San Marcos 9

1Ráguaba Jesús cabi:

—Neti nna gualíbatia ria le, ttulhe ca benni seꞌe ni nna axta liba gansi chi biláquinna rinnabia Tata Do Iyyabaaha len elha ra xxen le guee, lania liba nna gatticana.

Botsía lo Jesús

(Mt. 17:1-13; Lc. 9:28-36)

2Dequide chi utee xxupa ubisa nna uchetteba Jesús Pedro lhe Jacobo lhe Juan lhe iqui ttu iꞌiya yadha atta suntteba laque useꞌe. Nía nua botsía lo Jesús aníba lo ca biꞌiniha. 3Xo Benniha nna ruꞌuni xieni gue ca nua de chabeatto nisihaba beacacana. Ni ttu benni rii lari do yies lo yu-ni bittu dhana odhaꞌanna ca nua sitsi atti beacacana. 4Nía bilencabi ucaxxe Elías lenbi Moisés rinnecabi len Jesús. 5Pedro nna ráttebabi Jesús:

—Maestro, tsee galá guaxxína seꞌetu nii. Unrugatu tsunna yoꞌo lhaga, ttu guelu nna attu gue Moisés nna attu gue Elías nna.

6Aníaba rá Pedro, cumu bittu bería niꞌelhinbi bixa innábi de rasixxattaquinbi. 7Nianna ucaxxetteba ttu bea udána xequique bexxulana que. Lheꞌe beaha nna bieni tsiꞌi ttu benni unnee re:

―Ben-ni anque xiꞌinia benni racaxxattatia guee. Gue Benni gualdo nagale.

8Ttu ca lharu nna atti begüiachicabi sabiꞌaba atta seꞌecabiha nna tsa lärganu ca biꞌiniha biláquinbi. A tturba Jesús biláquinbi due nía.

9Laca deyyacabi readicabi iqui iꞌiyaha nna bentteba Jesús ca biꞌiniha mandadu re cabi:

—Tsa nuttu nu quixxiꞌenle gue nu bilenle axta liba dequide gansi chi beacatia eríaya lheꞌe baa atta yuꞌu ca nu yatti-na, neti Benni unbiyuu daa iyyabaaha.

10Lacabi nna uyuꞌutsitsibacabi tisa, masquiba gua rinnaba tisaguaba loescabi gue bi dia le nu rá Benniha eyacanie attu libe. 11Nianna unnaba tisacabi Jesús rácabi Benniha:

—¿Biaca rá ca nu ruleꞌe nu rá lo ca ley bocaꞌana Moisés dequi primerla Elías esía, lenla nna isía Benni anque Cristu?

12Lee nna becabie re ca biꞌiniha:

—Gualíba, primerla Elías esía, biꞌiniha oseꞌetseebi iyáxea. Gansi anía anca, ¿Si läba ráguaba lo ca sitsi gue Tata Do Iyyabaaha neti Benni unbiyuu daa iyyabaaha nna satexxatta, cuꞌu niꞌacani neti lhe? 13Ttiaca neti nna rpea le, chila beta Elías, ca benni nna nu ucaba lecani bedhacacana biꞌiniha, attiba chi gaꞌana lo ca sitsi gue Tata Do Iyyabaaha satebi.

Jesús bebee be xxegüi yuꞌu lheꞌe cuerpu gue ttu uncuiti

(Mt. 17:14-21; Lc. 9:37-43)

14Atti besina Jesús atta seꞌe adí ca biꞌini rudheti ca tisa ruleꞌe, biláttebanie ixeru ca benni seꞌe sabiꞌaba ca biꞌiniha. Níaguaba seꞌe ttu chupa ca nu ruleꞌe nu rá lo ca ley bocaꞌana Moisés, ritilha tisacana len ca biꞌiniha. 15Atti biláni ca benni seꞌe nía Jesús, bebanbaquinna iyábacana bigaattebacana guatsácana Benniha rácane: “Padiuxi”. 16Lee nna unnaba tisattebe, re cana:

—¿Bi lo niꞌa gueonna ritilha tisa lenle ca unná?

17Ttu ca nu seꞌe nía nna unnettebana rána:

—Maestro, daba neti lenia uncuiti quia-ni lo cuinalu, cumu yuꞌu lheꞌe cuerpu gueni ttu be xxegüi. Unná nna bittu rugüelhana innena. 18Gaxaba duna atti risía retti gueni nna be xxegüi-na riguꞌunattebana unná lo yu, riríatteba besina roꞌoni lhe rotteba lo layani lhe atti redá yagattebana. Neti chi unnaba lo ca biꞌini rudheti ca tisa ruleꞌelu-na qui ebeacabi be xxegüi-na, ttiaca bittu udácabi.

19Jesús becabie re:

—Lebiꞌi ca benni bittu ria leni, ¿núcachiarga neti lania le? ¿Núcachiarga neti dhoa uchíana lole? Gualsaxxí uncuitiha ni.

20Laniala nna uchecana uncuitiha atta du Jesús. Ttiaca atti biláni be xxegüiha Jesús, benttebana uttiꞌa uncuitiha atti bixxidittebanna. Unnuha nna beyyattebana udhá, bitesttebana lo yu lhe biría besina roꞌoni lhe. 21Jesús unnaba tisattebe tata gue uncuitiha re na:

—¿Núcaliga ridaca unná aná?

Tata gue uncuitiha nna becabina ráne:

—Desdeba atti ancali unná chicaꞌa udulo ridacana aná. 22Ixe libe chi bedelha be xxegüi-na uncuiti quia-na lo gui, lheꞌe inda lhe qui gattina. Larcala gansi gua dabalu unlu ttu bixa leni unná, besiꞌichinlu riꞌitu. Ucachi lenlu riꞌitu.

23Jesús ráttebe na:

—¿Gasná nua rálu: “Gansi gua dalu”? Bixaba raca le ttu benni aca, ladiba ria leni nna guacaba nua.

24Laniala nna unnetteba tata gue uncuitiha idisa, rána:

—¡Gua riaba lasia! ¡Ucachi len neti qui tsiaga lasia!

25Atti biláni Jesús chi bisína ixeru ca benni atta due, bedhaca disattebe be xxegüiha re na:

—¡Neti, rinnabiaya lu, be xxegüi nu runna anca uncuiti-ni biría lhe cuesu lhe bería lheꞌe cuerpu gue uncuiti-na. Tsa bitturu etetaꞌalu lheꞌonna attu libe!

26Be xxegüiha nna uresiꞌattebana, nianna benttebana uttiꞌa uncuitiha attu libe, atti beríattebana deyyana. Uncuitiha nna níaba te nua guannalu uttibana. Larcala nna ixe ca nu seꞌe nía rácana dequi uttiba nua. 27Ttiaca Jesús bedaxxuttebe ná uncuitiha belhidhe na. Unnuha nna xeaba guadhana udúrana.

28Dequila nna utaꞌa Jesús lheꞌe yoꞌo lanie ca benni rudheti ca tisa ruleꞌe. Nianna atti chi seꞌecabi suntteba lacabi lencabi Benniha nna unnaba tisacabi rácabi Benniha:

—¿Biaca bittu udátu ebeatu be xxegüi-na?

29Jesús becabittebe re cabi:

—Ca be xxegüi loesi unná, tsa läga dhari ebeari cana gansi bittuba innábari len Tata Do Iyyabaaha, [cuꞌu ubina lheꞌeri lhe.]

Ni rerupa libe rixxiꞌa Jesús gaxasná gattie

(Mt. 17:22-23; Lc. 9:43-45)

30Atti chi bedácabi nía, deyyattebacabi daca lo yu nu te láni Galilea, Jesús tsa bittu raca lee nuxa unana requique nía, 31cumu de ruleꞌenie ca biꞌini rudheti ca tisa ruleꞌe. Lee nna re ca biꞌiniha:

—Neti Benni unbiyuu daa iyyabaaha, labíaba utee ca benni neti las ná ca nu utticana neti, ttiaca dequide eyonna ubisa nna eyacatia.

32Lacabi nna tsaba bittu guadú lecabi bixa dia le ca tisa unnee Benniha, ttiaca rasbaquinbi innába tisacabi Benniha.

Bi un ttu benni qui eꞌeyuna acana nu ra xxenru leni

(Mt. 18:1-5; Lc. 9:46-48)

33Bisínba Jesús lenie ca benni rudheti ca tisa ruleꞌe lheꞌe yiesi Capernaum. Atti chi seꞌeque lheꞌe yoꞌo nna unnaba tisatteba Jesús ca biꞌiniha, re cabi:

—¿Bi lo niꞌa gue nua ritilha tisa len loesle atti yuꞌuri neda dari bechiha?

34Ttiaca lacabi nna beaca sittebacabi, cumu atti yuꞌucabi nedaha nna ritilha tisa len loescabi gue nuxacabi aca nu lo. 35Laniala nna bedotteba Jesús, atti uxittebe iyába tsiꞌinu ca benni rudheti ca tisa guee, nianna re ca biꞌiniha:

—Gansi nuxale rdacale acale nu lo, unnuha nna acana nu xubana gue iyále, nu udá náni lo iyále lhe.

36Atti bedaxxuttebe ttu unto bedúe salhe gue ca biꞌiniha, lenla nna bedotteba lo nee nua, nianna ráttebe cabi:

37—Nuxaba benni ulabina ttu unto loes unní de ancana nu ria leni neti nna netiba nua rulabi nua. Nu ulabina neti nna läga sunru neti nua rulabina, anáguaba rulabina Tata quia Do Iyyabaaha benni udhelhe neti.

Nu bittu riguꞌu niꞌacana riꞌi, seꞌecana len riꞌi

(Lc. 9:49-50)

38Juan ráttebabi Jesús:

—Maestro, riꞌitu chi bilentu ttu nu requi ruría lána ca be xxegüi atti rudettina lálu, ttiaca unná nna läga riꞌi selunna. Larcala nna chi besunatu qui bitturu unna aná.

39Jesús becabittebe re:

—Bittu usunale uni unná aná, cumu läganu te unna ttu milagru udettina láya, lenla nna eyequina inne güena quia. 40Nu bittu redú disana lori nna len riꞌiba duna. 41Nuxaba benni gansi utena ladiba ttu xiga inda len lebiꞌi de ancale benni baba len neti, neti nna gualíbatia rpea le, unnuha nna guadíba na nu tsee ralhana dhína gue nu bennaha.

Lhatsiru unle

(Mt. 18:6-9; Lc. 17:1-2)

42’Ttiaca gansi nuxa benni unna ixúyie ttu ca benni ria leni neti bittu chi seꞌe tsitsi lo neda gue Tata Do Iyyabaaha unna ttu nu lä anca tsee, tseerla salíana nua uxxicacana ttu iyya gue mulinu xeni yienni atti udelhacan na lheꞌe indattoo. 43Gansi ttu nálha runna ixúyielu unlu nu lä anca tsee, lu nna uchecu na, cumu tseerla salíana lu esínlu atta gatta elha nabani guelu ttu dia lii bittu ttu lhaꞌa nálu te, attichula tsialu atta lexúa leni irpa lhaꞌa nálu. Nía nua atta ttu dia liiba rite lo guiha, ttu tsa bittu reola loni. 44[Nía nua bittu ratti ca bedúa, lä reolaguaba lo guiha lhe.] 45Gansi ttu lhaꞌa niꞌalha runna ixúyielu unlu nu lä anca tsee, lu nna uchecu na, cumu tseerla salíana lu esínlu atta gatta elha nabani guelu ttu dia lii bittu ttu lhaꞌa niꞌalu te, attichula tsialu atta lexúa leni irpa lhaꞌa niꞌalu. [Nía nua atta ttu tsa bittu reola lo guiha. 46Nía nua bittu ratti ca bedúa, lä reolaguaba lo guiha lhe.] 47Gansi ttu iyya lolha runna ixúyielu unlu nu lä anca tsee, lu nna ulequi na, cumu tseerla salíana lu etaꞌalu atta rinnabia Tata Do Iyyabaaha bittu ttu lhaꞌa iyya lolu tee, attichula tsialu atta lexúaha leni irpa lhaꞌa ca iyya lolha. 48[Nía nua bittu ratti ca bedúa, lä reolaguaba lo guiha lhe.]

49’Cumu guiha uni etticana ixe attiba deti. 50Deti-na tseeba rixúe, ttiaca gansi enitti ixe gue ben-na, lärga aca eyo ben-na ixe. Gualuni qui acale benni ixú attiba deti-na tseeba rixuuna. Lhatsiru gualtseꞌe, bittu ttilha len loesle.

Currently Selected:

San Marcos 9: zaq

Highlight

Copy