KEJADIAN 46
46
Nai Yakub nok in ume nanan sin anao neu pah Mesir
1Nai Yakub naloitan ale in mu'in nalali te in anfen ma in nao. Antia Bersyeba in natulu fua tulu neu Uisneno le in amaf Nai Ishak naluli nabes neune. 2Anbi mnitas mese in nanan anbi fai, Uisneno nak neune nak, “Yakub, Yakub!”
“Koi, Uisneno,” Nai Yakub in natae.
3“Au le i Uisneno kau, Uisneno le ho ama naluli nabes neune,” In nak onane. “Kaisa ho mumtau neu hem nao neu Mesir. Au of umfaub ho sufam nane anfani uf mese le anaek anbi bale nane. 4Au of ko anbi lanan neu Mesir, ma Au of eki ho sufam nane anfani nem neu pah le i. Nai Yusuf of anbi ho aon bian leka ho tabu maten anbol.”
5Oke te Nai Yakub anfen ma anao na'ko Bersyeba. In anah sin nasaeb sin amaf ma sin anah ma sin fenai neu aklet le Kesel Mesir ansonu. 6Sin neki amsa mu'it ma ale sin a'mu'in le sin napeni anbi pah Kanaan, oke sin anfen ma sin anao neu Mesir. Nai Yakub neki ale in sufan, esle' 7ale in anah ma in upuf atoni ma bife.
8Nai Yakub in ume nanan le sin nok neu pah Mesir esle': 9Nai Ruben, in anmone nae; in anah sin: Nai Henokh, Nai Palu, Nai Hezron ma Nai Karmi. 10Nai Simeon; in anah sin: Nai Yemuel, Nai Yamin, Nai Ohad, Nai Yakhin, Nai Zohar ma Nai Saul, in anah na'ko in fenai na'ko Kanaan. 11Nai Lewi; in anah sin: Nai Gerson, Nai Kehat ma Nai Merari. 12Nai Yehuda; in anah sin: Nai Syela, Nai Peres ma Nai Zerah, ma Nai Yehuda, esle' Nai Er ma Nai Onan anmate anbi Kanaan. Nai Peres in anah sin: Nai Hezron ma Nai Hamul. 13Nai Isakhar; in anah sin: Nai Tola, Nai Pua, Nai Ayub ma Nai Simron. 14Nai Zebulon; in anah sin: Nai Sered, Nai Elon ma Nai Yahleel. 15Sin al sin nane bi Lea in anah sin le nahonis sin neu Nai Yakub anbi Mesopotamia, naik na'ko nane in anfeto bi Dina. Es nane te Nai Yakub in sufan na'ko in fenai bi Lea sin alsin atoni bo'tenu am tenu.
16Nai Gad; in anah sin: Nai Zifyon, Nai Hagi, Nai Syuni, Nai Ezbon, Nai Eri, Nai Arodi ma Nai Arteli. 17Nai Asyer; in anah sin: Nai Yimna, Nai Yiswa, Nai Yiswi ma Nai Beria ma Nai Serah, sin fetof. Nai Beria in anah sin esle' Nai Heber ma Nai Malkiel. 18Atoni bo'es am ne le nane Nai Yakub in sufan na'ko bi Zilpa, ate bife le Nai Laban anfe neu bi Lea, in anfeto.
19Bi Rahel Nai Yakub in fenai in nahonis li'ana nua, esle' Nai Yusuf ma Nai Benyamin. 20Anbi pah Mesir Nai Yusuf napeni anah nua, esle' Nai Manasye ma Nai Efraim na'ko in fenai bi Asnat; Nai Potifera in anfeto, le anfani ana fuat anbi Heliopolis. 21Nai Benyamin; in anah sin: Nai Bela, Nai Bekher, Nai Asybel, Nai Gera, Nai Naaman, Nai Ehi, Nai Mupim, Nai Ros, Nai Hupim ma Nai Ared. 22Atoni bo'es am ha nane Nai Yakub in sufan na'ko in fenai bi Rahel.
23Es anteni Nai Dan; in anah Nai Husim. 24Nai Naftali; in anah sin: Nai Yahzeel, Nai Guni, Nai Yezer, ma Nai Syilem. 25Atoni hitu sin le nane Nai Yakub in sufan na'ko in fenai bi Bilha, ate bife le Nai Laban anfe neu in anah bi Rahel.
26Nai Yakub in sufan le sin nao neu pah Mesir sin alsin atoni bo'ne am ne, kan so'i natam fa in nanef sin. 27Nai Yusuf in anah sin le nahonis sin anbi Mesir nane sin atoni nua, es nane te Nai Yakub in ume nanan le antia Mesir sin alsin atoni bo'hitu.
Nai Yakub ma in ume nanan sin anbi pah Mesir
28Nai Yakub in anlenu Nai Yehuda anao nahunun in he no'en Nai Yusuf he naeku nok in amaf anbi Gosyen. Leka sin nem antia Gosyen. 29Nai Yusuf ansae neu in aklet he naeku nok in amaf anbi nane. Leka sin naeku, Nai Yusuf anho nan in amaf ma in ankae lo le'uf. 30Nai Yakub nak neu Nai Yusuf nak, “Anbi leku le i au lomi he mate, natuin au it ulali ko ma au uhin nak ho fe amoni.”
31Oke te Nai Yusuf nak neu in biaf sin ma in-ini sin bian nak, “Au mes anao he utonan kesel ak au biaf sin ma au in-ini sin le namaika anbi Kanaan sin nem nalali. 32Au of utonan ak hi atukus bibi kase ma bijae, ma hi meki hi mu'it ma abnak nem nalali. 33Leka kesel anboin ki ma natan ki neu hi mepu, 34mitonan in mak na'ko hi mibau hi le i atukus mu'it ki, namnes onle afi hi am uf sin. Nok nane in of anlenu ki he mimaika anbi pah Gosyen.” Nai Yusuf namolok onane natuin atoni Mesir sin nanebtok leka sin nabua nok atukus-atukus.
Currently Selected:
KEJADIAN 46: AOZ
Highlight
Share
Copy
Want to have your highlights saved across all your devices? Sign up or sign in
