San Marcos 4
4
Ejemplu gue ttu benni rudelha xuxtila
(Mt. 13:1-9; Lc. 8:4-8)
1Jesús bededulottebe bodoleꞌenie ca benni bisína atta doe gaxxaba roꞌo indattooha. Ttiaca cumu de yatterba de reru benni bisína nía, nuarca gopittebe udoe lo ttu barco xua lo indattooha. Ca benni seꞌe nía nna bedaa roꞌo indahaba useꞌecana. 2Nianna ixe loba nu utixxiꞌenie cana leni ca ejemplu, qui beleꞌenie cana nu raca lee unacana. Lee nna re cana:
3—Gualudo nagale gue nu upea le: Ttu benni runi sina lo ca yu biríabi diabi güedelha xua xuxtila. 4Ttiaca atti diabi rudelhabi xuxtilaha nna ttulhe ca benniha nna binnaque lo nedaha, atti bisíntteba ca binni utocana ca benniha. 5Attu lheque nna biyinnaque lheꞌe ttu ruya atta bittu tte xxeni yu re. Ca benniha nna sattiba beꞌeyuque cumu de bittu tte xxeni yu re nía. 6Ttiaca atti biría tatubisa-na bequexxuttebe ca benniha, cumu de bittu bedetti lhu ca benniha lhiꞌu, nuarcala nna ubisque. 7Attu lhe ca benniha nna biyinnaque lheꞌe atta daa ca ya yitsi, ttiaca atti bixen ca ya yitsiha nna betsenttebaquinna ca benniha. Larcala lägabi xua udo iqui ca benni beꞌeyuha. 8Adí ca benniha nna biyinnaque ttu atta re yu bebi. Nianna beꞌeyuttebaque, biyelhattebaque lhe. Ca benniha nna tsapaba tsee lena beteque: ttulhe ca iquiha beteque rerúa (30) xua, attu lheque nna beteque gayuna (60) xua, adí ca iquiha nna beteque axtaba ttu gayua (100) xua.
9Ráguabe cana:
—Atta gua rudo nagale gue nu ria, gualun duelha qui sadú lele.
10Dequila nna atti chi beꞌana a suntteba Jesús. Ca benni tsiꞌinu rudheti ca tisa ruleꞌe, leni attu chupa ca benni seꞌe gaxxaba nna unnaba tisattebacabi bixa dia le ejempluha. 11Lee nna becabie re cabi:
—Lebiꞌi nna guarunba Tata Do Iyyabaaha qui sadú lele gue gaxasná rinnabie, nu bittu ritedaani ca benni. Ttiaca adí ca benni bittu sela len riꞌi nna leni ca ejemplu liba ruleꞌetia cana:
12qui masquiba tticaxa rugüiacana, bittu iláquinna
masquiguaba tticaxa rudo nagacani, bittu sadú lecani lhe
qui bittu odaxxucana neda gue Tata Do Iyyabaaha,
lee nna dhie elha xen lasi gue ca tulha guecani.#4:12 Isaías 6:9-10
13Laniala nna re ca biꞌiniha:
—¿Si bittuba radú lele gue ejemplu gue benni rudelha xua xuxtila-na? ¿Galasná unle sadú lele gue adí ca ejemplu rixxiꞌaya na ganna? 14Benni rudelha xuxtilaha nna ancabi attiba ttu benni rixxiꞌa ca tisa gue Tata Do Iyyabaaha. 15Seꞌe lhe ca benni ancacana attiba ca xuxtila binna lo nedaha. Gua rudoba nagacani gansi chi nuxa rixxiꞌenna cana ca tisa gue Tata Do Iyyabaaha, ttiaca dequide chi binacana ca tisa-na, risintteba nu xxegüiha rebeana ca tisa-na lheꞌe lastoocani. 16Adí ca benni nna ancacana attiba ca xuxtila biyinna lheꞌe ruyaha, atti rienquinna ca tisa-na attulade reꞌo lecani recabicana udaxxucana neda gue Tata Do Iyyabaaha. 17Ttiaca cumu läga beꞌan tsitsi ca tisaha lheꞌe lastoocani nuarca läga isá ria lecani. Larcala gansi chi bixa ratecana o nuxa rusía lencana lo niꞌa gue ca tisa-na, readi gattebacana lo neda gue Tata Do Iyyabaaha. 18Adí ca benni nna ancacana attiba ca xuxtila biyinna lheꞌe sitsiha. Gua rudoba nagacani ca tisa-na. 19Ttiaca rudolhaba lecani gue nu anca gue yies lo yu-ni, ruꞌu lecani gattaxxatta guecani lhe ridá lecani iyáloba nu te yies lo yu-ni lhe. Iyába unní yuꞌu lheꞌe iquicani, larcala rixulhaquinna nu chi bienquinna. Denua nna nuarca bittu raca uncana nu anca tsee. 20Ttiaca seꞌe adí ca benni atti rienquinna ca tisa gue Tata Do Iyyabaaha, riatteba lecani Ben-na. Denua nna runcana nu anca tsee attiba ca xuxtila biyinna atta re yu bebiha tseeba bixúe. Ttu lheque betee rerúa (30) xua, a díque nna betee gayuna (60) xua, a ttu lheque nna betee ttu gayua (100) xua.
Ejemplu gue ttu gui riguꞌu xieni
(Lc. 8:16-18)
21Ráguaba Jesús cabi:
—¿Si gua dica saxxíri ttu gui rudani nía nna atti uttodhiri ttu lmoti iquini o si ugaꞌari na xana atta rattari? ¡Dica! Ttu gui nna ttu atta yadha liba dica dho nua qui cuꞌuna xieni itúba lheꞌe yoꞌo. 22Larcala nna tsa lägabi te ttu bixa te gatsi, lä tsanni lobana, niguaba lä caa ttu nu raca sigá lä unaba benni-na lhe. 23Atta gua rudá nagale, duelhaba gualuni qui sadú lele.
24Ráguabe cabi:
—Gualdo nagale gue nu ria-ni. Cumu attichuba rudo nagale gue nu rieninle, aníaguaba uni Tata Do Iyyabaaha sadúchattiru lele, axtala utee adí elha rieni guele lhe. 25Cumu benni gua radú leniha nna dhirla nua elha rieni qui sadúchatti leni, ttiaca nu bittu radú leniha nna axtala saroꞌo nu chi radú leniha itúa.
Ejemplu gue gaxasná raca rixen ttu xua
26Jesús ráguabe ca benni:
—Gue gaxasná rinnabia Tata Do Iyyabaaha ca benni, raxxína ancana attiba ttu unbiyuu bedelhana xua xuxtila lo yu gueniha. 27Unbiyuuha nna raꞌadhibana lo rela, gansi chi rani nna rebanttebana. Laca xuaha nna gua reꞌeyue lhe die rixenie lhe lana nna niba lä ritedeenna gaxasná raca. 28Cumu ca lo yu-na chiba gaꞌan ca unná eꞌeyu xua iyada locani. Lotteba beotsi reꞌeyu, atti rixenttebe axta liba risía rido iquie. Lenla nna coa coaba xua lheꞌe iquie. 29Gansi chi ula iqui xuaha nna rudaxxutteba unbiyuuha iyyarsela rechúna benniha. Cumu chiba bisía sá exuu lena baniha.
Jesús rixxiꞌe ttu ejemplu gue ttu besi coana
(Mt. 13:31-32; Lc. 13:18-19)
30Ráguaba Jesús:
—¿Bi attu ejemplu quixxiꞌatia le nu raxxína gue gaxasná rinnabia Tata Do Iyyabaaha ca benni? 31Gue gaxasná rinnabia Tata Do Iyyabaaha ca benni raxxína anque attiba ttu besi gue coana murtasa riyyada lo ttu yu. Besiha nna masquiba ancana nu chicaꞌaru gue delo iyá besi te yies lo yu-ni, 32ttiaca dequide chi biedana, riríatteba beotsi gueni, nianna rixenttebana. Xxenrula rácana atti adí ca coanaha, ca xiquiniha nna tsapaba rielhacana. Larcala axtaba ca binni-na guarcaba rusía xcuadi guecani loni qui ribíacana xan xula gueni.
33Leni ixe loba loesi ca ejemplu-ni beleꞌeni Jesús ca benni, utixiꞌabanie cana bedaa atta bedhacaba lee sadú lecani. 34Lee nna sunruba leni ca ejemplu rinnee leni ca benni, ttiaca gansi chi suntteba lee due len ca benni rudheti ca tisa ruleꞌe, rixxiꞌattebanie ca biꞌiniha iyába bixa diani nu rinnee.
Jesús bedhaca dise be idí raca lo indattooha
(Mt. 8:23-27; Lc. 8:22-25)
35Atti chi uca ela la sáha nna rátteba Jesús ca benni rudheti ca tisa ruleꞌe:
—Gualtsá tsiari attu ladu gue indattoo-ni.
36Laniala nna bechú tisacabi ca benni seꞌe nía, nianna gopittebacabi lo barco atta do Jesús, atti diatteba lencabi Benniha. Diarguaba adí benni leni adí ca barco lhe. 37Ttiaca tturba biríaru ttu be idí uyuꞌuna lo indattooha. Indattooha nna udulítteba loni utaꞌana lo barcoha. Larcala bentteba nua tseettina lhiꞌu de chi risána inda. 38Jesús daca xaniꞌala barcoha te Benniha tiꞌedhie gani iquie ttu nu rucani iqui benni. Laniala nna bodibancane rácane:
—¡Maestro! ¿Lä biguaba retábinlu chi diari rettiri lheꞌe inda-ni?
39Jesús guadhattebe bedhaca dise beha lhe indattooha lhe re cana:
—¡Siru gualeseꞌe!
Beha nna bebe sittebana. Siba bebe nu ridú lí lo indattooha lhe. 40Laniala nna rátteba Jesús ca benni rudheti ca tisa ruleꞌe:
—¿Biaca rasinle? ¿Si itú ttuaba bittu chi ria lele neti?
41Ttiaca ca biꞌiniha nna rasilhabaquinbi, nianna unnaba tisatteba loescabi rácabi:
—¿Nú benni biꞌini du-ni? Nuarcala axtaba be-ni lhe indattoo-ni lhe rudocana tisa guee.
Currently Selected:
San Marcos 4: zaq
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
