LUKAS 8

Angka dadaboru na mandongani Jesus

1Nada sadia honok dung i, mardalani ma Jesus tu angka kota dohot huta-huta i. Dijamitahon Ia ma disi Jamita Na Denggan taringot tu Harajaan Ni Debata. Dohot ma dua bolas halak siseanNia i laho mandongani Ia. 2Songon i muse angka dadaboru na dung dipamalum sian angka tondi na jahat dohot nyae. I ma si Maria na nigoaran muse si Magdalena (pitu begu dipaorot sian ia); 3dohot si Johanna daboru ni si Khusa, bendahara ni Raja Herodes; si Susanna, bahat dope tehe daboru na asing. Halahi sandiri do na pasingkop na hasaya di Jesus rap dohot angka siseanNia i.

Umpama taringot tu sada halak na manyabur same

(Mat. 13:1-9; Mrk. 4:1-9)

4Torus do marroan halak mandapotkon Jesus sian angka kota na marragam. Dung bahat sajo halak marlagut, dicaritahon Jesus ma umpama on tu halahi. 5Ning Ia ma, “Adong ma sada halak, na kehe manyabur same. Jadi hatiha na manyabur i ia, adong ma same i na madabu di dalan i, gabe didege-dege halak ma i jana dipapangani unggas. 6Adong muse ma na madabu tu tano na marbatu-batu. Di na mamungka haruar tumburna manigor malos ma suan-suanan i, angke mahiang do tanona i. 7Adong muse ma same i na madabu tu tonga-tonga ni angka duri. Mur magodang ma angka duri i rap dohot angka same na tubu i. 8Tapi adong muse do same na madabu tu tano na napu, gabe tubu ma i jana marsuha ma saratus lompit.”

Dung i dipaujung Jesus ma umpamania i songon on, “Sanga ise na marpinggol laho marbinege, ditangihon ia ma!”

Biasi angkon mamake umpama Jesus

(Mat. 13:10-17; Mrk. 4:10-12)

9Disapai angka siseanNia i ma tu Jesus astuan ni umpama i. 10Ninna Jesus ma mangalusi, “Madung dilehen anggo di hamu parbinotoan laho umboto sibunian ni Harajaan Ni Debata. Tapi anggo tu halak na asing mamake umpama do dipaboa taringot tusi, anso ulang diida halahi haru pe nian manaili halahi; haru pe marbinege halahi tapi nada mangarti.”

Dipatorang Jesus astuan ni umpama ni panyabur same i

(Mat. 13:18-23; Mrk. 4:13-20)

11“Ondo astuan ni umpama i: Same i, i ma hata ni Debata. 12Same na madabu tu dalan i, manggambarkon angka halak na manangihon hata i. Tapi ro ma Sibolis mangarampas hata i sian roha ni halahi anso ulang porsaya jana nipalua halahi. 13Same na madabu tu tano na marbatu i, i ma manggambarkon angka halak na manangihon hata i jana na manjagitsa mardongan sonang ni roha. Tapi nada jabat marurat di bagasan roha ni halahi. Hum santongkin sajo do halahi porsaya hape di na ro pandugaan, marbalik ma halahi. 14Same na madabu tu tonga-tonga ni duri i, manggambarkon angka halak na manangihon hata i tapi ganggu do roha ni halahi jana por roha ni halahi di sinadongan boti lungun roha ni halahi marsonang-sonang di tano on. Sudena ma i mangkapit halahi mambaen halahi nada marbatuhon parbatu na matoras. 15Same na madabu tu tano na napu i, i ma manggambarkon angka halak na umbege hata i, jana na manjagohon sadenggan-dengganna di bagasan roha ni halahi. Burju do halahi jana sobar, gabe tulus ma marbatuhon parbatu na denggan.”

Lampu na nitungkupan dohot ampang

(Mrk. 4:21-25)

16“Nada adong halak manutung lampu, dung i ditungkupi muse dohot ampang, sanga pe dipayakkon di toru ni podoman. Di inganan ni lampu do dibaen lampu, anso diida na ro tu bagas i sondangna i. 17Angke nada adong bagi aha na buni, na so haidaan muse, jana nada adong na simo na so diboto halak muse, angkon tarboto do i jana dipapatar.

18Antong parrohahon hamu ma tangkas sanga songon dia parbinegemunu. Angka halak na dung marnampuna, nitambaan muse dope disia. Tapi halak na so adong diha-dihana, dibuat muse dope sian ia sanga aha na nietongnia adong disia.”

Ina dohot angka kahanggi ni Jesus

(Mat. 12:46-50; Mrk. 3:31-35)

19Ro ma inang ni Jesus dohot angka anggiNia mandapotkon Jesus. Tapi nada tarbaen halahi marsuo dohot Ia hara ni bahat ni halak. 20Dung i adong ma sada halak paboahon tu Jesus. “Di ruar an do inaMu dohot anggiMu. Giot marsuo halahi dohot Ho.”

21Tapi didok Jesus ma tu halahi sude, “Angka halak na umbege hata ni Debata jana na mamarangehonsa, i do Dainang dohot anggingKu.”

Dipaso Jesus alogo na gogo

(Mat. 8:23-27; Mrk. 4:35-41)

22Di na sadari marparau ma Jesus dohot angka siseanNia i. Ning Jesus ma tu halahi, “Taripar ma jolo hita tu bariba ni dano on.” Dung i kehe ma halahi marparau. 23Hatiha na marparau i halahi tarpodom ma Jesus, jana mangombus ma alogo na gogo di dano i. Masuk muse ma aek tu bagasan parau i gabe di parmaraan ma halahi sude. 24Kehe ma angka siseanNia i mandapotkon Jesus mangngoti Ia. Ning halahi ma, “O, Guru! Guru! Marmara ma hita on!”

Ngot ma Jesus, digorahon Ia ma alogo dohot aek ni dano na marombak i. Alogo i pe dohot aek ni dano i nada marombak be jana gabe so ma sudena. 25Dung i ninna Jesus ma tu angka siseanNia i, “Di dia do haporsayaanmunu?”

Mabiar ma halahi boti homang-homang sajo. Didok halahi ma sama halahi, “Ise do ulaning on? Alogo dohot ombak pe tarparenta Ia. Patu muse do alogo dohot ombak i tuSia!”

Dipaisir Jesus tondi na jahat sian halak Gerasa

(Mat. 8:28-34; Mrk. 5:1-20)

26Ditoruskon Jesus ma dohot angka siseanNia i marparau lopus tu Luat Gerasa#8:26 Gerasa: Dipiga-piga naskah narobi, didok: Gadara sanga Gergesa. di ipar ni Dano Galilea sabola Habincaran. 27Dung mijur Jesus tu darat, didapotkon sada bayo na hona tondi na jahat ma Ia. Na ro sian kota i do bayo i. Honok ma nada ra marpakean jana nada ra tinggal di bagas bayo i. Hum na di liang ni kuburan ma ia. 28Di na niidania Jesus, mangangguhi ma ia jana marsomba di jolo ni Jesus, marsurak ma ia, “O, Jesus Anak Ni Debata Na Guminjang! Na giot mahua do Ho tu au? Gomos ma hupangidohon, ulang ma parkanciti au!” 29Umbaen na nidok ni bayo i pe songon i, hara ni na dung dipaorot Jesus do tondi na jahat i ruar sian ia. Bahat sajo tondi na jahat i na manggosa-gosa bayo i. Jadi haru dirante pe tangannia dohot patna i jana dijagoi dope ia, laing tarruntaskon ia do rante i gabe dioban setan i ma ia tu halongonan.

30Disapai Jesus ma tu bayo i, “Ise goarmu?”

“ ‘Legion’ do goarku,” ning bayo i – angke bahat do tondi na jahat na masuk tusia. 31Gomos ma dipangido angka tondi na jahat i, anso ulang dipaisir Jesus halahi tu banua toru.#8:31 banua toru: Anggo pandapot ni halak, di banua toru do inganan ni angka tondi na jahat. Disi ma halahi lopus abis masa uhumanna.

32Donok tu inganan i, adong do babi bahat sajo, na topet mangugei di dolok i. Gomos ma dipangido angka tondi na jahat i anso dipaloas Jesus halahi masuk tu angka babi i. Gabe dipaloas Jesus ma. 33Dung i ruar ma angka tondi na jahat i sian bayo i, masuk ma halahi tu angka babi i. Maturubus ma angka babi i sian rahis-rahis i tu dano an, gabe mate marmogapan sudena.

34Diida angka parmahan babi i ma na masa i. Gabe marlojongi ma halahi tu kota dohot tu huta na humaliang i, dicaritohon halahi ma sudena i. 35Markehean ma halak giot mangaligi sanga aha na masa i. Didapotkon halahi ma Jesus, dung i diida halahi ma disi bayo na nitadingkon ni tondi na jahat i juguk di lambung pat ni Jesus. Madung denggan ia marpakean, pikirannia pe madung torang. Gabe mabiar ma halahi sude. 36Jadi dicaritahon halak na midaan i ma tu angka jolma i pangalahona parmalum ni bayo i. 37Dung i gomos ma dipangido sude halak na di Luat Gerasa i tu Jesus, anso morot Ia sian inganan i, hara ni santakna biar ni halahi sude. Dung i marparau ma Jesus laho mulak. 38Dung i gomos ma dipangido bayo na nitadingkon ni tondi na jahat i anso laing tola ia rap dohot Jesus.

Tapi disuru Jesus ma ia kehe, ninna ma, 39“Kehe ma ho mulak tu bagasmu jana baritahon ma sanga aha na dung dipatupa ni Debata tu ho.”

Jadi kehe ma bayo i paboahon sanga na tudia di kota i sude, taringot tu na nibaen ni Jesus tusia.

Boru ni si Jairus dohot anak boru na manjama baju juba ni Jesus

(Mat. 9:18-26; Mrk. 5:21-43)

40Jadi dung mulak Jesus bahat do halak mangalo-alo Ia, dibaen madung tarpainte-inte halahi diSia. 41Dung i ro ma sahalak kapala ni bagas paribadatan di kota i, si Jairus goarna. Marsomba ma ia di jolo ni Jesus jana dipangido ia ma gomos tu Jesus anso ro nian Jesus tu bagasnia, 42dibaen giot mate ne ma borunia na dung marumur dua bolas taon. Hum sada i muse do borunia.

Tapi di na mardalan Jesus laho tu bagas ni si Jairus, marsisosak di ibana ma halak tuSia. 43Adong ma disi sahalak anak boru na sai ro bulanna ma jabat dua bolas taon. Madung abis sinadongannia dipake ia manggarari pangubati#8:43 Madung abis sinadongannia dipake ia manggarari pangubati: Dipiga-piga naskah narobi nada adong hata on. hape nada adong na tolapsa pamalumkon ia. 44Disolat anak boru i ma sian tonga-tonga ni halak na bahat i lopus lalu ia tu pudi ni Jesus. Jadi dijama ia ma topi ni baju juba ni Jesus. Ompot ma pantan bulanan ni anak boru i. 45Dung i didokkon Jesus ma, “Ise dehe, na manjama Au i?”

Dung sude halak mansoadahon, ninna si Petrus ma, “Guru, bahat do halak mangarongomi jana marsisosak be tu Guru i!”

46Ninna Jesus ma, “Tapi adong do halak na manjama Au. Huboto do i, angke adong hagogoon na ruar sian Au.” 47Diboto anak boru i ma na dung tarboto pangalahonia i. Jadi ro ma ia tu jolo ni Jesus hitir-hitir marsomba. Dipaboa ia ma di jolo ni halahi sude sanga hara ni aha umbaen dijama ia Jesus, dohot nyaenia sanga tarbia parmalumna manigor santongkin i. 48Didok Jesus ma tusia, “Madung dipamalum haporsayaanmi ho da inang. Kehe ma ho, dibagasan sonang!”

49Dompak na mangkatai i dope Jesus, lalu ma suruan sian bagas ni si Jairus kapala ni bagas paribadatan i. Didok Ia ma tu si Jairus, “Indangkon be nipasusa Guru i, harana madung jumolo dakdanak ni bapa i.”

50Dibege Jesus do na nidok ni bayo i. Gabe didok Jesus ma tu si Jairus, “Ulang ho mabiar, salaku porsaya sajo ma ho, malum do dakdanakmi.”

51Dung lalu Jesus tu bagas ni si Jairus, nada dipatola Jesus umpe sahalak masuk rap dohot Ia; hum si Petrus, si Johannes, si Jakobus dohot natoras ni dakdanak i sajo ma na dipaloas masuk. 52Martangisan ma sude halak jana marsak be rohana hara ni parmate ni dakdanak i. Mandok hata ma Jesus, “Ulang hamu tangis. Inda na mate dakdanak on. Hum na modom do i!”

53Gabe dipartatai halahi ma Jesus, angke tangkas do diboto halahi na dung mate dakdanak i. 54Dung i digolom Jesus ma tangan ni dakdanak i, ning Ia ma, “Ngot ma ho inang!” 55Mangolu ma dakdanak i, jana manigor jongjong. Dung i disuru Jesus ma halahi mangalehen mangan tu dakdanak i. 56Homang sajo ma roha ni natoras ni dakdanak i. Tapi dirarang Jesus ma halahi anso ulang dipaboa-boa na masa i sanga na tu ise pe.

Currently Selected:

LUKAS 8: LAIAKB

Highlight

Copy