MARKUS 12

Umpama taringot tu parkarejo di kobun anggur

(Mat. 21:33-46; Luk. 20:9-19)

1Dung i dipungka Jesus ma marumpama laho mandok hata tu angka sintua ni malim i dohot angka Siboto Surat bope tu angka hatobangon ni halak Jahudi i. Ning Ia ma, “Adong ma sada bayo na markobun anggur. Dihandang ia ma kobun anggurnia i humaliang. Dung i dihuar ia ma pamoroan ni anggur i, dipajongjong ia muse ma sada tuhu-tuhu inganan ni panjago. Dung i dipabolahon ia ma kobun anggurnia i, ia pe kehe ma tu luat na asing. 2Jadi dung dapot hatihana mamutik batu ni anggur i, disuruhon nampuna i ma sahalak naposonia mandapotkon angka na markarejo i laho manjagit bagiannia sian suha ni kobun i. 3Tapi ditangkup angka halak na markarejo kobun i ma naposo i. Dibalbali halahi ma ia, dung i disuru halahi ma mulak umpe maroban bagi-aha. 4Gabe disuru nampuna kobun i ma sahalak nari naposonia na asing. Tapi dipotuk angka na markarejo i ma ulu ni naposo i. Jana dipaila halahi. 5Disuru nampuna kobun i ma mangulahi sahalak naposonia na asing. Tapi dibunu halahi ma naposonia i. Laing songon i ma pambaen ni halahi tu angka naposo na asing i muse. Adong ma na dibalbali ni halahi, adong na dibunu. 6Ise noma na tarsuru nampunaan i? Hum sahalak sajo noma, i ma anaknia sandiri haholongan ni rohania i. Jadi ujungna laing disuru ia ma anaknia i mandapotkon angka na markarejo i. ‘Tontu argahonon ni halahi do anakki,’ ning rohania. 7Tapi marsipandohonan ma angka na markarejo i sama halahi, ‘On ma halakna na giot manean i. Tabunu ma on dison anso di hita sude siteanonnia i!’ 8Jadi ditangkup halahi ma anaknia i lalu dibunu halahi ma. Diambungkon halahi ma bangkena i tu balian ni kobun i.”

9Dung i disapai Jesus ma, “Antong, aha noma sibaenon ni nampuna kobun i? Ro ma ia laho mangabiskon angka na mamola i, anso dipasahat ia kobunnia i tu angka pamola na asing. 10Tontu ma disise hamu ayat on di Buku Na Badia i,

‘Batu na niambungkon ni pande bagas,

madung gabe batu parsuhi.

11I ma na nibaen ni Tuhan;

sada tanda hahomangan di matanta!’ ”

12Jadi sude angka pangituai ni halak Jahudi na umbege umpama nangkin, rap manjalahi dalan ma laho manangkup Jesus. Harana diboto halahi do, halahi sandiri do na nidok ni Jesus di umpamana i. Tapi mabiar do halahi di halak na bahat i, gabe ditinggalkon halahi ma Jesus.

Sapa-sapa taringot tu na manggarar pajak

(Mat. 22:15-22; Luk. 20:20-26)

13Disuru ma sanga na piga halak Parise dohot angka anggota ni si Herodes laho manjalahi hasalaan ni Jesus marhite angka sapa-sapa. 14Didapotkon halahi ma Jesus. Didok halahi ma, “Guru, hami boto do, halak na tigor do Ho. Nada parduli Ho sanga na bia pikiran ni halak tu Ho. Hum na marojahan tu hasintongan do diajarkon Ho, taringot tu sanga aha hagiot ni Debata. Harana inda meol-eol rohaMu sanga na bia pe didok halak. Antong, paboa ma jolo tu hami, ‘Muda tagarar pajakta tu Kesar ni halak Rom, sala dehe i tu ugamonta sanga nada? Angkon gararonta dehe pajak i sanga nada?’ ”

15Diboto Jesus do na mangakali halahi. Dialusi Ia ma, “Biasi pola diuji hamu Au? Patidahon hamu ma jolo tu Au hepeng perak i sada.”

16Dilehen halahi ma sada hepeng perak i. Dung i disapai Jesus ma, “Gambar dohot surat ni ise do on?”

“Kesar i!” ning halahi mangalusi.

17“Antong anggo songon i do, pasahat hamu ma mangulahi tu Kesar sanga aha nampuna ni Kesar i. Laing pasahat hamu ma mangulahi tu Debata sanga aha nampuna ni Debata!” Jadi homang ma roha ni halahi umbege Ia.

Sapa-sapa taringot tu na mulak mangolu mangulahi muda dung mate

(Mat. 22:23-33; Luk. 20:27-40)

18Adong ma sanga na piga halak sian halak Saduse ro mandapotkon Jesus. (Mangihutkon pandapot ni halak on, anggo jolma nada be mulak mangolu muda dung mate.) 19“Guru, ditonahon si Musa do tu hita: ‘Muda mate sada bayo maninggalkon sada dadaboru ia, tapi nada jabat maruntungan halahi, angkon gabe patugincaton ni anggi ni na mate i ma na mabalu i anso mardakdanak ia. I ma na gabe pomparan di na mate i.’ 20Jadi jungada ma adong pitu halak na martinadohon. Mambuat boru ma siangkaan i tapi mate ma ia so jolo adong dope untungannia. 21Jadi dipatugincat na paduahon i ma angkangna na mabalu i, tapi ia pe laing mate do so jolo adong dakdanak. Laing songon i ma na masa tu na patoluhon i, 22dohot tu na paopatkon lopus tu na papituhon i. Sude halahi madung rap marbagas tu anak boru i, marmatean be do halahi so jolo adong dakdanakna. Ujungna mate muse ma anak boru i. 23Jadi mulak mangolu ma halahi sude saulahon di ari parpudi, gabe dadaboru ni ise do anak boru i? Harana, halaklahi na pitu i madung mardadaboruhon ia!”

24Dialusi Jesus ma, “Madung lilu hamu hara ni na so diastui hamu Buku Na Badia i dohot kuaso ni Debata. 25Angke anggo dung mulak mangolu do mangulahi angka na mate i, nada marbagas be halahi. Songon ngolu ni surusuruan noma halahi di banua ginjang i. 26Dung i anggo taringot tu angka na mate i na dipangolu mangulahi, adong he na so jungada dope disise hamu di buku ni si Musa taringot tu ramba na gor i? Di angka ayat i adong do tarsurat na nidok ni Debata tu si Musa songon on, ‘Au do Debata ni si Abraham, Debata ni si Ishak dohot Debata ni si Jakob.’ 27Tapi anggo Debata, nada Debata ni na mate; Debata ni na mangolu do. Na lilu do hamu!”

Tona na ummarga

(Mat. 22:34-40; Luk. 10:25-28)

28Jadi ro ma sahalak Siboto Surat manangihon pangkataion ni Jesus dohot halak Saduse i. Denggan do pangalusi ni Jesus diida ia maradopkon angka halak Saduse i. Dung i disapai ia ma tu Jesus, “Sian sude angka tona na adong, tona dia do na ummarga?”

29Dialusi Jesus ma, “Anggo tona na ummarga, i ma: ‘Tangihon hamu ma, hamu halak Israel! Tuhan Debatanta, i ma Tuhan na sada.#12:29 Tuhan Debatanta, i ma Tuhan na sada: Tuhan i ma Debatanta, holan Tuhan sajo. 30Angkon haholonganmu do Tuhan Debatamu sian sude tondi dohot pamatangmu dohot sude pikiranmu dohot sian sude gogo na adong di ho.’ 31Jana na paduahon na ummarga i ma: ‘Angkon holong do rohamunu di halak na asing songon panghaholongimu di dirimu sandiri.’ Nada adong be tona na ummarga asing sian na dua i.”

32Dung i didok Siboto Surat i ma mandok tu Jesus, “Inda adong hurangna alus ni Guru i! Tutu do na nidokMi: Hum sada Debata sajo do Debata, nada adong be Debata na asing. 33Dung i, angkon holong do roha ni jolma mida Debata sian sude rohana, dohot sian sude pikiranna dohot sian sude na adong disia. Dung i muse angkon holong do roha di halak na asing songon na mangkaholongi diri niba sandiri. Dumengganan dope na songon i ulang pado na manghaulkon pahan-pahanan sanga angka haul na asing tu Debata di ginjang ni inganan parkaulan i.”

34Diida Jesus, ma denggan sajo do alus ni Siboto Surat i. Didok Jesus ma tusia, “Saotik nari noma anso gabe anggota di Harajaan Ni Debata ho.”

Dung i inda adong be halak na puluk manyapai tu Jesus.

Sapa-sapa taringot tu Kristus

(Mat. 22:41-46; Luk. 20:41-44)

35Jadi dompak na mangajari i Jesus di Bagas Ni Debata, disapai Ia ma, “Bia do pandok ni angka Siboto Surat i paboa na pinompar ni si Daud do Kristus i? 36Si Daud sandiri, marhite panuturi ni Tondi Parbadia mandok:

‘Madung didok Tuhan i do tu Tuanku:

Juguk ma Ho di siamunKu

lopus Hubaen sude angka musuMu tunduk tu Ho.’

37Si Daud sandiri mamiohon Ia ‘Tuanku’: Jadi tarbia ma parjadina gabe pomparan ni si Daud muse Ia?”

Sipaingot anso jamot maradopkon angka Siboto Surat

(Mat. 23:1-36; Luk. 20:45-47)

Tabo dihilala halak na marroan i tu Bagas Ni Debata umbege Jesus na mangajar i. 38Didok Ia disi, “Jamot ma hamu adop angka Siboto Surat i. Na torus do halahi mardalan-dalan mamake baju na ginjang. Na jopan do muse roha ni halahi muda ditabi halak di poken. 39Ulang so di juluan halahi juguk muda ro tu bagas paribadatan dohot di angka pesta. 40Angka na mabalu dipaoto-oto halahi muse laho mambuat bagasna i. Ginjang-ginjang dibaen halahi hata ni tangiang ni halahi laho manutup-nutupi hajahatan ni halahi i. Na boratan do saulahon uhuman tu halahi!”

Haul ni sahalak ina na mabalu

(Luk. 21:1-4)

41Dung i juguk ma Jesus satongtang ni poti ni hepeng na di Bagas Ni Debata. Diparrohahon Ia ma angka halak na pamasukkon hepengna tu poti i. Bahat do halak na maradong pamasukkon hepengna bahat-bahat. 42Ro muse ma sada ina na mabalu boti pogos muse. Dipamasuk ia ma dua hepeng tumbaga. I ma tukaran ni hepeng na ummenek argana. 43Dung i dipio Jesus ma angka siseanNia i didok Ia ma tu halahi, “Parrohahon hamu ma jolo on: Umbahat do hepeng na nipamasuk ni ina na mabalu i sian na nipamasuk ni sude angka halak na asing i. 44Angke sian halobian ni halahi do na dilehen i, tapi anggo na mabalu i, sian hahuranganna do, sude na adong disia, i ma na porlu tu hangoluannia.”

Currently Selected:

MARKUS 12: LAIAKB

Highlight

Copy