San Lucas 12

Jesús ruleꞌenie ca benni qui bittu uncana nu lä anca tsee run ca fariseo

(Mt. 10:26-27)

1La laniaguaba nua nna balhala mili benni bitupa atta do Jesús. De yarba de ixe ca benni chi raca, nuarca risinxxatta lheꞌe loescani. Jesús unnee belise primerba ca biꞌini rudheti ca tisa ruleꞌe re cabi:

—Gualdo cuidadu len levadura gue ca fariseo-na. Diatia ria, lacana ancacana nu ni lo ni tisaba runcana dequi ancacana nu runi nu anca tsee. 2Cumu tsa lägabi te ttu bixa te gatsi, lä tsanni lobana, niguaba lä caa ttu nu raca sigá, lä unaba benni-na. 3Larcala nna iyába nu unne gatsile, iríana lolia. Nu unne sigá roꞌo naga loesle lheꞌe yoꞌo yaya nna ribesiꞌanicana nua iqui yoꞌo.

Nu dica gasin ca benni

(Mt. 10:28-31)

4’Lebiꞌi, ca benni seꞌe tsee len neti, neti nna upea le: “Bittu gasinle lo ca nu uttican cuerpu guele-na, cumu dequila nna tsa lärga birua dhacana udhacaquinna le.” 5Neti quixxiꞌatia le nú Benni dica gasinle: Gualgásin Benni dequide cuee elha naban guele-na, lee nna te derechu guee udelhe le atta lexúaha. Gualíba, Benniha gualgásini.

6’¿Si läba guayúbari len chuparba belhi nu bittu tte lidhacani te ritoꞌo gayu ca binnito? Läquiga de nua nna tsa läga rixulhani Tata Do Iyyabaaha gue ni ttu ca unná. 7Anáguaba lebiꞌi, axta ca itsiquile-na coa ttuttucana babani Benniha. Larcala nna bittu gasinle, cumu lebiꞌi nna dacarlale atti ixe tsitsia ca binni-na.

Nu sate ca benni dhi roꞌocani gualí ancabiaquinna Jesús

(Mt. 10:32-33; 12:32; 10:19-20)

8’Neti ria le, nuxaba benni dhi roꞌoni gualíba ria leni neti aní lo benni, neti Benni unbiyuu daa iyyabaaha nna dhíguaba roꞌa gualíba ria leni neti aní lo ca ingeli gue Tata Do Iyyabaaha. 9Ttiaca benni bittu dhi roꞌoni aní lo benni gualíba ria leni neti nna anáguaba neti bittuguaba dhi roꞌa gualí ria leni neti lo ca ingeli gue Tata Do Iyyabaaha.

10’Tata Do Iyyabaaha guadíbe elha xen lasi gue iyába ca benni inne güecana quia neti Benni unbiyuu daa iyyabaaha, ttiaca bittu dhie elha xen lasi gue nu inne güena gue Espíritu guee.

11’Atti ichecan le lo ca nu lo seꞌe lheꞌe ca yoꞌo atta ritupari rudhetiri ca tisa gue Tata Do Iyyabaaha, o lo ca xueda-na lhe lo ca uxtisi-na lhe bittu ichacha iquile gue bixa innále qui exúle o gue bixa ecabile lhe. 12Cumu atti isía inneleha nna Espíritu gue Tata Do Iyyabaahaba quixxiꞌenie le bixa innále.

Ejemplu gue benni uttaxxatta gueni

13Ttu ca nu sela len ca benni seꞌe nía nna unnena rána Jesús:

—Maestro, gus betsia-na ilaꞌana interés-na qui unnana nu ralha dhia.

14Jesús becabie re nua:

—Unbiyuu du-ni, läganu bodún neti aca xueda o nu ilhaꞌa nu te guele lhe.

15Nianna re ca benni seꞌe nía:

—Gualyú guele, bittu dhaxxatta lele nu te yies lo yu-ni, cumu läganu de gattaxxatta guele uni itíaruinle.

16Laniala nna utixxiꞌenie cana ttu ejemplu, nianna re cana:

—Udo ttu unbiyuu uttaxxatta gueni. Ca lo yu gueniha nna bixuuxxatta lena bani locani. 17Unbiyuu texxatta gueniha nna udona belaba leni rána: “¿Bi unia nnanna? Bitturu anca gaxa cua tseea ca lena bani quia-ni.” 18Nianna rána: “Chi yua bixa unia. Ottapaba ca atta tua tseetia ca lena bani quia-ni, nianna eyonia cana xxenru, qui cua tseea lheꞌecani iyába ca lena bani quia-ni lhe iyába nu te quia lhe. 19Lania nna upetteba la netiba: Xxeni elha tsee chi tua tsee quia gue ixe ida. Nnanna nna edí lasia lhe iꞌiya lhe goa lhe edaca lasia lhe.” 20Ttiaca Tata Do Iyyabaaha re na: “Nu diti lä rienini, nantte lo rela-niba gattilu, nianna nu tua tseenlu-na nna ¿núla gueonna?” 21Aná rate ca benni runi racacana nu texxatta gueni yies lo yu-ni, ttiaca len Tata Do Iyyabaaha nna benni diba ancacana.

Tata Do Iyyabaaha ruyúe ca xiꞌinie

(Mt. 6:25-34)

22Nianna rá Jesús ca benni rudheti ca tisa ruleꞌe:

—Larcala nna rpea le: Bittu ichacha iquile gue nu gole qui aca banle, niguaba gue nu ucule lhe. 23Cumu dacarla elha naban guele atti nu role, aníaguaba cuerpu guele dacarla na attichula nu rucule. 24Gualgüia gue ca bequi-na, ca unna nna läga riguꞌucana xua, bittuguaba rolapacana lhe bittuguaba rigúa tsee guecani lhe. Läquiga de nua nna Tata Do Iyyabaaha gua rutebe nu ro ca unná. ¡Adílaba lebiꞌi dacarlale atti ca binni-na! 25Läganu benni te de ichachaba iquini nna unna itienna ladiba attu ura iqui de nu chi anca aca banna yies lo yu-ni. 26Cumu gansi bittuba dhale unle ni ttu nu anca chicaꞌaru nna ¿biacala nna richacharu iquile gue bixarua?

27’Gualgüia gaxasná rixen ca iyya-na. Ca unna nna läga runcana sina, lä runguacana lari lhe. Ttiaca neti ria le, niba Salomón, masquiba chi uttaxxatta gueni, tsa bittu udána ucu xo ruleꞌe tsee gueni qui uleꞌena atti ruleꞌe ca iyya-na. 28Gansi análi tsee run Tata Do Iyyabaaha ruleꞌe ca iyya daa ca lo yu-na ca nu nasá ralicana, uxxedilaba nna chi tsiacana lo gui, ¡läba ganna adírlaba tsee uni Ben-na len lebiꞌi, ca benni bittu chi ria tsee leni! 29Larcala nna bittu ichacha iquile gue bixa gole, niguaba gue bixa iꞌiyale lhe. Bittu ulaba lele gue unní. 30Cumu gue iyába unní richacha iqui ca benni bittu ancabiani Tata Do Iyyabaaha, ttiaca lebiꞌi nna gua doba Tata guele benni do iyyabaaha, lee nna guayuxeabe bixa reasinle. 31Lebiꞌi nna primero gualudo lele gualuni nu run ca benni rinnabia Tata Do Iyyabaaha. Benniha nna gutebe iyába nu reasinle.

Jesús rixxiꞌe gaxasná unri qui gatta elha tsee gueri iyyabaaha

(Mt. 6:19-21)

32’Bittu gasinle, lebiꞌi ca benni anca attiba carneꞌe quia. Masquiba läga ixele seꞌe, ttiaca Tata Do Iyyabaaha chi bedaa lee unie acale benni innabia len lee. 33Gualtoꞌo bixa te guele. Nu unnacana gue unnuha nna gualute na len ca benni bittu te gueni. Anía nna rigúa tseele nu te guele iyyabaaha, atta bittu lhuxana. Nía nua gatta ttu dia liiba elha tsee guele atta bittu aca gaꞌa ubana lhanana nua, bittuguaba aca gaꞌa tsu unna tsuꞌuba nua lhe. 34Cumu atta tua tsee elha tsee gueleha nna gue níaguaba rulaba lele.

Eseꞌe tseele cumu güesia Benni unbiyuu daa iyyabaaha

35’Gualeseꞌe tsee, tsitsi gualedhí lheꞌele, gualugalha ca gui denle-na lhe. 36Gualuni attiba ca benni ren sina seꞌecana ribedacana benni baninbi cana dedaabi güiabi atta betsá nácani, qui cuantusi inne biꞌiniha nna idhalttebacana puertaha qui etaꞌa biꞌiniha gansi chi besíabi. 37Carbáru ca nu ren sina ettettiꞌa Benni bananie cana seꞌecana ubeda gansi chi besíabi. Neti nna gualíbatia rpea le, biꞌiniha nna edutsettebabi cuinaba labi osiabi cana roꞌo mexaha, atti caꞌattebabi elha go gocana. 38Carbáru ca nua, gansi ettettiꞌabi cana seꞌecana ubeda, masquiba chi bisía tu riloela o si tu daa tsani lhe. 39Ttiaca Gualúnarga nu upea le-ni, ttirca ttu benni beaca gueni ttu yoꞌo chi yuna bi ura isína ubanaha, lana nna läga gaꞌadhina qui bittu ugüelhana gaꞌa ubanaha lhanana nu te lheꞌe yoꞌo gueniha. 40Anáguaba lebiꞌi, gualtseꞌe ubeda, cumu neti Benni unbiyuu daa iyyabaaha esíaya atti bittu leda lele.”

Benni bittu rudo tisa gue benni bananie na

(Mt. 24:45-51)

41Pedro nna unnaba tisabi rábi:

—Benni bananie ri, ¿si sun riꞌibatu unní rinnelu rulisalu leni ejemplu-ni, aca? ¿Si iyába ca benni seꞌe-ni rulisalu, aca?

42Nianna rá Jesús:

—¿Nú nua ancana benni rudo tisa te elha rieni gueni bodú benni bananie na qui gapana ca benni riben sina lheꞌe yoꞌo guebiha, utena nu go ca nua ura guecani lhe? 43Carbáru nu ren sina sattiꞌa benni bananie na dana runna nu daa loni unna gansi chi besíabi. 44Neti ria, biꞌini baninbi nua nna odúbi na qui acana nu gapa iyába nu te guebi. 45Ttiaca gansi nu ren sinaha aquinna dequi biꞌini baninbi naha isábabi atti esíabi. Lana nna dhulottebana ugüena adí ca unbiyuu ren sinaha, adí ca nuila ren sinaha lhe atti dhottebana iꞌiya lhe gona lhe dhusinna lhe. 46Nianna biꞌini baninbi naha esíabi la sá atti bittu ribedana, la ura atti bittu leda leni esín biꞌiniha lhe. Biꞌiniha nna ugüebi na ttu elha disa tsitsi, atti udelhabi na atta ralhana tsiana len ca nu lä bedo tisa.

47’Nu ren sina nu gua yuxeabana bi nua raca le biꞌini baninbi na unna lana nna bittu redú tseena, lä runguana nu raca le biꞌiniha lhe de unnuha nna tsitsiba itín nua. 48Ttiaca nu ren sina bittu yuna bix nua raca le biꞌini baninbi na unna lana nna runna ttu nu ralhana dhína elha disa gueni. Unnuha nna ttu lattiba itínna. Cumu iyába ca nu ridíxxeni nna xxenirguaba ralha ca nua otecana. Anáguaba benni nu ruxxenru le benni-na, xxenirguaba nu innábacana unna.

Lo niꞌa gue Jesús ilaꞌa lheꞌe loes ca benni

(Mt. 10:34-36)

49’Neti nna delha unia dho gui yies lo yu-ni, nu racaru lasia nna ttirca chila udona gui. 50Ttiaca neti nna labíaba satexxatta uyúa elha disa, tsitsiba rudú guaten neti axta liba isía sá atti satea aná. 51Lebiꞌi nna ¿si raquinle dequi delha yies lo yu-ni qui tseꞌe tsee len loes ca benni? Neti nna ria, bittu. De bisíala nna ilaꞌa lheꞌe loes ca benni. 52Cumu desde nnannali dhulo gayu ca benni seꞌe lheꞌe ttu yoꞌo tseꞌe tilha len loescani, tsunnacana ttilha lencana a chupa ca nua, ca nu chupaha nna ttilha lencana ca nu a tsunnaha. 53Tataha nna ttilha lenna xiꞌin biyuuniha, xiꞌin biyuuniha nna ttilha lenna na. Nanaha nna ttilha lenna xiꞌiniunnániha, xiꞌiniunnániha nna ttilha lenna na. Nan gue unbiyuuha nna ttilha lenna xolisniha, xolisniha nna ttilha lenna na.

Nu raca yies lo yu-ni rixxiꞌana gue nu aca

(Mt. 16:1-4; Mr. 8:11-13)

54Jesús re iyába ca benni:

—Lebiꞌi nna gansi chi rilenle dedaa ttu bea daca atta radi bisa-na, ráttebale: “Iyyaba aca”, nianna aníaba raca. 55Atti riría be daca sur, ráttebale: “Bisaba aca”, nianna aníaba raca. 56¡Lebiꞌi ca nu nilo ni tisa runle dequi ancale nu runi nu anca tsee! Gua ritedaabinle gue nu raca lo bea-na lhe nu raca yies lo yu-ni lhe. ¿Biacala nna bittu ritedeenle gue nu rilenle raca tiempu seꞌele-ni?

Gualuni qui eyaca tsee lenle nu ritilha lenleha

(Mt. 5:25-26)

57’¿Biaca lä ritsatsa niꞌa la lebiꞌiba qui ttedeenle gaxa te nu anca tsee? 58Gansi nuxa sagaꞌan lu lheꞌe yoꞌo lagüi lo ca uxtisi, laca yuꞌu lenlu nua neda nna beni gaxasná eyaca tsee lenlu nua, qui bittu icheen lu sadún lu lo xueda, cumu xuedaha nna utten lu las ná güensina, güensinaha nna udelhan lu lisiyya. 59Neti ria nna läga eríalu lheꞌe lisiyyaha axta liba quixalu iyárecha belhi nu innába ca nua.

Currently Selected:

San Lucas 12: zaq

Highlight

Copy