Ɛ́séɖɔ̀ 4

Gèɖèpɔ́ɔ̀ nyí Mózè zɛ̃̀ìn-ɖɛ̀-nyu-kpè

1Ké Mózè diè ma Bounɓoɔ̀ dyi ɖe, ké ɔ ɖá, “Ɔ jǔ ké wa se ní wuɖuɔ̀ jǎà po, ké wa se ní wuɖuɔ̀ ɖùǔ gbo tò, ké wa dyi níiń, ‘Bounɓoɔ̀ mɔ̀ nyɔ se m̀ ɖoɓoo’ ní ɖé?”

2Hwɛ̀ ké Bounɓoɔ̀ diè ma ɔ dyi, ké ɔ ɖá, “Ɖɛ́ nìà ɓó m̀ xwaún wɛ̃́?”

Ké Mózè ɖá, “Ɔ mɔ̀ kùì-kpàe.”

3Ké Bounɓoɔ̀ ɖá, “Poɛ dyi!” Ké Mózè poɛ ma dyi, ké ɔ zɛ̃̀ìn ma sɛ mú. Púɛɛ, Mózè gbǔɛ ma dyúa. 4Hwɛ̀ ké Bounɓoɔ̀ cɛ̃ɛ ma ɔ gbo ɖe, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ ké sɛɔ̀ vɔ̃ dyí ɖúìn.” Ɔ jèɛɛ, Mózè pɛ́ɛ̀ ma sɔ̃, ké ɔ kpɔ̃ ma sɛɔ̀ dyi, ké sɛɔ̀ zɛ̃̀ìn ma kùì-kpà mú ɖe ɖé ɔ xwaún. 5Ké Bounɓoɔ̀ ɖá, “Ɖɛ nìà kɛ muɛ nyuùn ɓɛ́ wa kéɛ jǎà po kà mɔ̄ mɔ̀ Bounɓo mɔ̀à wa ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛɛ mɔ̀ nyɔ ɖǎ m̀ dyí wóɖóìn nyɛ.”

6Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Po nì sɔ̃ɔ̀ ɓó nì kɛ́ɔ̀ kɔ̃, ɓó nì gã́ùnɔ̀ xwíɖíi.” Ké Mózè kpa ma ɔ gã́ùnɔ̀ xwíɖíi sɔ̃. Ti ɔ zà ma ɓó sɔ̃ɛɛ, caà kpɔ̃ ma ɔ sɔ̃ɔ̀ kɛɛ nyuɛ ké ɔ sɔ̃ɔ̀ nì ma séɖéé. 7Ké Bounɓoɔ̀ ɖá, “Kpa nì sɔ̃ɔ̀ ɖé nì gã́ùnɔ̀ xwíɖíi ɖe!” Ké Mózè kpa ma ɖé sɔ̃ ɖe. Ké ti ɔ zàà ma ɖéɛ kɛɛ, caà-wɛ̀ɔ̀ hwɛ̀ ma ɔ sɔ̃ɔ̀ bũ̌in, ké ɔ sɔ̃ɔ̀ nì ma kà ɔ dyɔɔ̀-kùɔ̀ wáká tɔ̀ɔ̀ ɓěɔ̀ nyuà nìɛ̀ kɛ. 8Ké Bounɓoɔ̀ ɖá, “Ɔ jǔ ké wa se nì wuɖuɔ̀ jǎà po, ké wa se zɛ̃̀ìn-ɖɛ̀ kĩ́ínɔ̀ jè jǎà po ní, wa mu zɛ̃̀ìn-ɖɛ̀ sɔ̃́ nììnɔ̀ jè jǎà poùn. 9Kɛɛ ɔ jǔ ké wa se zɛ̃̀ìn-ɖɛ̀-dù sɔ̃́ ɓěɛ̀ jè jǎà po, ké wa se nì wuɖuɔ̀ ɖùǔ gbo tò ní, m̀ mɛ píní ní sɔ̀ìn ɖé Náà-nìɔ̀ kɔ̃, ɓɛ́ m̀ kéɛ ɓóɛ ɓóɖó-kpà dyɛ-dyɛɔ̀ kɔ̃ púè. Ɔ ɖǎ ná nìǐn, ní ɓɛ́ m̀ píníà ɖé níɔ̀ kɔ̃ɛɛ mu nyɔmɔɔ mú zɛ̃̀ìn ɓó ɓíɖíiɔ̀.”

10Ké Mózè cɛ̃ɛ ma Bounɓoɔ̀ gbo, ké ɔ ɖá, “Ɓɔ̌ɔ̀, ḿ se wùɖùɛ̀ dyuò. Ḿ se ma wùɖùɛ̀ dyuò kĩ́ín, hwɛ̀ ḿ po níiń, ti ɓɛ́ m̀ ɖǎ mɔ̄ mɔ̀à nì gbo-nì-nyɔ̀ɔ̀ kɛɛ gbo wùɖùɛ. Ní wuɖu pɛɛ̀ ní, ké ní miɔɔ̀ ku xwa.”

11Ké Bounɓoɔ̀ cɛ̃ɛ ma ɔ gbo, ké ɔ ɖá, “Nyɛ́ mɔ̀ nyɔ nyí nyɔǔn-dyù wɔ̃ kɛ́? Nyɛ́ mɔ̀ nyɔ nyuɛ ɓɛ́ nyɔǔn-dyù dyi sṹ mɔɔ ké ɔ se wùɖùɛ̀ ɓɛ́ìn nyɛ́? Nyɛ́ mɔ̀ nyɔ nyuɛ ɓɛ́ nyɔǔn-dyù dyi dyi dyé mɔɔ ɓɛ́ ɔ dyi dyéɖéín dyi kpè kɛ́? Ɔ se mɔ̄ mɔ̀à Bounɓoɔ̀ kɛɛ̀? 12Ɔ jèɛɛ, m̀ mɛ mu. Ní mu m̀ gbo kpáùn, ɓɛ́ m̀ ké wùɖù, ké ní mu m̀ ɖɛ m̀ ké cɛ̃ kɛɛ tɛ̀mɛ̀ìn.”

13Kɛɛ Mózè ɖá, “Ɓɔ̌ɔ̀, ní ɓaà m̀ ní, ɖoɓo nyɔ kà kò ɖò, ɓɛ́ ɔ ké ɖɛ nìà kɛ nyu.”

14Púɛɛ, Bounɓoɔ̀ kpáìn ma Mózè dyoɖoún mìɔ, ké ɔ ɖá, “Ké nì ɖíí Eɖóún mɔ̀à Ɖíìváà-nyɔ̀ɔ̀ kɛɛ jè ɖéɛ́? Ḿ dyuò kà ɔ dyuò wùɖùɛ̀ kɛ. Ɔ ɖǎ hwìè kɔ̃ nì nɔ̀ɔ̀, ké ɔ nì m̀ gbo dyiɛń. Ɔ dyi m̀ dyé ní, ɔ mu múàǔn kpáùn mìɔ. 15M̀ mɛ wùɖù ɔ gbo, ɓɛ́ m̀ ké ɔ wuɖu wĩín po. Ní mu ɓě sɔ̃́ɔ̀ gbo kpáùn, ɓɛ́ ɓě ké wùɖù, ké ní mu ɓě ɖɛ ɓě ɓɛ́ ɓě ké nyuɛɛ tɛ̀mɛ̀ìn. 16Eɖóún mu nyɔ ɓěɔ̀ gbo wùɖùùn ɓó m̀ bìì. Ké ɔ mu nì wɔ̃ jǔùn, ké nì mu ɔ wuɖu wĩín poùn kà Gèɖèpɔ́ɔ̀ poà nyɔǔn wuɖu wĩín nyɛ. 17Kɛɛ m̀ mɛ ɓéɖé kùì-kpà nìà kɛ xwa, ɓɛ́ m̀ kéɛ zɛ̃̀ìn-ɖɛ̀ ɓě nyùìn.”

Mózè mu Íjè-ɓòɖòɔ̀ kɔ̃ ɖe

18Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè mu ma ɖé ɔ bùǐ-gàà mɔ̀à Jɛ́tòɖò kɛɛ gbo, ké ɔ cɛ̃ɛ ma ɔ gbo, ké ɔ ɖá, “Ní mɔ́ ɓɛ́ ḿ ké ɖé ní nyɔ ɓěɔ̀ gbo ɖe mu ɖé Íjè-ɓòɖòɔ̀ kɔ̃, ɓɛ́ ḿ kéɛ dyé kɛbì wa ɖò nì toɖo kɔ̃ ke ní.”

Ké Jɛ́tòɖò ɖá, “Ḿ wɔ̃́ ní, mu. Gìɖìǐ mɛ nì m̀ kɔ̃.”

19Ti ɓɛ́ Mózè nì ma ɖé Míɖìàùn-ɓòɖòɔ̀ kɔ̃ keɛɛ, Bounɓoɔ̀ cɛ̃ɛ ma ɔ gbo, ké ɔ ɖá, “Mu ɖé Íjè-ɓòɖòɔ̀ kɔ̃ ɖe, sepóɛɖé nyɔ séín ɓě mɔ́ ma kà m̀ ɖáɓáa dyiɛɛ, wa ɖǎ mɛ́ɛ hwɛ̀.” 20Ɔ jèɛɛ, Mózè ɖú ma ɔ gmààɔ̀ kè ɔ dyú-gàà ɓěɔ̀ dyí. Ké ɔ po ma wa jǎkasì ɖò kɔ̃ún, ké ɔ kɔ́ìn ma ɖé Íjè-ɓòɖòɔ̀ kɔ̃ ɖe. Ɔ kpa ma ɔ kùì-kpà ɓɛ́ Gèɖèpɔ́ɔ̀ ɖá ɔ mɛ kpa ma kà kɛ.

21Ɓó hwìèɔ̀ kɔ̃ɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Ti ɓɛ́ nì mu ɖé Íjè-ɓòɖòɔ̀ kɔ̃ nyiniìn nyɛɛ, m̀ mɛ nyu zɛ̃̀ìn-ɖɛ̀ séín kɔ̃̀ kpé ḿ ɖǎà m̀ nyíɛɛ ɓó Féwòɖò dyéɖé waí. Kɛɛ ní mu ɔ hwòɖǒ-dyùàɔ̀ kùmùìn, ké ɔ se nyɔ ɓěɔ̀ dyi táǎ mu, ɓɛ́ wa ké mu. 22Ɔ ɖǎ ná nìǐn, m̀ mɛ cɛ̃ɛ Féwòɖò gbo kà ḿ ɖáìn Éézùɖùɛ̀-dyù ɓěɔ̀ ní nyíɔ́-dyù-gàà kɛ. 23Ɔ jèɛɛ, cɛ̃ɛ Féwòɖò gbo kà ḿ ɖá, ɔ mɛ táà ní dyú-gààɔ̀ dyi, ɓɛ́ ɔ ké ḿ ɓièɛ. Kɛɛ ɔ nɔ́ɔ̀ ké ɔ se ɔ dyi táà, ɓɛ́ ɔ ké mu. Ɔ jèɛɛ, ní mu ɔ nììn nyíɔ́-dyù-gààɔ̀ ɖáɓáùn.”

24Ti ɓɛ́ Mózè kè ɔ gbǒ-xwíníínɔ̀ nyini ma dɛ̀ wa ké ma pɛ̃́ ɓó hwìèɔ̀ kɔ̃ɛɛ, Bounɓoɔ̀ kè Mózè gmɔ̌ìn ma, ké Bounɓoɔ̀ mɔ́ ma ɔ ɖáɓáa dyi. 25Kɛɛ Zìpówàɖà mɔ̀à Mózèɛ̀ gmààɔ̀ kɛɛ nyu ma sɔ́ɔ́-námá-námá ɖò ɖǎ-dyù mú, ké ɔ ɖáɓá ma ɔ dyú-gààɔ̀ sàà. Ké ɔ ɖú ma sàà-dùɔ̀ dyí, ké ɔ poɛ ma ɓó Mózè ɓo kɔ̃, ké ɔ ɖá, “M̀ mɔ̀ nyɔmɔɔ-dyi-wáɖá-dyù-ɓǎ ɓó ḿ bìì.” 26Ɔ cɛ̃ ɖɛ nìà kɛ ɓá sàà-mɛ́-mɛ́ɔ̀ jè dyí. Púɛɛ, Bounɓoɔ̀ táà ma Mózè dyi.

27Hwɛ̀ ɓɛ́ Mózè ké ma Íjè mu hwìèɔ̀ kɔ̃ kpáa, Bounɓoɔ̀ cɛ̃ɛ ma Eɖóún gbo, ké ɔ ɖá, “Mu ɖé gbǎùn-fúɖúáɔ̀ kɔ̃, ɓɛ́ m̀ kè Mózè ké gmɔ̌ìn.” Ɔ jèɛɛ, Eɖóún mu ma, ké ɔ kè Mózè gmɔ̌ìn ma ɓó Gèɖèpɔ́ɔ̀ toɖoɔ̀ wáún, ké ɔ nyá ma Mózè wɔ̃ ɖé ɔ nyíɔún-zà-zà mú. 28Hwɛ̀ ké Mózè cɛ̃ ma ɖɛ séín kɔ̃̀ jè Bounɓoɔ̀ ɖǎ ma kà ɔ ɖoɓo, ɓɛ́ ɔ ké ma kà cɛ̃ kɛ ɔ kè zɛ̃̀ìn-ɖɛ̀ séín ɓɛ́ Bounɓoɔ̀ ɖǎ ma ɔ gbo cɛ̃, ɓɛ́ ɔ ké ma nyuɛɛ jè Eɖóún gbo. 29Ké Mózè kè Eɖóún mu ma ɖé Íjè-ɓòɖòɔ̀ kɔ̃, ké wa poìn ma Éézùɖùɛ̀-nyɔ̀ vɛ̀nɛ̀ séín ɓěɔ̀ dyí. 30Ké Eɖóún zaìn ma ɖɛ séín ɓě ɓɛ́ Bounɓoɔ̀ cɛ̃ ma kà Mózè gboɛɛ wa gbo kɔ̃in, ké Mózè nyu ma zɛ̃̀ìn-ɖɛ̀ ɓěɔ̀ ɓó wa dyéɖé waí. 31Ké wa poɛ ma jǎà. Ké ti ɓɛ́ wa wɔ̃́ɔ ma kà Bounɓoɔ̀ ɖǎ kà Íjè-nyɔ̀ ɓěɔ̀ nì wa dyi pĩ́àǔn wɛ̃ɛ dyé, ké wa jè ɖǎ ɔ hwòɖǒ kpɔ̃ɛɛ, púɛɛ, wa taɓa ma dú hwuɖu, ké wa ɓiè ma Bounɓoɔ̀.

Currently Selected:

Ɛ́séɖɔ̀ 4: ƁB02

Highlight

Copy