KEJADIAN 47
47
Nai Yakub anhake anbi kesel Mesir in matan
1-2Namuni onane te Nai Yusuf nok atoni nim na'ko in biaf sin anao ma anhake anbi kesel in matan. In namolok nak, “Ho ate kau au Ama ma au biaf sin nem nalali na'ko Kanaan neki sin pukan bibi kase, bijae ma ale sin abnak. Leku le i sin antokon es Gosyen.” Oke te in naton ma nalile in biaf sin nane neu kesel. 3Kesel natan neu sin nak, “Hi mepu sa' ka?”
Sin natae nak, “Hai le i atukus mu'it kai onle hai am uf sin.
4Hai aim he mimaika anbi pah le i, natuin amnahas anaek anbol anbi pah Kanaan, talantia kan mu'i fa hun anteni neu hai pukan bibi kase sin. Mufetin ma amfe kai he hai mimaika ambi pah Gosyen.” 5Oke te kesel namolok neu Nai Yusuf nak, “Leku le i ho ama ma biaf sin nem nalali anbi bale i. 6Amkiso pah Mesir on ho pah kun. Maut he sin namaika anbi Gosyen, bale le naleko nesi anbi pah le i. Ma amlek man atoni ahinet sin fauk hen fani apaot neu au mu'it sin.”
7Nai Yusuf naton ma nalile in amaf neu kesel. Ma Nai Yakub anfe tetus neu kesel, 8ma kesel natan neune nak, “Ho moni man ton fauk ken Ama?”
9Nai Yakub natae nak, “Ho ate kau au moni an ton natun mese am bo'tenu anfani atoni anao amnemat. Ho ate kau au monit le i nahenu nok nukat ma na'pal leka au unesa nok ho ate kau au am uf sin neno monit anfani atoni anao amnemat.” 10Nalali onane te Nai Yakub anfen ma anfani ma in anfe tetus he nabaitsok. 11Nai Yusuf antuntaku in amaf ma in biaf sin ma sin namaika nabalah anbi pah Mesir. In anfe neu sin afu le naleko nesi anbi pah le nane, anfani sin ini, le anhaumak nok kot Raamses, namnes nok kesel in aplenat. 12Nai Yusuf ansato ma naloitan amnahat neu in amaf, in biaf sin, ma in-ini sin ok-oke, talantia le fe a'baut.
Leku amnahas
13Amnahas nane nae le'uf kun, talantia kan mu'i teni fa amnahat anbi me-me. To anbi Mesir ma to Kanaan sin an olen, ma ka nabe'i anteni fa natuin amnahas. 14Ma anbi leku sin ansos ane kase, Nai Yusuf in nibun nani noni le anbaen ane kase nane, oke te in nabelak anbi kesel in sonaf. 15Leka noni anbi pah Mesir ma Kanaan nane oke, atoni-atoni Mesir nem anteni neu Nai Yusuf ma sin nak, “Amfe neu kai amnahat! Kaisa mufetin kai he nai mate. Hai milali hai noni sin.”
16Nai Yusuf natae nak, “Leka hi noni nane oke, amfe hi mu'it; au of a'fe neu ki amnahat.” 17Oke te sin anfe sin mu'it neu Nai Yusuf, ma in anfe neu sin amnahat anseka sin bikase, bibi kase, bibi, bijae ma bikase luke mnanu. Anbi ton nane Nai Yusuf anfe neu sin amnahat ma sin anbaen neki mu'it.
18Anbi ton amnemat anteni sin nem anteni neu in ma sin nak, “Hai miton ko nok amneot Usi fun hai noni ok'en ma hai mu'it sin amsa anfani Usi ho ini. Hai ka mu'i fa sa'-sa' anteni le hai hem fe neu ko Usi, alkun hai aom ma hai afu. 19Kaisa mufetin kai he hai mate! Kaisa mufetin hai lene-lene sin he mois. Amsos man kai ma hai afu sin ma ambaen meki ane kase. Hai ma hai afu sin anfani kesel ho ini. Amfe kai ane kase he haim talu monim ma amfe kai fini he nati' haim sen anbi hai lene!”
20Oke te Nai Yusuf ansos nan ale afu anbi pah Mesir neu kesel. Atoni Mesir mese-mese nasosa in afu natuin amnahas nane nae le'uf kun, es nane te ale afu anbi pah Mesir nane anfani kesel in-ini. 21Nai Yusuf anmo'e ale to anbi pah Mesir anfani on ate. 22Afu mese le in kan sos nani fa esle' ale ana fuat sin afu. Sin ka nasosa fa sin afu natuin sin napeni tuthaes neu sin monin na'ko kesel. 23Nai Yusuf nak neu to nane nak, “Amkiso nai, hi ma hi afu au sos ulali neu kesel. Hi nabe'i amsen fini le i anbi hi lene. 24Anbi tabu him hetu ma amseki, so him fe batis nim neu kesel. In nesin nane nabe'i hi maiti hen fani fini ma anfani amnahat neu ki ma neu hi ume nanan.”
25Sin natae nak, “Usi ho mufetin mulali kai ma kan mu'i fa sa' he haim senu banin ho manekam. Haim lomi hem fani kesel in ate.” 26Namuni onane te Nai Yusuf anmo'e lasi nane anfani lekat-lulut anbi pah Mesir, esle' batis nim na'ko pah in nesan anfani kesel ini. Talantia tabu i fekat nane fe nanaoba nani. Al afu le mafefa knino sin ini es kan fani fa kesel ini.
Nai Yakub in totis amsoput
27Onle nane atoni-atoni Israel sin namaika nabalah anbi bale Gosyen, anbi pah Mesir. Sin anfani atoni amu'it ma sin anpe' ma namfau anbi bale nane. 28Nai Yakub fe anmoni ateni ton bo'es hitu anbi Mesir talantia in nan ton natun mese bo'ha am hitu. 29Leka anhaumak leku in hen mate, in anboin Nai Yusuf, in anah nane, ma in nak neune nak, “Amtao ho nimam anbi au pusuk in atnanan ma amsup nak of ho kam sub kau fa anbi Mesir le i. 30Au lomi he hom sub kau anbi au am uf sin bale; meki au aok ta'un na'ko pah le i ma amsub kau anbi sin naukel.”
Oke te Nai Yusuf natae nak, “Au of unaoba sa' le Ama hom toti nane.”
31Nai Yakub nak, “Amsup nai nak of ho mo'e lasi nane.” Nai Yusuf ansup, ma Nai Yakub in an onen toti anbi in bale tupa in tunan.
Currently Selected:
KEJADIAN 47: AOZ
Highlight
Share
Copy
Want to have your highlights saved across all your devices? Sign up or sign in
