San Lucas 9

Jesús ridhelhe ca benni tsiꞌinu rudheti ca tisa ruleꞌe

(Mt. 10:5-15; Mr. 6:7-13)

1Jesús uxie ca biꞌini tsiꞌinu (12) rudheti ca tisa ruleꞌe qui betee len ca biꞌiniha elha ra xxen lee lhe derechu lhe qui ebeacabi iyáloba ca be xxegüi yuꞌu lheꞌe cuerpu gue ca benni, qui eyoncabi ca nu rani lhe. 2Nianna udhelhe ca biꞌiniha qui quixxiꞌacabi gue gaxasná rinnabia Tata Do Iyyabaaha, eyoncabi ca benni rani lhe. 3Lee nna re ca biꞌiniha:

—Tsa bittubi ujale gue neda guele, ni garroti lhe ni chuba lhe ni ttaxtila lhe niguaba belhi lhe bittuguaba uja attu cue xole lhe. 4Gaxaba lheꞌe yoꞌo atta isínle, níaba eyaꞌanle. Edá libale nna eríale nía. 5Gaxa atta bittu ulabican le nna atti eríale lheꞌe yiesiha nna ucuibittele biste yu anca niꞌaleha, cumu unnuha uleꞌe lo läga beꞌo le Tata Do Iyyabaaha nu ben ca nua.

6Lania nna biríattebacabi diacabi lheꞌe iyába ca lheꞌesi seꞌe itúba nía utecabi rixxiꞌacabi ca tisa tsee gue gaxasná rinnabia Tata Do Iyyabaaha, reoncabi ca benni rani lhe.

Herodes ubinana gue Jesús

(Mt. 14:1-12; Mr. 6:14-29)

7Herodes nu anca tetrarca binana gue iyába nu run Jesús. Lana nna niba lä yuna gue bixa ulaba leni, cumu de rá ttulhe ca benni dequi Juan biꞌini begadi ca benni indahaba biꞌiniha beaquinbi beríabi atta yuꞌu ca nu yatti-na.

8Adí benni nna rácana:

—Profeta Elíasba biꞌin-na beacaxxe.

Adícana nna rácana:

—Ttu ca profeta gue Tata Do Iyyabaaha udo ca tu nureali, biꞌin-na beacani.

9Nianna rá Herodes:

—Inqui cuinaba neti benia mandadu uchecucana iqui Juan, nianna, ¿núlunna rientia rinnexxattacan gueni ganna?

Denuala nna run Herodes duelha ilenna Jesús.

Jesús begoe gayu mil ca benni

(Mt. 14:13-21; Mr. 6:30-44; Jn. 6:1-14)

10Atti chi besini ca biꞌini rudheti ca tisa releꞌe Jesús, utixxiꞌattebaquinbi Benniha iyába bixa bencabi. Lee nna uchettebe ca biꞌiniha lo ttu yu te gaxxaba roꞌo yiesi Betsaida atta aca tseꞌe suntteba laque. 11Atti bina ca benni gaxa ladu dia Jesús, diattebacana denocana Benniha. Lee nna uxttebe cana atta doe, nianna utixxiꞌanie cana gue gaxasná rinnabia Tata Do Iyyabaaha, beonguabe ca benni rani lhe.

12Atti chi dia ralha sá, ubigatteba ca benni tsiꞌinu (12) rudheti ca tisa ruleꞌe Jesús rácabi Benniha:

—Bechú tisa ca benni seꞌe ni qui eyyacana lheꞌe ca lheꞌesi-na, lheꞌe ca ranchu-na lhe qui satilacana bixa gocana, atta eyaꞌancana lhe, cumu atta seꞌeri ni nna tsa lägabi te.

13Jesús re ca biꞌini rudheti ca tisa ruleꞌe:

—Lebiꞌiba gualute nu gocana.

Lacabi nna rácabi:

—Tsa lägabi nu gori noja riꞌitu. Sunruba gayu ttaxtila leni chupa belha te guetu. ¿Si tsiabatu sayoꞌotu nu go iyáxea ca benni seꞌe-ni aca?

14Cumu attiba tu gayu mil ca unbiyuuha seꞌe nía. Laniala nna rá Jesús ca biꞌini tsiꞌinu (12) rudheti ca tisa ruleꞌe:

—Gualgás cana qui ebíacana, gualuseꞌe medi gayua (50) medi gayua cana lheꞌe ttuttu cue.

15Lacabi nna bedobacabi tisa. Aníaba bencabi ubía iyába benni. 16Jesús bedaxxuttebe gayu ca ttaxtilaha len irupaba ca belhaha, nianna ulhidhatteba loe begüie iyyabaaha betee xquixaru leni Tata Do Iyyabaaha. Lenla nna ulheꞌe ca ttaxtilaha len ca belhaha begüee ca biꞌini rudheti ca tisa ruleꞌe qui ugüecabi ca benni seꞌe nía. 17Iyába ca benni seꞌe nía utocana bedaa belbaquinna. Bodaparlacabi a tsiꞌinu (12) sumi ca ttaxtila salhaꞌa bexxaha.

Pedro unnebi rábi: Jesús anque Cristu

(Mt. 16:13-19; Mr. 8:27-29)

18Ttu sá nna do Jesús rinne lanie Tata Do Iyyabaaha ttu atta nuttu benni seꞌe. Sunruba ca biꞌini rudheti ca tisa ruleꞌe seꞌe lenie nía. Lee nna unnaba tisattebe ca biꞌiniha re cabi:

—¿Nú rá ca benni dequi anca?

19Ca biꞌiniha nna becabicabi rácabi:

—Ttulhe benni rácana lu ancalu Juan biꞌini begadi indaha, adí benni nna rácana lu ancalu profeta Elías, adí benni nna rácana gaxa ttu ca benni uca profeta gue Tata Do Iyyabaaha useꞌe atti níali biꞌin-na beacani.

20Jesús re ca biꞌiniha:

—Lebiꞌi nna ¿núla rále anca?

Laniala nna becabi Pedro rábi:

—Lu ancalu Cristu benni udhelha Tata Do Iyyabaaha odilá ca benni.

21Tiaca Jesús bentebe mandadu ca biꞌini rudheti ca tisa ruleꞌe qui tsa nuttu nu quixxiꞌencabi labe nua Cristu. 22Nianna re:

—Neti Benni unbiyuu daa iyyabaaha, labíaba satexxatta.

Ca nu teru elha rieni gueni gue ca benni gueri anca benni Israel, ca nu lo gue ca bixxudi-na lhe ca nu ruleꞌe nu rá lo ca ley bocaꞌana Moisés lhe cuꞌu niꞌacani neti, utticana neti lhe ttiaca eyonna ubisa nna eyacatia.

23Nianna rá Jesús iyába ca biꞌiniha:

—Gansi nuxale raca lele acale benni udheti ca tisa quia-ni, ttuttu sá raca duelha erú iqui erú lele elha nabani guele, uchíale lo iyába nu satele lhe attiba ttu benni diana nuja crusi gueni atta utácan na lo nua. Lena nna ettenobana neti, masquiba uttican-na. 24Cumu iyába ca benni rdaca odilá elha nabani guecani yies lo yu-ni, unnittiba elha nabani guecani, iyába ca benni erú iqui erú lecani gatticana lo niꞌa quia nna aca banba ca nua ttu dia lii lo Tata Do Iyyabaaha. 25Tsa lägabi ixuu len ttu benni ganna eꞌeyuna acana nu banani iyá nu te yies lo yu-ni, elha nabani gueniha nna dia nittibana, lana nna ttu tsaba lhuxana. 26Cumu nu ettuinna quia lhe gue ca tisa quia-ni lhe neti Benni unbiyuu daa iyyabaaha, ettúguatia gueni atti esíaya dedaaya lheꞌe xieni gaꞌana tsee quia lhe lheꞌe xieni gaꞌana tsee gue Tata quia do iyyabaaha lhe lheꞌe xieni gaꞌana tsee gue ca ingeli gue Ben-na lhe. 27Neti nna gualíbatia ria le, ttulhele ca nu seꞌe-ni nna läga gattixxile antisla ilenle innabia Tata Do Iyyabaaha.

Botsía lo Jesús

(Mt. 17:1-8; Mr. 9:2-8)

28Attiba tu xxunu ubisa dequide atti unne Jesús ca tisa-ni nna, uchettebe Pedro lhe Juan lhe Jacobo lhe, die lo ttu lhilhi güenne leni Tata Do Iyyabaaha. 29Laca rinne Jesús len Tata Do Iyyabaaha nna botsíatteba loe. Xoe nna beacana sitsituuchiga, racalaanina de ruꞌu xieni gueni. 30Nía ucaxxe chupa ca unbiyuu rinne lencabi Benniha: ttubi ancabi Moisés, attubi nna ancabi Elías. 31Biꞌa dhacabacabi racalaa yuꞌu xieni. Lacabi nna rinnecabi len Jesús gue elhutti gue Benniha, attiba chi gaꞌana aca lheꞌe yiesi Jerusalén. 32Pedro lenbi ca benni seꞌe lenbi nía nna tsaba bitturu ridacabi lo bisíala, ttiaca bechíabacabi bittu utaꞌadhicabi. Lacabi nna biláquinbi xieni gaꞌana tsee gue Jesús, a chupa ca biꞌini seꞌe len Benniha lhe. 33Atti chi reries ca biꞌiniha Jesús, unnetteba Pedro rábi Benniha:

—Maestro, tsee galá guaxxína seꞌetu nii. Nnanna nna untu tsunna yoꞌo lhaga: ttu guelu nna, attu gue Moisés nna, attu gue Elías nna.

Pedro nna niba lä yubi bixa nua rábi. 34Laca du Pedro rinnebi nna bisíatteba ttu bea uyuꞌuna atta seꞌecabiha. Lacabi nna usilhabaquinbi de uyuꞌucabi lheꞌe beaha. 35Tata Do Iyyabaaha nna unnee lheꞌe beaha re:

—Benni anque xiꞌinia benni racaxxattatia guee. Gue Benni gualdo nagale.

36Atti chi uluxa unne Tata Do Iyyabaaha, atturba Jesús biláquinbi due nía. Lacabi nna uyuꞌutsitsibacabi tisa, itúttuba lania nuttu nu utixxiꞌaquinbi gue nu biláquinbiha.

Jesús beonie ttu uncuiti yuꞌu be xxegüi lheꞌe cuerpu gueni

(Mt. 17:14-21; Mr. 9:14-29)

37Betteyú sá nna atti beadique lo lhilhiha nna ixe tsitsiaba benni güiacana besácana Jesús. 38Ttu unbiyuu nutsa lagüi gue ca benni daa nía nna uresiꞌana rána:

—Maestro, rinnaba lolu beonchi xiꞌinia-ni, cumu tturunna dotia. 39Ttu be xxegüi nna tsaba chi belháninna na, ttutterba risía nna rucuesiꞌan na lhe rucuibin na lhe ridotteba besina roꞌoni lhe. Atti rudhaca güena unna nna pena nisi baba rulhán na. 40Neti nna chi benia ruegu lo ca biꞌini rudheti ca tisa ruleꞌelha qui ebequicabi be xxegüi-na, ttiaca bittu udácabi.

41Jesús becabie re:

—¡Lebiꞌi ca benni bittu ria leni, nu lä du ta leni lhe! ¿Núcachiarga neti dhoa uchíana lole? ¿Núcachiarga neti laniale? Utá len xiꞌinlu-na nii.

42Laca dia uncuitiha ribigana lo Jesús, be xxegüiha nna uruꞌunatteban nua lo yu, atti becuibittebana nua. Ttiaca Jesús bedhaca disattebe be xxegüiha qui beríana lheꞌe cuerpu gue uncuitiha. Beonbe nua nna botettebe na len tata gueni. 43Iyába ca benni seꞌe nía rebanquinna gue milagru xxeni runi Tata Do Iyyabaaha.

Ni rerupa libe rixxiꞌa Jesús gue gattie

(Mt. 17:22-23; Mr. 9:30-32)

Laca seꞌe iyába ca benni rebanxxattaquinna gue nu runi Jesús, lee nna re ca biꞌini rudheti ca tisa ruleꞌe:

44—Tsitsi gualdo nagale ca tisa upea le-ni. Neti Benni unbiyuu daa iyyabaaha labíaba utecana neti las ná ca benni utticana neti.

45Ttiaca lacabi nna läga guadú lecabi bixa dia le ca tisaha, cumu Tata Do Iyyabaaha nna läga chi benie qui sadú lecabi gue iyá nu aca. Rasguabaquinbi innába tisacabi Jesús bixa dia le ca tisa unnee lhe.

¿Nú anca nu ra xxenru leni?

(Mt. 18:1-5; Mr. 9:33-37)

46Ca biꞌini rudheti ca tisa ruleꞌe Jesús uyuꞌucabi bitilha tisa len loescabi lo niꞌa gue nuxcabi aca nu raru xxen leni. 47Jesús yuxeabe nu rulaba lecabi. Lee nna bedaxxuttebe ttu unto bedú luitte. 48Nianna re:

—Nuxaba benni ulabina unto-ni de ria leni neti nna netiba nua rulabi nua, benni rulabina neti nna Benni udhelhe netihaba benniha rulabina. Cumu benni raquinle bittu ancana nu ra xxen leni nutsa len delo iyále nna unnuha la ancana nu ra xxen leni.

Benni bittu riguꞌu niꞌan ri nna len riꞌiba du nua

(Mr. 9:38-40)

49Juan ráttebabi Jesús:

—Maestro, riꞌitu chi bilentu ttu nu requi ruríalana ca be xxegüi atti rudettina lálu, ttiaca unná nna läga riꞌi selunna. Larcala nna chi besunatu qui bitturu unna aná.

50Jesús re Juan:

—Bittu usunale, cumu nu bittu redú disana lori nna len riꞌiba du nua.

Jesús bedhaca dise Jacobo lenbi Juan

51Atti chi daa ribiga isía sá eyya Jesús iyyabaaha, lee nna bebequitsitsittebale qui tsie Jerusalén. 52Nianna, udhelhattebe ca benni uneru loe. Ca biꞌiniha nna bisíncabi lheꞌe ttu lheꞌesi re lo yu gue yiesi lá Samaria qui quilacabi atta isín Jesús gansi chi bisíne nía. 53Ttiaca ca benni seꞌe nía nna läga uca lecani isín Benniha lascaniha, cumu ute daaquinna Jerusalénba die. 54Atti biláni ca biꞌini rudheti ca tisa ruleꞌe Jesús, delába Jacobo lenbi Juan, nu ben ca nua nna ráttebacabi Benniha:

—Benni bananie riꞌitu, ¿si raca lelu innábatu iyinna gui daa iyyabaaha [attiba beni Elías,] qui ulhuxana ca unná?

55Jesús bodequitteba loe bedhaca dise cabi re cabi:

[—Lebiꞌi nna läga yule nú espíritu gue ancale. 56Cumu neti Benni unbiyuu daa iyyabaaha nna läga delha qui unia tsia nitti ca benni, daba neti qui odiláya cana.]

Nianna diattebaque daca lheꞌe attu yiesi.

Ca benni raca lecabi sanalhacabi Jesús

(Mt. 8:19-22)

57Laca diacabi yuꞌucabi neda nna ttu unbiyuu rána Jesús:

—Tata, neti raca lasia etenalha lu gaxaba ladu tsialu.

58Jesús becabie re na:

—Ca beda-na guasiaba liscani gaxa retaꞌacana, ca binni-na lhe gua siaba xcuadi guecani, ttiaca neti Benni unbiyuu daa iyyabaaha, läga anca gaxa quixxa iquia.

59Attu nua nna re na:

—Utá betenalha neti.

Ttiaca unnuha nna rána:

—Benni bananie neti, begüeelhaxa neti eyyaꞌaya sacatsia tata quiaha.

60Jesús becabie re nua:

—Begüelha ca nu anca attiba nu yatti lo Tata Do Iyyabaaha ucatsicana ca nu yatti guequinna. Lu nna güia, utixxiꞌa gue gaxasná rinnabia Tata Do Iyyabaaha.

61Attu na nna rána:

—Benni bananie neti, neti raca lasia etenalha lu, ttiaca primerxa begüeelha neti sachú tisa ca benni seꞌe lheꞌe yoꞌo quia.

62Jesús bequie re na:

—Benni rudaxxu xan belasuha nna nianna rodequir loni rugüiana daca atta dana, lägabi ixuu nua iselana ca benni rinnabia Tata Do Iyyabaaha.

Currently Selected:

San Lucas 9: zaq

Highlight

Copy