KEJADIAN 45
45
Nai Yusuf in natonon namneo in sekau
1Nai Yusuf ka nabe'i fa anteni he namepan in nekan anbi in ameput-ameput sin matan. Es nane te in anlenu sin he nasaitan ke'an nane he in natonon neu in biaf sin namneo in le nane sekau. 2Leka in ameput sin nasaitan ke'an nane, Nai Yusuf ankae nok hana naek, talantia atoni-atoni Mesir le anbi mone nane sin nen in, ma hanaf nane antia kesel in sonaf. 3Nai Yusuf in nak neu in biaf sin nak, “Au Nai Yusuf kau. Hit ama fe anmoni ka?” Leka in biaf sin nen lasi nane sin namtau nae le'uf talantia sin ka natae fa. 4Oke te Nai Yusuf nak neu sin nak, “Aim nai neu i.” Sin anhaumak, ma in namolok anteni nak, “Au Nai Yusuf kau, le hi misosa milali kau neu Mesir. 5Kaisa mimtau ai amtofom anmatom nok le hi misosa milali kau. Namneo Uisneno In es neknon kun neki kau neu bale i uhunun ki he nati' au panat atoni namfau sin monin. 6Leku le i amnahas fe' ton nua, ma anbi ton nim in nanan anteni of kau mu'i fa atoni hen foi afu ai hen abul. 7Uisneno ansonu nahunun kau na'ko ki neu bale i he nati' tuntaku ki nok lanan amkakat le i, ma he panat hi monim ma paloli hi sufam. 8Es nane te, namneo ka natuin fa hi mo'et au tam bi bale i, mes natuin kun Uisneno. In es anmo'e kau fani ameput amnanut na'ko Kesel Mesir. In nana'at kuasat neu kau he panat in ume nanan ma pah Mesir anfun natef.
9Leku le i, nok manapat him fani neu hit ama ma miton an mak Nai Yusuf, ho anah, nak on i, ‘Uisneno anmo'e kau fani akuasat neu pah Mesir anfun natef; aum nok labah nai. 10Ama nabe'i mumaika anbi Gosyen, amhaumak kau – ama, mok ho anah ma ho upuf sin, bibi kase, bibi, bijae ma ale ama ho mu'im. 11Leka ama ho aum amtia Gosyen, au nabe'i panat ko. Tabu amnahas nane fe' ton nim anteni ma au of a'paloli ko he nati' ama, hi in-ini sin ma ama ho mu'it sin kaisa anlabu sa'-sa'.’ ”
12Nai Yusuf nak anteni nak, “Leku le i him kiso mes kim, ma ho amsa Benyamin, nak namneo-namneo au le i Nai Yusuf kau. 13Miton nai neu hit ama neu au kuasat anaek anbi bale i, anbi Mesir, ma mitonan neune ale lasi le hi mit milali. Oke te meki in nem nok lab-labah neu bale i.”
14Nalali onane te in anho nan Nai Benyamin, in olif nane, ma in ankae; Nai Benyamin amsa in ankae ma anho nan Nai Yusuf amsa. 15Namuni onane te, nok fe ankae, Nai Yusuf anho in biaf sin ok-oke ma in nek sin. Nalali onane te sin namolok-molok nok in.
16Leka anbi kesel in sonaf nane sin nen hanaf neu Nai Yusuf in biaf sin neman, kesel ma in ameput-ameput sin amsa anmalinan. 17Oke te kesel nak neu Nai Yusuf nak, “Amlenu ho biaf sin nane nasaeb baut ane kase neu sin bikase luke mnanu ma anfani neu pah Kanaan 18ma nunan ho ama nok sin ume nanan oke te sin natnani nem neu i. Of au fe neu sin afu le naleko nesi anbi pah Mesir, ma sin of anmoni nok athoes nok pah nane in afan. 19Amlenu sin amsa he neki aklet fauk-fauk na'ko i neu sin fenai ma sin anah-anah le fe nabau, ma neu he nunan sin amaf. 20Sin ka nabe'i fa he natenab ale blua le sin namaika sin nabalah, natuin alekot anesit anbi pah Mesir of anfani sin ini.”
21Nai Yakub in anah sin nanaoba nani kesel in aplenat nane. Nai Yusuf anfe neu sin aklet fauk-fauk namnes nok kesel in aplenat, ma bukae anbi lanan. 22Ma anfe neu sin es-es blua pake fe'u pasan mese, mes neu Nai Benyamin in anfe noni muti natun tenu ma blua pake pasan nim. 23Ma neu in amaf in ansonu bikase luke mnanu bo'mese le nasaeb ale blua alekot na'ko pah Mesir, ma bikase luke mnanu bo'mese anteni le nasaeb ane kase, utunu' ma mnahat bian anteni anfani bukae anbi lanan neo neu pah Mesir. 24Namuni te in nafetin in biaf sin, ma in anba'an sin nak, “Kaisa amatoe anbi lanan.”
25Sin nao nasaitan pah Mesir ma sin anfani neu Nai Yakub, sin amaf. 26“Nai Yusuf in fe' anmoni!” sin nak neu in. “In anfeni akuasat neu pah Mesir anfun natef!” Leka in an nen hanaf nane, Nai Yakub in namkak, ma in kan palsai fa sin.
27Mes leka sin naton nalali ale alsi le Nai Yusuf naton nalali neu sin, ma leka in nit aklet le Nai Yusuf ansonu he nunan in ma neki neu pah Mesir, in anbe' na'ko in tenab. 28“Au anah Nai Yusuf fe anmoni!” in nak onane. “Alkun lasi nane es au sali! Au mes nao he kiso in nahun na'ko au fe ka mate fa.”
Currently Selected:
KEJADIAN 45: AOZ
Highlight
Share
Copy
Want to have your highlights saved across all your devices? Sign up or sign in
