Mak 12

1GO Yecu wel cir kela. Ran aci dom de wain lo pur, ku rok gau, ku wec ad̤uom loi yen wain t̤in, ku wec aton e kat, ku yok koic bik tit apuat̤; ku ler rer pan maic. 2La ruel, ke toic aluangde, bi ka ci luok lo be etong koic tit dom. 3Goke kwak piny, ku t̤atke, ku ciecke yecin. 4Go aluang do ber toic; goke yup nom ku buike. 5Ku ber aluang do ber toic, goke nok. Ku toic koic juec kok; goke koic kok t̤at, ku nake koic kok. 6Ku bain̤ nong wenden tong ci n̤iar, ku toic cien etong ke, ku jiam, Abi wendie riou. 7Go koic tit dom goke jam, Wen dit de bain̤ ekan, naku ku bu dom kap. 8Goke kwak piny ku nake, ku cuatke gher. 9Bi bain̤ de dom loi andi? Abi ben ku kʼabi ke nok, ku kʼabi dom yek koic kok. 10Kecka waragange de N̤ialic ting,

Kur ci raic e koic loi ghot,

yen ekan ci koic tau pain nom.

11Kan e ke de Bain̤ Dit,

ku ghok agai.

12Ku nongke puot̤ bik Yecu dom, ku rioicke koic ked̤ia, ku n̤yicke lan Cir Yecu wel ke kek. Goke Yecu puol ku cat̤ke.

13Ku toicke tong Yecu koic ke Parit̤ai ku koic ke Erod, lan bi ke wel raic ping ye-t̤ok. 14Goke lo ku jamke, Bain̤ yin an̤yi-cku yin a ran de yiit̤, ku yin aci rioic e koic, yin ci ke de ran gam, ku yin awet koic d̤ol de N̤ialic ayic. Puat̤ bi ghok Kait̤ar juer ko raic? 15Bu yek e, ko bu jai? Go Yecu pelden n̤yic, ku jiam, Yengu t̤em wek gha? Beika grien tok ba ting. 16Goke bei. Ku t̤iec Yecu ke, Ye nom e nga ci gor e kanic, ku rinke? Goke jam, E nom e Kait̤ar. 17Go Yecu d̤uk, Yeka Kait̤ar kake, ku yeka N̤ialic kake. Goke gai aret.

18Ku koic ke T̤aduki aci ben etong en, koic jam, An te t̤ou koic, koic aci ber pir; ku t̤iecke, 19Bain̤, Mot̤et̤ aci gor, Te t̤ou ran ku pir tingde, ku cin tik met̤, ke wanmet̤e de ran abi lo ghot bi tik d̤iet̤ mit̤ ke wanmet̤e. 20Koic kad̤arou ato, wet ke ran tok; go wen dit go n̤ya t̤iak ku t̤ou, ku acin met̤. 21Ku wen lo yecok aci lo ghot, ku ber t̤ou, ku cin tik met̤. 22Go wanmet̤-ken d̤arou goke lo ghot, ku t̤ouke acin met̤. Akoldo ke tik ber t̤ou ya. 23Ku te pir koic akoldo, bi tik a ting e nga? kec koic kad̤arou kecke lo ghot ke ting e wan-met̤ken? 24Go Yecu jam, Acak bai, wek akuic waraga ke N̤ialic ku riel de N̤ialic. 25Ku te pir koic akoldo, koic aci ber t̤iek, abi cet malaikai ke n̤ialic. 26Ku etong koic ci t̤ou, ku jon bi ke ro jot, kecka waragak de Mot̤et̤ ting, te de But, ghon jam N̤ialic, Ghan e N̤ialin de Abragham, ku ghan e N̤ialin de It̤ak, ku ghan e N̤ialin de Jakop? 27Ku aci e N̤ialin de koic ci t̤ou, e N̤ialin de koic pir. Acak bai.

28Go ran de koic ke waragak go ben, ku ping terden ku n̤yic lan ci Yecu ke der, ku t̤iec, Long ke N̤ialic, ye longo to tueng? 29Go Yecu jam, Kan e long tueng, Ping It̤rel, Bain̤da N̤ialic e Bain̤ tok rir. 30Ku yin bi Bain̤ Dit N̤ialindu n̤iar e puondu eben, ku weku, ku n̤yindu eben, ku rieldu eben. 31Ku kan e long lo yecok, Yin abi mat̤ n̤iar acit yigwop. Acin long do angwen e kak. 32Go ran de waragak jam, Bain̤, yin aci wel yit̤ jal luel, N̤ialic e tok rir ku acin do. 33Ku te n̤iar ran ye e puonde eben, ku n̤yinde eben, ku riel eben, ku te n̤iar ran met̤e acit yegwop, luoi e rane angwen e t̤ok ci n̤yuop, ku muor ci tem rol. 34Ku te ci Yecu wel ke ran ping e kepuat̤, ke jam, Yin ci maic e ceng de N̤ialic. Ku acin ran ci Yecu ber t̤iec.

35Go Yecu koic lo wet luang dit de N̤ialic, ku t̤iec koic, Yengu ye koic ke waragak jam, An Mat̤ia e wen de Dabid? 36Dabid aci n̤yuoic e Jong Dit Laijik ku jiam,

Bain̤ Dit aci Bain̤ Ditdie yok,

N̤yuoica cin cuecdie

Aghet te ban koic nong ater ke yi tau yicok.

37Aci Dabid Col Bain̤ Dit, Yengu ye koic jam, An ye wende? Go koic ked̤ia goke Yecu ping ku mit kepuot.

38Ku te wet Yecu koic, ke jam, Tiangka koic ke waragak apuat̤, kek an̤iar cat̤ alet̤ bar, ku n̤iarke muot̤ e koic t̤ukic, 39ku ghon puat̤ bi ke n̤yuic t̤in luek ke N̤ialic, ku ghon puat̤ ke miet̤: 40ku rumke ka ke diar jok, ku longke N̤ialic aret bi koic tut; koicke abi N̤ialic luok we aret.

41Go Yecu lo n̤yuic luang dit de N̤ialic t̤ok te de ghon e weou ci yek N̤ialic, ku dai koic ke cuat weou t̤andukic. Koic nong weou juec aci kajuec cuat t̤in. 42Go ting jo ngong gwop go ben, ku cuat ka t̤i karou t̤in, karou at̤ong ke malim tok. 43Go Yecu koickek puoic col ku jiam, Ting jo ngong gwobe aci N̤ialic moic kedit e koic ked̤ia cuatke t̤andukic. 44Koic kok ci weou cuat t̤andukic nong weou juec ked̤ia, ku ting acin kang, ku aci N̤ialic d̤uol kake ked̤ia.

Currently Selected:

Mak 12: CIEC1916

Highlight

Copy