Surona Pueꞌ Iesu 11

Pampopaisána Peturuꞌ i Ierusale

1Upu-upu surona Pueꞌ Iesu hai halalu hampepepoináláiraꞌ to ntániꞌna i tampoꞌ Iudá, mohádi kaꞌáráraꞌ tauna to tiꞌara toIahudiꞌ to motarimamoheꞌ woꞌo ngkóráꞌna Pueꞌ Ala. 2I kahaweꞌna Peturuꞌ i kótá Ierusale, bahangapaheꞌ toIahudiꞌ to mepoinálái i Iesu mosalaꞌi Peturuꞌ, 3rauliꞌ, “Moapa riꞌi haneꞌi mesuaꞌkoꞌ i támbina tauna to tiꞌara toIahudiꞌ,#11:3 to tiꞌara toIahudiꞌ - I lalu básá Iunani: to tiꞌara ratileꞌ. hai mandeꞌkoꞌ woꞌo hingkakani hai hira?”

4Onoꞌ miꞌi haneꞌi natuntuáheꞌ Peturuꞌ upu-upu to mewaliꞌ mantepuꞌu hangko i rungu-runguna, nauliꞌ, 5“Tangaꞌkuꞌ mekakae i kótá Iope, hangkaꞌ-hangkaꞌ kuita pampetudeꞌá. I lalu pampetudeꞌá iti, kuita ara to nodo báná to mapepaꞌ, hai hokina to iba iti rabárárángi, haneꞌi raulu hangko i langiꞌ tóá i lindoꞌkuꞌ. 6Kuita óntóꞌna mampopengaa binataꞌ: ara to mobiti iba, ara to maila, ara to mendólóꞌ, hai ara woꞌo tádáhi. 7Tiꞌara marue hangko ionoꞌ, kuhádi wambaꞌ to manguliꞌ, ‘Peturuꞌ, meángkáꞌmokoꞌ, nusambalemoheꞌ binataꞌ iti láwiꞌ iti miꞌi pandeꞌmu.’ 8Kuhániki: ‘Tiꞌara Pueꞌ! Tiꞌara haweꞌ hangkani kuandeꞌ binataꞌ to rapáliá mouláꞌ ádá ágámángkiꞌ láwiꞌ kedái.’ 9Kuhádi wopiꞌi wambaꞌ iti manguliꞌ, ‘Apa to nauliꞌ Pueꞌ Ala maroꞌa, ineeꞌ nuꞌuliꞌ kedái.’ 10Tálu miꞌi kánina mewaliꞌ noꞌonoꞌ, haneꞌi upu-upuna teoreꞌ miꞌi huleꞌ lao i langiꞌ. 11Tempó onoꞌ woꞌo, tálu tobaleilo haweꞌ i támbi to kikatoroꞌi.#11:11 Tálu tobaleilo to haweꞌ iti, tiꞌaraheꞌ toIahudiꞌ. To tálu iti, rahuoꞌheꞌ hangko i kótá Kaisarea lao i kótá Iope mampeliꞌaꞌ. 12I tempó iti, nahángáꞌáꞌaꞌ Inao to Magasaꞌ, ‘Peturuꞌ, meuláꞌmokoꞌ i hira, hai ineeꞌ nupopontaniꞌ tauna.’#11:12 Ara woꞌo bahangapa sura to ioru-oru raukiꞌ to motámbái: ineeꞌ bata-bata lalumu. Mewaliꞌ lao mpuꞌuaꞌ hingkakani hai hira. Hai ara woꞌo sabiꞌkuꞌ ieneꞌ, láwiꞌ halaluntaꞌ to ini deꞌe mamporángáꞌaꞌ lao i Kaisarea. Kahaweꞌkiꞌ i támbina Koroneliu, mesuaꞌangkaiꞌ. 13Koroneliu iti mopahaweꞌ apa to naita, ia miꞌi hadua malaꞌeka to haweꞌ i támbina to mohángáꞌá, ‘Nuhuoꞌmoheꞌ bahangapa tauna lao i kótá Iope bona laoheꞌ mai moala hadua tobaleilo to rahangaꞌ Simoꞌ, to rauliꞌ woꞌo Peturuꞌ. 14Ia to ina mopahaweꞌákoꞌ bámbári to moánti katehómpóꞌ i hio hai i upu-upu tauna to toroꞌ i támbimu.’ ”

15Peturuꞌ mopaliliu wopiꞌi laluitana, nauliꞌ, “Mewaliꞌ, hangko mantepuꞌuaꞌ mopaturoꞌheꞌ, mendáulu miꞌi Inao to Magasaꞌ mokuasaꞌiheꞌ, hibali hai to mewaliꞌ i kitaꞌ toIahudiꞌ rungu-runguntaꞌ nakuasaꞌi Inao to Magasaꞌ i alo Pentakosta.#11:15 Básá Suro 2:4. 16Hangko ionoꞌ, kubuhinao miꞌi laluitana Pueꞌ to manguliꞌ, ‘Iohane meriu hai uwai, agáiáná kómu ina rariukou hai Inao to Magasaꞌ.’#11:16 Básá Lukasi 3:16; Suro 1:5. 17Mewaliꞌ halalu-halalu, kehapiꞌ tiꞌaraheꞌ toIahudiꞌ, tongawaꞌ ntepuꞌu miꞌi kanaweꞌiraꞌ Pueꞌ Ala Inao to Magasaꞌ, nodo to Naweꞌikeꞌ ánti pepoináláintaꞌ i Pueꞌ Iesu Kerisitu. Ane noꞌonoꞌi, heánáraꞌaꞌ paꞌi kódóꞌ deꞌe, haneꞌi ina kuewaꞌ tunggáiána Pueꞌ Ala i hira?”

18Karahádina tauna to natuntu iti, tiꞌarapoheꞌ mosalaꞌi Peturuꞌ, ngkáliꞌna riꞌi motóiáheꞌ Pueꞌ Ala, rauliꞌ, “Deꞌe-deꞌe tongawaꞌ miꞌi, Pueꞌ Ala motarimaheꞌ woꞌo tauna to tiꞌara toIahudiꞌ, hai Naweꞌiheꞌ tempó menosoꞌ hangko i dósáraꞌ bona peisáheꞌ woꞌo molámbiꞌ katueꞌ to maroꞌa to tiꞌara mokahópóꞌá.”

ToSarani i Antiokia

19Mantepuꞌu hangko i karapapatena Setepanu, tauna to mepoinálái i Iesu to toroꞌ i kótá Ierusale rapopeahiahiꞌheꞌ oaꞌ duuꞌraꞌ mahawuꞌ. Handaꞌheꞌ to melangka lao i wánuá ntániꞌna.#11:19 Básá Suro 7:57–8:1. Araheꞌ to lao i Penisia, araheꞌ to lao i puló Sipuru, hai araheꞌ woꞌo to lao i kótá Antiokia i Siria.#11:19 Tempó onoꞌ, Antiokia ia miꞌi pehodaꞌá popárentá i tampoꞌ Siria. Jemaꞌa to rungu-runguna to kahandaꞌraꞌ tauna tiꞌara toIahudiꞌ araheꞌ i Antiokia. Tálu kánina Paulu rapileꞌi jemaꞌa iti bona moánti ngkóráꞌna Pueꞌ (básá Suro 13:1-4; 15:35,40; 18:23). Lukasi hangko i Antiokia. Ara woꞌo kótá Antiokia ntániꞌna i poropensi Galatia. I upu-upu wánuá to rapoliui, rabámbáriáheꞌ oaꞌ ngkóráꞌna Pueꞌ Ala, agáiáná bámbári iti rapahaweꞌ peá i toIahudiꞌ. 20Mewaliꞌ ánti pobámbáriraꞌ Ngkóráꞌ Marasa, araheꞌ woꞌo tauna i puló Sipuru hai kótá Kirene to mepoinálái i Iesu.#11:20 Kirene ia miꞌi hambuaꞌ kótá i Afrika tándáꞌ i wongko. Iti wánuána Simoꞌ, to modurei Iesu mopáháꞌá kau mombehape. Básá Lukasi 23:26. Hangko i oloꞌraꞌ, araheꞌ to lao i kótá Antiokia moánti Ngkóráꞌ Marasa kana i Pueꞌ Iesu i tauna to tiꞌaraheꞌ toIahudiꞌ. 21Kuasaꞌna Pueꞌ ara i hira, áláraꞌ handaꞌ toAntiokia mepoinálái hai meuláꞌheꞌ i Pueꞌ Iesu.

22Mewaliꞌ, tauna to mepoinálái to ara i Ierusale mohádiheꞌ woꞌo apa to mewaliꞌ i Antiokia iti. Onoꞌ miꞌi haneꞌi Baranaba#11:22 Baranaba toSipuru. Kehapiꞌ ia tiꞌara teimbaꞌ i topeguruna Iesu, ia mewaliꞌ hadua tadulakoraꞌ toSarani (básá Suro 4:36; 9:27). rahuoꞌ lao i Antiokia.#11:22 Antiokia iti iba átuna uwalu puloꞌna lábi kilómete tándáꞌ i wongkona Ierusale, i tampoꞌ Siria. 23-24Baranaba iti, hadua tauna to maroꞌa laluna. Ia nakuasaꞌi Inao to Magasaꞌ hai maróhó pepoináláina. Kahaweꞌna Baranaba i Antiokia, góeꞌ ntepuꞌu laluna láwiꞌ tongawaꞌ ntepuꞌu pewátiꞌna Pueꞌ Ala i hira to mepoinálái i Iesu. Mewaliꞌ Baranaba mopalindó laluraꞌ, hai mopaturoꞌheꞌ bona meuláꞌheꞌ oaꞌ i Pueꞌ Iesu hangko i laluraꞌ ntepuꞌu. Onoꞌ miꞌi haneꞌi handaꞌ woꞌo toAntiokia mepoinálái i Pueꞌ Iesu.

25Roo onoꞌ, lao miꞌi Baranaba i kótá Tarusu mampeliꞌ Saulu. 26Kanalámbiꞌna, naꞌánti lao i Antiokia. Baranaba hai Saulu toroꞌheꞌ ionoꞌ hampare kamaruena. Moromuheꞌ hai tauna to mepoinálái i Iesu, hai mopaturoꞌheꞌ handaꞌ tauna. I Antiokia miꞌi, tauna to mepoinálái i Iesu rungu-runguna rauliꞌ toSarani.

27I tempó iti woꞌo, araheꞌ bahangapa nabiꞌ hangko i Ierusale to lao i kótá Antiokia. 28Hadua hangko i hira to rahangaꞌ Agabu meángkáꞌ, hai moliu kuasaꞌna Inao to Magasaꞌ, nauliꞌ, “Ina haweꞌ tempó rimi to rumihi i humalele Kadatuá Roma.” Rimi iti mewaliꞌ mpuꞌu i tempó popárentána Datu Mahile Laudiu i Roma.#11:28 Datu Mahile Laudiu mopárentái kadatuá Roma hangko i pare iba puloꞌna hai isáꞌ haweꞌ i pare lima puloꞌna hai iba roo karapoánákana Iesu (41-54M). Pare iba puloꞌna hai ini, ara rimi to rumihi ntepuꞌu i tampoꞌ Iudá. 29Karahádina toSarani i Antiokia laluitana iti, rapoinao motulungi halalu hampepepoináláiraꞌ to ara i tampoꞌ Iudá. Mewaliꞌ upu-upuheꞌ mampeweꞌi dóiꞌ mouláꞌ pebukuáraꞌ hadua-hadua, 30hai dóiꞌ iti rarámpu. Roo onoꞌ, Baranaba hai Saulu rapoináláiheꞌ moánti dóiꞌ iti lao i tadulakoraꞌ toSarani i kótá Ierusale.

Currently Selected:

Surona Pueꞌ Iesu 11: NTBEP

Highlight

Copy