San Marcos 3

Jesús beonie ná xi gue ttu unbiyuu

(Mt. 12:9-14; Lc. 6:6-11)

1Jesús nna bedetaꞌattebe attu libe lheꞌe yoꞌo atta rudheti ca benni Israel ca tisa gue Tata Do Iyyabaaha. Nía do ttu unbiyuu xi ttu lhaꞌa náni. 2Ca benni fariseo seꞌe nía nna rulhatsicana gansi güeyon Jesús ná xi gue unbiyuuha sá redí lecaniha qui te roꞌocani udelhiyyacane. 3Jesús nna ráttebe unbiyuu xi nániha:

—Udú lii nna utá udú salhe gue ca benni seꞌe-ni.

4Nianna unnaba tisattebe ca benni seꞌe nía re cana:

—¿Bi gaꞌana un ca benni sá redí leri riꞌi ca benni Israel? ¿Si unri nu tsee, aca? ¿Si unri nu lä anca tsee, aca? ¿Si odilári ttu benni lo elhuttiha, aca? ¿Si ugüelhari nua gattina, aca?

Ca unnuha nna tsa bittu becabicana, siba ucacana. 5Jesús nna risaꞌabanie rugüie lo iyába ca nu seꞌe sabiꞌaba atta due. Siꞌirurba bedúe cumu de anca ca nua nu diti ancaxxatta tsitsi lastoocani. Laniala re unbiyuuha:

—Belhí nálu.

Unbiyuuha nna belhítteba náni. Nániha nna beacattebana. 6Ttiaca ca fariseo seꞌe nía, cuantusiba beríacana lheꞌe yoꞌoha, unnetteba lencana ca benni deno Herodes, gue gaxasná eguila lecani qui utticana Jesús.

Jesús rudhaca dise ca be xxegüi

7Jesús nna güequittebe nía die roꞌo indattooha len ca benni rudheti ca tisa ruleꞌe. Aníaba deno ixeru ca benni beaca lascani Galilea. 8Atti chi bina adí ca benni seꞌe lheꞌe adí ca yiesi gue iyába nu reban leri runi Benniha nna güiatteba ixeru ca benni seꞌe lo yu nu te láni Judea atta du Benniha. Güiaguaba ca benni seꞌe lheꞌe yiesi Jerusalén lhe ca benni seꞌe lo yu nu te láni Idumea lhe ca benni seꞌe attu ladu gue yoo Jordán lhe ca benni seꞌe lheꞌe yiesi nu te láni Tiro lhe ca benni seꞌe lheꞌe yiesi nu te láni Sidón lhe. 9Lo niꞌa gue de seꞌexxatta benni nía, nuarca rátteba Jesús ca benni rudheti ca tisa ruleꞌe udú tseecabi ttu barco qui tsopie lo nua. Anía liba nna bittu uquíxxatta ca benni Benniha. 10Cumu de yarba de re ca nu rani chi beonie, nuarca iyába adí ca nu yuꞌu isagüe seꞌe nía, rixuua-ni cana iqui Jesús qui ttixaca galhacana canacana Benniha. 11Gansi chi riláni ca be xxegüi yuꞌu lheꞌe cuerpu gue ca nu seꞌe nía Jesús, rudútteba xibicani lo Benniha atti ribesiꞌani cana rácana:

—¡Lu nua xiꞌini Tata Do Iyyabaaha!

12Ttiaca lee nna bedhaca dise cana qui tsa bittu quixxiꞌacana aní lo benni nuxa anque.

Jesús rucue tsiꞌinu (12) ca benni aca apóstol guee

(Mt. 10:1-4; Lc. 6:12-16)

13Dequilaha nna gopitteba Jesús lo ttu lhilhi. Lee nna uxttebe ca benni boquinna iquie gaxie. Atti chi ubiga ca biꞌiniha atta due nna 14boseꞌettebe tsiꞌinu ca biꞌiniha qui tsequicabi len lee, anáguaba qui idhelhe ca biꞌiniha tsiacabi sattixxiꞌacabi ca tisa guee lhe. [Ca biꞌiniha nua begüee lácabi apóstol.] 15Begüeguabe ca biꞌiniha derechu qui eyoncabi ca benni rani lhe ebeacabi ca be xxegüi lhe. 16Aní lá ca biꞌini tsiꞌinu boseꞌe Jesús:

Simón biꞌini begüee lábi Pedro,

17Jacobo lenbi betsibi Juan ca xiꞌini biꞌini lá Zebedeo, ca biꞌiniha nua begüee lácabi Boanerges nu dienna innána Xiꞌini Ruꞌu Be.

18Selaguaba Andrés lhe

Felipe lhe

Bartolomé lhe

Mateo lhe

Tomás lhe

Jacobo xiꞌini biꞌini lá Alfeo lhe

Tadeo lhe

Simón biꞌini te lábi Zelote lhe.

19Judas Iscariote nu betena Jesús las ná ca nu betticana Benniha lhe.

Rácana dequi nu xxegüiba yuꞌu lheꞌe cuerpu gue Jesús

(Mt. 12:22-32; Lc. 11:14-23; 12:10)

20Dequide chi besina Jesús lheꞌe yoꞌo atta reꞌane, bedesintteba ixeru ca benni nía. Larcala niba yetta lä ucaru goe lenie ca benni rudheti ca tisa ruleꞌe.

21Atti bina ca benni datía Jesús gue nu run Benniha nna uluꞌuttebacana neda diacana saxícana Benniha, cumu lacana nna racaquinna dequi iquiba Benniha raca.

22Anáguaba ca nu ruleꞌe nu rá lo ca ley bocaꞌana Moisés daa lheꞌe yiesi Jerusalén, rácana:

—Beelzebú nu rinnabia ca be xxegüi-naba yuꞌu lheꞌe cuerpu gue unná. Labana rugüena unná derechu qui ebeana ca be xxegüi yuꞌu lheꞌe cuerpu gue ca benni.

23Jesús nna uxttebe cana, atti utixxiꞌattebanie cana ttu ejemplu, re cana:

—¿Tti modu uría la nu xxegüiha, cuinaga nu xxegüiha? 24Gansi ca benni seꞌe lheꞌe ttu yiesi ilaꞌa lheꞌe loescani de ritilha len loescani, yiesiha nna lärga isá uchía nua. 25Gansi ca benni seꞌe lheꞌe ttu yoꞌo ilaꞌa lheꞌe loescani de ritilhacana, ca unnuha nna lärga isá uchíacana atti lhuxacana. 26Anáguaba gansi nu xxegüiha ilaꞌa lheꞌe loesni, itilha len la loesi xxegüiba-ni, unnuha nna lärga isá uchíana, chiba bisía sá lhuxana.

27’Nuttuguaba nu te dhana gaꞌana lheꞌe lisi ttu unbiyuu rea lasi qui sattúana bixa te gue nua, gansi bittuba iyaxxu lola unbiyuu rea lasiha qui ixxícana. Anía liba nna dhaa ubanaha lhanana nu te lheꞌe lis nua.

28’Neti nna gualíbatia rpea le, Tata Do Iyyabaaha guadíbe elha xen lasi gue iyába ca tulha gue ca benni, gue nu rinne güecana lhe. 29Ttiaca gansi nuxa inne güena gue Espíritu guee, unnuha nna lärgabi elha xen lasi gue nua te, sinuqui ttu tsaba tsia nittina.

30Aníaba rá Jesús ca benni cumu de rácana dequi be xxegüiba yuꞌu lheꞌe cuerpu guee.

Nan gue Jesús lenbi ca betsi benniha reguilacabi Jesús

(Mt. 12:46-50; Lc. 8:19-21)

31Laniaguaba nua bisína nan gue Jesús lenbi ca betsi Benniha atta do yoꞌo do Jesús güeleꞌe. Ca unnuha nna níaba useꞌecana lheꞌeliꞌa gue yoꞌoha. Nianna udhelhattebacana nu güia gualisana Benniha. 32Ca benni sia sabiꞌaba Jesús nna unnettebacana rácana Benniha:

—Ni nan gueluha lenbi ca betsiluha lhe seꞌe lheꞌeliꞌa gue yoꞌo-ni. Lacana nna reguilacan lu.

33Benniha nna becabittebe re cana:

—¿Nú nua rále dequi anca nan quia lhe betsia lhe?

34Atti begüiattebe lo iyába ca nu sia sabiꞌaba atta doe, nianna ráttebe:

—Ca unní liba anca nan quia lhe betsia lhe 35cumu ca benni rudo tisa gue Tata Do Iyyabaaha liba anca nan quia lhe betsia lhe dana lhe.

Currently Selected:

San Marcos 3: zaq

Highlight

Copy