YOHANES 8

1Yesus ere, fami juas Saitun aesose. 2Ajofe tomnak, Armat Ipit Allah Tame aoesose. Owe takesam afojomes. Armat Ipit arawa, andaepakiape, wanam atakam era owe aememtame. 3Me Musa Basakamtam Atakam baememtam oweam, Parisi oweam, taot taka atoomjiies. Are era taot owe tamane ande aporesen. Emesare, are era taot era owe bipu baemem atakam asakamtames. 4Ararawa, atakam Yesus akoromes. “Guru! Owe, ara taot, owe tamane andar, banamek amba aporaresen. 5Emesare, Musa Basakamtam Atakam, emes atakam aeapome: ‘Tare, eka, owe tamane andar taot asampirimay.’ Musa Basakamtam Atakam, ere emes atakam akorem. Wore ere, wama atakam bimak binip emommarem?” Emes atakam aesimes. 6Era owe, Yesus Allah pota atakam bakore, akot ajies. Ere Armat Ipit Allah pota atakam korem baporeji aren. Erarawa are emes Armat Ipit ajatepores.

Yesus ere, peter andaepuape, wanam banbi wao tapirmi aeapome. 7Era owe ere, Armat Ipit ajatepora ajaies. Yesus emes apore, wanam jimas awasie. Are atakam akorome. “Me tarmamon dosa apok ipit apaye, are eka era taot bonak bakorompirimto.” Emes atakam aesime. 8Armat Ipitam jimas aojirape, wanam wao tapirmi aoeapome. 9Era owe emes atakam jane ajies, are taka esosa, taka esosa, ajies. Me emak fiak parat owe bonak atakamesoses. Era ai owerawa, asep aesoses. Erarawa Yesusam, era taotam, me wan owe tanane bipu apa aemememis. 10Yesus arawa, awasite. Are atakam era taot akorome. “Era owe ete? Wopere ambeanis atakam bakore owe apoknake?” Emes atakam aesime. 11Era taotam, “Emesare. Depere ambeanis atakam bakore owe apok.” Emes atakam aesime. Yesus arawa, “Denom woemarem potanak pak atakam bakore apok. Wonom, te! Wonom dosa boem bas.” Yesus emes atakam aesime.]

Yesus ara aemansa tapirmi sare anakot atakam

12Emesare. Yesus atakam era owe akorome. “Dere owe atakam aememtamtemin. Dere ara aemansa tapirmi sare anakot Derare. Dere sare Dera ajamkaimanis owe atetammin. Erarawa era owe jiiti bomon bojar apok aemtemas. Denom jiinenak era owe atetammin.” Emes atakam aesime.

13Me Parisi oweam atakam Armat Ipit akoromes. “Wonom wodamo atakam Womba akoremarem. Emesare era atakam, atakamnak apok.” Emes atakam aesimes.

14Yesus arawa, “Dere aendaeo asan demsam. Denom aesostey asan demsam. Erarawa Denom dedamo atakam Dema akoretey, era atakamam atakamnak. Me, tare era aendaeo asan tamsam apok. Tanom era aesostey asan tamsam apok. 15Me owe apota pak atakam asakamtiimakam, ere asamot bimak binip taka. Dere ere, waa owe apota pak atakam basakamtii apok. 16Denom depa apok. Deritipit ataendaemen. Armat Ipitam dedamo setep aemeta. Erarawa Dere owe apota pak atakam asakamtiitey apaye, era asakamtiitey atakam, ere atakamnak. 17Me Musa Basakamtam Atakam Buku emes atakam are: ‘Owe jamnuk atakam awar akoretamis, aatakam atakamnak.’ Era Buku emes atakam aeapoma. 18Emesare, Denom dedamo atakam dema akoremin. Deritipit Dera ataendaemen. Anom dedamo atakam akorem.” Emes atakam aesime.

19Era owerawa, “Me Wuritipit etepuram?” Emes atakam aesimes. Yesusam, “Tare Dere tamsam apok. Tanom Deritipit tamsam apok. Tare Dere tamsam ere, Deritipitam tamsam.” Emes atakam aesime. 20Yesus ara atakam takes Allah Tame bomon akoretame. Are Allah Tame uang bataapom asanpu aememe. Owe Armat Ipit bajipirtaer bare baemames apok. Erarawa owe Armat ipit bajipirtaer apok.

Tare era aesostey asan baemeesos asan apok atakam

21Yesus atakam era owe aokorome. “Dere aesostemin. Tanom Dera andimartemankum. Me, tare dambir tadosa aptam aemtemakam. Tanom era aesostey asan baemeesos asan apok.” Emes atakam aesime. 22Me Yahudi owerawa, “Armat Ipitam, ‘Tanom era aesostey asan baemeesos asan apok,’ ere wama tamenem? Are sanao amba baeames apeno.” Emes atakam aesimes. 23Yesusam, “Tare ara bap tapirmi owe tarare. Dere ere, Surga oup Ipit. Tanom ara aemansa tapirmi owe. Dere ere, ara aemansa tapirmi ipit apok. 24Denom atakam tara akoromey, ‘Tare dambir tadosa aptam aemtemakam,’ emes atakam aesimey. Dere Allah Aeremtaere Ipit ara aememey. Tare ere, emes atakam bamesem apok aemtakam, tanom dambir tadosa aptam aemtemakam.” Emes atakam aesime.

25Era owerawa, “Wore ere, ta ipitim?” Emes atakam aesimes. Yesusam, “Emesare, Dere era pak atakam tarainak tara akoretamaarin. 26Denom era aemmakam pak, wan atakam tanane aemomey. Dere dosa tanane aemmakam pak, atakam basakamtii. Me, ataendaemen Ipit, ere atakamnak Ipit erare. Dere Armat Ipit akore atakam jane ajio. Derarawa, era atakam taka, ara aemansa tapirmi owe aokoretammin.” Emes atakam aesime. 27Emesare, Yesus Aritipit atakam akore. Me, era owe era atakam amsam apok. 28Me Yesusam, “Tare Asamot Anakot Ajaoreme Ipit salib wus oup ataetopomtakam, tanom Dere Allah Aeremtaere Ipit, emes aportemankum. Tanom era akoremin atakam depa atakam apok aportemakam. Me, Dere Deritipit aememtamen atakam taka akoremin. Tanom emes aportemakam. 29Denom era ataendaemen Ipit akor apormar pak jipu taka atawejommin. Erarawa Armat Ipit dedamo setep aemeta. Are beken Dera bajiem apok.” Emes atakam aesime. 30Me Armat Ipit emes atakam akore, owe tananenak Armat Ipit eemnak ambesemkoromes.

Allah arereis anama Bii Kapar Ipit arereis atakam

31Emesare, wan Yahudi owe Yesus eemnak ambesemkoromes. Armat Ipitam atakam era owe akorome. “Tare deatakam ji aeaartakam, ere tare Dera bajamkai owe anakot aememtemakam. 32Tanom atakamnak jane ajiekoromtemakam. Era atakamnak jane ajiekoromtakam, wan owe tara baemeemomem asan apok.” Yesus emes atakam aesime. 33Era owerawa, “Dare Abraham arurupis darare. Oweam dara baemomem apoknak. Erarawa era akoremarem atakamam, ‘Owe tara baemeemomem asan apok,’ ere wama tamenem?” Emes atakam aesimes. 34Yesusam, “Atakamnak, owe dosa aemaartas, era dosa pak era owe aemomem. 35Bambi karai baetam ipit, wan owe aemomemto, era owe, era ipit arereis emes baemapaar apok aemmas. Me, era ipit andepnak, aritipit andep, emes aemapaartem. 36Me, Allah Andep tara asurumtamtan apaye, ere wan pak tara baemeemomem asan apoknak. 37Tare Abraham arurupis tarare. Dere emes demsam. Me, tare deatakam ji bae apok. Erarawa tare Dera batatii aememmakam. 38Dere Deritipit aporomtamen pak, atakam tara akorommin. Tare ere, taritipit jane ajiekem atakam jipu atawejomakam.” Yesus emes atakam aesime.

39Era owerawa, “Abraham ere, darerokor.” Emes atakam aesimes. Yesus arawa, “Tare Abraham arurupis anakot aememmakam ere, tare Abraham aemaarir pak jipu atawejomakam. (Me, tare emes apok.) 40Me Allah akoromen atakam, ere atakamnak. Denom era atakam tara aokoretammin. Me, tare Dera batatii aememmakam. Emesare, Abraham emes baem apoknak. 41Tare taritipit aememar pak jipu atawejomakam.” Emes atakam aesime.

Era oweam, “Darisare tanane apok. Allah taka daritipit erare.” Emes atakam aesimes.

42Yesus arawa, “Allah taritipit aememmar ere, tare Dera afaimmankuma. Dere Allahpu eendaeo. Emesare, Dere ara asan dema bandae apok. Allah aotaendaemen. 43Tanom era akoremin atakam tamsam apok aememmakam, ere wama tamenem? Erarawa tare ara atakam jane bajie pota aememmakam. 44Taritipit ere, Bii Kapar Ipit are. Tanom taritipit akot pak jipu, emes atawejomakam. Bonaknak are owe batatii ipit aememaarir. Waa aemansaram, owe batatii ipit aememem. Are atakamnak bakore amsam apok. Erarawa are era atakamnak bifane afeomem. Are era pote atakam ipit anakotnak. Erarawa are pote atakam akorem. Era pak ajak bomon pak jipu. 45Dere ere, atakamnak akoremin. Erarawa tare deatakam bamesem apok. 46Tanom, ‘Yesus dosa ipit,’ emes atakam baemekore asan apok. Emesare, Dere atakamnak akoremin. Tare ere, deatakam bamesem apok, ere wama tamenem? 47Me Allah aowe, Allah atakam jane ajimas. Me, tare Allah aowe apok. Erarawa tare Allah atakam jane bajie apok.” Yesus emes atakam aesime.

Yesus anama Abraham atakam

48Me Yahudi owerawa, “Era akoremarom atakam, atakamnak. Wore Samaria saman ipit. Wojak bomon, ere bii aapeta.” Emes atakam aesimes. 49Me Yesusam, “Dejak bomon bii apok. Dere Deritipit asitimmin. Tare ere, bifane Dera afeomemmankum. 50Dere owe Dera basitim atakam bajanim apok. Me, jipit taka owe Dera basitim atakam ajanimum. Era Ipitam, owe adosa atakam basakamtii Ipit. 51Atakamnak, owe deatakam ji aetas, are dambir bata apok aemtemas.” Yesus emes atakam aesime.

52Era Yahudi owerawa, “Emesare, wojak bomon biinak. Me Abraham dambir aeme. Allah atakam bakoretam oweam dambir aemes. Me, Wore, ‘Owe deatakam ji aetas, are dambir baem apok aemtemas,’ emes atakam aesimmarem. 53Emesare, Allah atakam bakoretam owe dambir aemes. Abrahamam dambir aeme. Me, Abraham, juas apok ipiti? Wore ere, juas aptamnak ipiti? Wore ere, ta ipitkorem?” Emes atakam aesimes.

54Me Yesus arawa, “Dere dema aemetemtemtey apaye, emes pota. Me, Deritipit Dera atemtemman. Are era atakam akoremakam Ipit are. ‘Armat Ipit daAllah.’ Emes atakam aesimmakam. 55Tare Armat Ipit tamsam apoknak. Dere ere, Armat Ipit demsam. Denom aatakam akoretey apaye, ‘Dere Armat Ipit demsam apok,’ emes atakam aesimtey apaye, ere Dere pote ipit ta tamen aememtemin. Me, Dere Armat Ipit demsam. Denom aatakam ji aemin. 56Tarerokor juas Abraham, Dere ara bap tapirmi bandaeap, atakam jane ajie. Erarawa jak akot aemape. Are era atakam atakamnak apore, wanam jak akot aemape.” Yesus emes atakam aesime.

57Yahudi owerawa, “Wore umur, tahun 50 apok. Me, Wore Abraham bi aporemi?” Emes atakam aesimes. 58Yesus arawa, “Atakamnak, Abraham bajisames apok aeme, Dere ere, taemema emo.” Emes atakam aesime. 59Emesare, era owe eka tanane ataeres. Are eka Yesus basampirim aememes. Me, Armat ipit asaieme. Wanam Are Allah Tame ajise.

Currently Selected:

YOHANES 8: LAIASC

Highlight

Copy