Lukas 20

Pekutana didiona umba nakasulei kakuasaanna Puang Yesus

1Pihsang tempo menge Puang Yesus yaling di Dasang Ada' umpepainsangnging Kaheba Mapia, ya' suleing kapala-kapala imang sibaha to pampakuhu ada' anna setobaha'ang nalumba. 2Anna sika ungkutanaii Puang Yesus naoaintee, ”Umba nakasulei ne kakuasaammu anna malao unghambai to pa'bulele yaling mai di Dasang Ada' di pehengi? Anna menna ang mampopa'kuasao?”

3Natimba'mi Puang Yesus naoatee, ”Aha tou Kodi' pekutanangku la kukutanaiingkoa' ke malai untimba' dianto: 4Menna umbea kakuasaang pano di Yohanes to Pantero': Dehataraka, hupatauraka?”

5Ingkänna yato kapala imang anna setobaha'ang situla'-tula' anna naoaitee, ”Ponna taoaa'te, ‘Dehata mambea kakuasaang,’ ya' la naoamingkea'totee, ‘Ponna noa, ya' akana daia' ungngaku umpetahpa'?’ 6Ampo' ponna taoaa'te, ‘Hupatau mambea kakuasaang,’ ya' la nasaleba'imingkea'to indo pano tau mai'di aka' ingkänna tau ungngangka' Yohanes mesa nabi.”

7Dahi sika mentimba'mi pano di Puang Yesus naoatee, ”Dai kiinsang kitimba'.”

8Sika naoaminte Puang Yesus, ”Ponna noa, ya' datoeto Ko kutula'ingkoa' didiona umba nakasulei kakuasaangku anna malaä' membabe noa.”

Pohapangang didiona to pantesang bela' angkoro'

9Napatahhi' bumi tula'na Puang Yesus pano di tau mai'di untula' mesa pohapangang naoatee, ”Aha mesa tau ang umpapia bela' angkoro'. Puhaitoo napopetesammi yato bela'na pano di sangngaka-sangngaka to pantesang, mane le'ba'i masae pano di bohto senga'. 10Tahpana lambi' tempo pantuhangang, yato puäng bela' unsuo mesa sabua'na pano di to pantesang la ungngala boa pinamulanna ang mendahi katahaanna. Ampo' sika nasahka anna nasibamba-bambaii supu anna nasuoi sumule tomande', dai aha aka nabaha. 11Pihsananna unsuo salang mesa sabua'na ang senga', ampo' sika nabamba bumi yato to pantesang, mane napakasili-silii anna nasuo toine' sumule dai aha aka nabaha. 12Puhai yatoo, ya' unsuo sala bumi mesa sabua'na mao, ampo' bilang sika nasibamba-bambaine' lambi' bängkä'-bängkä' kalaena mane sika nasiängkä'-ängkä'i napentibeing pano di behing bela'.

13Ma'pihki'mi yato puäng bela' naoatee, ‘Ya' akang inde la kubabe? Umbai la kusändä' kusuo inde änä' pakamayangku, umbato ke sika nakalaya'i nei'.’

14Ampo' tahpana sika ungngita yato änä' to pantesang, ya' sioa-oamintee, ‘Diangnga'to indo ang la umpuängang inde bela' ke mateng ambena. Dahi tapateiia' anna malai kita'a' mampuängang inde bela'.’ 15Ya' tahpa sika nasahkang anna sika napentibeing tama di aneanna bela' mane sika napateii.

Dahi dinoa, akang la nababe yato puäng bela' pano di to pantesang? 16Tantunte' anna la panoi di bela'na anna umpatei asangngi yato ingkänna to pantesanna, mane napapetesang salai yato bela'na pano di tau senga'.”

Yato tau mai'di ang menge ma'pehingngi sika naoatee, ”Daete' la palla' dipanoa.”

17Ampo' sika nasaile Puang Yesus anna naoaintee, ”Ponna noa, ya' aka bahtuanna inde ihsi Suha' Masero ang naoatee,

‘Batu ang puha natibei tukang, setonganna mendahi batu ang handang dipahallu.’ Mzm 118:22

18Anna menna-menna ang mampengkanahoi yato batu la bahe-bahe kalaena, ampo' menna-menna ang nakanahoi la londo puhane' mapehsä'.”

19Donetoo pemala liung yato sangngaka-sangngaka to pampakuhu ada' sibaha kapala-kapala imang la sika unsahka Puang Yesus, aka' sika nainsang naoate kalaenaii ang napahoai pohapanganna, ampo' sika mahea' yato pano di tau mai'di.

To pambahananna to Yahudi nasändä' unsahka Puang Yesus yaling di pekutananna didiona sima

20Yato sangngaka-sangngaka to pampakuhu ada' sibaha kapala-kapala imang semata sika ungngahung lolo Puang Yesus. Sika unsuo tau ang puha sika napakanahke manahpa anna malai kamba' mendahi tau malunä' di olona Puang Yesus anna malai namata-matai ingkänna aka ang nababe. Yatoii pemala sika unnahoang Puang Yesus ungngolai sangngaka-sangngaka pekutana takekuna anna malai sika nabeho pano di to ma'pahenta ke sala timba'i. 21Dahi sika mekutanang pano di Puang Yesus naoatee, ”O Tuang, kiinsang kioate tahpa' asang pepakuhummu pano di ingkänna tau, aka' mampakuhuo sitonda kamarohoang inaha anna katahpa'ang. Dao aha umpasisenga'-senga' tau, ampo' mampakuhuo sitonda katahpa'ang didiona lalang ang nakärä'i Puang Alataala. 22Dahi, situhu' atohang ada'ta, la malaraka la tabaya'a' sima pano di to ma'pahentana Kaisar, daraka?”

23Ampo' nainsang Puang Yesus yato pahtuyu karakenaii, anna naoaite pano diii, 24”Paitaiä' mesa doi' bahsi. Menna inde kekambara' anna menna kesanga?”

25Sika mentimba'mi naoatee, ”Kambara'na anna sanganna Kaisar.”

Naoante Puang Yesus pano diii, ”Dahi monna noa, ya' beaia' pano di to ma'pahenta Kaisar aka ang la pahallu umbea anna beaia' pano di Puang Alataala aka ang la pahallu umbea.”

26Dai sika mala nanahoang ungngolai yato pentimba'na Puang Yesus di olona tau mai'di. Supung sika masili nahingngi yato pentimba'na anna sika mahtangngi.

To pambahananna to Yahudi nasändä' unsahka Puang Yesus yaling di pekutananna didiona katuhoang sumule

27Pihsang tempo suleing sangngaka-sangngaka to Saduki ullumba Puang Yesus. (Inde mai tau dai sika napetahpa' la aha katuhoang sumule di hoi' mai di kamateang.) Sika mekutanang pano di Puang Yesus naoatee, 28”O Tuang, puha nauki' Musa inde pahenta pano di kita': Ponna aha mesa muane ang mate, dake' hali keänä' bahinena, ampo' ahake' ullu'na yato muane, pahallu la umpobahine sala inde bahinena ullu'na ang mate anna malai aha peänä'anna yato to mate. 29Noa indee: Dolu aha pitu to siullu'. Yato ang ulua kebahine, ampo' mate di tempona dake' keänä'. 30-31Dahi yato bahinena napobahine sala ullu'na ang kaderuanna anna malai umpaaha peänä'ang pano di kakana ang puha mate. Ampo' yato ullu'na mate toe' dai hali keänä'. Napobahine bumi ullu'na ang katallunna ampo' noa toe', lambi' yato ullu'na ang kapitunna noa asang, mate dai aha änä'na. 32Katämpä'anna mate toe' yato bahine. 33Dahi ponna ke tuhong sumule to mate di hoi' mai di kamateang, ya' mennang kahang di alla'na yato pitu to siullu' ang la mendahi muanena yato bahine? Aka' puha asammi umpomuane yato pitu to siullu'.”

34Sika natimba'mi Puang Yesus naoatee, ”Tau ang tuho tempo dinoa si biasa sipobahine anna sipomuane. 35Ampo' ingkänna tau ang sihatang tuho sumule di hoi' mai di kamateang anna mentama di lino bakahu ang napahenta Kalaena Puang Alataala, dante'ne' la ungnginsang kasipobahineang bahtu' kasipomuaneang. 36Aka' ingkännaii dante'ne' la siita kamateang, katuhoannaii la sinnoante'ne' malaeka'-malaeka' yaho di suruka anna sika mendahinne' petauanna Puang Alataala ang napillei, aka' puhanne' sika ungngolai kamateang anna tuhong sumule. 37Didiona katuhoanna sumule to mate, puhang natula' Musa di tempona anna ungngitai Puang Alataala sinnoa puhpunna api yaling di alla' lohpo ang naoatee, ‘Puang Alataala dianto Dehata ang napenombai Abraham, Isak, anna Yakub.’#20:37 Kel 3:6 38Donetoo Abraham, Ishak anna Yakub inang puhang mate, ampo' naangka' tuhoke' Puang Alataala. Aka' tadiaete' to mate ang umpenombai Puang Alataala ampo' to tuhoetee', aka' Dianto ang mepatuho.”

39Sika ma'tula'mi yato sangngaka to pampakuhu ada' ang unghingngi tula'na Puang Yesus sika naoatee, ”Ahana inang tahpa' si'da-si'da ne pentimba'mu, Tuang!” 40Ya' daliung aha moi mesa tau bahani la napekutana salaing.

Menna keänä' Yato ang dioainte To Dilanti' la Mepasalama'

41Mekutanang Puang Yesus pano yato di to Saduki naoatee, ”Aka boi anna naoaite tau, ‘To Dilanti' la Mepasalama' dianto peänä'anna Tomaraya Daud?’ 42Aka' kalaena Daud ang ma'tula' yaling di Suha' Pampudiang naoatee,

‘Puang Alataala ma'kara pano di Dehatangku naoaintee:

Ohko'o di hao di tando kuanangku,

43lambi' ingkänna balimmu kusuo asang malimuntu' di olomu.’ Mzm 110:1

44Dahi ponna ke di mendehatannai To Dilanti' la Mepasalama' nasangai Tomaraya Daud, ‘Dehatanna,’ ampo' mala toi ke di mentolinonai ‘peänä'annaetee'.’ ”

45Lella' yato tau mai'di ma'pehingngi, ya' ma'tula'mi Puang Yesus pano di pahsikolana naoatee, 46”Madakakoa' pano di to pampakuhu ada', ang pemala liu dipakeangka', hapanganna umpake kaya' ang handang kalambe' anna malai dinenne'i lolo. Noa toi sika nakärä'i liu ponna natabe'ii ingkänna tau di hao di pasa'. Ponna ke maoi ma'sambayang si umpeäng ohko'ang ang handang mahasa, bahtu' ke ahai pa'rame-rameang si nakärä'i mohko' di hao di ongeang ang dipasadiaing to dipakeangka'. 47Sika umbulitu' balu bahine lambi' nahampa'i aka-akanna. Si ma'sambayang kalambe' aka' pemala dioaintee, ‘Ei, meimäng si'da-si'da!’ Dia asammito indee ang la untahimbo tahungkung ang handang matingngi ke nahohto'mi Puang Alataala ke lambi'mi tempona.”

Currently Selected:

Lukas 20: ATQ

Highlight

Copy