1 Sámìɔ̀ 28

1Yinù ɓɛɛ káɛ Félésã́ã̀mɛ̀nù wò waa grùkǝmɛ̀nù pàkóà kǝ wɔ̃̀ɔ̃̀ grùgɔ̃ Ézrɛ̀mɛ̀nù ká. Lɛ̀kɔ̀ɔɛ Ákè yà pɵ Dèɓé lǝ̀, “Kɵ́ ɥ à gɥ́dɔ̀ nɛ̀ɛ̀ kãã̀ ɓa gɔ̃ɔ̃̀nù ɓɛ ka yi píé é kwãã̀nù kwá lólà kópíé ɓǝ.”

2Dèɓé yà pɵ Ákè lǝ̀, “È sǝ̀ dèèdè, ɥ lò pǝ á loà kǝɛ ye.”

Ákèà pɵ Dèɓé lǝ̀, “Kǝ è sǝ̀, A lò ɥ kǝ zòkǝ̀ n píé krúá ká ɓa kǝ̀àgɥ́sɥ̀ kpɔ̀n ká.”

Sɔ́ɔ̀ èye kóyè Dɛ̀bɔmɛ̀ ká

3À yiɓɛ káɛ kǝ Sámìɔ̀ yà ga, kǝ Ézrɛ̀mɛ̀ sáálɵɛ wàà gbɵ̀bɔ wàà bĩ̀ e plɵ̀ɵ̀ Wrámà pɵɵ. Ĩ́ĩ́ kǝ Sɔ́ɔ̀ yà dɛ̀bɔmɛ̀nù wãã̀ dɥmɛ̀nù ɓo Ézrɛ̀ sɛ̀gɥ́.

4Félésã́ã̀mɛ̀nù ɓɛɛ wò pà wokóà wó nu wó yà Súnɛ̀ pɵɵ. Sɔ́ɔ̀ è Ézrɛ̀mɛ̀ sáálɵɛ pàkóà, wó yà Gébòà Tɔ̃̀ píé. 5Lɛ̀ Sɔ́ɔ̀ yà Félésã́ã̀ grùkǝmɛ̀nù ɓɛɛ yeɛ, è sùò, é à zòɔ è zùù dèèdè. 6É lɛ̀ Sɔ́ɔ̀ yà Yàwɛ lɛ̀ɛ̀kpɔ́kǝɛ, Yàwɛ ká à zǝnu wɛ́á ĩ́ĩ́ yiégɥ́, ĩ́ĩ́ Úrìn #28.6 Úrìn Gùǝ̀ lɛ pǝ téété pèètɛ, yàkǝɛ wô bĩ̀lɛ̀ ɓo à yà mɛ tɔ́àsɥ̀ ká. Àyé wó loà sɥɛ yà kǝ mɛ ɓɛ tɔ́áɛ kǝ wɔ̃́ yà tóàɓà.gɔ̃sɥ̀ wãã̀ dɔ̀-Aaɓilílàmɛ̀nù lígɥ́. 7Lɛ̀kɔ̀ɔɛ Sɔ́ɔ̀à pɵ yaa yuɔkǝmɛ̀nù lǝ̀, “Kà dɛ̀bɔlè mɛɛ̀ n lǝ̀ kǝ ã́ã̀ à lɛ̀ɛ̀kpɔ́kǝ.”

Àɓà yuɔkǝmɛ̀nù wô pɵ à lǝ̀, “Lɛ̀gà, dɛ̀bɔlè do è Ɛ́ndɔ̀.”

8Lɵɛ Sɔ́ɔ̀ èye dè màlu nɛ̀ɛ̀ mɛgbɛ lɵ́, é gbààwíì gbɛ dà e ɓà, é wãã̀ yaa gɔ̃ɔ̃̀nù pèètɛ wó lo, wó gbɛ̀ì le ɓɛ là gben. Lɛ̀kɔ̀ɔɛ ê pɵ, “Ƃò ɥ kóye zùù ká, kǝ mɛɓlɵ́ á loà tɔ́pɵ ɥ lǝ̀ɛ̀ ɥ́n nuá kpɔ́ànluo.”

9Le ɓɛɛ ê pɵ à lǝ̀, “Ч à gɥ́dɔ̀ fɛ́fɛ́lɵ nɛ̀ɛ̀ Sɔ́ɔ̀ yà dɛ̀bɔmɛ̀nù wãã̀ dɥmɛ̀nù ɓo sɛ́nɛ̀gɥ́. Mǝ̀kǝ̀ ɥ́ srǝ́ kã́là n gɔ̀ kǝ ɥ́n nu ga ká n là ɓǝɛ̀?”

10Kǝǝ Sɔ́ɔ̀ èye sɵ̀ɓɵ̀ le ɓɛ lǝ̀ Yàwɛ tɔ́á nɛ̀ɛ̀, “Lɛ̀ Yàwɛ lɵ́ ɓéìɛ̀, króɓole gbɛɛ yaá ló nu ɥ píé wɔ̃́nɛ̀ mɔ́ɔ̀wɔ̃̀ã̀.”

11Lɛ̀kɔ̀ɔɛ le ɓɛ ê pɵ, “Dɵ ɥ́ mɛ̀ɛ̀ ã́ã̀ nuá kpɔ́ànluo ɥ lǝ̀ɛ̀?”

Ê pɵ, “Nu Sámìɔ̀ ká n lǝ̀.”

12Lɛ̀ lé ɓɛɛ yà Sámìɔ̀ yeɛ, éye wò sɥlúú gbéè gbɵbɔsɥ̀ ká. Ê pɵ Sɔ́ɔ̀ lǝ̀, “Mǝ̀kǝ̀ ɥ́ n bɔ̃́kã̀ɛ̃̀? Sɔ́ɔ̀ mɥ̀ ɥ ká.”

13Kíŋ ɓɛɛ ê pɵ à lǝ̀, “Kɵ́kǝ̀ ɥ́ sùò. Mǝ̀ ɥ́ yeè?”

É le ɓɛ ê pɵ Sɔ́ɔ̀ lǝ̀, “A aaɓi do yè é gólà sɛ́í, è nulà luo.”

14Sɔ́ɔ̀ ya lɛ̀ɛ̀kpɔ́kǝ̀, “À kǝkɔ̀ kǝ̀nɛ̀ɛ̀ dɵlɵ́e?”

Le ɓɛ ê pɵ, “Gɔ̃ɔ̃̀klɵ̀ é wruùlà ɓǝ. É gbàwíì lɵ́à ɓà.”

É Sɔ́ɔ̀ è tomɥ́ ê gɥ́dɔ nɛ̀ɛ̀ Sámìɔ̀ mɥ̀, é gblɥ̀n à lǝ̀ éye kpòn pàsɛ́á, é ɓlɛ̀kpɔ́le nuàlǝ̀.

15Lɛ̀kɔ̀ɔɛ Sámìɔ̀ yà pɵ Sɔ́ɔ̀ lǝ̀, “Mǝ̀kǝ̀ ɥ́ n fũ̀ã̀fṹã́ kǝlà nɛ̀, ɥ́ kǝ̀ á yíɛ́là n zɥ́ nɛ̀?”

Sɔ́ɔ̀à pɵ, “Zòtále gbéè yà nu n píé! Ƃií Félésã́ã̀mɛ̀nù wà grù yà n ɓà, é Yàwɛ yà e tàye n ɓà, é yáá n zǝnu gbɔɔ dɔ̀-Aaɓilílàmɛ̀nù lígɥ́, ĩ́ĩ́ yiégɥ́. Pǝkǝ̀ á ɥ lɔ̀ɔ̀kǝ̀ ɥ́n pǝ á loà kǝɛ biɛ̀ n lǝ̀ɛ̀ é ɓǝ.”

16Sámìɔ̀ yà pɵ, “Lɛ̀ Yàwɛ yà e tàye ɥ ɓà yàkǝ ɥ dǝgbɵ káɛ, kǝ mǝ̀kǝ̀ ɥ́ n lɛ̀ɛ̀kpɔ́ kǝɛ̀? 17Wɔ̃́ Yàwɛà bìɛ̀ kpá n lígɥ́ɛ é kǝlà ɓǝ, ɓií Yàwɛ yà kíŋsɛ̀ nɛ̀ pɛ́ ɥ ɓà, yàà nu ɥ yàsɔ́mɛ̀ Dèɓé lǝ̀. 18Ƃií ɥ ká Yàwɛ wò kǝ ĩ́ĩ́ àɓà nàzòà gbéè é nu Ámálɛ̀mɛ̀nù làɛ̀ ɥ ká à líéɓo, ɥ́n wo zǝ fɛ́fɛ́lɵ wãã̀ waa tùɔ̀nù ká. Pǝkǝ̀ Yàwɛ lɵ́ wɔ̃́ sùu nǝ̀ǝɛ kǝlà ɥ gɔ̀ gbɛ̃́ã̀ɛ̃̀ é ɓǝ. 19Bààzɥ́ɛ Yàwɛ ɓɛɛ è lò kãã̀ Ézrɛ̀ sɛ̀ ka dɔ Félésã́ã̀mɛ̀nù kwɛ. Yàkɔɔ́ lɛ̀apíéɛ kãã̀ ɥ gbɵnù ka lò kǝ n píé. Ĩ́ĩ́ zɥ́ɛ Yàwɛ ɓɛɛ é lo Ézrɛ̀a krúázǝ̀ dɔ Félésã́ã̀mɛ̀nù kwɛ pɵ́.”

20Lɛ̀kɔ̀ɔɛ Sɔ́ɔ̀ è tòmɥ́ é pɥ̀ɵ̀sɛa, é pò fɛ́àfɛ́àlɵ, ɓií è sùò wɔ̃́ Sámìɔ̀à bìɛ̀ɛ̀ mɔ́ɔ̀wɔ̃̀ɓà. Gɥ́gbéèlɛ̀ gbɛ yaá tó à gɔ̀ ɓií yaá pǝ gbɛ ɓɵ̀ bímǝ́n wãã̀ lèpóù kpɔ̀n ɓɛ kà. 21Le ɓɛ è nù Sɔ́ɔ̀ píé, lɛ̀ ê ye nɛ̀ɛ̀ Sɔ́ɔ̀ è sùò dèèdèɛ̀, ê pɵà lǝ̀, “Lɛ̀gà, ɓa yuɔkǝlè é n káɛ má ɥ wò kǝ. Má n nii sɥ́ n dè kwɛɛ, má pǝ ɥ́ bìɛ̀ n lǝ̀ɛ̀ kǝ. 22Lɛ̀ é pɵ́ mɔnɛ ɓi dèe, ɓò wɔ̃́ á loà biɛ̀ ɥ lǝ̀ɛ̀ kǝ. Gó á ɓɵ̀pǝ̀ ɓlɵ́téé kǝ ɥ lǝ̀ ɥ́ ɓɵ̀, kǝ fã̀ã nyɛ̀ɛ̀ kǝ ɥ gɔ̀ ɥ́n ɓa lóɓo.”

23È kɔ̀a, ê pɵ yaá ló pǝgbɛ ɓɵ̀. Kǝǝ àɓà yuɔkǝmɛ̀nù wãã̀ le ɓɛɛ, wò ɓɛ̀à à lǝ̀, éye tó to wo wòà. Lɵɛ é wrùù sɛa é yà béè là. 24Dùnǝ́ bàɥ̀ é kǝ̀ le ɓɛ gɔ̀ à píékeeɛ, ê zǝ, ê pǝ̀kǝ̀ síèsíè, é blɛɛ̀ bì sɥ ê blɔ̃ é blɛɛ̀ à ɓɛ̀ɛ̀pǝ̀ kâ gɥ́ɛ kǝ̀. 25Ê dɔ Sɔ́ɔ̀ wãã̀ yaa yuɔkǝmɛ̀nù líé, é wó pǝɓɵ̀. Lɛ̀kɔ̀ɔɛ wó wrùù wó lo gbengɥ́ dè ɓɛ ká.

Currently Selected:

1 Sámìɔ̀ 28: DHB

Highlight

Copy