YouVersion Logo
Search Icon

MATIUS 26

26
Owe Yesus batatii atakam
(Mrk. 14:1-2; Luk. 22:1-2; Yoh. 11:45-53)
1Emesare, Yesus emes atakam akorekorome. Emes atakam akorekoromerawa, Are atakam abajamkai owe akorome. 2“Era Paskah Bare Pakambwi joon aemtemas. Tare emes tamsam. Era bare ere, owe, Asamot Anakot Ajaoreme Ipit salib wus oup batatopom, aotasimemomtamtemas.” Emes atakam aesime.
3Emesare, Allah Tame pak baem owe daytu anama Yahudi owe duturu, Allah Tame pak baem ipit daytu juas Kayafas atame daytu ajarisiapes. 4Era owe, Yesus, tiruu bajipirtaer, wanam batatii, atakam akukuramtiies. 5Era owe ere, “Dare era pak baem ara pakambwi bomon bas. Me bambi owe owentakam dara baem-ombar.” Emes atakam aesimes.
Pinim akot minyak Yesus kuus aokomdaeme atakam
(Mrk. 14:3-9; Yoh. 12:1-8)
6Emesare, Yesus kota Betani aemape ere, Are owe juas Simon atame ajiiape. Bonak ere, era ipit owe ombare bamarem damo pitini potanak ipitin. 7Yesus era tame bomon aemape ere, taot taka, burfi, Armat Ipitpu atoomtine. Era burfi juas “pualam”. Emesare, era burfi, pinim akot minyak aptam. Era minyak harga daytinak. Armat Ipitam amos taondemap, era taot, era minyak Armat Ipit kuus aokomdaeme. 8Me abajamkai oweam emes apores. “Ara taot era minyak aokomosommar ere, wama tamenem? 9Are era minyak, uang auumamtaerto, uang daytinak ataettem. Era uang arawa, era pak apok owe batetam, ere akot.” Emes atakam aesimes. 10Yesusam emes atakam apore. Ararawa, “Tare ara taot apa jurusummakam? Era aemtamman pak, ere akotnak. 11Era pak apok owe tadamopu setep aemapaartemas. Dere ere, tadamopu setep baemapaar apok. 12Ara taot era minyak dedamo aokomdaemman, ere are dedamo era dambir asan bajiitaetii are. 13Atakamnak, owe Allah Akot Atakam samaniin samaniin akoretamtas, owe era taot aemtamman pak emes atakam jane ajitemas.” Yesus emes atakam aesime.
Yudas, Yesus, jokoman owe baotasimemomtam aememe atakam
(Mrk. 14:10-11; Luk. 22:3-6)
14Emesare. Yesus bajamkai owe 12 wan ipit taka juas Yudas Iskariot. Armat ipit Allah Tame pak baem owe daytupu aesose. 15“Dere Yesus tara aotasimemomtamtey, tare wama pak tetamtankum?” Emes atakam aesime. Era owerawa, uang perak 30 era ipit atetames. 16Era bare ajiire, Yudas, Yesus, era owe baotasimemomtam asan akot, andimarpore.
Yesus anama abajamkai owe Paskah Pakambwi Bare amos takan andes atakam
(Mrk. 14:12-21; Luk. 22:7-14, 21-23; Yoh. 13:21-30)
17Emesare. Era Eek Apok Roti Pakambwi bonak baem bare aemanse. Me Yesus bajamkai oweam Armat Ipit ambaromes. Are atakam akoromes. “Wore Paskah Bare Pakambwi ete asana detem? Dare pakambwi pak bakenem.” Emes atakam aesimes. 18Armat Ipit arawa, “Era kota, jipit taka bamarporay. Atakamam era ipit akoromay. ‘Me guruam, “Era dambir atemtey bare, ere setepnak. Denom, debajamkai oweam, Paskah Bare Pakambwi, wotame andetemarom.’ ” Emes aesimay.” Yesus emes atakam aesime. 19Emesare, era bajamkai owe, Yesus atakam ji aees. Are Paskah Bare Pakambwi pak akenemes.
20Eam arawa, Armat Ipitam, era bajamkai owe 12am, amos banda andaepakiapes. 21Amos taondemapes, Armat Ipit atakam akorome. “Atakamnak, tare wan ipit taka Dere era jokoman owe aotasimemomtamteman.” Emes atakam aesime. 22Era oweam jak pota aemapteteres. Ararawa, Armat Ipit ajateporteteres. “Tuhan! Era atakam akoremarem ipit, der apok apeno?” Emes atakam aesimteteres. 23Armat Ipit arawa, “Amos, bwi Deratin asetenmamum ipit taka, jokoman owe aotasimemomtamteman. 24Me Asamot Anakot Ajaoreme Ipit dambir atemtem. Ere Alkitab atakam jipu. Me, Armat Ipit, era jokoman owe aotasimemomtamto ipit, asan potanak aemaptem. Era ipit bajisames apok ere, are asan akot.” Emes atakam aesime. 25Me Yesus, era jokoman owe aotasimemomtamto ipit juas Yudas, atakamam akorome. “Guru! Ere derane?” Emes atakam aesime. Yesus arawa, “Emesare. Era akoremarem atakam jipu.” Emes atakam aesime.
Tuhan perjamuan atakam
(Mrk. 14:22-26; Luk. 22:15-20; 1 Kor. 11:23-25)
26Emesare. Era owe amos banda aemapes ere, Yesusam amos ataere. Are terima kasih atakam Allah akorome. Are era amos akookome, wanam abajamkai owe sai asaietame. “Ara amos bataenaay. Are dedamo dasa.” Emes atakam aesime. 27Armat Ipit arawa, mbok anggur bwi aptam ataere. Terima kasih atakam Allah akorome. Wanam era mbok bwi era owe sai asaietame. “Tare takes ara bwi panday. 28Ara bwi deesee. Bonaknak ere, Allah asamot owe bajortaer ataaji aee. Deesee owe tanane bajortaer ajirindaetem. Me deesee, Allah ataaji aee atakam, atakamnak aporomtamtem. Me deesee ajirindaeto, are owe tanane adosa bimak binip bajanimemtam are. 29Tare ere, Baporay! Waa ajiire, dere ara anggur bwi bonda apok— Dere ai anggur bwi Deritipit aAi Tapirmi tare takan aondetam bare ajiire.” Yesus emes atakam aesime. 30Era owerawa, Allah basitim so aees. Allah basitim so aees arawa, fami juas Saitun aesoses.
Petrus Yesus apatimto atakam
31Emesare. Yesus atakam era owe akorome. “Me Alkitabam, ‘Dere era domba banamek batai ipit atatiitemin. Era dombarawa, apatakuostemas.’ Emes atakam akorem. Emesare, waa eam tare takes Dera bajamkai ambompimtemankum. 32Me, Allah Dera ajaoromwasumtumtan, Dere Galilea tapirmi bonak aesostemin. Tararawa, asep aesostemakam.” Emes atakam aesime. 33Petrus arawa, atakam Armat Ipit akorome. “Me wan owe takes Wora bajamkai ambompimtanis apaye, dere ere, apok.” Emes atakam aesime. 34Yesus arawa, “Atakamnak, waa eam wore atakam bare bamintep bonak akorestemarem, ‘Dere Yesus demsam apok,’ emes atakam akorestemarem. Me ajomo ipit arawa, atakam asep akorestem.” Emes atakam aesime. 35Petrus arawa, “Owe Woratin takan atatiitemaroas apeno. Dere ere, ‘Dere Yesus demsam apok,’ emes bajie apoknak.” Emes atakam aesime. Era bajamkai owe takesam emes atakam taka akores.
Yesus atakam Allah ajanime atakam
(Mrk. 14:32-42; Luk. 22:39-46)
36Emesare. Yesusam, abajamkai oweam, asan juas Getsemanipu aesoses. Armat Ipit arawa, “Tare ara asan emes aemapay. Dere atakam Allah erapu bajanima.” Emes atakam aesime. 37Armat Ipit arawa, Petrus anama Sebedeus andep amnuk atoomtine. Anom jak potanak aememen. Emesare, Are jak apoknak aememen. 38Are atakam era owe akoromen. “Dere jak potanak aememmin— Dere dambir bakamiamesken tamen. Tare ere, ara asan emes aemapay. Wanam banamek takan Dera jamtaiompani.” Emes atakam aesimen. 39Are setep apokpee ambaremen. Wanam andaepariamsen. Are atakam Allah ajanimen. “Dot! Akot aportem, Dere bajirisem bas. Me, era akot apormin pak jipu baem bas. Era akot apormarem pak jipu taka aemey.” Emes atakam aesimen.
40Armat Ipit arawa, abajamkai owepu aofasiendaen. Are era owe ise aemanses aporen. “Petrus! Tare jam takakope banamek Dera baemetaiap asan apoke? 41Tanom banamek emes ataiapaaray. Atakam Allah emes ajanimaaray. Bii Kapar Ipit taredosa baem batatapimtaa-ombar. Tare Allah atakam ji bae, jak aseseromemakam. Me, ta damo kumiti.” Emes atakam aesimen. 42Emesare, Armat Ipit aoesosen. Wanam atakam Allah aojanimen. “Dot! Wore Dere bajirisem akot aportem, woakot pak jipu aemey.” Emes atakam aesimen. 43Armat Ipit arawa, era owepu aofasiendaen. Are era owe ise aoemanses aoporen. Era owe isiritnak aemansesen.
44Armat Ipit arawa, era owe beken aojiosen. Are bare bamintep atakam Allah aojanimen. Are bonak atakam ajanime atakam taka aojanimen. 45Armat Ipit arawa, abajamkai owepu aofasiendaen. Are atakam era owe akoromen. “Tare ise emansakame? Tare kais demakame? Dere waa are. Jipit taka Asamot Anakot Ajaoreme Ipit era dosa owe aotasimemomtamum. 46Tanom bawasitay! Baesosamo! Dera aotasimemomtamtan ipit andaem are.” Emes atakam aesimen.
Owe Yesus ajipirtaeres atakam
(Mrk. 14:43-50; Luk. 22:47-53; Yoh. 18:3-12)
47Yesus atakam taoemekoremape, Yudas akan ajakandaen. Are Yesus bajamkai owe 12 wan ipit taka arare. Owe tananenakam takan ajamdaes. Are jirao warim anama wurini atoomdaes. Me Allah Tame pak baem owe daytuam, Yahudi owe duturuam, emes atakam asakamtames. 48Bonak ere, Yesus aotasimemomtamto ipit, atakam, era owe tanane, akorome. “Era ake afapitey ipit, era ipit are. Are ajipirtaeray.” Emes atakam aesime. 49Emesare, Yudas, Yesuspu akan ambareme. “Guru! Selamato!” Emes atakam aesime. Armat ipit arawa, Yesus ake afapie. 50Yesus arawa, atakam armat ipit akorome. “Dip! Era andaeomemmanim pak aemey.” Emes atakam aesime. Era owerawa, Yesus ambaromes. Are Armat Ipit ajipirtaeres, wanam ban fiaknak akimomes. 51Me Yesus takan aememe ipit taka, jirao warim asumtaere. Ararawa, Allah Tame pak baem ipit daytu akarai baetam ipit janemak asakamdaeme. 52Yesus arawa, atakam era ipit akorome. “Era jirao warim ese aoweapomey. Owe jirao warim ataertas, are jirao warim dambir atetemas. 53Dere Deritipit dera bajortaer atakam ajanimtey apaye, Armat Ipit, amalaikat owe tananenak ataendaemtem. Wore emes womsam apoke? 54Me, ara owe aememas pak, Alkitab atakam jipu. Allah, amalaikat owe tananenak ataendaemto apaye, ara aememes owe Alkitab atakam jipu pak baemeem asan apok.” Emes atakam aesime.
55Yesusam atakam era owe tanane ametekorome. “Tare jirao warim anama wurini dera bataer, atoomdaemakam, ere wama tamenem? Tare ere, dere pak tasa baetaa ipiti? Juiin afaafeaarir Dere Allah Tame bomon aemapa ajaio, wanam atakam aememtama ajaio. Tare ere, Dera bajipirtaer apoknak aemenkum.” Emes atakam aesime. 56Emesare, era aemes pak takes, Allah atakam bakoretam owe buku aeapomes atakam jipu baem are. Emesare, Yesus bajamkai owe takes, Armat Ipit beken ajioses. Are ombare aesoses.
Yesus, atakam basakamtii owe daytu bipu aememe atakam
(Mrk. 14:53-65; Luk. 22:54-55, 63-71; Yoh. 18:13-14, 19-24)
57Emesare, Yesus ataeres owe, Armat Ipit, Allah Tame pak baem ipit daytu juas Kayafaspu atomasesen. Era asan ere, Allah atakam baememtam owe anama duturu owe ajarisiapesen. 58Petrusam, Allah Tame pak baem ipit daytu atamsanpu, Yesus fe setep apok asaramen. Armat ipit era tame ajiie, wanam Allah Tame banamek batai owe takan ajamemapen. Era owe Yesus aemtas pak bapor aren.
59Me Allah Tame pak baem owe daytu anama atakam basakamtii owe daytu Yesus batatii, emes atakam basakamtii, ere akoten. Erarawa are pote ateman batam owe atakam ajanimes. Are era owe, “Yesus emes pota pak aeme,” bajiteter akoten. 60Pote ateman batam owe tananeam andaea ajiesen. Me, era ateman atames atakam, Yesus batatii pak apok. Asep arawa, jipit amnuk andaeemisen. 61Are atakam akoreemis. “Yesusam, ‘Dere Allah Tame batietiiam, bare bamintep boeapomam, emes fiak pak aemomey.’ Emes atakam aesime.” Era ipit amnuk emes atakam aesimemisen.
62Me Allah Tame pak baem ipit dayturawa, awasiten. Atakamam Yesus akoromen. “Ara aememares owe, Wore jaos atakam akoremas. Wore ere, era owe atep ajitpem?” Emes atakam aesimen. 63Yesus ere, atakam apoknak aememen. Me Allah Tame pak baem ipit dayturawa, atakam Armat Ipit aokoromen. “Dere jiine Allah juas ajiemmin. Erarawa dere atakam wora asakamtammin. Atakam dara okoretamaro. Wore Allah Aeremtaere Ipit ape? Wore Allah Andep ape?” Emes atakam aesimen. 64Yesus arawa, “Emesare, Dere era akoremarem atakam jipu. Dere ere, atakam tara akorommin. Waa bare ajiire, tare Asamot Anakot Ajaoreme Ipit, fiaknak Allah bo poman baemap, aportemakam. Tanom Armat Ipit, wonamo ten baemem andaeto aportemakam.” Emes atakam aesimen. 65Me Allah Tame pak baem ipit dayturawa, apakaian akamosomen. Atakamam akoren. “Ara ipit Allah awaren. Erarawa are tame atakam daytu akorem. Dare ateman batam atakam jane bojie bas. Tare waa era tame atakam akoremar jane ajimakam. 66Tare ere, wama atakam sakamtiimakam?” Emes atakam aesimen. Era owerawa, “Era Ipit potanak pak aemum. Dambir batemto.” Emes atakam aesimesen.
67Emesare, era owe besa Armat Ipit bi ajiepirimesen. Are ban fon Armat Ipit aemesen. Wan owerawa, Armat Ipit ake apakamesen. 68“Wore Allah Aeremtaere Ipitkor. Wusup tao teman? Atakam akoretamaro.” Emes atakam aesimesen.
Petrus, Yesus apatime atakam
(Mrk. 14:66-72; Luk. 22:56-62; Yoh. 18:15-18, 25-27)
69Emesare, Petrus tasan aemapen. Karai baetam taot arawa, armat ipitpu ambaremen. Are atakam armat ipit akoromen. “Wonom Galilea ipit juas Yesus takan ajamememaarim.” Emes atakam aesimen. 70Me Petrus ere, era owe takes bipu apatimen. “Era akoremarem atakam demsam apok.” Emes atakam aesimen. 71Armat ipit arawa, jimsappu aemjaren. Wan karai baetam taotam armat ipit aporen. Are atakam era asan aememes owe akoromen. “Ara aemema ipit Nasaret Ipit juas Yesus takan ajamememaarir.” Emes atakam aesimen. 72Armat ipit arawa, aopatimen. “Pote apoknak. Allah banamek taiapa. Dere era ipit demsam apok.” Emes atakam aesimen. 73Asep arawa, era asan aememes owe, Petrus ambaromesen. Are Atakam Armat Ipit akoromesen. “Wonom era owe ajoo ipit. Era akoremarem atakam era owe atakam awar apormarom.” Emes atakam aesimesen. 74Petrus arawa, “Pote apoknak! Allah banamek taiapa. Emesare, dere Yesus demsam apok.” Emes atakam aesimen. Emesare. Ajomo ipit atakam ametekoren. 75Bonak ere, Yesus atakam Petrus akoromen. “Wore atakam bare bamintep bonak akorestemarem, ‘Dere Yesus demsam apok,’ emes akorestemarem. Me ajomo ipit arawa, atakam asep akorestem.” Emes atakam aesimen. Emesare. Petrus era atakam, bimak binip ajanimtaeren. Ararawa, tasan ajise, wanam bate daytinak ambaten.

Currently Selected:

MATIUS 26: LAIASC

Highlight

Share

Copy

None

Want to have your highlights saved across all your devices? Sign up or sign in