Máà 16

Zízɛ̀ e wɛ̀lɛ̀ ga kɛ̀lɛ̀

(Máfìù 28.1-8; Lúù 24.1-12; Zɔ̃̀ɔ̃́ 20.1-10)

1Lɛ̀ lɛ́ fĩ́ĩ́-dɔ-lùòa e diea, Melé lɛ́ è go Mádɛ̀lɛ̀-pɛlɛía, ɛ̃́ɛ̃́ Melé lɛ́ e kɛ Zĩ́ĩ̀ lèe káaò, e bɛ̀i, Sàlómèò, o nyɔ́nɔ́ gĩĩ yiè zɛ̀ lɔ́, kɛ ó ló ó táá Zízɛ̀ bílí là. 2Lúó bèĩzɛ̀ lɛ́ e lɔ́ɔ́ yía, à zì làapíé kpó-kpó mɔ̀, kɛɛ nyɛ́nɛ́ lɛ wɛ̀lɛ̀pìàa, o ló Zízɛ̀ ɓɔ́à. 3O kɛ à gèepìà o kíe lɛ̀ɛ, “Ɛ́ɛ̃́, dé è lo gɛ̀lɛ̀ɛ gìni-gíníì ko lɛ̀ɛ, é gó bṹa lé?” 4Lɛ̀ o lóá gɛ̃̀ɛ, o gɛ̀lɛ̀ɛ gɛ̃̀, à gìni-gíníì lɛ, à ɓoò e kɛá à lé. Ƃii gɛ̀lɛ̀ e kília, e kɛ dóo gbùò kpànazɛ̀. 5Lɛ̀ o wàà bṹa yía, o gɔ̃-nɛ̀fú doó gɛ̃̀. À yàà lɛ o kɔ̀ yiè yí, à mɛ́ síì e kɛá gbàà-wíì púlú ká. Túó e nu gbaa o là.

6Ye lɛ́ a gèe o lɛ̀ɛ, “Yékɛ̀ ká túó. Ka Zízɛ̀ lɛ́ è go Názàlɛ̀, lɛ́ wa pá nélè ká kɔ́lɔ́sì mɔ̀ɔ naapìà. Ye wá lɛ̀ɛ mɔ̀. Aà wɛ̀lɛ̀ ga kɛ̀lɛ̀. Kà lɛ̀ gɛ̃̀. Lɛ̀ lɛ́ wa wɔɔ yía, gɛ̃̀ e ké. 7Kɛɛ kà lo, ká gèe Pílɛ̀ wà Zízɛ̀ là tòà-píé-mìà yé o tóa, o lɛ̀ɛ kélɛ̀ lɛ dɔpìà o mɔ̀ líé, áà lò Gálàlíì. À lɛ̀ mɔ̀ lɛ́ ò lo à gɛ̃̀ɛ̃̀ yi, lɛ̀ zí nɔ́ a gèea ká o lɛ̀ɛ lɛ́ ɓea.”

8O ɓɔ pɛlɛí gbaa, o ló bàlá o gó ɓɔ́à e kília mɔ̀. Ƃii mɛ́-tàle nì, túó nì e kɛ o là. Òó gbaa wɔ̃́ gbɛɛ gèe mi nɔ́ɔ fé lɛ̀ɛ, ɓii o kɛ túópìàa wɛ̃́ĩ̀.

Zízɛ̀ e e dìè zɔ̃̀ɔ̃̀ Melé lɛ̀ɛ

(Máfìù 28.9-10; Zɔ̃̀ɔ̃́ 20.11-18)

[ 9Lɛ̀ Zízɛ̀ e wɛ̀lɛ̀ ga kɛ̀lɛ̀ lúó bèĩzɛ̀ lɛ́ e lɔ́ɔ́ yía làapíé kpó-kpó káa, e e dìè zɔ̃̀ɔ̃̀ Melé lɛ́ è go Mádɛ̀lɛ̀-pɛlɛía, lɛ̀ɛ bèĩzɛ̀. Aà pɛ yɔɔ sálápèèlɛ ɓo do Melé e kília píé. 10Melé e ló gbaa, áà à dɔ̀ɔ̀ dɔ̀ mia lɛ́ o kɛ Zízɛ̀ píéa lɛ̀ɛ. O kɛ à yéĩ̀ kṹpìà, wáà gbóó ɓò lɛ̀ lɛ́ Melé e nua ká. 11Lɛ̀ wa ma kélɛ̀ Zízɛ̀ gaà wá gbaa à ká, ɛ̃́ɛ̃́ Melé dìè a gɛ̃̀ɛ, òó gbaa gɛ̃̀ wánà ká.

Zízɛ̀ e e dìè zɔ̃̀ɔ̃̀ là tòà-píé-mìà pèèlɛ lɛ̀ɛ

(Lúù 24.13-35)

12Yé e kɛ kília, Zízɛ̀ e e dìè zɔ̃̀ɔ̃̀ zi dò gbɛɛ ká o pèèlɛ o lɛ̀ɛ lɛ̀ o kɛ táápìà, wáà lò sɛ́lɛ́ kélé kélé e tóa yí píéa ká. 13O ló o mɛ̀ĩ́, wa gèe mia yé o tóa o lɛ̀ɛ. Kɛɛ òó gbaa gɛ̃̀ wánà ká.

Zízɛ̀ e e dìè zɔ̃̀ɔ̃̀ là tòà-píé-mìà vũ̀ doó wɛ́lɛ́ doó lɛ̀ɛ

(Máfìù 28.16-20; Lúù 24.36-49; Zɔ̃̀ɔ̃́ 20.19-23; Àpɔ́sɔ̀lɔ̀ 1.6-8)

14Yé e kɛ kília, Zízɛ̀ e e dìè zɔ̃̀ɔ̃̀ là tòà-píé-mìà vũ̀ doó wɛ́lɛ́ doó lɛ̀ɛ, lɛ̀ lɛ́ o kɛ o lé ɓèlèpìàa ká. E gbɛ̃̀ áà wèè o lɛ̀ɛ, ɓii zò-dɔ̀à-mɔ̀ lɛ̀ɛ́ gbaa kɛ o yí, ɛ̃́ɛ̃́ zeĩ́a, o wũ-kèlè yí e kɛ gágà. E bɛ̀i, òó gbaa mia lɛ́ o à gɛ̃̀, kɛɛ aà wɛ̀lɛ̀ ga kɛ̀lɛ̀ɛ, wéè gɛ̃̀ wánà ká. 15A gèe o lɛ̀ɛ, “Kà lo sɛ́lɛ́ séĩ́ là, káà lò wɔ̃́ làṹ yièa gèeá sí lòũ̀ ká mia séĩ́-séĩ́ lɛ̀ɛ. 16Mi lɛ́ è lo à gɛ̃̀ɛ̃̀ wánà ká, ɛ̃́ɛ̃́ lɛ́ ò lo à bàtáì kɛɛ̀ɛ, lɛ́ɛ̀ lo laà. Mi lɛ́ lɛ̀ɛ́ ló à gɛ̃̀ɛ̃̀ wánà káa, mɛ̀ĩ́-sà lɛ́ɛ̀ lo káà à wĩĩ́. 17Mia lɛ́ ò lo à gɛ̃̀ɛ̃̀ wánà káa, óò lo lé-pa-wɔ̃̀ lɛ́ o kéa kɛɛ̀. Óò lo pɛ yɔɔ ɓoò mia píé m tɔ́ yí zàá, ɛ̃́ɛ̃́ óò lo kɛɛ̀ wè gbɛɛ̀ gbɛɛ gèepìà píé, 18tó yé waà mɛ̀nɛ sí lɛ̀í, ɛ̃́ɛ̃́ yé waà mia zɛ-pɛ̀ nɔ́ɔ fé mia, lɛ̀ɛ́ ló pɛ gbɛɛ kɛɛ̀ o ká. E bɛ̀i, óò lo o kɔ̀ kpɔ́ɔ̀ yáá-mìà là, tó wáà là.”

Wálà e Zízɛ̀ sí, e ló à ká lɛ̀í

(Lúù 24.50-53; Àpɔ́sɔ̀lɔ̀ 1.9-11)

19Yé ko Dàa-mì Zízɛ̀ e nyɛ wèè o píé mɔ̀ɔ, Wálà a sí, e lóá lɛ̀í. Zízɛ̀ e yà Wálà kɔ̀ yiè yí lɛ̀ e lóa ká. 20Zízɛ̀ là tòà-píé-mìàa, o wɛ̀lɛ̀ gbaa, o ló lɛ̀ɛ tɛ̃̀ɛ̃́ɛ mɔ̀, wáà lò wɔ̃́ làṹ yièa gèeá sí lòũ̀ ká. Wà ko Dàa-mì nì o kɛ yɛɓo e kília kɛpìà. Ko Dàa-mì a zɔ̃̀ɔ̃̀ kélɛ̀ wɔ̃́ o kɛ à gèepìàa lɛ wánà ká, lé-pa-wɔ̃̀ doò do lɛ́ o kɛ à kɛpìàa yí.]

Currently Selected:

Máà 16: MNT

Highlight

Copy