Lukas 19

Ta Zakheus sitammu Puang Yesus

1Lambi'mi Puang Yesus tama di Bohto Yerikho. Ya' umpatahhi' lolong pellaoanna ungngolai yato bohto mahoa'. 2Yaling yato di bohto aha mesa tau disanga Zakheus, mesa pongkahana to pahsinga' sima ang to makaka si'da-si'da. 3Pemala liu la ungngita toe' umba noa yato Puang Yesus, ampo' dai mala aka' mahempo'-hempo', dahi nahehengngi solana. 4Ya' napenandaing le'ba' lumumpa' pano di lalang ang la naolai Puang Yesus, umpendolui ingkänna tau mai'di, anna melei dai' di mesa poang ara anna malai naita ke liung.

5Tahpana liu Puang Yesus yato di hao di poang kayu, ya' mentongang dai' di lolo kayu anna untambaii ta Zakheus naoaintee, ”O Zakheus, tuhummo aka' mane la lempängngä' pano di dasammu.” 6Ya' tuhung siang anna umposolai Puang Yesus pano di dasanna sitonda kakahsiang.

7Ampo' yato tau mai'di ang aha donetoo sika momämmäng naoatee, ”Ii, älo' pake la naakue' la mao pano di dasanna to madosa.”

8Tahpana sika di haong di dasanna, ya' ke'de'mi inde ta Zakheus anna ma'tula'i pano di Puang Yesus naoatee, ”O Puang, inde sambaheang ahtasa'ku la kususa pano di to pemase-mase. Anna ponna ke ahai tau ang hali kubulitu' naonge kusinga'i simanna, ya' la kubala'ing pengnguhpa' luhpi'.”

9Ma'tula'mi Puang Yesus naoatee, ”Allo dinoa dioa' sanghapu napasalama'mokoa' Puang Alataala aka' mampetahpa'koa' sinnoa Abraham peneneammu dolu. 10Nasuhung suleä' Kodi' inde Änä' to Lino anna malai umpasalama' sumule tau ang sähsä' lalang.”

Pohapangang didiona modala'

11Donetoo yato tau mai'di mengeke' umpehingngii pepakuhunna Puang Yesus lambi' sika natula'ing mesa pohapangang. Aka' sika la lambi'mi dai' di Yerusalem anna mai'di tau di alla'-alla'naii ang ma'pihki' naoatee la napahandu'mi Kapahentaanna Puang Alataala. 12Dahi naoatee, ”Aha mesa parengnge' mao pano di mesa bohto ang makahao aka' la dilanti' mendahi tomaraya. Puhake' dilanti' mane sumulei. 13Dolunna la mao, untambai dolu sampulo suoanna anna pantangngi nasusai modala', la pantang mesa doi' bulahang, naoaintee, ‘Puta'ia' inde doi' lambi' sumuleä'.’

14Ampo' yato sola bohtona parengnge' sika ungkahi'di' yato parengnge', lambi' sika unsuo sangngaka-sangngaka tau melola anna ungngoainte yato ang la mallanti', ‘Dai kiaku kipotomaraya inde parengnge'!’

15Pihsananna sumuleng yato parengnge' tahpana puha dilanti' mendahi tomaraya. Untambaing yato sampulo suoanna ang hali nabea modala' sika naputa', aka' pemala nainsang sangngaka kauntungang ang sika nalambi'.

16Suleng yato suoang ang uhuna mengngolo naoatee, ‘O Tuang, yato doi' bulahang ang umbeaä' haling kuputa' lambi' mendahing sampulo doi' bulahang dinoa.’

17Ya' naoaming yato tomaraya, ‘Mapia liu ne babemu. Dionto suoang ang dai mantondong kamapiaammu. Dinoa la kubeao kakuasaang ungkuasai sampulo bohto mahoa' aka' malao dipetahpa' yaling di kaha-kaha ang saohko'.’

18Sule tunne' yato suoang ang kaderuanna anna naoaitee, ‘O Tuang, puhang kuputa' yato doi' ang umbeaä' lambi' mendahing lima doi' bulahang dinoa.’

19Naoaminne'tee, ‘Kuasaio dio lima bohto mahoa'.’

20Pihsananna sule tunne' mesa suoang ang senga' anna naoaitee, ‘O Tuang, indeeng yato doi' ang umbeaä', moi taahai tiu'bi' aka' kupoto' mahha' lenso. 21Nasuhung kupanoa aka' mahea'ä' mating di dio, aka' masahhu'o anna si ungngala tomande'o pampatokana tau, anna umpepaheo bela'na tau ang dai aha ungkalupui.’

22Ya' naoaminte yato tomaraya, ‘Eh, ahana inang diong inde to karake. La kuhohto'o situhu' tula'mu tobou dio. Ungnginsammi umba noa sipa'ku dianto masahhu'ä', si ungngalaä' pampatokana tau, anna si umpepaheä' bela'na tau ang dai aha kukalupui! 23Ponna noa yatoo, ya' akana dai umbea pano di tau senga' ne doi'ku ang la mala mambungai, lambi' ke sumulemä' mala kuala sitonda bunganna?’

24Ma'tula'mi yato parengnge' pano yato di tau ang sika ke'de' donetoo naoatee, ‘Oa' hampa'ine' yato doi' ang dibea anna umbeai pano di suoang ang sampulo doi'na.’

25Sika mekutanang naoatee, ‘O Tuang, la naakake' nei' aka' mai'dinne' doi'na?’

26Natimba'mi naoaintee, ‘Menna-menna ang inang ahang aka-akanna la dihängngängngiking, ampo' tau ang dai aha, moi sai'di' ang naampui bilang la dihampa'i tuke'. 27Anna ne mating tau ang mampa'baliä' ang dä' mantahimbo mendahi tomarayannaii, bahai mai di oloku anna sika umpateii kuita.’ ”

Puang Yesus dipa'käyyängngi tahpana la mentamang di Yerusalem

28Puhanna yato Puang Yesus untula' pepakuhunna pano di tau mai'di, ya' mengkalaong ungkadoluangngi yato ingkännaii umpatahhi' pellaoanna ludai' di Yerusalem. 29Tahpana la lambi'mi Puang Yesus anna pahsikolana dai' di Bohto Betfage anna Betania yaho di Tanete Zaitun sidungku' Yerusalem, ya' unsuong derua pahsikolana mendolu, 30naoatee, ”Pendolumokoa' dai' indo di bohto ang landa'. Ke lambi'mokoa' dai', la ungngitakoa' mesa änä' keledai ang tisangke' ang dake' aha napensakei tau. Buhkeii anna unghendengngingkä' yaho mai. 31Anna ponna aha ang mangkutanaikoa' naoatee, ‘Aka boi anna umbuhkeiia'?’ ya' oaintee, ‘Napahallu Puang.’ ”

32Ya' mao si'dang yato to derua anna nalambi' asangngi yato ang naoaing Puang Yesus. 33Tahpana lella'mi nabuhkei pesangke'na yato keledai, ya' mekutanang yato puänna naoatee, ”Akana la umbuhkeirakoa' dio ne keledai?”

34Sika natimba'mi naoatee, ”Napahallu Puang.”

35Tahpana lambi' naung di Puang Yesus, sika ungngalaing kaya'naii sallapi' anna naampi'ing yato keledai, mane umpapensakei Puang Yesus. 36Lella' mellao yato keledai ang nasakei Puang Yesus, lella'ne' yato tau mai'di ungngampa'i pakeannaii naung di lalang ang la naola yato keledai, tandana sika umpakeangka' Puang Yesus.

37Tahpana sika ullambi'mi ongeang naonge mesolo'i luyaho mai di Tanete Zaitun, ya' napahandu'mi yato ingkänna tau ang mentindo' di Puang Yesus sika koha masannang liu umpudi sanganna Puang Alataala aka' ingkänna kaha-kaha ang mepusa'-pusa' ang hali sika naita. 38Sika koha naoatee,

”La dibehe inde Tomaraya ang nasuo Puang Alataala sule!

Kamasahkeang yaho di suruka anna matande sanganna Puang Alataala yaho di ongeang handang malängkä'.” Mzm 118:26

39Aha sangngaka-sangngaka to Farisi ang mempola toe' yato di tau mai'di untindo' Puang Yesus. Sika naoatee, ”O Tuang, sängkäii ne pano to pentindo'mu anna dai napanoa!”

40Natimba'mi Puang Yesus naoaintee, ”Kupainsangngio, ponna ke sika mahtangngi, ya' inde mai batu di lalang ang la sika koha.”

41Tahpana Puang Yesus undungku'ing Bohto Mahoa' Yerusalem anna ungngitang yato bohto, ya' nadusengnging 42anna naoaitee, ”Boro'rakoa'etee', bayuke'ne' ke la pake malai ungnginsang dinoa yato aka ang la umbahaingkoa' kamasahkeang yaho mai di Puang Alataala, ampo' la diaka dio aka' dai nalambi' pihki'mu didiona yatoo. 43La aha tempona la sule balimmu ungkulilingngi bohtomu anna natolla'koa' umpake ingkänna pangkahka' pa'tolla'anna, lambi' dakoa' aha la mala le'ba' mengkalahsu'. 44Mane hopu asangkoa' anna napasitale-tale asangngi tembo'mua'. Dai aha la napapela'bi moi sai'di', aka' daia' ungnginsang ungngoatee suleng Puang Alataala napasalama'koa'.”

Puang Yesus unghambai ingkänna to pa'bulele yaling mai di Dasang Ada'na Puang Alataala

45Donetoo mentamang Puang Yesus di Dasang Ada'na Puang Alataala, anna napahandu'i unghambai asang ingkänna to pa'bulele ang aha yaling yato di tähämpä' Dasang Ada'na. 46Naoante pano diii, ”Aha tiuki' yaling di Suha' Masero ang naoatee, ‘Dasangku dianto dasang ang la naongei tau ma'sambayang.’#19:46a Yes 56:7 Ampo' umpadahirea' dio pembunianna to bokoti!”#19:46b Yer 7:11

47Allo-allo Puang Yesus mampakuhu yaling di Dasang Ada'na Puang Alataala. Masae allong yato kapala-kapala imang anna to pampakuhu ada' pemala la napatei. 48Ampo' dai sika nainsang umba la napanoa napasulepano yato pampemalannaii, aka' tuhtuang mai'di tau donetoo ang nakärä'i umpehingngii pepakuhunna.

Currently Selected:

Lukas 19: ATQ

Highlight

Copy