San Lucas 11

Jesús ruleꞌe gaxasná dica inne ca benni len Tata Do Iyyabaaha

(Mt. 6:9-15; 7:7-11)

1Ttu libe atti do Jesús güenne len Tata Do Iyyabaaha ttu re. Atti uluxa unnee len Tata Do Iyyabaaha nna ttu ca biꞌini rudheti ca tisa ruleꞌe, rábi Benniha:

—Benni bananie neti, beleꞌen riꞌitu gaxasná dica innetu len Tata Do Iyyabaaha attiba Juan beleꞌenbi ca benni bedheti nu beleꞌebi.

2Jesús re biꞌiniha:

—Aní innále atti innele len Tata Do Iyyabaaha:

Tata guetu do iyyabaa, ribequi xentu cuinalu

cumu anca cuinalu Dios.

Utá innabialu riꞌitu.

[Beni qui nu runtu yies lo yu-ni acana nu raca lelu aca,

attiba raca iyyabaaha.]

3Bete nu reasintu gotu ttu ttu sá.

4Uxí elha xen lasi gue nu lä anca tsee runtu lolu,

cumu anáguaba riꞌitu ridítu elha xen lasi gue iyába ca nu run nu lä anca tsee len riꞌitu.

Bittu ugüelhalu ixú yietu untu nu bittu anca tsee.

Bodilá riꞌitu lo ná nu xxegüiha.

5Anáguaba rá Jesús ca biꞌiniha:

—Gansi nuxa ttule do ttu benni do tsee lenle, lu nna tsialu lheꞌe yoꞌo gue nua tu riloela, nianna gál nua: “Benni do tsee lania, ulea gannachi tsunna ttaxtila guelha quia, 6cumu bisía ttu benni yuꞌu neda do tsee lania lheꞌe yoꞌo quia, neti nna bittu te quia bixa utea gona.” 7Unnuha nna ecabina lhiꞌu lheꞌe yoꞌoha innána: “Bittu utsitsinlu neti. Nuca yayatia puerta-na, chiguaba te ca unto quia-ni len neti lhe. Larcala nna bittu aca chadha qui unna nu rinnabalha.” 8Neti ria nna läga chadha nua utena nu rinnabalu de anca nua nu do tsee lenlu. De bittuba saxxaquinlu dhu ditilu, rinnabalu nu reasinlu, larca chadha nua utena iyába nu rinnabalu. 9Larcala nna neti ria le: “Gualnnaba len Tata Do Iyyabaaha, Benniha nna gutebe nu reasinle. Gualeguila, lee nna gunbe eselinle nu reguilaleha. Gualnne roꞌo yoꞌo, lee nna gunbe idhalcana guele. 10Cumu iyába ca benni rinnaba, gua ridíba ca nua nu rinnabacana, ca nu reguilaha nna gua reselbaquin nua nu reguilacana, ca nu rinne roꞌo puertaha nna gua ridhalbacana gue ca nua.”

11’¿Nu benni nua ancana tata, gansi innába xiꞌinniha ttu ttaxtila, lana nna ttu ca iyya duꞌuya lo neda-na la ugüena nua? ¿O innába nua ttu belha raca lheꞌe inda, lana nna belha raꞌaya lheꞌeni lo yu la ugüena nua? 12¿O ganna innába nua ttu sitta nna lana nna ttu lacranala ugüena nua? 13Inqui lebiꞌi ancalale nu lä du tsee leni nna gua rutebale nu tsee len ca xiꞌinle-na, adíla Tata gueri do iyyabaaha, gutebe Espíritu guee len ca benni innábacana Benniha len Ben-na.

Ca benni rácana dequi Beelzebúba raca lenna Jesús qui rebequie ca be xxegüi

(Mt. 12:22-30; Mr. 3:20-27)

14Jesús rebequie ttu be xxegüi yuꞌu lheꞌe cuerpu gue ttu unbiyuu chi bodhaꞌanna nua biría. Atti chi bería be xxegüiha nna udulotteba unbiyuu uca biríaha unnena. Ca benni seꞌe nía nna tsitsiba rebanquinna. 15Ttiaca ttulhecana rinnecana gue Jesús rácana:

—Beelzebú, nu rinnabia ca be xxegüi-naba rutena derechu gue unná qui ebeana ca be xxegüi yuꞌu lheꞌe cuerpu gue ca benni.

16Adícana nna de rdacacana cuꞌu biacane, unnabattebacana unie ttu milagru nu uleꞌe lo gansi gualí Tata Do Iyyabaaha udhelhe Benniha. 17Ttiaca Jesús yuxeabe nu rulaba le ca nua, nianna ráttebe cana:

—Iyába yiesi rinnabia xeni, gansi seꞌe laꞌa ca benni seꞌe lheꞌeniha de ritilha len loescani, yiesiha nna gualuxattena. Anáguaba ca benni seꞌe lheꞌe ttu yoꞌo, gansi seꞌe laꞌacana de ritilha len loescani, lhuxabacana. 18Anáguaba nu xxegüiha, gansi seꞌe laꞌa len loesi xxegüi-ni, ¿gasná aca usiguina innabiana? Rpeale aná cumu de rále dequi neti nna Beelzebú-naba runna neti yuda qui rebequia ca be xxegüi-na. 19Gansi neti rebeaya ca be xxegüi-na de rute Beelzebú-na derechu quia, ca benni rudheti ca tisa ruleꞌele-na nna ¿si nu xxegüiha guaba rutena derechu gue ca unná qui rebequicana ca be xxegüi-na? Larcala nna la ca benni ruleꞌenlenba inná dequi lebiꞌi nna läga gualínle gue nu rále-na. 20Cumu gansi Tata Do Iyyabaahaba raca lanie neti qui rebeaya ca be xxegüi-na lheꞌe ca benni, lania nna unní ruleꞌe lo chi udulo Tata Do Iyyabaaha rinnabie lebiꞌi.

21’Gansi ttu benni run tsitsi denna iyába nu reasinna ttilhana duna rapana yoꞌo gueniha, iyába nu yuꞌu lheꞌe nua nna lägabi dhacana. 22Ttiaca gansi isín attu unbiyuu run tsitsiru atti lana ttilha lenna na, nianna dhaba nua loni, atti cuatteba nua lo náni iyába ca nu xen leni utía lennaha, lania nna quidhitteba nua iyába nu uca gue unbiyuu run tsitsiha.

23’Nu bittu du len neti nna läga raca uyú nua neti. Nu bittu runna neti yuda gaxtu adí benni qui udaxxucana neda gue Tata Do Iyyabaaha nna ruríalala nua ca benni.

Be xxegüi nu requi retaꞌa attu libe atta beríana

(Mt. 12:43-45)

24’Gansi chi rería ttu be xxegüi lheꞌe cuerpu gue ttu benni, riattebana lo yu bisi atta nuttu benni seꞌe reguilana gaxa etaꞌana qui edí leni. Atti bittuba rattiꞌana nna ulabatteba leni gue benni beríana lheꞌeniha, nianna innána: “Eyequibalha neti lisia atta beríaya”. 25Atti eyequina esínna lania nna sattiꞌana benni beríana lheꞌeniha ancana attiba ttu yoꞌo chi luba lheꞌeni lhe chi yapa te xea lheꞌeni lhe. 26Be xxegüiha nna tsiattebana saxxína a gasi (7) ca be xxegüi runru adí nu lä anca tsee atti lana. Nianna gaꞌatteba iyábacana tseꞌecana lhiꞌu lheꞌe benni beríana lheꞌeniha. Lania nna adíla satsa udú le nua attichula atti du leni primeroha.

Ca benni gualíga seꞌe tseecana

27Laca rinne Jesús ca tisa-ni nna ttu nuila nutsa ca benni seꞌe nía uresiꞌana rána:

—¡Carbáru benni nuila bijabi lu lhe begasbi lu lhe!

28Jesús becabie re:

—Carbáru ca benni rudo nagacani ca tisa gue Tata Do Iyyabaaha, rudocana tisa gue nu rá Ben-na lhe.

Ca benni rinnabacana un Jesús ttu milagru

(Mt. 12:38-42; Mr. 8:12)

29Atti chi bitupa adí benni sabiꞌaba Jesús, lee nna udulottebe re:

—Ca benni seꞌe nnanna ancacana nu runi nu lä anca tsee. Lacana rinnabacana unia ttu milagru nu uleꞌe lo gansi gualí Tata Do Iyyabaaha udhelhe neti, ttiaca bittu uleꞌetia cana attu milagru subi gan läba loesi milagru uca len profeta Jonás. 30Cumu attiba Jonás, nu guatebiha beni beleꞌe lo len ca benni seꞌe Nínive gualíba Tata Do Iyyabaaha udhelhe biꞌiniha, aníaguaba neti Benni unbiyuu daa iyyabaaha, nu sateha ancana nu uleꞌe lo len lebiꞌi ca benni seꞌe nnanna gualíba Tata Do Iyyabaaha udhelhe neti. 31Gansi chi bisía sá uni Tata Do Iyyabaaha elha uxtisi gue ca benni, nuila unnabia daca sur, esíaguana qui udelhiyyana lebiꞌi ca benni seꞌe nnanna. Cumu nuilaha nna lheꞌe yiesi nu reru idittuli udána güiana atta do Salomón qui bedo nagani gue elha rieni gue nua. Nnanna nna gualgüiarga, niba du len lebiꞌi ttu Benni ra xxenru leni atti Salomón. 32Ca benni useꞌe lheꞌe yiesi Nínive esíaguacana gansi chi ben Tata Do Iyyabaaha elha uxtisi gue ca benni seꞌe nnanna qui udelhiyyacana lebiꞌi. Cumu boduxiyyaban ca unnuha bodaxxucana neda gue Tata Do Iyyabaaha atti bienquinna ca tisa utixxiꞌa Jonás. Nnanna nna gualgüiarga, niba len lebiꞌi du ttu Benni raru xxen leni atti Jonás.

Ca iyya lo ttu benni ancacana nu rudani itúba cuerpu gue ttu benni

(Mt. 5:15; 6:22-23)

33’Ni ttu benni bittu rugalhana ttu gui, lenla nna udaxxuna ttu bixa uttona iqui nua, niguaba lä ruttodhina ttu lmoti iqui nua lhe. Sinuqui udolana nua iqui ttu bixa nu yadha qui cuꞌu nua xieni gue ca benni gaꞌa lhiꞌu lheꞌe yoꞌoha. 34Ca iyya lolha ancacana nu rudani gue itúba cuerpu guelu. Gansi ca iyya lolha ancacana tsee lania nna itúba cuerpu guelha duna lheꞌe xieni, ttiaca gansi ca iyya lolha ancacana nu bittu anca tsee, lania nna itúba cuerpu guelha duna lheꞌe chulha. 35Tsitsi begüia nu anca guelu, qui cadirbaga chulhala anca nu rálu anca xieni guelha. 36Cumu gansi itúba lheꞌe cuerpu guelha ralha gui, ni ttu latti bittu anca chulha, lania nna itúba cuerpu guelha duna lheꞌe xieni, attiba gansi chi riguꞌu ttu gui itúba xieni gueni atta dulu.

Jesús rudelha iyye ca fariseo, ca nu ruleꞌe nu rá ca ley bocaꞌana Tata Do Iyyabaaha lhe

(Mt. 23:1-36; Mr. 12:38-40; Lc. 20:45-47)

37Atti chi uluxa unne Jesús, ttu benni fariseo unnabana len Benniha tsie go etta lheꞌe yoꞌo gueniha. Utaꞌaba Jesús lheꞌe yoꞌoha nna urettebe roꞌo mexaha. 38Nu fariseo nna bebanbinna bilenna bittu bedo Benniha tisa lola eyari nee lenla nna goe etta, unie attiba labi ca nu fariseo runcana. 39Ttiaca Jesús re unnuha:

—Lebiꞌi, ca fariseo, ancabale attiba ca taza-na lhe ca platu-na lhe lebiꞌi nna tsapaba riile cuꞌecani ttiaca lhiꞌu lheꞌecani nna attulade satsa anca. Aná bunna ancale, sunruba lolia guele nari ttiaca lhiꞌu lheꞌe lastoole nna attulade re nu satsa, nu ridá lele lhanale lhe nu bittu anca tsee runle-na lhe. 40¡Nu diti bittu rienini! ¿Si bittuba yule dequi benni benie nu anca lolia gueri, laguabe benie lhiꞌu lheꞌeri? 41Itú iqui itú lele gualute nu te guele len ca benni bittu te gueni, anía liba nna aca nari itúbale.

42’¡Carusiꞌirule, xa fariseo! Lebiꞌi rutsiattale tsii (10) gue lo ttu ttu gayua (100) nu anca gue guadhi bela-na lhe ruda-na lhe adírba ca coana radale-na lhe qui rutele len Tata Do Iyyabaaha, ttiaca bittu retábinle unle nu anca tsee len ca benni, niguaba lä retábinle aquinle gue Tata Do Iyyabaaha lhe. Lo unní dica unle, ttiaca bittu udhanle utele tsii gue lo ttu gayua gue nu te guele.

43’¡Carusiꞌirule, xa fariseo! Lebiꞌi nna tsitsiba ridá lele cuiale lo ca xxila seꞌe gaxxa atta ribía ca benni anca nu lo lheꞌe ca yoꞌo atta rudhetiri ca tisa gue Tata Do Iyyabaaha, ridá lele gá benni le padiuxi len respeto lo ca neda seꞌe atta raca iꞌiya lhe.

44’¡Carusiꞌirule xa fariseo, anáguaba ca nu ruleꞌe nu rá lo ca ley bocaꞌana Moisés lhe ca nu ni lo ni tisaba runle dequi ancale benni runi nu anca tsee! Cumu lebiꞌi ancale attiba ttu baa nu bittu ruleꞌe gansi nía tena. Denuala nna ca benni rite lo nua nna läga yucana bixa yuꞌu lhiꞌu gue atta ruleacanaha.

45Becabitteba ttu ca nu ruleꞌe nu rá lo ley bocaꞌana Moisés rána Jesús:

—Maestro, atti rinnelu rálu aná, riꞌitu lhe riendintu.

46Jesús becabie re:

—¡Anáguaba lebiꞌi, ca nu ruleꞌe nu rá lo ley-na, carusiꞌirule! Cumu runle duelha gue ca benni uncana iyáxea nu rá lo ley-na, lebiꞌi nna niba saroꞌo nu ruleꞌe na bittu raca lele unle.

47’¡Carusiꞌirule! Lebiꞌi nna rusíale ca baa tsee gue ca biꞌini uca profeta, ca biꞌin-ni nua ulhidha ná ca benniola gueleha betticana. 48Leni nu runle-na ruleꞌe lole lebiꞌi nna reꞌo lele gue nu ben ca benniola gueleha. Ca unnuha betticana ca biꞌiniha, lebiꞌi nna rusíale ca baa guecabi.

49’Denua nna unne Tata Do Iyyabaaha leni elha rieni re: “Neti idhelha atta seꞌele-na ca benni anca profeta, ca benni anca apóstol lhe lebiꞌi nna uría lále ttulhe ca biꞌiniha, a ttulhe ca biꞌiniha nna uttile.” 50Larcala nna ca benni seꞌe nnannaba uni Tata Do Iyyabaaha quixacana gue reni bilali gue iyába ca benni uca profeta, desdeba axta atti ure yies lo yu-ni, 51desdeba reni gue Abel axtaba reni gue Zacarías, biꞌini betticana lagüi gue lheꞌeliꞌa gue yotuha atta do becoaha. Larcala nna rpea le, Tata Do Iyyabaaha ennabe cuenta gue elhutti gue ca biꞌiniha len ca benni seꞌe nnanna.

52’¡Carusiꞌirule! Lebiꞌi ca nu ruleꞌe nu rá lo ca ley bocaꞌana Moisés, cumu chi rusunale unbia ca benni Tata Do Iyyabaaha. Lebiꞌi nna lä riaguaba lele Ben-na, lä rugüelhaguale tsia le ca benni raca lecani tsia lecani Ben-na lhe.

53Atti bería Jesús lheꞌe yoꞌo gue benni fariseo, ca nu ruleꞌe nu rá lo ley bocaꞌana Moisés lhe ca fariseo lhe bisaꞌaxxattaquinna lo niꞌa gue nu unne Jesús. Denua nna desdeba lania udulottebacana betsitsiquinne lhe rinnaba tisaxxattacane lhe. 54Anía bencana qui ixii roꞌo Benniha ibixxie bixa innee qui te roꞌocani udelha iyyacane.

Currently Selected:

San Lucas 11: zaq

Highlight

Copy