YOHANES 7
7
Yesus anama areotais atakam
1Emesare. Yesus Galilea tapirmi asaniin asaniin ajareme. Armat Ipit Yahudi owe Ara batatii atakam akukuramtiies apore. Erarawa Are Yudea tapirmi baesos pota ajie. 2Me, Yahudi owe pakambwi juas Jise Tame Pakambwi aemanse. 3Erarawa Yesus areotais, atakam Armat Ipit akoromes. “Wore ara asan bajakajirap bas. Me Yudea tapirmi aesosey. Me wobajamkai oweam aemmarem daytinak pak baportas. 4Emesare, jipit taka andi bafufuos akot aporto, are era aememar pak batukumtii apok aemum. Wonom daytinak pak aemmarem apaye, asamot owe takesam baporkoromtas.” Emes atakam aesimes. 5Me areotaisam Yesus bamesem apok aemes. Erarawa are emes atakam akoromes.
6Yesusam atakam areotais akorome. “Dere baesos bare baemames apok. Tare ere, waa baesos apaye, asep bare baesos apaye, ere tabimak binip. 7Ara aemansa tapirmi owe bifane tara baemefeomem asan apok. Me, Dere ara aemansa tapirmi owe era aememas pota pak, atakam akoremin. Erarawa are bifane Dera afeomemmanis. 8Emesare, tare era pakambwi tapa aesosay. Me Dere baesos bare baemames apok. Erarawa Dere waa ara pakambwi baesos apok.” Emes atakam aesime. 9Emesare, Yesus Galilea tapirmi emes akamisieme.
Yesus Jise Tame Pakambwi ajameme atakam
10Emesare, Yesus areotais era pakambwi apa aesoses. Armat Ipit arawa, era pakambwi asep aesose. Me, Are tiruu apakope aesose. 11Era pakambwi bomon ju jirao, Yahudi owe, Armat Ipit andimares. Are Yesus jano atapores. “Armat Ipit etepuram?” Emes atakam aesimes. 12Emesare, era owe tananenakam tiruu atakam ajamkorames. Are Armat Ipit atakam akorames. Era wan owe akores, “Armat Ipit akot,” emes atakam aesimes. Wan owe ere, “Emes apok. Are era owe tanane potet aotutumum.” Emes atakam aesimes. 13Me, owe, Yahudi owe ombare ambares. Erarawa Are Armat Ipit atakam, baso bakore, apoknak aemes.
14Era pakambwi bomon, Yesus Allah Tame ambareme, wanam atakam aememtame. 15Erarawa Yahudi owe jinim daytinak aees. “Armat Ipit sekolah bae apoknak. Me, Are amsam takes. Wama tamenem?” Emes atakam aesimes. 16Yesusam atakam era owe akorome. “Era aememtammin atakam, debimak binip apok. Dere era ataendaemen Ipit aatakam bimak binip aememtammin. 17Owe Allah anakot pak jipu baem akot aportas, are era aememtammin atakam, Allah aotetamen atakam apaye, depa atakam apaye, emes aportemas. 18Owe, apa atakam aememtamtas apaye, are owe, ara basitim, jak aseseromemas. Me, owe, wan owe, ara ataendaeme Ipit basitim jak aseseromemtas, are atakamnak bokore owe erare. Are potet batutum apoknak. 19Musa, tare Musa Basakamtam Atakam ataetiitamen. Me, tare ara aememmakam owe takes era Basakamtam Atakam aoomakam. Tanom Dera batatii atakam akukuramtiiekem, ere wama tamenem?” Yesus emes atakam aesime.
20Era owe tananerawa, “Wojak bomon bii aapeta. Wora batatii atakam akukuramtiies owe, to oweem?” Emes atakam aesimes.
21Yesusam, “Dere Yahudi Owe Samayen Bare jinim bae pak takakope aemo. Me, tare takes jinim daytinak aeekem. 22Emesare, Musa era tamane pitini basakamosom Yahudi pak tai tara ataetiitamen. (Emesanare, Musa era pak tai tara bataetiitam apok. Era pak tai ere, tarfaisomar bonak ataetiitamen.) Emesare tare jii Yahudi Owe Samayen Baream, tamane pitini basakamosom Yahudi pak tai aememakam. 23Owe, jii, Yahudi Owe Samayen Bare, tamane pitini asesakamosomemas. Era pak Musa Basakamtam Atakam baoo-ombar pak erare. Me, Dere jipit taka, Yahudi Owe Samayen Bare, damo ajaoromtaero ere, tare jokoman atakam akoromenkum, wama tamenem? 24Tanom owe pota pak atakam basakamtii, fef bas. Owe pota pak baem apaye ato takamoorporkoromay.” Emes atakam aesime.
Yesus Allah Aeremtaere Ipit atakam
25Me wan Yerusalem oweam atakam akores. “Ara aemema Ipit, era batatii atakam akukuramtiimas Ipit ape? 26Baporay! Armat ipit, atakam, owe bipu basonak akorem. Owe ere, Armat Ipit bipu atakam bakore apok aemas. Me daduturu owe Armat Ipit Allah Aeremtaere Ipit apormas apeno. 27Dare ara aemema Ipit asaman damsam. Me, Allah Aeremtaere Ipit andaeto, owe atapirmi amsam apok aemtemas.” Emes atakam aesimes.
28Emesare, Yesus Allah Tame bomon atakam aememtame ere, Are atakam afaketaere. “Ara aememakam owe, Dere tamsam apaye. Tanom detapirmi tamsam apaye. Dere andaeo, dema baemedae asan apok. Era ataendaemen Ipit, ere atakamnak Ipit. Tare ere, era Ipit tamsam apok. 29Dere Armat ipit takan aememaaru. Are Dere ara asan aotaendaemen. Erarawa Dere Armat Ipit demsam.” Emes atakam aesime.
30Era oweam, Yesus, bajipirtaer aempores. Me, abajipirtaer bare baemames apok. Erarawa era owe Armat Ipit baemejipirtaer asan apok. 31Me, wan aememes owe tanane Yesus eemnak ambesemkoromes. Are atakam akores. “Ara aemema Ipit, Allah Aeremtaere Ipit arare. Are jinim bae pak tananenak aemum. Bambi owe emes jinim bae pak baemeem asan apok.” Emes atakam aesimes.
Owe Yesus bajipirtaer asakamtames atakam
32Era owe tanane Yesus atakam tiruu akorames. Me Parisi oweam emes atakam jane ajies. Wanam, Allah Tame pak baem owe daytuam, Parisi oweam, atakam Allah Tame banamek batai owe asakamtames. Are era owe Yesus bajipirtaer atakam asakamtames. 33Yesus arawa, “Denom tara ajamemaptey bare arke apok. Derarawa, era ataendaemen Ipitpu aoesostemin. 34Tanom Dera andimartemankum. Me, tare Dera bandimartaer apok aemtemankum. Tanom era aesostey asan baemeesos asan apok.” Emes atakam aesime. 35Me Yahudi owerawa, armamon atakam ajamkorames. “Armat Ipit, ‘Tare Dera andimartemankum,’ Emes atakam aesimar. Me, Are ete asan aesosto? Me wan Yahudi owe, Yunani saman aemapmas tapirmi, apatoses. Armat Ipit era Yahudi owe asan aesostem arane? Are atakam Yunani owe baememtamane? 36Armat Ipitam, ‘Tare Dera andimartemankum. Me, tare Dera bandimartaer apok aemtemankum. Tanom era aesostey asan baemeesos asan apok.’ Emes atakam aesimmar. Emes atakam, ere wama tamenem?” Yahudi owe emes atakam aesimes.
Jiinenak bwi atakam
37Emesare. Era pakambwi batie bare aemanse. Ere pakambwi daytu bare erare. Yesusam awasite, wanam atakam afaketaere. “Owe bwito aememtas, are Dera bamaromemtanis. Ararawa, bwi bandetas. 38Alkitab atakam jipu erare. ‘Jiinenak atetammar bwi Dera ambesemmanis owe jak bomon ajisaarto emes tamen are.’ Alkitab emes atakam akorem.” Yesus emes atakam aesime. 39(Yesus ara akore atakam, ere Allah Jip atakam are. Emesare, Yesus eemnak bamesemkorom owe Allah Jip ataettetertemas. Me, era bare, Yesus aakotipit pak dambir batem apok. Emesamare era bare, Allah, aJip, era owe batetam apok.)
40Era owe tanane, anom era atakam jane ajies. Me wan owerawa, atakam akores. “Atakamnak. Ara aemema Ipit Allah Atakam Bakoretam Ipitkor.” Emes atakam aesimes. 41Wan owerawa, “Ara aemema Ipit, Allah Aeremtaere Ipit arare.” Emes atakam aesimes. Wan owe ere, “Allah Aeremtaere Ipit Galilea tapirmi ipit apok. 42Alkitabam, “Allah Aeremtaere Ipit Daut wurpis. Are kota Betlehem tapirmi ajisamestem. Ere Daut aemapaarir kota are. Alkitab emes atakam are.” Emes atakam aesimes.” 43Emesare, era owe tanane damon, wan owe Yesus atakam akot akores. Wan owe ere, Yesus atakam pota akores. Erarawa are atakam ajamkorames. 44Wan owe, Armat Ipit bajipirtaer aememes. Me, era owe Armat Ipit bajipirtaer apok.
Yahudi duturu owe Yesus bamesem apok atakam
45Emesare. Allah Tame banamek batai owe, Allah Tame pak baem owe daytupuam, Parisi owepuam, aofasies. Era owerawa, era banamek batai owe ajatepores. “Tare era Ipit batoomtinao apok, apa pakem?” Emes atakam aesimes. 46Me banamek batai owerawa, “Wan owe akoremas atakamam, era Ipit akoremar atakamam, ere awar apoknak. Era Ipit atakam, ere akotnak.” Emes atakam aesimes. 47Me Parisi owerawa, era owe ajatepores. “Era Ipit potet tanom atutumane? 48Me daduturu oweam, Parisi oweam, era Ipit bamesem apoknak. 49Ara aememes owe tanane ere, Musa buku aeapome Basakamtam Atakam amsam apok. Allah era owe asan pota emeemapome.” Emes atakam aesimes.
50Emesare, wan Parisi ipit juas Nikodemus. Bonaknak ere, armat ipit Yesus ambarome. Me Nikodemusam atakam era owe akorome. 51“Dare owe apota pak atakam bambi basakamtii bas. Dare era owe atakam jane ato batakamjie. Danom era aememas pak ato batakamoorpor. Emes baem, era aemomemmarom Basakamtam Atakam jipu.” Emes atakam aesime.
52Era owerawa, “Wonom Galilea tapirmi ipit ape? Wonom Alkitab atakam womba oorporey. Erarawa wore Allah atakam bakoretam ipitkor, Galilea tapirmi ipit apok aportemarem.” Emes atakam aesimes.
Jasipar taot atakam
[ 53Emesare. Era owe takesam atame aesosteteres.
Currently Selected:
YOHANES 7: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
