Ɛ́séɖɔ̀ 3

Gèɖèpɔ́ɔ̀ ɖá Mózè

1Ɓó tia ɓaɖaa, Mózè nì ma ɔ bùǐ-gàà Jɛ́tòɖò ɓɛ́ ɔ mɔ̀à Míɖìàùn-ɓòɖòɔ̀ sáa-zà-nyɔ̀ɔ̀ kɛɛ ɓáɖáá kè wiɖi ɓěɔ̀ dyí gmɔ̀ǔn. Wé ɖòɛ̀ ɓaɖaa, ɔ kpa ma nyúà-ɖɛ̀ ɓěɔ̀ dyi ɖiɛń ɖé gbǎùn-fúɖúá ɖò ɖeín, ɖé Hówèɖè#3:1 Hówèɖè mɔ̀ Sányà-tòɖòɔ̀ nyɛ́nɛ́ tɔ̀ɔ̀. mɔ̀ Gèɖèpɔ́ɔ̀ toɖo vɛ̀nɛ̀ kɛɛ gbo. 2Ké Bounɓoɔ̀ zɛ̃̀ìn ma ínjà ɖò mú, ké ɔ wóɖóìn ma Mózè dyí ɖé nyɛ-mìɔ̀ ɖò ɓɛ́ ɔ nì ɖé cu-gbɔ̌ ɖò mú sɔ̀ǔn wɛ̃ɛ mú. Mózè dyéɛ ma kà cu-gbɔ̌ɔ̀ nì ma nyɛ kɔ̃ɛ, kɛɛ ɔ se ma sĩɛń nì. 3Hwɛ̀ ké Mózè cɛ̃ɛ ma ɖé ɔ hwòɖǒ bũ̌, ké ɔ ɖá, “Ní mu ɓó dyi xwɛ̃́ìn, ɓɛ́ ḿ ké ɖɛ kĩà dyí nìà kpáuń wɛ̃ɛ dyé, ɖɛ kɔ̃̀ jè nyɛɔ̀ nìà wãuń ɖé cu-gbɔ̌ɔ̀ mú, kɛɛ cu-gbɔ̌ɔ̀ seà sĩɛń nì kɛ.”

4Ti ɓɛ́ Bounɓoɔ̀ dyéɛ kà Mózè xwɛ̃́ìn ma ɓó dyi, ɓɛ́ ɔ ké ma ɓó gmɔ̀ɛɛ, ɔ nì ma ɖé cu-gbɔ̌ɔ̀ mú, ké ɔ ɖá ma Mózè, ké ɔ ɖá, “Mózè, Mózè!”

Ké Mózè ɖá, “Dyòo.”

5Ké Bounɓoɔ̀ ɖá, “Mɔ̀ǔn ɖá ɓɛ́ m̀ ké ɓó dyi xwɛ̃́ìn ɖe. Zà nì bǎɔ̀ ɓoún, sepóɛɖé pá m̀ nyànàà ɓó kɔ̃ dyiɛɛ mɔ̀ pá hwɛ̀ǐn-hwɛ̀ǐn. 6Mɔ̄ mɔ̀ nì ɓǎ ɓěɛ̀ Gèɖèpɔ́ɔ̀. Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.” Púɛɛ, Mózè jìɖǐ ma xwa dyéɖéí, sepóɛɖé ɔ fɛ̃̀ìn ma ɓó Gèɖèpɔ́ɔ̀ dya gmɔ̀ jè.

7Ké Bounɓoɔ̀ cɛ̃ɛ ma ɔ gbo, ké ɔ ɖá, “Ḿ ɖǎa dyéɖéi hwɔ̀ìn kà wa nyu ní nyɔ ɓěɔ̀ dyi pĩ́àà ɖé Íjè-ɓòɖòɔ̀ kɔ̃ɛ. Ḿ ɖǎ waà vĩ̌-wùɖù ɓá kà wa gǐì-ɓǎ ɓěɔ̀ nyu wa bũ̌in nyìnìɛ̀n nyɛɛ jè dyíɛɛ wɔ̃́, ké waà gǎ-dyé-dyéɔ̀ jè ɖǎ ḿ hwòɖǒ kpɔ̃. 8Ɔ jèɛɛ, ḿ ɖǎ ɓíɖíi dyi, ɓɛ́ ḿ ké wa póìn sɔ̀ìn ɖé Íjè-nyɔ̀ ɓěɔ̀ xwaún, ɓɛ́ ḿ ké wa ɖé Íjè-ɓòɖòɔ̀ kɔ̃ zà, ɓɛ́ ḿ ké wa ɓóɖó bã-bã vɛ̀nɛ̀ mɔ̀à Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɓíɖí-ɓòɖò kɛɛ kɔ̃ kpa. 9Ǹdye, ḿ ɖǎ Éézùɖùɛ̀-dyù ɓěɔ̀ kpé-po-wùɖùɔ̀ wɔ̃́, ké ḿ ɖǎ kà Íjè-nyɔ̀ ɓěɔ̀ nì wa dyi pĩ́àǔn wɛ̃ɛ dyé. 10Ɔ jèɛɛ, ḿ nì m̀ ɖé Féwòɖò gbo ɖoɓoɛń. Mu, ɓɛ́ m̀ ké ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ ɖé Íjè-ɓòɖòɔ̀ kɔ̃ zà.”

11Kɛɛ Mózè cɛ̃ɛ ma Gèɖèpɔ́ɔ̀ gbo, ké ɔ ɖá, “Nyɛ́ ḿ jǔɛ́, ɓɛ́ ḿ kéà Féwòɖò gbo mu, ɓɛ́ ḿ kéà Éézùɖùɛ̀-nyɔ̀ ɓěɔ̀ ɖé Íjè-ɓòɖòɔ̀ kɔ̃ zà kɛ́?”

12Ké Gèɖèpɔ́ɔ̀ ɖá, “Ní mu ɓó m̀ gbo nììn. Ɖɛ nìà kɛ mu dyí-dyuòìn-ɖɛ̀ jǔùn kà mɔ̄ mɔ̀ nyɔ ɖǎ m̀ ɖoɓoɛ. Ti ɓɛ́ nì mu nyɔ ɓěɔ̀ ɖé Íjè-ɓòɖòɔ̀ kɔ̃ zàùn wɛ̃ɛ, ɓě mu ḿ ɓièìn nɔ̄ toɖo nìà kɛ dya.”

13Ké Mózè cɛ̃ɛ ma Gèɖèpɔ́ɔ̀ gbo, ké ɔ ɖá, “Ɔ jǔ ké ḿ dyi ɖé Éézùɖùɛ̀-nyɔ̀ ɓěɔ̀ gbo mu, ké ḿ dyiɛ wa gbo cɛ̃, ké ḿ dyi níiń, ‘Ɓě ɓǎ nììn ɓǎ ɓěɛ̀ Gèɖèpɔ́ɔ̀ mɔ̀ nyɔ ɖoɓo ḿ nɔ̄ ɓě gbo,’ ké wa dyi ḿ dyi diè, ké wa dyi níiń, ‘Xwɛ̌ ɔ nyɛ́nɛ́ jǔɛ́?’ ní, ɖɛ́ ḿ mɛ cɛ̃ wa gboɛ́?”

14Ké Gèɖèpɔ́ɔ̀ cɛ̃ɛ ma ɔ gbo, ké ɔ ɖá, “Mɔ̄ mɔ̀ nyɔ ḿ jǔɛɛ, ɔɔ̀ ḿ jǔ. Cɛ̃ɛ Éézùɖùɛ̀-dyù ɓěɔ̀ gbo kà nyɔ mɔ̀ nyɔ kɔ̃̀ nyɛ́nɛ́ mɔ̀à Mɔ̄ Mɔ̀ɛɛ#3:14 Mɔ̄ Mɔ̀ kè Bounɓo-nyɛ̀nɛ̀ɔ̀ hwɔìn ní ɖé Híìbúɖúù-wùɖùɔ̀ mú. ɖǎ m̀ ɖé wa gbo ɖoɓoɛ. 15Cɛ̃ɛ Éézùɖùɛ̀-dyù ɓěɔ̀ gbo ɖekè kà Bounɓo mɔ̀à wa ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛɛ mɔ̀ nyɔ ɖǎ m̀ ɖé wa gbo ɖoɓoɛ. Nyɛ́nɛ́ nìà kɛ mɔ̀ ní nyɛ́nɛ́ kánáá pū. Nyɛ́nɛ́ nìà kɛ mú, ɖéɛ̀ wa mɛ dyuòìn ḿ dyí kánáá pū, sɔ̀ìn xwéɖé-dù ɖò gbo mu ɖò gboɛ. 16Mu, ɓɛ́ m̀ ké Éézùɖùɛ̀-dyù ɓěɔ̀ nyɔ vɛ̀nɛ̀ ɓěɔ̀ dyí poìn, ɓɛ́ m̀ kéɛ wa gbo cɛ̃, ɓɛ́ m̀ ké níiń, ‘Bounɓo mɔ̀à ɓě ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛɛ wóɖóìn ma ḿ dyí, ké ɔ ɖá, “Ḿ ɖǎ ɓě jè ɖe gmɔ̀, ké ḿ ɖǎ ɖɛ wa nyu ɓě bũ̌ nɔ̄ Íjè-ɓòɖòɛ̀ kɔ̃ɛɛ dyé. 17Ké ḿ ɖǎa ɓě nyɛ́nɛ́ín ɖáìn kà ní mu ɓě nyɔ-dyi-pĩ́à-ɖɛ̀ ɓě ɓɛ́ ɓě nìà dyí dyéɛń nɔ̄ Íjè-ɓòɖòɛ̀ kɔ̃ɛɛ mú zàùn, ɓɛ́ ḿ ké ɓě ɓóɖó kà kò ɖò kɔ̃ kpa kɛ. Ɔ mɔ̀ ɓóɖó bã-bã kɔ̃̀ kɔ̃ ɓɛ́ Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ cĩ́à kɛ.” ’

18“Éézùɖùɛ̀-dyù ɓěɔ̀ nyɔ vɛ̀nɛ̀ ɓěɔ̀ mu nì wuɖuɔ̀ dyi kpɔ̃ùn. Ɔ ɖǎ ná nìǐn, nìí, m̀ kè wa mɛ mu ɖé Íjè-kã̀ǎɔ̀ gbo, ɓɛ́ ɓě kéɛ ɔ gbo cɛ̃, ɓɛ́ ɓě ké níiń, ‘À kè Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ ɖǎ gmɔ̌ìn. Ɔ jèɛɛ, m̀ mɛ táà à dyi, ɓɛ́ à ké wé tã hwìè-kpà ɖò kpa ɖé gbǎùn-fúɖúáɔ̀ kɔ̃, ɓɛ́ à ké sáa zà ɖé Bounɓo mɔ̀à à Gèɖèpɔ́ɔ̀ kɛɛ gbo.’ 19Kɛɛ ḿ dyuòɛ̀ kà Íjè-kã̀ǎɔ̀ se ɓě dyi táǎ mu, ɓɛ́ ɓě ké mu, ɔ sèìn dyɛ ké ḿ kpɔ̃̀ìn ɔ ganaún hwɛ̀. 20Ɔ jèɛɛ, ní mu ní sɔ̃ɔ̀ kũ̀à mú nyùìn, ɓɛ́ ḿ ké Íjè-nyɔ̀ ɓěɔ̀ dĩ́ín-dĩ̀ìn-ɖɛ̀ kò-kò ɓě bũ̌ nyu. Ɔ ɖǎ ná nìǐn, nìí, ɔ mu ɓě dyi táàùn, ɓɛ́ ɓě ké mu.

21“Ké ní muɛ nyuùn ɓɛ́ Íjè-nyɔ̀ ɓěɔ̀ hwòɖǒ ké wɔ̃́ ɓɛ́ wa ké ɓě ɖɛ nyí, ɓɛ́ ti ɓě mu ɓóɖóɔ̀ kɔ̃ sɔ̀ùn wɛ̃ɛ, ɓě ní kɔ̃̀ ɖà xwa fɔ̀nɔ̀. 22Éézùɖùɛ̀-màà ɖò-ɖò séín mɛ zɔ̀ìn ɔ mǔè Íjè-màà ɓě séɓàɖà-ɖɛ̀ kè góò-ɖɛ̀ ɔ kè mú-po-ɖɔ̀, ɓɛ́ wa kéɛ waà dyú-màà kè waà dyú-gàà ɓěɔ̀ bɛ̃̀ìn. Kǎà ɓě mu Íjè-nyɔ̀ ɓěɔ̀ hwuɛ nyuùn.”

Currently Selected:

Ɛ́séɖɔ̀ 3: ƁB02

Highlight

Copy