Surona Pueꞌ Iesu 12
12
ToSarani rapopeahiahiꞌ wopaheꞌ
1I tempó iti, Datu Herode Agaripa#12:1 Datu Herode Agaripa: Ia miꞌi Datu Herode Agaripa to rungu-runguna, ueꞌraꞌ Datu Herode Mahile hai Mariam. Básá to teukiꞌ i Kahirámpuá Laluita. mantepuꞌu mampopeahiahiꞌ bahangapa tauna to mepoinálái i Pueꞌ Iesu. 2Rápáꞌna, napehuoꞌá woꞌo bona Iakobu wutuꞌna Iohane rapapate hai pihoꞌ. 3Apa to nabábehi Datu Herode iti rapogóeꞌ toIahudiꞌ. Onoꞌ miꞌi haneꞌi Herode mohuoꞌmoheꞌ tauna bona lao mohakaꞌ Peturuꞌ. Iti mewaliꞌ i alo mahileraꞌ toIahudiꞌ to rauliꞌ Posusa Rótiꞌ to Tiꞌara Raragiꞌi.#12:3 Posusa Rótiꞌ to Tiꞌara Raragiꞌi: Básá to teukiꞌ i Kahirámpuá Laluita. Hangko tiꞌara mani Posusa Rótiꞌ to Tiꞌara Raragiꞌi, mosusaheꞌ hangalo Posusa Paska, onoꞌ haneꞌi hangkani-hangkani rompákáꞌ posusa iti rauliꞌ Posusa Paska. (Rápáꞌna, básá wátiꞌna to ka-4). 4Rahakaꞌ mpuꞌu miꞌi Peturuꞌ, hai ratarungku. Iba kolompoꞌ surudadoꞌ rapohawaꞌá mokámpái, ragáláꞌheꞌ iba-iba mombeháwá-háwá. Tunggáiána Herode bona kárá-kárána Peturuꞌ ina rahoda-hoda i lindoꞌraꞌ tauna to handaꞌ ane liu miꞌi Alo Posusa Paska.#12:4 Alo Posusa Paska: Iti miꞌi tempóna toIahudiꞌ mampopambuhinaoá tempóna malaꞌeka mopapate handaꞌ tobaleilo towutuꞌ toMásiriꞌ, agáiáná moliungi toSáráeliꞌ láwiꞌ rakámpái hai waheꞌ dimbá i popatakaꞌána babaꞌ. (Básá Pesuwuꞌá gáláꞌna ka-12.) Handaꞌ toIahudiꞌ lao i Ierusale hangko i tampoꞌ ntániꞌna bona mouláꞌheꞌ posusa iti ionoꞌ. 5Mewaliꞌ Peturuꞌ ara i lalu tarungku, agáiáná tauna to mepoinálái i Pueꞌ Iesu mampekakaeáheꞌ oaꞌ Peturuꞌ.
Peturuꞌ rakábáhá hangko i tarungku
6Tunggáiána Herode, bona kahalona mepulo, Peturuꞌ ina raꞌánti i lindoꞌraꞌ tauna to handaꞌ {bona rahuku mate}. Tangaꞌ káindi, Peturuꞌ maturu rapaitangaꞌ rodua surudadoꞌ, hai taena potimbali rarante haneꞌi rapatakaꞌ i taeraꞌ surudadoꞌ to mokámpái. Ara woꞌo surudadoꞌ ntániꞌna to mokámpái babaꞌ tarungku. 7Hangkaꞌ-hangkaꞌ perái, ara to mewangkaꞌ i lalu tarungku, láwiꞌ haweꞌ miꞌi hadua malaꞌekana Pueꞌ. Malaꞌeka iti mogabeꞌ Peturuꞌ, nahángáꞌá, “Hawiáꞌkoꞌ mearó!” Tempó onoꞌ woꞌo, tekábáhá pemiꞌi rante hangko i taena. 8Nauliꞌ malaꞌeka iti i Peturuꞌ, “Nupatakaꞌ miꞌi pámpoumu, hai nupusaꞌ miꞌi sandalemu!” Napeuláꞌi mpuꞌu miꞌi Peturuꞌ hawaꞌna, hai roo onoꞌ, nauliꞌ wopiꞌi malaꞌeka, “Nupakeꞌ miꞌi kumbámu hai meuláꞌmokoꞌ i kódóꞌ.”
9Meuláꞌ mpuꞌu miꞌi Peturuꞌ i malaꞌeka iti. Agáiáná tiꞌara mani manótó i Peturuꞌ ba toꞌu-toꞌu mpuꞌui malaꞌeka to naita ba pampetudeꞌá peá. 10Molumaoheꞌ moliu i surudadoꞌ to mokámpái babaꞌ to rungu-runguna hai babaꞌ to karombuaꞌna, haneꞌi haweꞌheꞌ i babaꞌá besiꞌ pesuwuꞌá lao i kótá. Babaꞌá besiꞌ iti tebungkáhi haduduána, haneꞌi mesuwuꞌheꞌ ionoꞌ. Hangko mantepuꞌuheꞌ molumao i rárá lao i kótá, hangkaꞌ-hangkaꞌ perái malaꞌeka iti mopálehi Peturuꞌ.
11Hangko ionoꞌ, manótó miꞌi pekirina Peturuꞌ haneꞌi nauliꞌ, “Óó, toꞌu ntepuꞌu! Pueꞌ to mohuoꞌ malaꞌekaNa maiaꞌ mokábáhá hangko i kuasaꞌna Datu Herode hai hangko i upu-upu tunggáiáraꞌ tadulakoraꞌ toIahudiꞌ i kódóꞌ.”
12Roo onoꞌ, lao miꞌi Peturuꞌ i támbina Maria,#12:12 támbina Maria: Babilaꞌ iti támbi iumbá Iesu hai topeguruNaheꞌ mandeꞌ Pandeꞌ Paska to kahópóꞌána (básá Marakusi 14:13-15), hai támbi iumbá topegurunaheꞌ Iesu hambengi i Ierusale (básá Suro 1:13; 4:31). inána Iohane to rauliꞌ woꞌo Marakusi.#12:12 Iohane to rauliꞌ woꞌo Marakusi: Ia to moukiꞌ Ngkóráꞌ Marasa Marakusi, tiꞌara Iohane ádina Iakobu (wátiꞌna ka-2). I támbi iti, handaꞌheꞌ tauna to hirámpu mekakae. 13Mewaliꞌ Peturuꞌ mokadoꞌ babaꞌá támbi iti. Hadua towawine to mobágóꞌ ionoꞌ to rahangaꞌ Rode, lao ina mobungkáhi babaꞌá. 14Kanahádina wambaꞌna Peturuꞌ, góeꞌ ntepuꞌu Rode iti. Ánti kagóeꞌna, tiꞌara liliu mobungkáhi babaꞌ, agáiáná kawiáꞌ mesuaꞌ huleꞌ i támbi haneꞌi nauliꞌ, “Peturuꞌ ara i babaꞌ!”
15Rahángáꞌá tauna iti, “Ba mampaturuárakoꞌ?” Agáiáná nahuleꞌ-huleꞌ peá laluitana, onoꞌ miꞌi haneꞌi rahángáꞌá, “Tiꞌara Peturuꞌ noꞌonoꞌ, agáiáná malaꞌeka to mokámpái riꞌi.”#12:15 Mouláꞌ pepoináláiraꞌ toIahudiꞌ, hadua-hadua tauna nakámpái hadua malaꞌeka to hangko i Pueꞌ Ala. Básá Sura Petóiá 91:11; Matiu 18:10; Iberani 1:14.
16Tangaꞌna Rode lao i lalu támbi, Peturuꞌ mokadoꞌ oaꞌ babaꞌá. Rabungkáhi mpuꞌu miꞌi babaꞌá iti, hai raita Peturuꞌ. Tingkáráꞌ ntepuꞌuheꞌ. 17Hangko ionoꞌ, Peturuꞌ moángkáꞌ taena bona napakaniiꞌheꞌ, haneꞌi napahaweꞌáheꞌ noumbá rárána Pueꞌ mampopesuwuꞌ hangko i lalu tarungku. Napahópóꞌ miꞌi Peturuꞌ laluitana haneꞌi napembiáꞌ bona apa to pewaliꞌ iti rapahaweꞌ i halalu hampepepoináláina, hai rapahaweꞌ woꞌo i Iakobu.#12:17 Iakobu: Ia miꞌi ádina Iesu to mewaliꞌ tadulakoraꞌ toSarani roo karapapatena Iakobu wutuꞌna Iohane. Básá wátiꞌna ka-2. Roo onoꞌ, pohuꞌ miꞌi Peturuꞌ lao i katoroꞌá ntániꞌna.
18Kahalona mepulo, mewaliꞌ miꞌi posisalaꞌ i oloꞌraꞌ surudadoꞌ topekámpái. Wuliheꞌ ba apa to mewaliꞌ i Peturuꞌ. 19Datu Herode Agaripa mohuoꞌ miꞌi tauna lao mampeliꞌ Peturuꞌ, agáiáná tiꞌara ralámbiꞌ. Onoꞌ miꞌi haneꞌi Herode mohuoꞌ surudadoꞌna to mokámpái Peturuꞌ bona rapáresáꞌheꞌ haneꞌi rahuku mate. Roo onoꞌ, Herode pohuꞌ hangko i tampoꞌ Iudá lao toroꞌ i kótá Kaisarea.
Kamatena Datu Herode Agaripa
20Hangkani tempó, rumihi kamabukoꞌna Datu Herode Agaripa i tauna to toroꞌ i kótá Tiru hai Sido, onoꞌ miꞌi haneꞌi pueꞌ wánuá iti mogómbóheꞌ. Pogómbóraꞌ iti, rabutusi bona bahangapa tauna hangaa-ngaa lao i kótá Kaisarea modame hai Datu Herode, láwiꞌ toTiru hai toSido iti molámbiꞌheꞌ pandeꞌraꞌ hangko i tampoꞌ to napárentá Herode. Rungu-runguna pueꞌ wánuá iti monáráhi hadua topobágóꞌna Herode to napoinálái ntepuꞌu Herode, bona ia modureiheꞌ. Hangaꞌna tauna iti Belastu. 21Mewaliꞌ i alo to rapakanótó, Herode mewaruꞌ datu mehoda i pehodaꞌá kadatuá, hai molaluita i tauna to handaꞌ. 22Monganga-ngangaheꞌ tauna to handaꞌ rapasimbuku bona mopagóeꞌ laluna Herode, rauliꞌ, “Polaluitana nodo polaluitana pueꞌ, tiꞌara polaluitana tauna!”
23Ánti kamaꞌángkáꞌna láwiꞌ tiꞌara naundeꞌ mobiláꞌ ba motóiá Pueꞌ Ala, kásáliu nahuku malaꞌekana Pueꞌ haneꞌi óntóꞌ laluna naꞌandeꞌ kahindoro duuꞌna mate.#12:23 Mouláꞌ Iosepu, hadua to tueꞌ tempó onoꞌ to moukiꞌ daritakáná toIahudiꞌ, Datu Herode Agaripa mopaꞌara pogómbó i tempóraꞌ tauna mamposusai Datu Mahile Laudiu. Iti mewaliꞌ pare iba puloꞌna hai iba roo karapoánákana Iesu (44M). Tempó onoꞌ, Datu Herode mopakeꞌ badu to mengkilaꞌ. Karoona ia ratóiá tauna to handaꞌ, hangkaꞌ-hangkaꞌ perái mahái ntepuꞌu taꞌina. Ia raꞌánti lao i támbina hai lima alona mantódihá haneꞌi mate.
24I tempó iti, tetámbái miꞌi tauna to mampehádingi ngkóráꞌna Pueꞌ, hai tetámbái miꞌi woꞌo kahandaꞌraꞌ to mepoinálái i Iesu.
25Roo miꞌi bágóꞌraꞌ Baranaba hai Saulu i kótá Ierusale, mesuleꞌmoheꞌ lao i Antiokia, hai moántiheꞌ Iohane to rauliꞌ woꞌo Marakusi.
Currently Selected:
Surona Pueꞌ Iesu 12: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
