞌ upu-upu, haneꞌi mombekuneꞌ-kuneꞌheꞌ hadua hai hadua, rauliꞌ, “Apa lempóna to mewaliꞌ deꞌe?”

13Agáiáná araheꞌ woꞌo to mopatawai, rauliꞌ, “Nalanguiheꞌ anggoroꞌ to woꞌu!”

Tuntuna Peturuꞌ i tauna to handaꞌ

14Hangko ionoꞌ, Peturuꞌ meángkáꞌ miꞌi hingkakani hai rángána to hampuloꞌ hai hadua, haneꞌi molaluita napasimbuku, nauliꞌ, “Halalungkuꞌ toIahudiꞌ, hai kómu to ara i Ierusale deꞌe-deꞌe! Nipehádingi mpakaroꞌa, láwiꞌ ina kupakanótóákou apa to pewaliꞌ deꞌe. 15Kaiꞌ deꞌe, tiꞌaraꞌangkaiꞌ malangu nodo to niuliꞌ. Deꞌe-deꞌe tiꞌara mani tempóna mainu anggoroꞌ, láwiꞌ hangko tintiꞌ hahioꞌ mepulo!#2:15 ToIahudiꞌ mainu peá anggoroꞌ ane mandeꞌheꞌ bauꞌ. Ane mepulo, mandeꞌheꞌ rótiꞌ. Káindi peá hangko mandeꞌheꞌ bauꞌ hai mainu anggoroꞌ. Básá Pesuwuꞌá 16:8; 1 Tesalonika 5:7. 16Agáiáná apa to mewaliꞌ deꞌe-deꞌe hintotoꞌ hai apa to napahaweꞌ miꞌi nabiꞌ Ioeli hangkoia.#2:16 Nabiꞌ Ioeli tueꞌ rekeꞌ-rekeꞌna uwalu átuna parena hangko tiꞌara mani Iesu rapoánáka. Nauliꞌ node:

17Nauliꞌ Pueꞌ Ala:

‘I alo-alo to kahópóꞌána,#2:17 kahópóꞌána duniáꞌ: Mantepuꞌu i kahaweꞌna Iesu i duniáꞌ, (básá 1 Korintu 10:11; Iberani 1:2; 9:26; 1 Peturuꞌ 1:20; 1 Iohane 2:18) hai ina roo i kahaweꞌáNa huleꞌ.

Kódóꞌ ina mampeweꞌiAꞌ InaoNgkuꞌ i upu-upu tauna.

Ánáꞌmi tobaleilo hai towawine ina mohuwárá laluitaNgkuꞌ.

Ánáꞌntomoane ina moita apa to Kupopaitaꞌáheꞌ.

Totosae ina mopaturuáheꞌ paturu to hangko i Kódóꞌ.

18I alo iti, ina Kuweꞌiheꞌ InaoNgkuꞌ i huoꞌáNgkuꞌ

maroꞌa tobaleilo maroꞌa towawine,

hai hira ina mohuwárá laluitaNgkuꞌ.

19Ina Kupopaitaꞌákou to metingkáráki i langiꞌ

hai tandaꞌ kuasaꞌ i duniáꞌ,

nodo waheꞌ hai api hai rámbu to rumukuꞌ.#2:19 nodo waheꞌ hai api hai rámbu to rumukuꞌ: Lempóna, pehukuna Pueꞌ Ala. Básá woꞌo Iesaia 13:9-11; 24:21-23; Ieheskie 32:7-8; Ioeli 2:10-11; 3:15 hai Amosi 8:9.

20Alo ina mewaliꞌ makáindi,

hai wulá ina mewaliꞌ malei nodo waheꞌ,

hangko tiꞌara mani haweꞌ alo to mahile hai meawaꞌ,

ia miꞌi alo pebutusiána Pueꞌ.

21I tempó iti, heáná peá to mekióꞌ i Pueꞌ#2:21 To rapangákuꞌ toSarani, “Pueꞌ Iesu Ia miꞌi Pueꞌ.” (Básá Roma 10:9.) Laluita “Pueꞌ” rapakeꞌ woꞌo mokábelái Pueꞌ Ala, lempóna: Pueꞌ Iesu Ia woꞌo Pueꞌ Ala.

bateꞌna ina tehómpóki hangko i huku dósáraꞌ.’ ” (Ioeli 2:28-32)

22Napaliliu miꞌi Peturuꞌ laluitana, nauliꞌ, “Halalungkuꞌ toSáráeliꞌ! Nipehádingi apa to ina kuhángáꞌákou deꞌe. Ina kupolaluitaꞌákou mokana i Iesu toNasare. Ia peá to napileꞌi hai napakanótó miꞌi ami Pueꞌ Ala mewaliꞌ TopobágóꞌNa to Magasaꞌ. Iti niꞌisá miꞌi láwiꞌ ánti kuasaꞌna Pueꞌ Ala, Pueꞌ Iesu mobábehi handaꞌ tandaꞌ kuasaꞌ hai tandaꞌ to metingkáráki i oloꞌmi. 23Iesu iti rahuhuꞌ i kómu, hai nipembiáꞌ bona Ia rahuku mate. Nihuhuꞌ i tauna to tiꞌara mengkoruꞌ i Paturoꞌna Musa bona rapakuꞌ i kau mombehape.#2:23 Iesu rapakuꞌ i kau mombehape mouláꞌ áturáraꞌ Roma. Ane toIahudiꞌ mohuku mate tauna, rawatui, agáiáná tempó onoꞌ, toRoma mokuasaꞌi tampoꞌ Sáráeliꞌ hai toSáráeliꞌ tiꞌara piꞌi ara kuasaꞌ mohuku mate tauna. Karapakuꞌna Iesu i kau mombehape mewaliꞌ bona Ia napahárárá Pueꞌ Ala, hai mobukeki apa to teukiꞌ i Pohuleki 21:23. Básá woꞌo Galatia 3:13. Marue miꞌi naisá Pueꞌ Ala apa to hangaa-ngaa ina mewaliꞌ i Iesu, hai Pueꞌ Ala haduduáNa to mopakanótó apa to ina mewaliꞌ iti. Kómu to mopapate Iesu, 24agáiáná Pueꞌ Ala to mopatueꞌ huleꞌ, hai mokábáhá wátáNa hangko i kuasaꞌ kapate, láwiꞌ Iesu tiꞌara peisá nakuasaꞌi oaꞌ kapate.#2:24 Tongawaꞌ hangko i básá Iunani, roo kamateNa, Iesu mantódihá kapári láwiꞌ kapate mampehukáꞌ motaha. Básá woꞌo 1 Korintu 15:54-57; Iberani 2:14-15. 25Ara miꞌi laluitana Datu Daudiꞌ hangkoia#2:25 Datu Daudiꞌ tueꞌ rekeꞌ-rekeꞌna hasábu parena hangko tiꞌara mani Iesu rapoánáka. mokana i Iesu to manguliꞌ:

‘Kuisá, bateꞌna Io Pueꞌ to mamporángáꞌAꞌ.

Tiꞌara ara to Kupokalááꞌ,

láwiꞌ Io Pueꞌ to motulungiAꞌ.

26Onoꞌ miꞌi haneꞌi góeꞌ laluNgkuꞌ,

hai KutóiáKoꞌ Pueꞌ.

Pehárungángkuꞌ aranto i Hio,

27láwiꞌ tiꞌaraꞌAꞌ ina Nupatodáhi

toroꞌ oaꞌ i katoroꞌá tomate.

WátáNgkuꞌ tiꞌara ina Nupatodáhi

i lalu popatawuá duuꞌna magoro,

láwiꞌ Kódóꞌ miꞌi TaunáMu to Magasaꞌ.

28Ina rumihi ntepuꞌu kagóeꞌKuꞌ

láwiꞌ NutudeꞌáMoꞌ rárá ngkatueꞌ

i tempóNgkuꞌ hingkakani hai Io.’ ” (Sura Petóiá 16:8-11)

29Hangko ionoꞌ, napaliliu wopiꞌi Peturuꞌ laluitana nauliꞌ, “Halalu-halalu! Bona niꞌisá katoꞌu-toꞌuána mokana i toioruntaꞌ Datu Daudiꞌ, tiꞌara wátána haduduána to natunggái i laluitana iti, láwiꞌ ia mate miꞌi hai ratawu. Popatawuána taisáꞌá mani haweꞌ deꞌe-deꞌe. 30-31Daudiꞌ iti, hadua nabiꞌ to moisá ami apa to ina nabábehi Pueꞌ Ala. Naisá kaꞌárána podándina Pueꞌ Ala i hia to manguliꞌ: hadua hangko i pemuleꞌámu ina Kuángkáꞌ mewaliꞌ datu.#2:30 Básá Sura Petóiá 89:4-5. Mewaliꞌ, onoꞌ miꞌi haneꞌi Daudiꞌ mampopaisá ami kaꞌina tueꞌna huleꞌ Datu Topehómpóꞌ,#2:30-31 Datu Topehómpóꞌ - I lalu básá Iberani: toMásehi. I lalu básá Iunani: Kerisitu. Lempóna: to rabubuhi lana hai ralántiꞌ. hai nauliꞌ woꞌo Ia tiꞌara ina rapatodáhi i katoroꞌá tomate, hai wátáNa tiꞌara ina rapatodáhi i lalu popatawuá duuꞌna magoro.#2:31 Básá Sura Petóiá 16:10.

32Iesu miꞌi to natunggái Daudiꞌ i laluitana iti, láwiꞌ Ia miꞌi to napatueꞌ huleꞌ Pueꞌ Ala. Kaiꞌ upu-upu deꞌe mewaliꞌangkaiꞌ sabiꞌNa, láwiꞌ kiꞌita mata katueꞌNa huleꞌ. 33Pueꞌ Ala moángkáꞌ miꞌi Iesu, Napopehoda i pehodaꞌá tándáꞌ i kuánáNa láwiꞌ Iesu Napomahile ntepuꞌu. Hangko ionoꞌ, Pueꞌ Ala Umántaꞌ mampoweꞌi Iesu Inao to Magasaꞌ nodo to Nadándi. Mewaliꞌ apa to niꞌita hai nihádi miꞌi ininá, mewaliꞌ ánti kuasaꞌna Inao to Magasaꞌ to naweꞌiangkaiꞌ Iesu.

34Mewaliꞌ halalu-halalu, taisá katiꞌárána mpuꞌu wátána haduduána to natunggái Datu Daudiꞌ i laluitana, láwiꞌ tiꞌara Daudiꞌ to tueꞌ huleꞌ hai mengkaoreꞌ lao i surugáꞌ. Hai nauliꞌ wopiꞌi Daudiꞌ:

Pueꞌ Ala mohángáꞌá Pueꞌkuꞌ to kupenómbái,#2:34 Pueꞌkuꞌ to kupenómbái - Ia miꞌi: Datu Topehómpóꞌ to nadándi Pueꞌ Ala ina haweꞌ. Básá woꞌo Matiu 22:43-45.

‘MehodamoKoꞌ tándáꞌ i kuánáNgkuꞌ,

35duuꞌna Kupopengkoruꞌheꞌ upu-upu ewáliMu i Hio.’ ” (Sura Petóiá 110:1)

36Hangko ionoꞌ, napahópóꞌ miꞌi Peturuꞌ laluitana, nauliꞌ, “Mewaliꞌ, onoꞌ miꞌi haneꞌi kómu toSáráeliꞌ, hangaa-ngaa niꞌisá i lalumi apa to kuꞌuliꞌ deꞌe: Iesu to nipakuꞌ i kau mombehape, Ia miꞌi to napileꞌi Pueꞌ Ala mewaliꞌ Pueꞌtaꞌ hai Datu Topehómpóꞌ.”

37Karahádina tauna to handaꞌ laluitana Peturuꞌ iti, nahohoꞌ miꞌi inaoraꞌ, hai mekuneꞌheꞌ i Peturuꞌ hai i surona Pueꞌ Iesu to ntániꞌna, rauliꞌ, “Ane noꞌonoꞌi, apa miꞌi to hangaa-ngaa kibábehi?”

38Nahániki Peturuꞌ, “Hangaa-ngaa menosoꞌmokou hadua hai hadua hangko i dósámi, hai hangaa-ngaa rariukou i lalu hangaꞌna Iesu Kerisitu. Ane nibábehi noꞌonoꞌ, Pueꞌ Ala ina moámpungi dósámi, hai ina molámbiꞌkou Inao to Magasaꞌ,#2:38 Pueꞌ Ala hai Iesu to moweꞌikeꞌ Inao to Magasaꞌ. Básá wátiꞌna ka-33 hai ka-39. 39láwiꞌ dándina Pueꞌ Ala deꞌe raweꞌikeꞌ haweꞌ-haweꞌ i pemuleꞌántaꞌ hai i tauna ntániꞌna to karaoꞌ tampoꞌraꞌ. Dándina Pueꞌ Ala deꞌe, bateꞌna ina mewaliꞌ i upu-upu tauna to nakióꞌ Pueꞌtaꞌ Pueꞌ Ala mewaliꞌ taunáNa.”

40Tiꞌara iti peá to nauliꞌ Peturuꞌ, agáiáná handaꞌ mani to napolaluita. Ia mopaturoꞌheꞌ tauna to handaꞌ hai napaingáꞌiheꞌ, nauliꞌ, “Menosoꞌmokou! Ineeꞌkou mampeuláꞌi tauna to kadake to tueꞌ tempó deꞌe, bona tiꞌarakou woꞌo molámbiꞌ pehukuna Pueꞌ Ala to ina morampeheꞌ!” 41Handaꞌ miꞌi tauna to mampoinálái laluitana Peturuꞌ, haneꞌi mampoperiuheꞌ woꞌo. I alo iti, kahandaꞌna tauna to mepoinálái i Iesu tetámbái miꞌi rekeꞌ-rekeꞌna tálu sábuna. 42Roo onoꞌ, handaꞌ tauna to hangko mepoinálái i Iesu mampehádingiheꞌ oaꞌ paturoꞌraꞌ surona Pueꞌ Iesu, hai moromu-romuheꞌ oaꞌ. Mandeꞌheꞌ hingkakani, mandeꞌheꞌ rótiꞌ ánti pambuhinaoraꞌ Pueꞌ Iesu, hai mekakaeheꞌ.

Pohintuwuꞌraꞌ to mepoinálái i Iesu

43Surona Pueꞌ Iesu mobábehiheꞌ handaꞌ tandaꞌ kuasaꞌ hai tandaꞌ to metingkáráki. Onoꞌ miꞌi haneꞌi tauna to handaꞌ mobiláꞌ ntepuꞌuheꞌ surona Iesu. 44Upu-upu to mepoinálái i Iesu mohintuwuꞌheꞌ. Párewá to ara i hira rapopobunduꞌ i tauna to moparaluu.#2:44 ToSarani tiꞌara mampobaluꞌ upu-upu to ara i hira (básá Suro 2:45; 4:32–5:11), hanggáláꞌ peá ane ara to melábi. 45Rápáꞌna, araheꞌ to mampobaluꞌ tampoꞌraꞌ ba óntóꞌ támbiraꞌ, dóiꞌ hólóna ragáláꞌ-gáláꞌ i hángká rángáraꞌ to tiꞌaraheꞌ nakaꞌarai. 46Alo-alona hirámpuheꞌ i tangabaa Támbina Pueꞌ Ala. Bulá ntepuꞌu laluraꞌ mombetatarima i támbiraꞌ, hai mandeꞌheꞌ hingkakani i lalu kagóeꞌ-góeꞌ. 47Motóiáheꞌ oaꞌ Pueꞌ Ala, hai rapokagóeꞌheꞌ upu-upu tauna. Alo-alona katetátámbáiáheꞌ oaꞌ, láwiꞌ Pueꞌ motámbáiáheꞌ hai tauna to molámbiꞌ katehómpóꞌ.

Currently Selected:

Surona Pueꞌ Iesu 2: NTBEP

Highlight

Copy