San Marcos 7

Nu runna itsiga ca benni lo Tata Do Iyyabaaha

(Mt. 15:1-20)

1Ca fariseo lencana adí ca nu ruleꞌe nu rá lo ca ley bocaꞌana Moisés daa lheꞌe yiesi Jerusalén, ubigattebacana sabiꞌaba Jesús. 2Lacana nna biláquinna ttu chupa ca benni rudheti ca tisa ruleꞌe Benniha anca tsiga nácabi atti rocabi etta. Delaba bittu beari nácabi, bittu bedocabi tisa uncabi attiba chi labi ca benni Israel runcana atti deoba gocana etta. Larcala nna unne güeettebacana gue ca biꞌiniha. 3(Cumu ca fariseo lencana adí ca nu Israel tsitsiba runcana qui dho tisa gue nu beleꞌen ca benniola guecaniha cana. Gansi bittuba quí nácani attiba chi labicana runcana, läga gocana etta.) 4Dequide resincana riacana lheꞌe atta raca iꞌiya nna tsa läga rocana ttu bixa gansi bittuba quí nácani. Runruguabacana ixerguaba ca loesi unní lhe attiba eyari ca taza lhe ca canti lhe ca platu anca leni bronce lhe axtaba ca nu ribíacana loniha lhe. 5Nuarcala ca fariseo lencana ca nu ruleꞌe nu rá lo ca ley bocaꞌana Moisés nna unnaba tisattebacana Jesús rácane:

—Ca benni rudheti ca tisa ruleꞌelu-na, tsigaba anca nácani rocana etta. ¿Biaca bittu rudocana tisa gue nu beleꞌe ca benniola gueriha?

6Jesús becabittebe guecani re cana:

—Gualíbani profeta Isaías atti unnebi utixxiꞌabi gue nu runle, lebiꞌi ca nu ni lo ni tisaba runle dequi ancale nu runi nu anca tsee. Lo sitsi ben biꞌiniha nna rinne Tata Do Iyyabaaha re:

Ca benni seꞌe-ni nna cuentaba rinnecana rácana dequi ria lecani neti,

ttiaca läga gualícani ca unná racaquinna quia itú iqui itú lecani.

7Cuentarba te la dequi rudú xibicani loa,

cumu nu anca gue ca benni seꞌe yies lo yu-niba ruleꞌequinna ca benni,

läga ruleꞌecana nu ancatia mandadu uleꞌecana.#7:6-7 Isaías 29:13

8Lebiꞌi nna rudhá iquile nu ben Tata Do Iyyabaaha mandadu unri. Gue ca nu chi labi ca benni runcana la diale rudole tisa, [riguíle ca canti-na lhe ca xiga-na lhe ixerguaba ca loesi unná runle lhe.]

9Rágua Jesús cana:

—¡Lebiꞌi nna si tseeba raquinle riguꞌu niꞌale nu ben Tata Do Iyyabaaha mandadu unle qui raca runle nu chi labile runle! 10Cumu lo ca sitsi bocaꞌana Moisés rinne rá: “Gapalu respeto tata guelu lhe nan guelu lhe.”#7:10 Éxodo 20:12 Ráguaba: “Nu quena iqui tata gueniha o nan gueniha nna ralhaba nua gattina.”#7:10 Éxodo 21:17 11Ttiaca lebiꞌi nna rálale dequi gua dicaba gá ttu benni tata gueniha o nan gueniha: “Bittu aca unna ttu bixa te quia guelu, cumu nu dica utea len lu nna chi ancana corbán.” Corbán dienna innána nu chi anca úna gue Tata Do Iyyabaaha. 12Nianna ráguale dequi careꞌaba inná ttu benni aná nna lärgaga raca duelha ute nua ttu bixa te gueni leni tata gueniha o nan gueniha. 13Aná nna leni nu rudhetinle ca benni uncana riguꞌu niꞌale ca tisa gue Tata Do Iyyabaaha. Runruguabale adírguaba loesi unní lhe.

14Laniala nna uxi Jesús ca benni seꞌe nía, nianna re cana:

—Iyá rechattele nna gualdo nagale quia, gualiyienini gue nu innía-ni lhe. 15Läganu ro ca benni runna acacana nu anca tsiga lo Tata Do Iyyabaaha, nu riría lhiꞌu lheꞌe lastooquinna liba runna acacana nu anca tsiga lo Ben-na. 16[Atta gua rieninle, gualdo nagale qui sadú lele.]

17Atti chi beriesi Jesús ca benni seꞌe nía nna betaꞌattebe lheꞌe yoꞌo. Ca biꞌini rudheti ca tisa ruleꞌe nna unnaba tisattebacabi Benniha bixa dia le ca tisa unnee. 18Lee nna ráttebe cabi:

—¿Si niguaba lebiꞌi lä radú lele? ¿Si bittuba rieninle läganu ro ca benni runna acacana nu anca tsiga lo Tata Do Iyyabaaha? 19Cumu läga lhiꞌu lheꞌe lastoori dia nu rori, lheꞌe libari dia nua, lenla nna reríana.

Leni ca tisa unnee-ni rixxiꞌe gue iyába nu rori ancana nari. 20Ráguabe cabi:

—Nu riría lhiꞌu lheꞌe lastoo ca benni libunna runna acacana nu anca tsiga lo Tata do Iyyabaaha. 21Cumu lhiꞌu lheꞌe lastoo ca benni liba riría nu lä anca tsee rulaba lecani:

nu runi racacana nu risá nu bittu anca latselani lhe

nu runi racacana nu rutsá roꞌoni nutti nuttiba lhe

nu runi racacana nu runi elhutti lhe

22nu runi racacana nu runi ubana lhe

nu runi racacana nu ridá leni acana nu gattaxxatta gueni lhe

nu runi racacana nu rudhaca güee benni lhe

nu runi racacana nu run leni lhe

nu runi racacana nu rudona leni unna nu racaba leni lhe

nu runi racacana nu rutía di leni lhe

nu runi racacana nu rinne güee gue benni lhe

nu runi racacana nu runi ttaba lhe

nu runi racacana attiba nu lä caa elha rieni gueni lhe.

23Iyába ca unní ancacana nu lä anca tsee riría lhiꞌu lheꞌe lastoo ca benni. Ca unná libunna runcana aca benni nu anca tsiga lo Tata Do Iyyabaaha.

Ttu nuila bittu ancana benni Israel ria leni Jesús

(Mt. 15:21-28)

24Jesús udáttebe nía die lo ca yu gue yiesi nu te láni Tiro leni yiesi nu te láni Sidón. Atti bisíne nía nna utaꞌattebe lheꞌe ttu yoꞌo do nía. Lee nna bittu raca lee una benni doe nía, ttiaca ga uca dho gatsie nía. 25Larcala binatteba nan gue ttu uncuiti yuꞌu be xxegüi lheꞌe cuerpu gueni. Nan gue nua nna güiattebana bedú xibini lo Jesús.

26Nuilaha nna läganu Israel nua, nu Sirofenicia liba nua. Lana nna unnesiꞌixxattana unnabana lo Jesús qui ebea benniha be xxegüi yuꞌu lheꞌe cuerpu gue xiꞌiniunnániha. 27Ttiaca lee nna ráttebe na:

—Primer xa begüeelha elani ca benni Israel raca xiꞌinia-na. Cumu läga anca tsee cuaya ttaxtila ro ca xiꞌinia-na qui udelha lo ca becu-na.

28Nuilaha nna becabina rána:

—Gualíbinlu, xa tata, ttiaca axta ca becu-na rocana nu rexxa ro ca unto-na riyinna xana mexa-na.

29Jesús ráttebe nuilaha:

—Tseeba becabilu. Denua nna lhatsiru beyya cumu nu xxegüiha nna chiba bería nua lheꞌe cuerpu gue xiꞌiniunnáluha.

30Atti chi besin nuilaha lheꞌe yoꞌo gueniha nna biláttebina xiꞌiniunnániha siba chi tena lo atta rattanaha, cumu chiba bería be xxegüiha lheꞌe cuerpu gue nua.

Jesús benie iyienini lhe inne tsee lhe ttu biría

31Jesús beríattebe lo yu gue yiesi nu te láni Tiro, atti betaꞌattebe lheꞌe yiesi nu te láni Sidón. Níala nna die lo yu nu te láni Decápolis, axta liba bisíne roꞌo Indattoo gue Galilea. 32Nía nua uchecana lo Jesús ttu unbiyuu cuesu, bittuguaba rilí roꞌoni innena lhe. Nianna unnesiꞌittebacana unnabacana loe uxxúa nee iqui nua qui eyacana. 33Lee nna ulequiesittebe nua atta seꞌe ca benni seꞌe nía. Nianna begaꞌatteba xbine lheꞌe irupa laduba nagani, atti bettuttu tteba xxenie lo xbine utane lo lhusani. 34Laniala nna ulhidha loe begüie Iyyabaaha. Bennexaba lee nna atti re unbiyuuha:

―¡Efata! ―Tisa-ni nna dienna innána: ¡Beali!

35Snaba lania nna beali naga nu cuesuha, bilí lhusaniha lhe. Lania nna lhatsirba unne nua. 36Jesús ráttebe ca benni seꞌe nía, tsa nuttu nu quixxiꞌaquinna. Tsitsiba belise ca nua qui bittu quixxiꞌacana, ttiaca ca unnuha nna adílaba run ca nua rudácana tisa gue nu beni Benniha. 37Iyábacana rebanxxattaquinna gue nu ucaha, nianna rácana:

―¡Iyába nu runi Ben-na ancana nu tsee! ¡Axtaba ca nu cuesu-na runie riyienquinna runie rinne ca biría-na lhe!

Currently Selected:

San Marcos 7: zaq

Highlight

Copy