San Marcos 8

Jesús rute ttaxtila go ttapa mil benni

(Mt. 15:32-39)

1La laniaguaba nua bedesina ixeru ca benni atta do Jesús. De bittu te bixa go ca nua nna nuarca uxtteba Jesús ca benni rudheti ca tisa ruleꞌe, nianna re ca biꞌiniha:

2―Resiꞌirutia ca benni seꞌe-ni, cumu chi uca tsunna ubisa seꞌecana len neti, lacana nna tsa bittu te bixa gocana. 3Gansi edhelha cana eyyacana anába na rituncana, la satúba lecani neda, cumu ttulhecana idittuli dácana.

4Ca benni rudheti ca tisa ruleꞌe nna becabittebacabi rácabi Benniha:

—Güelha, ¿ga saxxíri xxeni ttaxtila qui go ttonáli ca benni, inqui lo yu bisi bunni seꞌeri nna?

5Jesús unnaba tise re ca biꞌiniha:

—¿Balha ttaxtila te guele?

Lacabi nna becabicabi rácabi:

—Gasi.

6Laniala nna benie mandadu bebía iyába ca benni seꞌe nía lo yu. Lee nna bedaxxuttebe gasi ca ttaxtilaha. Dequide chi begüee xquixaru len Tata Do Iyyabaaha, ulhaꞌattebe ca benniha begüee ca benni rudheti ca tisa ruleꞌe, ca biꞌiniha nna utidhittebacabi benniha begüeecabi iyába ca benni seꞌe nía. 7Gua teeguaba a ttu chupa belha güexxa guecabi lhe. Jesús bodigüettebe xquixaru Tata Do Iyyabaaha, atti benttebe mandadu ca benni rudheti ca tisa ruleꞌe quidhicabi ca belhaha gue ca benni seꞌe nía. 8Iyába ca benni seꞌe nía utocana axta qui belquinna bodaparla ca benni rudheti ca tisa ruleꞌe a gasi sumi ca pedazu bexxa uto ca nua. 9Attiba tu ttapa mil ca benni uto ttaxtilaha raca. Laniala nna bechú tisa Jesús ca nua, 10lee nna gopittebe lo barcoha lenie ca benni rudheti ca tisa ruleꞌe, atti diattebaque daca lo yu nu te láni Dalmanuta.

Ca benni fariseo rinnabacana uleꞌe lo Jesús gansi gualí dee iyyabaaha

(Mt. 16:1-4; Lc. 12:54-56)

11Ca fariseo nna bisínttebacana nía, atti udulottebacana ritilha tisacana len Jesús. Qui cuꞌu biacana Benniha nna unnabattebacana unie ttu milagru nu uleꞌe lo gansi gualí Tata Do Iyyabaaha udhelhe Benniha. 12Jesús bennetteba lee, atti re:

—¿Biaca rinnaba ca benni seꞌe nnanna unia ttu milagru? Neti nna gualíbatia ria: “Tsa läga unia ni ttu nu uleꞌe lo nuxa anca [len ca benni seꞌe nnanna.]”

13Laniala nna bocaꞌane ca nua nía. Lee nna beopittebe lo barcoha attu libe deyye daca attu ladu gue indattooha.

Jesús rixxiꞌe gue levadura gue ca fariseo

(Mt. 16:5-12)

14Ca benni rudheti ca tisa ruleꞌe Jesús bixulhabaquinbi bittu bijacabi bixa gocabi, sunruba ttu ttaxtila nojacabi lo barcoha. 15Jesús ráttebe cabi:

—Gualdo cuidadu qui lä iyietile levadura gue ca fariseo-na, anáguaba len levadura gue nu rinnabia lá Herodes-na lhe.

16Ttiaca ca benni rudheti ca tisa ruleꞌe nna unnetteba len loescabi rácabi:

—Gaxa de bittuba ttaxtila nojari nuarca rá Ben-na aná.

17Atti utedaani Jesús gue nu rá ca biꞌiniha nna ráttebe cabi:

—¿Biaca rinnele rále dequi bittu ttaxtila te guele? ¿Si itúttuhaba bittu radú lele? ¿Lä ritedaaguabinle nna? ¡Cattiparba tsitsi yaya elha rien guele! 18Gua yuꞌuba iyya lole nna bittu rilenle, gua siaguaba nagale nna bittu rieninle, lä rexxaguaba lele nna. 19Atti utidhia gayurba ttaxtila gue gayu mil ca unbiyuuha. ¿Balha sumi bisá ca pedazu bodapaleha?

Lacabi nna becabicabi rácabi:

—Tsiꞌinu (12) sumi.

20Ráguabe:

—Atti utidhia gasirba ttaxtila gue ttapa mil benni, ¿balha sumi bisá ca pedazu bodapaleha?

Becabittebacabi rácabi:

—Gasi.

21Lee nna ráttebe cabi:

—¿Biacala itú ttuaba bittu radú lele ganna?

Jesús benie beali lo ttu nu xua loni

22Atti bisína Jesús lenie ca benni rudheti ca tisa ruleꞌe lheꞌe yiesi Betsaida nna uchetteba ca benni ttu unbiyuu xua loni guadúcana loe. Nianna unnesiꞌittebacana unnabacana loe cane ca iyya lo nua qui eyacana. 23Jesús bedaxxuttebe ná nua dia lanie na roꞌo yiesiha. Laniala utabi xxenie ca iyya lo nua, bexxúa nee iqui nua lhe atti unnaba tisattebe nua gansi chi rilenna saroꞌo. 24Nu xua loniha nna begüiattebana, nianna rána:

—Rilabatia ca benni ttiaca ruleꞌebatia cana attiba ca yaga ridacana.

25Jesús bodixxuatteba nee attu libe iyya lo nua. Nu xua loniha nna beacattebana, ita suba biláttebinna iyáxeaba. 26Laniala bedhelha Jesús nua eyyana lheꞌe yoꞌo gueniha, nianna re na:

—Bittu etelu lheꞌe yies-na. [Bittuguaba quixxiꞌenlu nuxa benni gue nu uca lhe.]

Pedro ridí roꞌobi Jesús anque Cristu

(Mt. 16:13-20; Lc. 9:18-21)

27Jesús lanie ca benni rudheti ca tisa ruleꞌe nna diattebaque lheꞌe ca lheꞌesi seꞌe lo yu nu te láni Cesarea gue Filipo. Atti yuꞌucabi neda nna unnaba tisatteba Jesús ca biꞌiniha re cabi:

—¿Nú rá ca benni dequi anca?

28Ca biꞌiniha nna becabicabi rácabi:

—Ttulhe benni nna rácana lu ancalu Juan biꞌini begadi indaha. Adí benni nna rácana lu ancalu profeta Elías. Attu lhecana nna rácana gaxa ttu ca profetahaba lu.

29Laniala nna rá Jesús ca biꞌiniha:

—Lebiꞌi nna ¿núla rále anca?

Pedro nna becabittebabi rábi:

—Lu ancalu Cristu Benni udhelha Tata Do Iyyabaaha odilá ca benni.

30Ttiaca Jesús bentebe mandadu ca benni rudheti ca tisa ruleꞌe qui tsa nuttu nu quixxiꞌencabi dequi labe nua Cristu.

Jesús rixxiꞌe gaxasná utticane

(Mt. 16:21-28; Lc. 9:22-27)

31Jesús udulottebe utixxiꞌanie ca benni rudheti ca tisa ruleꞌe re cabi:

—Neti Benni unbiyuu daa iyyabaaha labíaba satexxatta. Ca nu teru elha rieni gueni gue ca benni gueri anca benni Israel, ca nu lo gue ca bixxudi-na lhe ca nu ruleꞌe nu rá lo ca ley bocaꞌana Moisés lhe cuꞌu niꞌacani neti, utticana neti lhe ttiaca eyonna ubisa nna eyacatia.

32Iyába unní nna lhixxa rába unnee utixxiꞌanie cabi. Laniala nna ulequiesi Pedro Jesús attu atta subi. Nianna utisabi Benniha. 33Ttiaca Jesús bodequitteba loe begüie lo ca biꞌini rudheti ca tisa ruleꞌe, atti bedhaca disattebe Pedro re biꞌiniha:

—¡Ubietta atta dua-ni, nu xxegüi! Lu nna läga rulaba lelu atti rulaba le Tata Do Iyyabaaha, attiba rulaba le ca benni seꞌe yies lo yu-ni rulaba lelu.

34Laniala nna uxie ca benni rudheti ca tisa ruleꞌe leni adí ca benni seꞌe nía re cabi:

—Gansi nuxale raca lele acale benni udheti ca tisa quia-ni, raca duelha erú iqui erú le nua elha nabani gueni, uchíana lo iyába nu satena lhe attiba ttu benni diana noja crusi gueni atta utácan na lo nua. Lana nna ettenobana neti, masquiba uttican na. 35Cumu iyába ca benni rdaca odilá elha nabani guecani yies lo yu-ni, unnittiba elha nabani guecani, iyába ca benni erú iqui erú lecani gatticana lo niꞌa quia lhe lo niꞌa gue ca tisa gue Tata Do Iyyabaaha lhe guadíba ca nua elha nabani gatta ttu tsaba guecani. 36Tsa lägabi ixuu len ttu benni ganna eꞌeyuna acana nu banani iyába nu te yies lo yu-ni, elha nabani gueniha nna ttu tsaba dia nittina. 37Cumu tsa lägabi te ttu bixa ute ttu benni qui gatta elha nabani gueni ttu dia lii. 38Cumu gansi ttu benni ettuinna quia lhe ettuinna gue ca tisa quia-ni lhe lo ca benni runi nu lä anca tsee seꞌe nnanna ca nu rudhá iquicani Tata Do Iyyabaaha, anáguaba neti Benni unbiyuu daa iyyabaaha ettúguabatia gueni gansi chi dedaaya lheꞌe xieni gaꞌana tsee gue Tata quia do iyyabaaha lenia ca ingeli gue Ben-na.

Currently Selected:

San Marcos 8: zaq

Highlight

Copy