MARKUS 12
12
Lasi leta neu ale atoni ameup lele tanu'an sena
(Mat. 21:33-46; Luk. 20:9-19)
1Oke te Yesus na'uab neu sin neki lasi leta nak: “Anmu'i atoni mese le anmepu lele tanu'an sena ma in anmo'e bahan funam natef. In anhani nopu neu he naes tanu'an sena in oen. Oke te in anmo'e haklelo pana, hen pao lele nane. Nalali te in nana'at lele nane neu atoni ameput sin fun in he nao neu pah bian. 2Leka ante neno hen seu tanu'an sena in fuan, in lelu in ate mese neu atoni ameput sin hen simo in lele afan na'ko sin. 3Mes sin anheke ate nane ma antepo, oke te anlelu hen fani nok nim luman. 4Oke te in lelu anteni ate bian neu sin. Mes atoni ameput sin antepo ate nane ini nakan tal napap ma sin namaeb in nok. 5Oke te lele tuaf nane anlelu anteni ate mese, mes namate ate nane. Ma bian namfau anteni, mes sin antepo bian ma namate bian. 6Al in anmone anmes le in nek nisan. Nalali te in anlelu nani neu sin fun in nak: I au anah, of sin namtausan. 7Mes apao lele nane sin na'uaben es nok es nak: Ba'is i apao bale mnasi. Aim het tamate, he nati' bale mnasi i anfani hit ini. 8Ma sin anheke anah nane ma namate, oke te anpolin napoitan na'ko lele tanu'an sena nane. 9Nalali te lele tuaf nane of anmo'e sa' ka? In of nem ma nale'un apao lele nane sin, oke te nana'at lele nane neu atoni bian. 10Ait hi kam soi mit fa sa' le antui nani nak:
Fatu le amo'e ume sin anpolin nani
anfani fatu sukit:
11Lasi nane anbol na'ko Uisneno,
Sanmakat mese bi hit matak.”
12Oke te sin nami hen heke Yesus, fun sin nahinen, nak In nua'ab lasi leta nane antom neu sin. Mes sin namtausan atoni amfaun, es nane te sin naon ma ka noki fa In.
Lasi baen noni poni neu Kesel
(Mat. 22:15-22; Luk. 20:20-26)
13Nalali te anlelu atoni Farisi sin fauk ma atoni Herodian, neu Yesus hen su' nit In neki lasi tanas mese. 14Atoni nane sin neman ma nak neu In, “Pak, hai mihin, Ho atoni amneot Ko, ma Ho kam sian fa es amsa. Fun Ho kam beti fa humaf, mes munoina lalan Uisneno nok amnenot. Nabe'i ka het baen noni poni neu Kesel ai kahaf? Hai mes hen baen ka ai kahaf?” 15Mes Yesus nahin nalali sin asafanut nane, oke te In nak neu sin, “Nansa' es him su' Kau ka? Meki noni dinar nane nem he Au kiso it!” 16Oke te sin neki nem. Yesus natan sin nak, “Sekau in human ma in tuis es i ka?” Sin natae nak, “Kesel in human ma in tuis.” 17Oke te Yesus natae sin nak, “Him fe nai neu Kesel sa' le hi hem fe neu Kesel. Ma him fe nai neu Uisneno sa' le hi hem fe neu Uisneno!” Leka sin nen lasi nane te sin namkakan neu In.
Atoni Saduki natan Yesus neu amates anfen anfani
(Mat. 22:23-33; Luk. 20:27-40)
18Atoni Saduki sin fauk neman neu Yesus, le sin nak kan mu'if amates anfen anfain. Sin natan neu Yesus nak, 19“Pak, Nai Musa antui plenat i neu kai nak: Leka atoni mese anmate, ma kan mu'if anah, in olif mese anmafe nok in fel nane he nati' nahoni anah neu in tataf amates nane. 20Anmu'i atoni hitu le anmaoil tatan. Le anaet anmafe nok bife mese ma anmate mes ka nahonif anah. 21Oke te olif le natuin neune anmafe nok bife nane mes anmate ma ka nahonif anah amsa. Onane amsa in olif es anteni. 22Ma onane talan te sin hitu sin ka nahonin fa anah. Namuni te bife nane amsa anmate. 23Bi neno amates anfen anfain, leka sin anfen anfain, bife nane anfani sekau in fel ka? Fun sin hitu sin anmafe nokan.”
24Yesus natae sin nak, “Hi mitenab amsan, fun hi ka mihin fa Sulat Knino ma Uisneno In kuasat. 25Fun leka atoni anfen anfain na'ko amates sin kan mafe antenin fa, mes sin anmoni on ahake abit neno tunan. 26Ma neu lasi amates anfen anfain, hi kam soi fa Nai Musa in sulat, antom lasi nu'un kis lubu le anpin? Le Uisneno nakua a'an neu in nak: Au le i Nai Abraham in Uisneno, Nai Ishak in Uisneno, ma Nai Yakub in Uisneno. 27In ka Uisneno fa neu atoni amates, mes Uisneno neu atoni amonit. Namneu-namneo him sek ma ambeo!”
Plenat Knino abainesit
(Mat. 22:34-40; Luk. 10:25-28)
28Oke te ahin sulat mese le in nen Yesus ma atoni Saduki sin matoen, nahin nak Yesus natae sin nok alekot, in nem ma natan Yesus nak, “Plenat Knino me es abainesit kun?”
29Yesus natae nak, “Plenat Knino abainesit esle': Mitnin nai hoi to Israel, hit Abal-balat Uisneno, Uisneno mese kun. 30Him nek Abal-balat, hi Uisneno, meki hi nekam oke, ma hi smanam oke, ma hi hinem oke ma hi matanem oke. 31Ma plenat nua le nak: Him nek hi bia onle him nek hi aom. Katit fa plenat bian le a'nesi na'ko plenat nono nua i.”
32Oke te ahin sulat nane nak neu Yesus: “Namneo Pak, namneo onle Ho mu'uab nane, nak In mese kun, ma katit fa bian, al In mes. 33Es nane te him nek In meki nekam oke, ma amnek hi bia onle hi aom. Nane leko nesi na'ko ale fua mnotu ma fua lolo.”
34Ma Yesus nit, nak atoni nane natae nok nek ahinet, In nak neune, “Ho ka mu'lo fa mu'ko plenat Uisneno!” Ma katit fa atoni mese he natan anteni Yesus.
Lasi malutas Usif Yesus nok Nai Daud
(Mat. 22:41-46; Luk. 20:41-44)
35Leka Yesus nanoina bi Ume Uisneno, In nak, “Leka me ahin sulat sin nak Neno Anan nane Nai Daud in sufan ka?
36Fun natuin Smanan Knino in mepu, Nai Daud nak:
Uisneno tunan nakua a'an neu au Usif nak: Hom tok nai bi Au aok bian ne'u, talan te Au tao Ho musu sin bi Ho haem nupun.
37Kalu Nai Daud antek In nak in Usif, leka me In hen fani In anah ka?” Atoni amfaun nane sin lomi hen nen In nok amlilat.
Yesus anfainek he nati' sin anpantok na'ko ahin sulat sin
(Mat. 23:5-7; Luk. 20:45-47)
38Bi In lasi noina Yesus nak, “Him pantom mi'ko ahin sulat sin. Sin anlomi he nao nok sobalu betkone mnanu ma anlomi he napeni kan tola bi masa. 39Sin anlomi hen toko antom mat bi ume buat ma bale makana bi tolas. 40Le nasik nan bife banu sin ume ma an a'safanu neki onen toti amnanu. Sin le nane of napeni kasat mafena nes.”
Fua tulu bife banu mamu'it mese
(Luk. 21:1-4)
41Leka Yesus antoko mabaina nok peti fua tulu bi Ume Uisneno, In ankiso ale atoni amfaun le natam sin loi tulu neu peti nane. Atoni amu'it namfau sin natam noni anaek. 42Oke te bife banu mamu'it mese nem ma natam kisi nua, nane loit mese kun. 43Yesus no'en In asimo lasi sin ma nak neu sin, “Him kiso mit bife banu amamu'it i, in fe nesi na'ko ale atoni le natam loit neu peti fua tulu nane. 44Fun sin alsin anfe na'ko sin athoes, mes bife banu'i anfe na'ko in mamu'it. In anfe sa' le in anmu'i, le he nah neu in monin.”
Currently Selected:
MARKUS 12: AOZ
Highlight
Share
Copy
Want to have your highlights saved across all your devices? Sign up or sign in
