Gɛ̀lésìà 5

Yékɛ̀ ká kɛ lùò ká zeĩ́

1Pɛ́ e ko kɛ̀lɛ̀ɛ lɛ́ e tɔ́ tò-dìè-là. Kɛ́lɛ̀ì aà ko kɛ kɔaà tó ko dìè kɔ̀ mɔ̀. Yé lɛ kília, kà dɔ ka dɔ̀lɔ̀ mɔ̀ mi lɛ́ aà tó e dìè kɔ̀ mɔ̀ɔ dɔ-zì ká. Yékɛ̀ ká tó ká kɛ zeĩ́ lùò ká.

2Kà ka tóó dɔ. Ma Pɔ́ɔ̀, ḿm̀ gèe ka lɛ̀ɛ kéèé, yé kaà wéé à mɔ̀ kaà bɔ̃́ɔ̃́ sía, à yí lɛ́ e kélɛ̀, Kɛ́lɛ̀ì lɛ̀ɛ́ gbũ ka mɔ̀ gbɛɛ ɓo. 3Ḿm̀ gèe ka lɛ̀ɛ zeĩ́ kélɛ̀ gɔ̃ nɔ́ɔ fé lɛ́ è lo wéè à mɔ̀ é bɔ̃́ɔ̃́ sía, lɛ à mɔ̀ é Lɔ́ɔ̀ɔ kɛ zi nɔ́ɔ séĩ́ ká. 4Mia lɛ́ kà à kɛ-zì nàà kɛ ká kɛ kpeĩ Wálà lɛ̀ɛ Lɔ́ɔ̀ɔ kɛɛ̀ káa, kaà ka dìè kã́ gbaa Kɛ́lɛ̀ì mɔ̀. Ka ɓoò lɛ gbaa Wálà zì zò-kɛ̀-sɛ̀ wì. 5Ko yee, pɛ lɛ́ ko zò lɛ à mɔ̀ɔ lɛ́ e Wálà à ko kɛ̀ kpeĩ e dìè lɛ̀ɛ káa. Ɛ́ɛ̃́ ko yàà lɛ à gɛ̀nɛ̀ Wálà zì Gɛ̀ɛ̀ tɔ́ yí zàá ko zì zò-dɔ̀à-mɔ̀ kolo là. 6Ƃii yé kò Kɛ́lɛ̀ì Zízɛ̀ nì kɔaà kɛ doóa, ko bɔ̃́ɔ̃́ síì é gɔ̃̀á bɛ̃̀ɛ̃ kɛɛ̀ à ká, ɛ̃́ɛ̃́ à kɛɛ̀ é kɛá bɛ̃̀ɛ̃ à káa, ye wá wɔ̃́ dò ká. Pɛ ké yee e wɔ̃́ɔ káa lɛ́ e zò-dɔ̀à-mɔ̀ lɛ́ è yɛɓo kɛ̀ mi lɔ̀-kpɔ̀-mi-mɔ̀ yía káa.

7Ka kɛ dóo wɔ̃́ kɛpìà kpeĩ le. Dé e ka tèá wɔ̃́ wánà zɛ̀ɛ kɛɛ̀ mɔ̀? Zi sùu kpɛɛ̀ lɛ́ a kɛá lɛ́ ka wéé à mɔ̀? 8Wálà lɛ́ e ka súo kɛɛ, ye wá à ká kɛ á kɛèé. 9Belè-fɔ̀ɔ-pɛ̀ ɓéĩ́ lɛ́ɛ̀ belè-kpo gbùòa fɔ̀ɔ. 10Kɔ̀à ɓi nì kɔa kɛ̀ doó ko Dàa-mì yía mɔ́ɔ̀ wɔ̃̀ mɔ̀ɔ, m zò dɔɔ̀ lɛ ka mɔ̀ kélɛ̀ kɔ̀à ɓi nì kɔa zì yɛ́lɛ́-tàà-yí-wɔ̃̀ lɛ́ɛ̀ lo kɛɛ̀ doó. Ɛ́ɛ̃́ mi lɛ́ è ka wũ yí sìè, é kɛ bɛ̃̀ɛ̃ mi nɔ́ɔ fé dò káa, lɛ́ɛ̀ lo wɔ̃́ nyɔ́ɔ̀ɔ sɔ̀lɔ̀ ɓoò à wɛ̃́ĩ̀.

11Kɛɛ m lèe-gé vɔ̀, mɛ́ e kɛ lɛ́ o tĩã́ m sã̀ dɔpìà yé mɔṹ m tĩã́ gèepìà mia ó bɔ̃́ɔ̃́ sía ká ɓɛ? È kɛ̀á lɛ wánà káa, m zì Kɛ́lɛ̀ì là kɔ́lɔ́sì wɔ̃̀ lɛ́ m̀ gèea, lɛ̀ɛ́ gɔ̃̀ kɛɛ̀ mia sã́-gɛ̀lɛ̀-kpùlù ká. 12Áá kɛɛ̀ dóo m lɛ̀ɛ sɛ̀ yé mia lɛ́ ò ka wũ yí sìèa, waà pɛ́ e kília séĩ́ kã́ vɔ̀ɔ ɓoa ká.

13M lèe-gé vɔ̀, ka yee Wálà aà ka súo kɛ kɛ ká kɛ ka dìè kɔ̀ mɔ̀. Kɛɛ tò-dìè-kɔ̀ mɔ̀ e kéa, yékɛ̀ ká tó é kɛ ka wè-ɓò-yí-bà wɔ̃̀ ká, káà à tò ka zì gbĩ-kpàla nàà-ká-wɔ̃̀ áà ka líé sì. Kɛɛ mi lɔ̀-kpɔ̀-mi-mɔ̀ è à kɛ káà gbũ̀ ka kíe nì mɔ̀. 14Ƃii Lɔ́ɔ̀ɔ pɛ̀ séĩ́ kɛɛ̀ lɛ wánà zɛ̀ pɛ doó yí. Pɛ́ e kília lɛ́ e kélɛ̀, “I yà-sɔ́nɔ́-mìà zì lɔ̀-kpɔ̀ i mɔ̀ɔ, lɛ à mɔ̀ é kɛ lɛ̀ zí i dìè lɔ̀ kpɔ́ɔ̀ lɛ à ká i mɔ̀ɔ lɛ́ ɓe.” 15Kɛɛ yé kaà kɛ ka sɔ̃́ɔ̃́ tópìà ka kíe nì yí, tó káà ka kíe nì mɛ́ gĩ̀ĩ̀a, kà ka yɛ́lɛ́ kɛ ka dìè píé, ɓii ká tòá kɛpìàa, káà lo ka kíe nì yí sìè.

Gɛ̀ɛ̀ Púlú wà ko zì kɛ-kɔ̀

16Wɔ̃́ m̀ gèea, gɛ̃̀ e ké. Kà táá Gɛ̀ɛ̀ Púlú zì wɔ̃́ kɛ-kɔ̀ kpáá yí. Yé aà kɛ kília, kàá ló wɔ̃́ lɛ́ à lɔ̀ è ka zì kɛ-kɔ̀ kɛ̀ɛ zò-dà-wɔ̃̀ kɛɛ̀. 17Ƃii wɔ̃́ lɛ́ ko zì kɛ-kɔ̀ à nàà à káa, à ko gbɛ̃̀ɛ̃̀ lɛ wɔ̃́ lɛ́ Gɛ̀ɛ̀ Púlú à nàà à káa mɔ̀. Ɛ́ɛ̃́ wɔ̃́ lɛ́ Gɛ̀ɛ̀ Púlú à nàà à káa, à ko gbɛ̃̀ɛ̃̀ lɛ wɔ̃́ lɛ́ ko zì kɛ-kɔ̀ à nàà à káa mɔ̀. O pèèlɛɛ óò gèlè gɔ̃ o kíe nì ká. À yí lɛ́ e kélɛ̀, lɛ́ɛ̀ ka tèa wɔ̃̀ lɛ́ kà nàà ká kɛɛ kɛɛ̀ mɔ̀. 18Yé Gɛ̀ɛ̀ Púlú aà líé sí ka káa, kɛɛ ka wá gbaa Lɔ́ɔ̀ɔ wì.

19Wɔ̃́ lɛ́ ko zì kɛ-kɔ̀ à kɛ̀ɛ à bĩ̀ĩĩ̀ wá. Lɛ́ɛ̀ sɔ̃̀ɔ̃ yɔɔ kɛ̀, tó áà wɔ̃́ lilì kṹã̀a zɛ̀ kɛ̀, e bɛ̀i, áà nɛ́ĩ̀ wà mànaà zɛ̀. 20Lɛ́ɛ̀ gbìnì kɛ̀ɛ̀-wɛ́lɛ́ lɛ̀ɛ, tó áà nyìɛ̀ yɔɔ̀ yɔɔ̀ bɛ̃̀ɛ̃ kɛ̀. Lɛ́ɛ̀ à kɛ̀ tó mia wáà dàa-gbe là kɛ̀ o kíe nì mɔ̀. Óò gèlè gɔ̃, tó wáà fɔ̃̀ɔ̃́-là kɛ̀. Ɛ́ɛ̃́ wɔ̃́ lɛ́ɛ̀ o wàa. Óò dɔ o dìè là. Óò o dìè yí gìnì, tó wáà o fĩ̀ã̀ ɓò o kíe nì mɔ̀. 21O zò kɛ̀ ɓɛ́ĩ̀ gbɛɛ wà pɛ mɔ̀ mìà ká. Óò yɔ mi áà o kɛ̀, tó wáà kpílì kɛ̀. Tó wáà wɔ̃́ doò do lɛ́ e píé kéa kɛ̀. Ḿm̀ lìè-wè gèe ka lɛ̀ɛ zi nɔ́ maà gèe doá ka lɛ̀ɛ ká. Mia lɛ́ ò wɔ̃́ sùua kɛ̀ɛ, o dɔ̀lɔ̀ lɛ̀ɛ́ bɛ̀i kɛɛ̀ mia lɛ́ Wálà tóò lɛ o làa fĩ̀ã̀.

22Kɛɛ pɛ lɛ́ Gɛ̀ɛ̀ Púlú è ɓa à káa, lɛ́ e kélɛ̀, lɔ̀-kɛ̀à-mɔ̀, géli, e bɛ̀i, zò-yà-gé, ɛ̃́ɛ̃́ zò-kũ̀-tã́ã̀, e bɛ̀i, wɔ̃́ kɛ̀ mi lɛ̀ɛ zì yiè, sɔ̃̀ɔ̃-kɛ̀-sɛ̀, e bɛ̀i, mia zò-dɔ̀-i-mɔ̀, 23ɛ̃́ɛ̃́ kpóló-kpɔ̀-mɔ̀, wà dìè-kũ̀-tã́ã̀. Lɔ́ɔ̀ lɛ́ è bɛ̀i gèlè gɔ̃ɔ̀ wɔ̃́ nì e kéa káa ye wá ɓe. 24Mia lɛ́ o Kɛ́lɛ̀ì Zízɛ̀ là mia nì káa, waà o dìè zì kɛ-kɔ̀, e bɛ̀i, o zì kɛ-kɔ̀ nàà-ká-wɔ̃̀, ɛ̃́ɛ̃́ wà wɔ̃́ kɛ-lɔ̀ lɛ́ è o kɛ̀ɛ, waà o zɛ. 25Gɛ̀ɛ̀ Púlú aà kɛ̀ɓe nɔ ko lɛ̀ɛ. Lɛ à mɔ̀ kó táá à zì wɔ̃́ kɛ-kɔ̀ kpáá yí nɔ́ kíli. 26Yékɛ̀ kɔ́á kɔa dìè sí gbùò. Yékɛ̀ kɔ́á bɔ̀ɔ̀ sɔ̀ɔ̀ kɔa kíe nì mɔ̀. Yékɛ̀ kɔ́á dàa-gbe-là kɛ kɔa kíe nì ká.

Currently Selected:

Gɛ̀lésìà 5: MNT

Highlight

Copy