San Mateo 23

Jesús rudelhiyye ca fariseo lhe ca nu ruleꞌe nu rá lo ca ley bocaꞌana Tata Do Iyyabaaha lhe

(Mr. 12:38-40; Lc. 11:37-54; 20:45-47)

1Laniala nna unne Jesús belise ca benni seꞌe nía, ca benni rudheti ca tisa ruleꞌe lhe re:

2—Ca benni ruleꞌe nu rá lo ca ley-na lhe ca fariseo-na lhe daba locani uleꞌecana nu dia le ca ley bocaꞌana Moisés. 3Larcala nna gualudo tisa guecani lhe gualuni iyá nu innácana lhe, ttiaca bittu unle nu run ca unná, cumu ca unná nna läga runcana nu ruleꞌecana. 4Lacana nna attiba ttu yua idiꞌi unná rujuacana ca benni atti runcana duelha dho tisa gue iyá nu rácana, ttiaca lacana niba saroꞌo bittu rudocana tisa gue nu ruleꞌecana. 5Iyába nu runcana, runbacan nua qui ilen ca benni. Lacana nna atsacaba rodixxencana lo ca yieti ca nu ruxxicacana ca caja chicaꞌa rutá lo xeacani, ca nu ruxxica lo xiquicani lhe lheꞌe ca unnuha yuꞌu ca sitsi dia ttulhe ca tisa gue Tata Do Iyyabaaha locani. Reꞌoguaba lecani rudelhacana ca flecu bata roꞌo ca xalhoocaniha lhe.#23:5 Numeros 15:38-41 6Anáguaba runcana ca atta raca laní, tsitsiba ridá lecani cuiacana atta gaꞌanaru tsee. Aníaguaba runcana lheꞌe ca yoꞌo atta rudhetiri ca tisa gue Tata Do Iyyabaaha lhe tsitsiba ridá lecani cuiacana lo ca xxila gaꞌana tseeru atta ribía ca nu lo. 7Ridáguaba lecani gá benni cana padiuxi len respeto lheꞌe ca atta raca iꞌiya-na lhe gá benni cana: “Maestro” lhe.

8’Ttiaca lebiꞌi nna bittu dhielale gácan le maestro, cumu tturba benni do anque Maestro guele, delába Cristuha. Iyábale ttuba ancale, betsi loesbale raca. 9Bittuguaba gále Tata ca benni seꞌe yies lo yu-ni, cumu tturba ttu benni doe anque Tata gueri. Benniha nua doe iyyabaaha. 10Bittuguaba ugüelhale gácan le maestro, cumu tturba ttu benni do anque Maestro guele, delába neti, benni anca Cristu. 11Benni ancana nu ra xxeni leni guele nna acana nu ixuuna lo sina guele, 12cumu nuxaba benni nu la labana runna dequi ancana nu ra xxeni leni, Tata Do Iyyabaaha unie eyadigaa leni, nu rechida gaa leniha nna uni Benniha acana nu ra xxeni leni.

13’¡Ttiaca carusiꞌirule, lebiꞌi ca nu ruleꞌe nu rá lo ca ley bocaꞌana Moisés, anáguaba ca fariseo-na lhe! ¡Ca nu ni lo ni tisaba runle dequi ancale benni runi nu anca tsee! Lebiꞌi nna chi rusunale udaxxu ca benni neda gue Tata Do Iyyabaaha qui acacana benni rinnabia benna. Lebiꞌi nna lä ritaꞌaguale len benna lhe lä rugüelhaguale gaꞌa ca benni raca lecani gaꞌacana lhe.

14[’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe! ¡Ca nu ni lo ni tisaba runle dequi ancale benni runi nu anca tsee! Lebiꞌi nna rigúale ca yoꞌo gue ca nuila bidabi-na, nianna ni lo ni tisaba isálhaba riseꞌele runle dequi rinnele len Tata Do Iyyabaaha. Lo niꞌa gue unní nna dhíle ttu elha disa xeni.]

15’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe ca nu ni lo ni tisaba runle dequi ancale benni runi nu anca tsee! Lebiꞌi nna diale lheꞌe attu yiesi subi runle duelha reguilale ladiba ttu benni qui acana benni tsia leni attiba ria lele, ttiaca atti chi biría lenle ria le nua attiba ria lele nna lebiꞌi nna runle aca nua nu ralhana dhína elha disa xenru atta lexúaha atti lebiꞌi.

16’¡Carusiꞌirule, xa nu xua loni anca nu lo gue adí benni! Lebiꞌi nna rále: “Gansi nuxa benni udettina yotu-na atti ugüena tisa unna ttu bixa nna läga raca duelha unna nu chi bodhaꞌanna tisa unna. Ttiaca gansi udettina oro sia lheꞌe yotu-na atti ugüena tisa unna ttu bixa nna laniarguaba nna labíaba unna nu chi bodhaꞌanna tisa unna.” 17¡Lebiꞌi, ca nu lä caa elha rieni gueni lhe ca nu xua loni lhe! ¿Si bittuba yule dequi dacarla yotu-na atti oro-na? Cumu yotu-na runna reaca oro-na nu anca leꞌa. 18Ráguabale dequi gansi nuxa benni udettina becoa gue yotu-na atti ugüena tisa unna ttu bixa, läga raca duelha unna nu chi bodhaꞌanna tisa unna. Ttiaca gansi nuxa udettina úna sia lo becoa-na atti ugüena tisa unna ttu bixa nna laniarguaba nna raca duelha unna nu chi bodhaꞌanna tisa unna. 19¡Nu diti bittu rienini, nu xua loni lhe! ¿Si bittuba yule dequi dacarla becoa-na attichula úna nu rusíari lo unná? Cumu becoa-na runi reaca úna nu rusíari loni nu anca leꞌa. 20Larcala nna nu rudettina becoa-na atti rugüena tisa unna ttu bixa nna läga sunru becoa-na nua rudettina, sinuqui selaguaba iyába nu sia loni. 21Nu rudettina yotu-na atti rugüena tisa unna ttu bixa nna läga sunru yotu-na nua rudetti nua, sinuqui selaguaba Tata Do Iyyabaaha, Benni do lheꞌe yotu-na. 22Benni rudettina iyyabaaha atti rugüena tisa unna ttu bixa nna läga sunru iyyabaaha nua rudetti nua, sinuqui selaguaba Tata Do Iyyabaaha lhe xxila atta do Benniha lhe.

23’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe ca nu ni lo ni tisaba runle dequi ancale benni runi nu anca tsee! Lebiꞌi nna rutsiattale tsii (10) gue lo ttu ttu gayua (100) nu anca gue ca coana radale-na, gue guadhi-na lhe anís-na lhe comino-na lhe qui rutele len Tata Do Iyyabaaha. Ttiaca bittu retábinle gue nu rá lo ca ley bocaꞌana Tata Do Iyyabaaha, nu racaru duelha udole tisa gueni nna ancana, unle nu anca tsee len ca benni, satúa lele ca benni lhe tsia lele Tata Do Iyyabaaha itú iqui itú lele lhe. Lo unní dica unle, ttiaca bittu udhanle utele tsii gue lo ttu gayua gue nu te guele. 24¡Lebiꞌi, nu xua loni anca nu lo gue adí benni! Duelhaba runle dho tisa gue ttu nu güexxa dia lo ca ley-na, ttiaca bittu retábinle unle nu xxenru, nu racaru duelha unle. Runbale attiba runi ttu nu tsitsiba rugüiana qui bittu gabina ttu beꞌeya chicaꞌa, ttiaca niba lä ritedeenna rabina ttu nu xxeni anca attiba ttu camello.

25’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe ca nu ni lo ni tisaba runle dequi ancale benni runi nu anca tsee! Ancabale attiba ca taza-na lhe ca platu-na lhe lebiꞌi nna tsapaba riile cuꞌecani, ttiaca lhiꞌu lheꞌecani nna attulade satsa anca. Aná bunna ancale, sunruba lolia guele nari, ttiaca lhiꞌu lheꞌe lastoole nna attulade re nu satsa, nu ridá lele lhanale lhe nu bittu anca tsee runle na lhe. 26¡Fariseo, xua loni! Primer xa gualquí deca lhiꞌu lheꞌe taza-na lhe lheꞌe platu-na lhe qui aníachu nna eyariguaba deca cuꞌe ca unná.

27’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe ca nu ni lo ni tisaba runle dequi ancale benni runi nu anca tsee! Cumu lebiꞌi ancale attiba ttu baa nu tsitsiba tsee ruleꞌe lolia gueni, ttiaca lhiꞌu lheꞌeni nna satíba sitta gue ca nu yatti lhe iyáloba nu yusu lhe. 28Aníaguaba lebiꞌi, lo bennirba runle dequi ancale benni runi nu anca tsee, ttiaca lhiꞌu lheꞌe lastoole nna satíba nu lä anca tsee runle na, nu ni lo ni tisaba runle dequi ancale benni runi nu anca tsee lhe.

29’¡Carusiꞌirule, ca nu ruleꞌe nu rá lo ca ley bocaꞌana Moisés, anáguaba ca fariseo-na lhe ca nu ni lo ni tisaba runle dequi ancale benni runi nu anca tsee! Lebiꞌi nna rusíale ca baa gue ca biꞌini uca profeta, chi reonlhatsirule lo ca baa gue ca benni beni nu anca tsee lo Tata Do Iyyabaaha lhe. 30Nianna rále: “Ttirca chi seꞌetu atti useꞌe ca benniola guetuha nna läga bisela riꞌitu ca nu betticana ca benni uca profeta gue Tata Do Iyyabaaha.” 31Larcala nna leni nu rále-na ruleꞌe lole lebiꞌi nna gualíba ancale nu datía ca nu betticana ca profetaha. 32¡Tsattela gualuluxa gualuni nu udulo ca benniola gueleha bencana!

33’¡Lebiꞌi, ca nu datía belha! ¡Cuinaba belha le! ¿Gasná lhále bittu tsiale atta lexúaha? 34Denuala nna neti nna idhelha ca benni anca profeta atta seꞌele-na, ca benni te elha rieni guecani lhe ca benni uleꞌequinna le lhe. Ttiaca lebiꞌi nna utálale ttulhe ca biꞌiniha lo ya crusi qui uttile cabi, adí ca biꞌiniha nna ugüele cabi lheꞌe ca yoꞌo atta rudheti ca benni Israel ca tisa gue Tata Do Iyyabaaha, lheꞌe iyába ca yies-na tsequile uríalale ca biꞌiniha lhe. 35Larcala nna cuꞌebale dia elhutti gue ca benni bittu tulha guecabi te, ca biꞌini xalhaba betti benni cana yies lo yu-ni, desdeba reni bilali gue Abel, benni beni nu anca tsee lo Tata Do Iyyabaaha, axtaba reni bilali gue Zacarías, biꞌini uca xiꞌini Berequías, biꞌini bettile lagüi gue lheꞌeliꞌa gue yotuha atta do becoaha. 36Neti nna gualíbatia rpea le, iyába ca benni seꞌe nnanna quixacana gue ca elhutti-ni.

37’¡Atturu gueni xa benni seꞌe Jerusalén! Lebiꞌi nna ruttile ca biꞌini anca profeta, rusíale iyya ca benni ridhelha Tata Do Iyyabaaha atta seꞌele lhe. ¡Balhala libe benia oseꞌale ttu reba attiba run ttu bera reaxina ca xiꞌinni reguꞌu lheꞌe xxilani qui uyúncana, ttiaca bittu uca lele! 38Gualgüia nnanna yies guele-ni nna atturbana eyaꞌana, tsa lärga nuruha benni tseꞌe lheꞌeni. 39Neti nna rpea le, lärga nuruha neti uyúle, axta liba isía sá innále: “¡Carbáru benni daa cuenta gue Tata Do Iyyabaaha!”

Currently Selected:

San Mateo 23: zaq

Highlight

Copy