Lúù 1

Lúù e kíí e kéa bɛ̃̀ɛ̃ Tìɔ́fɔ́lɔ̀ píé

1Tìɔ́fɔ́lɔ̀, mia búnùzɛ̀ waà o yí dɔ gágà kɛ ó wɔ̃́ lɛ́ aà kɛ ko fĩ̀ã̀a wɔ̃̀ bɛ̃̀ɛ̃. 2O wɔ̃́ lɛ́ mia wa gèe ko lɛ̀ɛ kpó‐kpó bɛ̃̀ɛ̃. Mia lɛ́ o wɔ̃́ e kéa gèe ko lɛ̀ɛ, o lɛ́ o wɔ̃́ nì e kília gɛ̃̀ à gã̀ gbɛ̃̀‐pìà, wáà lò yɛɓo kɛ̀á sí wɔ̃́ làṹ yièa gèeè káa. 3À mɔ́ɔ̀ wɔ̃̀ mɔ̀ɔ, m dàa, lɛ m lɛ̀ɛ sɛ̀ kɛ ḿ wɔ̃́ kɛ‐zì nì e kília bɛ̃̀ɛ̃ e kpáá yí i lɛ̀ɛ, ɓii maà m zò yà m gé, máà wɔ̃́ nì e kília séĩ́ yí naà é gó o zì gã̀‐gbɛ̃̀pìà, máà lòá líé. 4Ḿm̀ wɔ̃́ e kéa kɛ̀, kɛ í wɔ̃́ lɛ́ waà à zɔ̃̀ɔ̃̀ i lɛ̀ɛ kɛ̀ wánà ká pìà kpó‐kpó yí dɔ.

O Zɔ̃̀ɔ̃́ mia bàtáì‐kɛ‐mì ye‐wɔ̃̀ gèe

5Lɛ̀ Hɛ́lɔ̀ e kɛ sɛ́lɛ́ líé‐sí‐mì ká Zùdíàa, sálà‐ɓò‐Wálà‐mɔ̀‐mì doó e kɛ yía, o kɛ à sípìà Zɛkèláyà. E kɛ sálà‐ɓò‐Wálà‐mɔ̀‐mìà kù yé ò si Àbáyàa, mì dò ká. O kɛ à na sípìà Ilésébɛ̀. À bɛ̃̀ɛ̃ lɛ́ɛ̀ go nɔ́ sálà‐ɓò‐Wálà‐mɔ̀‐mìà sùu là. 6O pèèlɛ o zì yìì‐kɔ̀ e kɛ kpeĩ Wálà lɛ̀ɛ. O wɔ̃́ séĩ́ lɛ́ ko Dàa‐mì à gèe ó kɛɛ, o kɛ à kɛ‐mìà ká. O o kɔ̀ kùnù à zì wɔ̃́ kɛ‐zì séĩ́ mɔ̀. 7Kɛɛ òó gbaa nɛ́ gbɛɛ ye, ɓii Ilésébɛ̀ e kɛ kpómá ká. O pèèlɛɛ o kɛ kòlò nyɔ́ɔ̀ɔ.

8Lúó doó káa, Zɛkèláyà e kɛ là sálà‐ɓò‐Wálà‐mɔ̀ yɛ̀ɓo kɛpìà Wálà wɛlɛ mɔ̀, lɛ̀ lɛ́ e kɛ wà e ɓɛ́ĩ̀ nì o zì yɛɓo kɛ‐lùò káa ká. 9Sálà‐ɓò‐Wálà‐mɔ̀‐mìàa zì wɔ̃́ kɛ‐kɔ̀ lɛ́ e kɛ o kɔ̀ mɔ̀ɔ lɛ́ e kélɛ̀, o kɛ gɔ̃‐pɛ̀ gɔ̃pìà kɛ ó mi lɛ́ è lo pɛ gĩĩ yiè zɛ̀ gélèa dɔ. Lɛ̀ e kɛ kília, o Zɛkèláyà dɔ à kɛ‐mì ká. Yé e kɛ kília, e ló ko Dàa‐mì là sálà‐ɓò‐Wálà‐lɛ̀ɛ‐kàa wì. 10Lɛ̀ e kɛ pɛ gĩĩ yiè zɛ̀ɛ gélépìàa, mia kù gbùò zɛ̀ o kɛ dɔ̀á pɛ́lɛ̀ zèí, wáà sɛ̀nɛ ɓò. 11Ko Dàa‐mì là vɔ‐mì doó e ɓíé à là. Vɔ‐mì e kília e kɛ dɔ̀á lɛ̀ lɛ́ ò pɛ gĩĩ yiè zɛ̀ɛ gèlè yi sálà‐ɓòà‐là‐pɛ̀ɛ làa mɔ́ɔ̀ kɔ̀ yiè là. 12Lɛ̀ Zɛkèláyà e à gɛ̃̀ɛ, à zò e mɛ̀ à mɔ̀, tó áà tùò. 13Kɛɛ vɔ‐mìa a gèe à lɛ̀ɛ, “Zɛkèláyà, yékɛ̀ í túó. Wálà aà ɓà sɛ̀nɛ‐ɓo‐wè ma. I na Ilésébɛ̀ lɛ́ɛ̀ lo nɛ́ doó yeè i lɛ̀ɛ. Lɛ à mɔ̀ í à sí Zɔ̃̀ɔ̃́. 14Géli wà zò‐yà‐gé lɛ́ɛ̀ lo kɛɛ̀ i kɛ̀lɛ̀. Mia búnùzɛ̀ bɛ̃̀ɛ̃ óò lo kɛɛ̀ géli zɛ̀ yé waà yea ká. 15Lɛ́ɛ̀ lo kɛɛ̀ gɔ̃ kpànazɛ̀ ká ko Dàa‐mì wɛlɛ mɔ̀. Yékɛ̀ é wã́ã́ĩ̀ ɛ̃́ɛ̃́ yɔ mɛ́ gágà zɛ̀ mi. À zì ye‐lùò téé‐tèè káa, à paà lɛ́ɛ̀ lo kɛɛ̀ à ká Gɛ̀ɛ̀ Púlú ká. 16Lɛ́ɛ̀ lo nuù mia búnù‐búnùzɛ̀ lɛ́ o Éézɛ̀lɛ̀‐mìà káa, ká ko Dàa‐mì lɛ́ e wà Wálà káa píé zeĩ́. 17Lɛ́ɛ̀ lo dɔɔ̀ à mɔ̀ líé. À zò wà à zì yíkɛ̀ gáàa mɛ́ lɛ́ɛ̀ lo kɛɛ̀ gágà, lɛ̀ zí Ìláyà zì e kɛá mɔ́ɔ lɛ́ ɓe. Lɛ́ɛ̀ lo à kɛɛ̀ tó nɛ́ wà o dàa nì o kɛ doó zeĩ́. Lɛ́ɛ̀ lo mia lɛ́ òó Wálà wéè kɛɛ nìɛ̀, kɛ wà mia yé lɛ́ o kpeĩa nì o zì gíkã́ é kɛ doó. Lɛ́ɛ̀ lo ko Dàa‐mì là mia pɛ̀ kɛɛ̀ à lɛ̀ɛ.”

18Zɛkèláyà a gèe vɔ‐mìa lɛ̀ɛ, “Ḿm̀ lo à yí dɔɔ̀ wánà ká kpɛ? Maà kɛ gbaa kòlò. M na bɛ̃̀ɛ̃ aà kɛ nɔ́ kòlò kíli.”

19Vɔ‐mìa e à là nìɛ̀ weeá kélɛ̀, “Ma lɛ́ m Géɓɔ̀lɔ̀ káa. M dɔ̀á Wálà wɛlɛ mɔ̀. E m vɔ, kɛ ḿ mɛ́ĩ́ ɓo i lɛ̀ɛ, ɛ̃́ɛ̃́ ḿ wɔ̃́ làṹ yiè e kéa gèe i lɛ̀ɛ. 20Kɛɛ ìí wɔ̃́ lɛ́ ma gèe i lɛ̀ɛ lɛ́ è lo kɛɛ̀ e kɛ‐lùò káa, gɛ̃̀ wánà ká. Lɛ̀ lɛ́ ìí à gɛ̃̀ wánà káa, i lé lɛ̀ɛ́ ló wéè. Íì lo tóò i lɛ̀à gaàa zɛ̀ ká, é tóá kíli m wè lɛ́ ma dɔ i lɛ̀ɛ, à píé‐wɔ̃̀ é kɛ.”

21Yé e kɛ kɛpìà kília, míáa o kɛ dɔ̀á Zɛkèláyà gɛ̀nɛ̀. O kɛ o yɛ́lɛ́ táápìà túó lɛ́ Zɛkèláyà aà ɓo Wálà‐kàa wìa mɔ́ɔ̀ wɔ̃̀ mɔ̀. 22Lɛ̀ e ɓɔ pɛlɛía, bɛ̀i lɛ̀ɛ́ gbaa kɛ à mɔ̀ kɛ é wéé o píé. O à yí dɔ gbaa kélɛ̀ Zɛkèláyà e pɛ lɛ́ lɛ kélɛ̀ mɛ̀ĩ̀ lɛ́ ɓea zɛ Wálà‐kàa wì. Lɛ̀ bɛ̀i lɛ̀ɛ́ gbaa kɛ à mɔ̀ é wééa, e kɛ mɛ́ĩ́ ɓopìà e kɔ̀ ká o lɛ̀ɛ.

23Lɛ̀ lúó lɛ́ è yɛɓo kɛ̀á Wálà‐kàa wìa e nyɛɛ, Zɛkèláyà e ló e mɛ̀ĩ́ e pà. 24Lɛ̀ lúó dò e diea, à na Ilésébɛ̀ e e gí sí. Lɛ̀ɛ́ gbaa gó e píé kɛ́ì mɛnɛ sɔ́ɔ́li píé. E à gèe kélɛ̀, 25“Dɛɛ ká gbaa, ko Dàa‐mì aà gbũ m mɔ̀ zí e kéa ká. Aà wɔ̃́ yɛ́lɛ̀ zɛ̀ lɛ́ e kɛ m mɔ̀ mia nyìɛ mɔ̀ɔ, ɓo gbaa m mɔ̀.”

O Zízɛ̀ ye‐wɔ̃̀ gèe

26Lɛ̀ Ilésébɛ̀ gí kɛ̀‐à‐mɔ̀ mɛnɛ e kɛ sáláádoa, Wálà e là vɔ‐mì Géɓɔ̀lɔ̀ vɔ pɛ́lɛ lɛ́ e kɛ Gálàlíì, lɛ́ ò si Názàlɛ̀ɛ yí. 27Wè‐vɔ dò e kɛ à kɛ̀lɛ̀, kɛ á gèe lee‐nɛ̀ gbɔ̃̀ũ̀ doó lɛ́ à gɔ̃‐wɔ̃̀ yí dɔɔ̀ lɛ̀ɛ́ gbaa kɛ à káa lɛ̀ɛ. Lee‐nɛ̀ e kília wà gɔ̃ lɛ́ ò si Zósɛ̀, lɛ́ e kɛ Dèɓé sùu‐là‐mì káa, wà ye o wè dɔɔ̀ e kɛá kɛ ó o kíe sí. Lee‐nɛ̀fúa tɔ́ lɛ́ Melé. 28Vɔ‐mìa e ló à píé, a gèe à lɛ̀ɛ, “Ƃaà vùò. M Dàa‐mì lɛ i píé. Aà lúà kpɔ́ i mɔ̀ kpànazɛ̀.”

29Melé zò e mɛ̀ kpó‐kpó ɓo à mɔ̀ wɔ̃́ lɛ́ vɔ‐mìa a gèea mɔ́ɔ̀ wɔ̃̀ mɔ̀. E kɛ wèè‐mi‐bà kɔ̀ sùua yí naapìà á dɔ. 30Vɔ‐mìa a gèe à lɛ̀ɛ, “Melé, yékɛ̀ í túó. Ƃii Wálà zò aà kɛ i ká sɛ̀. 31Íì lo i gí síì, ɛ̃́ɛ̃́ íì lo gɔ̃‐nɛ̀ doó yeè. Íì lo à tɔ́ kpɔ́ɔ̀ Zízɛ̀. 32Lɛ́ɛ̀ lo kɛɛ̀ kpànazɛ̀, ɛ̃́ɛ̃́ óò lo à síì Wálà lɛ́ lɛ pɛ séĩ́ làa Gbe. Ko Dàa‐mì Wálà lɛ́ɛ̀ lo à kɛɛ̀ mia líé‐sí‐mì ká, lɛ̀ zí à dàa ye dàà Dèɓé e kɛáa lɛ́ ɓe. 33Ɛ́ɛ̃́ lɛ́ɛ̀ lo Zékɔ̀ sùu‐là‐mìà líé síì tòá kíli ká. À zì tò‐mia‐là lɛ̀ɛ́ ló nyɛɛ̀.”

34Melé a gèe vɔ‐mìa lɛ̀ɛ, “M lee lɛ́ lɛ̀ɛ́ gɔ̃‐wɔ̃̀ yí dɔ nɛ́ɛ ká. Zi sùu kpɛɛ̀ lɛ́ bɛ̀i è lo kɛɛ̀á wɔ̃́ sùua mɔ̀ é kɛ?”

35Vɔ‐mìa a gèe à lɛ̀ɛ, “Gɛ̀ɛ̀ Púlú lɛ́ɛ̀ lo nuù i là, ɛ̃́ɛ̃́ Wálà lɛ́ lɛ pɛ séĩ́ làa, là yíkɛ̀ gáàa bĩ́ lɛ́ɛ̀ lo kɛɛ̀ dɔ̀á i là. Wɔ̃́ e kéa mɔ́ɔ̀ wɔ̃̀ mɔ̀ɔ, nɛ́ kɛ‐wɔ̃̀ púlú zɛ̀ lɛ́ à yeè è lo kɛɛ̀ à káa, óò lo à síì Wálà Gbe. 36Ɛ́ɛ̃́ zeĩ́, Ilésébɛ̀ lɛ́ e i mì káa, o kɛ à sípìà kpómá‐lè. Kɛɛ Ilésébɛ̀ dìè gí aà kɛ à mɔ̀ mɛnɛ sáláádo píé, yé bɛ̃̀ɛ̃ lɛ lee kpáà kpó‐kpó káa ká. 37Ƃii wɔ̃́ dò wá ɓe kɛ Wálà é kɔ̃́ à kɛɛ̀ mɔ̀.”

38Lɛ̀ e kɛ kília, Melé a gèe kélɛ̀, “M ko Dàa‐mì là lùò‐lè ká. Wɔ̃́ è kɛ m ká lɛ̀ zí ɓaà à gèe à káa lɛ́ ɓe.” Lɛ̀ e kɛ kília, vɔ‐mìa e gó gbaa à píé.

Melé e ɓɔ Ilésébɛ̀ píé

39Lɛ̀ à lɛ̀ e ɓo pèèlɛɛ, Melé e wɛ̀lɛ̀ áà e gã̀ kɛ̀ táá mɔ̀, áà lò sɛ́lɛ́ lɛ́ tɔ̃̀ũ̀ e kɛ à yí gbùòa yí. E ló pɛ́lɛ doó lɛ́ e kɛ Zúdàa yí. 40E ló Zɛkèláyà píé kɛ́ì, áà Ilésébɛ̀ vùò‐wè gèè. 41Lɛ̀ Ilésébɛ̀ e Melé wéè ma, áà vùò‐wè gèèa, nɛ́ lɛ́ e kɛ Ilésébɛ̀ géa, e pá e dìè mɔ̀. Ilésébɛ̀ paà e kɛá Gɛ̀ɛ̀ Púlú ká, 42e e wúú wɛ̀lɛ̀ lɛ̀í weeá kélɛ̀, “I lee kpó‐kpó lɛ́ lúà kpɔ́ɔ̀ lɛ à mɔ̀ loà séĩ́ bàa ká. Lúà kpɔ́ɔ̀ lɛ nɛ́ lɛ́ ì lo à yeèa mɔ̀. 43Mɛ́ e kɛ lɛ́ wɔ̃́ kpànazɛ̀ sùua è kɛ̀ m ká, lɛ́ m Dàa‐mì lèe è nu ɓɔɔ̀ m píé ɓe? 44Ƃii yé m i wéè ma nɔ́, ɓáà m vùò‐wè gèèa, nɛ́ lɛ́ e m géa, e pá e dìè mɔ̀ géli ká. 45Ƃi lɛ́ i zò dɔɔ̀ lɛ ko Dàa‐mì mɔ̀ kélɛ̀ wɔ̃́ aà à gèe i lɛ̀ɛ lɛ́ɛ̀ lo kɛɛ̀ wánà káa, zò géli lɛ i kɛ̀lɛ̀.”

Melé là Wálà tɔ́‐ɓɔ‐tã̀ a ɓoa

46Melé a gèe kélɛ̀,

“M zò lɛ́ɛ̀ ko Dàa‐mì tɔ́ ɓɔ.

47M gɛ̀ɛ̀ gé lɛ́ɛ̀ li, Wálà lɛ́ e m La‐mì káa mɔ́ɔ̀ wɔ̃̀ mɔ̀.

48Ƃii aà e nyìɛ dùò má m là lùò‐lè ɓɔ̀ɔ káa là.

É kã́ pɛ́nɛɛ mɔ̀, é lóá líéa, mia séĩ́ óò lo m síì géli.

49Ƃii Wálà lɛ́ yíkɛ̀ gáàa lɛ à kɛ̀lɛ̀ɛ, aà wɔ̃́ kpàlé‐kpàlézɛ̀ kɛ m lɛ̀ɛ.

À tɔ́ lɛ tɔ́ púlú ká.

50É kã́ lúó lɛ́ ko dàa ye dàà nì o kɛ à yía mɔ̀, é lóá líéa,

Wálà lɛ́ɛ̀ mia lɛ́ ò tùò à lɛ̀ɛ yéĩ̀ kũ.

51Pɛ lɛ́ a kɛ e kɔ̀ káa, e là yíkɛ̀ gáàa zɔ̃̀ɔ̃̀ mia lɛ̀ɛ.

E mia lɛ́ ò o dìè si gbùòa, ɛ̃́ɛ̃́ wà o zì wɔ̃́ lɛ́ waà yà o gé ó kɛɛ, kã́ e kíe mɔ̀.

52E sɛ́lɛ́ líé‐sí‐mìà yí gágà zɛ̀ ɓo wà dɔ‐táŋáná yí.

E mia lɛ́ o mia yéĩ̀zɛ̀ káa sí lɛ̀í.

53E mia lɛ́ lɔ̀ɔ è o kɛ̀ɛ, pa pɛ yiè yiè ká.

E à kɛ mia lɛ́ o kɛ mia kpànazɛ̀ káa, o ló o kɔ̀ fèle ká.

54E ɓɔ e wè lɛ́ a dɔ ko dàa ye dàà nì lɛ̀ɛ mɔ̀.

E ɓɔ gbũ̀ là yɛɓo‐kɛ‐mì lɛ́ e Éézɛ̀lɛ̀ káa mɔ̀ pìè.

55À zò e vùò Éɓɔ́lɔ́hã́ã̀ wà e sùu‐là‐mìà séĩ́ yéĩ̀ kṹũ̀ mɔ́ɔ̀ wɔ̃̀ ká tòá kíli ká.”

56Melé e pɛ́ e kélɛ̀ mɛnɛ yààkaa zɛ Ilésébɛ̀ píé yi. Yé e kɛ kília, e yɛ́ e zí, e ló e pà.

Zɔ̃̀ɔ̃́ mia bàtáì‐kɛ‐mì ye‐gã̀

57Ilésébɛ̀ la‐lùò e ɓɔ. Yé e kɛ kília, e gɔ̃‐nɛ̀ ye. 58Lɛ̀ e kɛ kília, à yà‐sɔ́nɔ́‐mìà, e bɛ̀i, à mìà nì o zi lɛ́ ko Dàa‐mì aà wɔ̃́ kpàlézɛ̀ kɛá à lɛ̀ɛ wɔ̃̀ ma. Wà à ye nì o dà gbaa géli yí.

59Lɛ̀ nɛ́fúa kɛ̀ kpóṹ là zèe lùò e kɛ sálàkaa, o nuá kɛ é bɔ̃́ɔ̃́ sí. O kɛ à naapìà ó à dàa tɔ́ kpɔ́ à mɔ̀, wáà sì Zɛkèláyà. 60Kɛɛ à lèe a gèe, “Gbàaò. À tɔ́ lɛ́ Zɔ̃̀ɔ̃́.”

61Wa gèe à lɛ̀ɛ, “Tɔ́ sùua wá i mì nɔ́ɔ fé dò mɔ̀.” 62Lɛ̀ e kɛ kília, o mɛ́ĩ́ ɓo à dàa lɛ̀ɛ o kɔ̀ ká, wáà à wɛ̃́ĩ́‐lɔ̀ɔ kɛ̀ kélɛ̀, “Tɔ́ sùu kpɛɛ̀ lɛ́ ɓà nàà ó kpɔ́ nɛ́fúa mɔ̀?”

63Zɛkèláyà e pɛ lɛ́ ò bɛ̀i à mɔ̀ ó pɛ bɛ̃̀ɛ̃ à làa pɛ̃́. Lɛ̀ e kɛ kília, e pɛ bɛ̃̀ɛ̃. Pɛ́ a bɛ̃̀ɛ̃ lɛ́ e kélɛ̀, “À tɔ́ lɛ́ Zɔ̃̀ɔ̃́.” O séĩ́‐séĩ́ o lé paà e kɛá kpó‐kpó ɓo. 64Lɛ̀ e kɛ nɔ́ kília, Zɛkèláyà lé áà wèè. E gbɛ̃̀ gbaa, áà Wálà tɔ́ ɓɔ̀. 65À yà‐sɔ́nɔ́‐mìà séĩ́ paà e kɛá túó ká. Wɔ̃́ e kéa làṹ e wɛ̃̀ĩ gbaa sɛ́lɛ́ lɛ́ tɔ̃̀ũ̀ e kɛ à yí e gbùò ká, lɛ́ ò si Zùdíàa lɛ̀ séĩ́ mɔ̀. 66Mia séĩ́ lɛ́ wa wɔ̃̀ maa, wa kpɔ́ o gé, wáà gèè, “Mɛ́ è lo kɛɛ̀ nɛ́ sùua kɛ‐wɔ̃̀ ká?” Ƃii ko Dàa‐mì là yíkɛ̀ gáàa e kɛ à píé.

Zɛkèláyà e wɔ̃́ lɛ́ Wálà a káá à léa gèe

67Zɔ̃̀ɔ̃́ dàa Zɛkèláyà paà e kɛá Gɛ̀ɛ̀ Púlú ká, áà wɔ̃́ lɛ́ Wálà aà káá à léa gèè. Ye lɛ́ e kélɛ̀,

68“Kɔ̀à kɔa Dàa‐mì, lɛ́ e Éézɛ̀lɛ̀‐mìà wà Wálà káa, tɔ́ ɓɔ.

E nu kɛ é gbũ là mia nì mɔ̀. Ɛ́ɛ̃́ e o ɓo wɔ̃́ yí.

69Aà mia La‐mì, lɛ́ yíkɛ̀ gáàa lɛ à kɛ̀lɛ̀ɛ, sí ko lɛ̀ɛ.

Mí e kília, lɛ là yɛɓo‐kɛ‐mì Dèɓé sùu‐là‐mì ká.

70E wɔ̃́ nɔ́ doóa káá mɔ́ là dɔ̀‐lé‐là‐mìà púlú lé kɛ ó à gèe.

71E e wè dɔ kélɛ̀ lɛ́ɛ̀ lo ko laà ko dàa‐gbe vɔ̀, ɛ̃́ɛ̃́ mia séĩ́ lɛ́ ko lɔ̀ nyɛɛ̀ lɛ o mɔ̀ɔ kɛ̀lɛ̀.

72A gèe kélɛ̀, lɛ́ɛ̀ lo ko dàa ye dàà nì yéĩ̀ kṹũ̀,

ɛ̃́ɛ̃́ lɛ́ɛ̀ lo ɓɔɔ̀ e zì wè‐dɔ‐wè púlúa mɔ̀.

73-74E e náá kpɔ́ ko dàa ye dàà Éɓɔ́lɔ́hã́ã̀ lɛ̀ɛ.

E e náá kpɔ́, áà gèè lɛ́ɛ̀ lo ko ɓoò ko dàa‐gbe vɔ̀ kɛ̀lɛ̀, tó áà túó ɓò ko là, kɔ́áà gbìnì à lɛ̀ɛ,

75kɛ kó kɛ púlú ɛ̃́ɛ̃́ kpeĩ à wɛlɛ mɔ̀ ko zì kɛ̀ɓe là.

76“M̀ nɛ́ ɓi bɛ̃̀ɛ̃, óò lo i síì Wálà lɛ́ lɛ pɛ séĩ́ làa, dɔ̀‐à‐lé‐là‐mì.

Íì lo dɔɔ̀ líé ko Dàa‐mì mɔ̀, í ló à gɛ̀nɛ̀ bɛ̀iì,

77ɛ̃́ɛ̃́ kɛ í à gèe là mia nì lɛ̀ɛ kélɛ̀ óò lo la‐ɓo sɔ̀lɔ̀ ɓoò, o zì kɛ‐wɔ̃̀ yɔɔ ɓò o wũ mɔ̀ kolo là zàá.

78Kò Wálà zò lɛ mia ká sɛ̀, ɛ̃́ɛ̃́ lɛ́ɛ̀ mia yéĩ̀ kũ.

Lɛ́ɛ̀ lo à kɛɛ̀ tó lɛ̀‐fɔ̀nɔ‐kɔ̀ e gó lɛ̀í, tó e lɛ̀ fɔ̀nɔ ko bà, lɛ̀ nyɛ́nɛ́ lɛ́ ɓe,

79kɛɛ é lɛ̀ fɔ̀nɔ mia lɛ́ o yàá bĩ́ tii bà, ɛ̃́ɛ̃́ lɛ́ ga bĩ́ lɛ o làa bà,

kɛ é zi lɛ́ è lo zò‐yà‐gé píéa, zɔ̃̀ɔ̃̀ ko gã̀ lɛ̀ɛ, kɔ́áà tò à píé.”

80Nɛ́ e kília, e fàa, ɛ̃́ɛ̃́ à mɛ́ e kɛ gbaa gágà gɛ̀ɛ̀ yí zàá. E kɛ yɛ̀í là é tóá kíli é ɓɔá lúó lɛ́ à zɔ̃̀ɔ̃̀ è lo kɛɛ̀á Éézɛ̀lɛ̀‐mìà lɛ̀ɛ é ɓɔ à mɔ̀.

Currently Selected:

Lúù 1: MNT

Highlight

Copy