MATIUS 25
25
Aitawais tapes ban amnuk baetaa atakam
1“Era bare ere, Allah aowe baomep atakam, aitawais tapes ban amnuk aemes atakam emes tamen aemamestem. Era tapes apelita atoomemteteresen. Ararawa, ajoo taot japen ajuutar ipit bimnuk baemamtaer ajisesen. 2Me wan aitawais tapes ban taka bimak binip apok aememesen. Me wan aitawais tapes ban takarawa, bimak binip aptam aememesen. 3Era bimak binip apok tapes, apelita atoomemteteresen. Me, are wan minyak batoomem apoken. 4Era bimak binip aptam tapes ere, minyak to pak aptam anama pelita atoomemteteresen. 5Era ai petae ipit ere, aerumkope andaen. Erarawa era tapes takes ise manames aemapesen. Wanam ise aputamsesen.
6Eamnak arawa, owe atakam afaketaaesen. ‘Baporay! Armat ipit andaem are. Tare armat ipit bimnuk aemamtaeray.’ Emes atakam aesimesen. 7Era aitawais tapes takes arawa, awasites. Are apelita akenemapomkoromesen. 8Era bimak binip apok tapesam, atakam era bimak binip aptam tapes akoromesen. ‘Wan minyak dara tetamaroay. Dapelita basasapiamesmas.’ Emes atakam aesimesen. 9Era bimak binip aptam tapes ere, ‘Daminyak daytu apok. Erarawa dare minyak tara baemetetam asan apok. Tare ere, toko esosay. Taminyak ato takamjititteteray.’ Emes atakam aesimesen. 10Emesare, era bimak binip apok tapes minyak bajit ajisesen. Era waut aemjares ere, era ai petae ipit andaen. Era pelita atamkenemapomkoromes tapes ere, armat ipit, era pakambwi tame takan ajiiesen. Owerawa, era tame jimsap akapimapomesen.
11Asep arawa, wan aitawais tapes aofasiesen. ‘Dot! Jimsap bapaimtamaro.’ Emes atakam aesimesen. 12Armat ipit ere, ‘Atakamnak, tare demsam apok.’ Emes atakam aesimen. 13Emesare, tanom are. Banamek ataiaaray. Tare taTuhan andaeto baream, jamam, tamsam apok.”
Karai baetam owe bamintep baetaa atakam
(Luk. 19:11-27)
14“Wanam Allah aowe baomep atakam, ere wan tapirmi aesose ipit aeme atakam emes tamen are. Armat ipit akarai baetam owe ajaten. Ararawa, aapak, era owe banamek bataitam, atetamen. 15Armat ipit, uang perak ban taka, wan karai baetam ipit atetamen. Are uang perak jamnuk wan ipit atetamen. Ararawa, uang perak taka wan ipit atetamen. Era atetame pak, era karai baetam owe tastu pak jipu atetamteteren. Armat ipit arawa, jii tapirmi aesosen. 16Uang perak ban taka ataere ipit, era uang, pak auumamtaera ajaien. Erarawa are uang perak ban taka akaima ajaien. 17Uang perak jamnuk ataere ipit emes aemen. Ararawa, wan uang perak jamnuk akaima ajaien. 18Uang perak taka ataere ipit ere, se jipa asisien. Ararawa, akarai armat ipit uang asaimtiien.
19Emesare, tarainak ere, era karai armat ipit afasien. Ararawa, era atetame uang atakam akoren. 20Uang perak ban taka ataere ipit tame ajiien. Are uang perak ban amnuk takes atoomjiien. ‘Dot! Wore wouang perak ban taka atetamenim. Baporey! Dere wan uang perak ban taka aokaimo.’ Emes atakam aesimen. 21Me akarai armat ipit arawa, atakam era ipit akoromen. ‘Era aemem pak, ere akotnak. Wore akot karai baetam ipit anama karai baetam ipit anakot aememem. Wore era pak kope aemomem ere, wore owe anakot aememem. Emesare, dere, pak daytu banamek bataitam, wora ataemomtemin. Wonom de! Dare jak akot takan aememamo.’ Emes atakam aesimen. 22Uang perak jamnuk ataere ipitam tame ajiien. ‘Dot! Wore wouang perak jamnuk atetamenim. Baporey! Dere wan uang perak jamnuk aokaimo.’ Emes atakam aesimen. 23Me akarai armat ipit arawa, atakam era ipit akoromen. ‘Era aemem pak, ere akotnak. Wore akot karai baetam ipitam, karai baetam ipit anakotam, aememem. Wore pak kope aemomem ere, wore owe anakot aememem. Emesare, dere pak daytu banamek bataitam, wora ataemomtemin. Wonom de! Dare jak akot takan aememamo.’ Emes atakam aesimen.
24Emesare. Uang perak taka ataere ipitam, tame ajiien. ‘Dot! Wore jokoman ipit aporo. Wore wobajapom apok pak akene eek ataenemarem. Wonom wobajow apok amos ataenemarem. 25Dere emes aporo, wanam ombare aememo. Dere wouang perak taka se bomon asaimtiio. Baporey! Wopak asinta.’ Emes atakam aesimen. 26Me akarai armat ipit arawa, atakam era ipit akoromen. ‘Wore karai baetam ipit jaos aememem. Wonom bamesem ipit aememem. Dere dobajapom apok pak akene eek ataenemin. Denom dobajow apok amos ataenemin. Wore emes aporeme? 27Wan banamek batai owe, wan owe uang ataeta ajiemas. Asep arawa, are emes uangam, bokaim uangam, era owe aofasimtama ajiemas. Wore deuang emes owe atetamtemaw. Wore emes aemeaw, dere aofasio ere, dere era atetamo uangam, era bokaim uangam, botaeraw.’ Emes atakam aesimen. 28Era karai armat ipit arawa, atakam wan karai baetam owe akoromen. ‘Emesare, atoommar uang perak taka botaerey, wanam era uang era uang perak ban amnuk atoommar ipit atetamey. 29Pak aptam owe, wan pak aotaettemas. Ararawa, pak daytu atoomemtemas. Me, owe, era pak apok owe era apaknak aotaertemas. 30Tare era pota karai baetam ipit jiitinak asan ataejiimay. Era asan ere, owe bate ambattemas. Are damo jende atawuomtemas.’ Era karai armat ipit emes atakam aesimen.”
Ajirisemaartas owe anama jiinenak aememaartas owe, atakam
31“Me Asamot Anakot Ajaoreme Ipit aakotipitnak aememe andaeto, amalaikat owe takesam takan ajamdaetemas. Armat Ipit arawa, owe baomep afe baemap akotipitnak asan andaepakiaptem. 32Era samaniin samaniin owe takes, Armat Ipit bipu ajarisiemtemas. Armat Ipit arawa, era owe, oweo aememayes apa asan ajimemomtem. Ere domba banamek batai ipit domba anama kambing apa asan poretaema ajiemar emes tamen are. 33Armat Ipit domba bo poman ataemomtem. Ararawa, kambing tamo poman ataemomtem. 34Rajarawa, atakam era bo poman baemem owe akoromtem. ‘Deritipit, asan akot tara aemen. Armat Ipit ara tapirmi akenemapome bare are Aowe Baomep Asan akenemapome. Tanom de! Era asan ajiiapay. 35Emesare, dere amosto aememo. Tararawa, amos atetamenkum. Denom bwito aememo. Tararawa, bwi atetamenkum. Denom bambinak ipit aememo. Tararawa, tame atoomjiienkum. 36Denom damo baso aememo. Tararawa, pakaian atetamenkum. Denom damo aememo. Tararawa, asan akot aemenkum. Denom buji tame bomon aemapo. Tararawa, ajinaopora ajienkum. Erarawa tare era asan ajiiapay.’ Raja emes atakam aesimtem. 37Era turu owerawa, Armat Ipit ajateportemas. ‘Tuhan! Dare Wore amosto aporom, wanam amos Wora atetamom, ere ete bare emom? Danom Wore bwito aporom, wanam bwi Wora atetamom, ere ete bare emom? 38Danom Wore bambinak saman ipit aporom, wanam tame atoomjiiom, ere ete bare emom? Dare Wore damo baso aporomam, wanam pakaian Wora atetamom, ere ete bare emom? 39Wore damo ajauemam, buji tame bomon aemapemam, wanam ajinaopora ajiom, ere ete bare emom?’ Emes atakam aesimtemanis. 40Me rajarawa, atep ajittem. ‘Atakamnak! Ara aememes dejoo owe, ere juas apok owe. Me, tare era pak dejoo ipit takakope aemekem apaye, tanom era pak dera aemenkum.’ Emes atakam aesimtem.
41Armat Ipit arawa, atakam era tamo poman baemem owe akoromtem. ‘Tanom te! Debipu baemem bas! Baesosay! Allah tara ajurusumteman. Armat ipit, era basapie apoknak jisimak asan, akenemapome. Ere Bii Kapar Ipitam, era amalaikat takesam, bajurusum asan erare. Tanom era jisimak asan ajiiapay. 42Dere amosto aememo. Me, tare amos Dera batetam apoknak aemenkum. Denom bwito aememo. Me, tare bwi Dera batetam apoknak aemenkum. 43Denom bambinak saman ipit aememo. Me, tare dera batoomjii apoknak aemenkum. Denom damo ajauo. Denom buji tame bomon aemapo. Me, tare dera batoomjii apoknak aemenkum. Denom damo ajauo. Denom buji tame bomon aemapo. Me, tare Dera bajinaopor apoknak aemenkum.’ Emes atakam aesimtem. 44Era owerawa, ajateportemas. ‘Tuhan! Wore amosto aememem apaye, bwito aememem apaye, bambinak saman ipit aememem apaye, damo ajauem apaye, buji tame bomon aemapem apaye, dararawa, emes aporom, wanam dare asan akot Wora boem apok, ete bare emom?’ Emes atakam aesimtemas. 45Armat Ipit arawa, atep era owe ajittem. ‘Atakamnak, tare, ara aememares juas apok owe, asan akot baem apok aemekem apaye, ere tanom asan akot Dera boem apok aemenkum.’ Emes atakam aesimtem. 46Emesare, era owe, era bajirisemaar asan aesostemas. Era turu owerawa, jiinenak aememaartemas.” Yesus emes atakam aesime.
Currently Selected:
MATIUS 25: LAIASC
Highlight
Share
Copy

Want to have your highlights saved across all your devices? Sign up or sign in
@LAI 1994