Luˊka 3
3
Yoˊhan cawoˊ tuilˊ hk'aˊ cumˊ rangraen eun hk'aˊ
1Yam cawoˊ keuting Kaeˊsa Tiberiˊasˊ uˊpeung eun kuingˊ naˊ gawmˊeucˊ ka a pun kulˊhpawnˊ neum naˊ, Pontiasˊ Piˊlat eun meuh konˊ eun cawoˊ nang kuingˊ Yuˊda naˊ, Herotˊ eun meuh konˊ eun cawoˊ nang kuingˊ Galilaeˊ na, Hpiˊlipˊ awngˊ eun Herotˊ naˊ eun meuh konˊ eun cawoˊ nang kuingˊ Iˊtuˊraetˊ maeeˊ kuingˊ Trahkawˊnitisˊ naˊ, Lisaniasˊ eun meuh konˊ eun cawoˊ nang kuingˊ Abiˊle naˊ, 2Anasˊ eun maeeˊ Kayafasˊ ka meuh peue jhawpˊ rit keuting. Yam awnˊ na, Peucawoˊ Eun tuilˊ leukahˊ ri naˊ ri Yoˊhan kuˊ meuh konˊ eun Yahkariˊ naˊ ri vang hk'ohˊhk'oengˊ naˊ. 3Eun heulˊ nang kuingˊ utˊ hotˊ keunam ka klongˊ Yawˊdan naˊ ku duihˊ ka. Eun paoˊ ri lahˊ, “Tawsˊ hpumˊ fuin mapˊ ri rap ri ti hk'aˊ cumˊ naˊ reuˊ. Peucawoˊ kaw Eun ploeˊ mapˊ peˊ naˊ.” 4Seunˊ nang htawm eun Iˊsayaˊ kuˊ meuh peue suip leukahˊ Eun Peucawoˊ naˊ temˊ a ri naˊ,
“Peue ti peue paoˊ eun nang vang hk'ohˊhk'oengˊ naˊ.
Eun lahˊ, ‘Mheˊ hk'aˊ pun Peucawoˊ Eun reuˊ.
Plengˊ hk'aˊ Eun naˊ seumeuˊ reuˊ.
5Kah hk'ok naˊ nuk ku duihˊ ka,
gong naˊ maeeˊ leuangˊ naˊ kah a tem ku meulˊ ka,
hk'aˊ vokˊ naˊ lat a seumeuˊ,
tang mheˊ hk'aˊ lhungˊ tem naˊ seudapˊ raphpeng reuˊ.
6Peue gawmˊeucˊ ce kaw pun ri nyu hk'aˊ htut lawtpon Eun Peucawoˊ naˊ.’ ”#3:6 Iˊsayaˊ 40:3-5
7Yoˊhan eun lahˊ a ri peue cum heunˊ kaw ingˊ rap ri ti hk'aˊ cumˊ ri heun naˊ ce, “Konˊhk'i ka seueuengˊ saˊhaoˊ naˊ peˊ, punta kaw peˊ pon hk'aˊ seungeuengˊ kaw ingˊ rot naˊ, aˊnhawˊ ciˊ deunˊ peˊ? 8Kop awnˊ na, kaw a meuh saˊhkiˊ ka tawsˊ peˊ hpumˊ fuin peˊ mapˊ ri hawcˊ naˊ, yeuh kuˊ chakˊ naˊ reuˊ. Pawlaee hanˊ maeeˊ Abraham meuh eun kuiingˊ peˊ nang hpumˊ ri. Uiˊ lahˊ a ri peˊ, Peucawoˊ kaw Eun cang plengˊ seumu aenˊ ce meuh konˊhk'i eun Abraham yeut. 9Maetˊmaenˊ, mueˊ naˊ uinˊ a ri keunam kleumˊ hkuˊ naˊ hawcˊ. Kleumˊ unˊ pliˊ kuˊ chakˊ naˊ ku kleumˊ ka, kah ri gawl ri tec a, dum a hk'aˊnaee ngawl.”
10Peue cum heunˊ naˊ ce lahˊ, “Yeuh keutitˊ koˊ, ye ciˊ naˊ htukˊ ri yeuh saˊnhawˊ?”
11Eun topˊ a, “Peue kueˊ hk'o lalˊ hpuinˊ naˊ ce, gvah kuˊ unˊ kueˊ hk'o naˊ ce isˊ reuˊ. Saecˊ meuh peue kueˊ kuˊ hk'a naˊ ce, yeuh a seunˊ awnˊ na yeut.”
12Saecˊ meuh peue cepˊ hkawnˊ naˊ ce ku ingˊ hk'oˊ ri rap ri ti hk'aˊ cumˊ ri heun yeut. Ce mhaingˊ eun, “Seuraˊ, ye ciˊ naˊ htukˊ ri yeuh saˊnhawˊ?”
13Eun lahˊ a ri ce, “Pawlaee cepˊ hkawnˊ peˊ naˊ pon lheuˊ.” 14Saecˊ meuh peue suikˊ naˊ ce ku mhaingˊ eun, “Ye ri sae, ye ciˊ naˊ htukˊ ri yeuh saˊnhawˊ yeut?”
Eun topˊ a, “Pawlaee rutrimˊ ri ti isˊ peue. Pawlaee lahˊ kuˊ unˊ kueˊ unˊ meuh chiˊlai ri hk'a peue. Cu leumuil ngos reng pun peˊ naˊ hitˊ hpumˊ ri reuˊ.”
15Yam peue heunˊ naˊ keutuiˊ hpumˊ koˊ ce Hkrit Eun naˊ, ce kuit a nang hpumˊ ri, “Yoˊhan eun ciˊ naˊ meuh Hkrit eun meuh unˊ meuh?” 16Yoˊhan eun lahˊ a ri ce, “Tuilˊ uiˊ hk'aˊ cumˊ naˊ ri peˊ ri leuumˊ naˊ. Daecti kuˊ tiˊca keuting hk'aiˊ uiˊ naˊ buih ingˊ Eun hawcˊ. Pal yawo kaw uiˊ unˊ kuingˊ ri kahˊ muˊ jhaepˊ Eun naˊ. Eun kaw tuilˊ hk'aˊ cumˊ naˊ ri peˊ ri Citˊ seungaˊ chakˊ naˊ maeeˊ ri ngawl naˊ.#3:16 Vangdohˊ ka ngawl lahˊ ka naˊ kueˊ a lalˊ ceu. 1. Yesuˊ kaw Eun yeuh peue seungaˊ chakˊ. 2. Ngawl naˊ a lahˊ hk'aˊ ciyang Eun Peucawoˊ naˊ. 17Eun jhawpˊ yaiˊyuip. Eun kaw yuip ri tec vang capˊ nghoˊ ri naˊ hklelˊ seungaˊ. Hawcˊ Eun naˊ hk'onˊro nghoˊ naˊ, Eun naˊ peus ri uinˊ a nang htuimˊ naˊ. Daecti depˊ nghoˊ naˊ Eun kaw dum a hk'aˊnaee ngawl unˊ cang laic naˊ.” 18Lheuˊ awnˊ na, Yoˊhan eun ku sangsawnˊ ce ri kuˊ seubu heunˊ ceu maeeˊ leukahˊ munˊ renˊkawn naˊ.
19Kopti Yoˊhan ram eun ri cawoˊ Herotˊ ti eun beunˊ eun awngˊ ri muis Herodiˊ naˊ maeeˊ kuˊ rai yeuh eun naˊ ce naˊ, 20Herotˊ eun seueˊ Yoˊhan eun nang htawngˊ. Kuˊ rai yeuh eun aenˊ a lheuˊ kuˊ yeuh eun nanggalˊ naˊ.
Yesuˊ rap Eun ri ti hk'aˊ cumˊ
21Hawcˊ peue gawmˊeucˊ naˊ rap ce ri ti hk'aˊ cumˊ naˊ, Yesuˊ Eun ku rap ri ti hk'aˊ cumˊ naˊ yeut. Yam buih hk'oˊ Eun munˊ naˊ, kuingˊ pang maoˊ naˊ a dahˊ. 22Citˊ seungaˊ naˊ a ruprang seunˊ guiˊ naˊ, a lih utˊ maeeˊ Heun. Sengˊ naˊ a lawsˊ lih neum kuingˊ pang maoˊ. A lahˊ, “Meuh Mi Konˊ aiˊ leumeusˊ Uiˊ. Mi hitˊ ri hpumˊ Uiˊ nyawkˊ.”
Ceucat Eun Yesuˊ naˊ ce
23Yam Yesuˊ la Eun ri yeuh kanˊ munˊ naˊ, aˊyu Eun naˊ a pun hk'ao ri leuoeˊkulˊ neum. Peue hteumˊ Yesuˊ Eun meuh konˊ Yoˊsaep.
Yoˊsaep eun meuh konˊ Heli. 24Heli eun meuh konˊ Mathtatˊ.
Mathtatˊ eun meuh konˊ Leviˊ. Leviˊ eun meuh konˊ Melchiˊ.
Melchiˊ eun meuh konˊ Yanaiˊ. Yanaiˊ eun meuh konˊ Yoˊsaep.
25Yoˊsaep eun meuh konˊ Mahtahtiˊasˊ. Mahtahtiˊasˊ eun meuh konˊ Amoˊ.
Amoˊ eun meuh konˊ Nahum. Nahum eun meuh konˊ Eˊsaliˊ.
Eˊsaliˊ eun meuh konˊ Nagaiˊ. 26Nagaiˊ eun meuh konˊ Matˊ.
Matˊ eun meuh konˊ Mahtahtiˊasˊ. Mahtahtiˊasˊ eun meuh konˊ Semiˊ.
Semiˊ eun meuh konˊ Yoˊsec. Yoˊsec eun meuh konˊ Yoˊda.
27Yoˊda eun meuh konˊ Yoˊhanaˊ. Yoˊhanaˊ eun meuh konˊ Resaˊ.
Resaˊ eun meuh konˊ Yeruˊbabel. Yeruˊbabel eun meuh konˊ Shealtielˊ.
Shealtielˊ eun meuh konˊ Neriˊ. 28Neriˊ eun meuh konˊ Melchiˊ.
Melchiˊ eun meuh konˊ Aˊdiˊ. Aˊdiˊ eun meuh konˊ Koˊsam.
Koˊsam eun meuh konˊ Elˊmadam. Elˊmadam eun meuh konˊ Eˊraˊ.
29Eˊraˊ eun meuh konˊ Yawˊsuˊ. Yawˊsuˊ eun meuh konˊ Eˊlesa.
Eˊlesa eun meuh konˊ Yawˊrim. Yawˊrim eun meuh konˊ Mathtatˊ.
Mathtatˊ eun meuh konˊ Leviˊ. 30Leviˊ eun meuh konˊ Siˊmeˊon.
Siˊmeˊon eun meuh konˊ Yuˊdah. Yuˊdah eun meuh konˊ Yoˊsaep.
Yoˊsaep eun meuh konˊ Yoˊnam. Yoˊnam eun meuh konˊ Eˊlakim.
31Eˊlakim eun meuh konˊ Meˊleˊa. Meˊleˊa eun meuh konˊ Mena.
Mena Eun meuh konˊ Matahtaˊ. Matahtaˊ eun meuh konˊ Natan.
Natan eun meuh konˊ Davitˊ. 32Davitˊ eun meuh konˊ Yesaeˊ.
Yesaeˊ eun meuh konˊ Obet. Obet eun meuh konˊ Bawˊyaˊ.
Bawˊyaˊ eun meuh konˊ Samon. Samon eun meuh konˊ Nason.
33Nason eun meuh konˊ Amiˊnadaˊ. Amiˊnadaˊ eun meuh konˊ Ram.
Ram eun meuh konˊ Hesˊron. Hesˊron eun meuh konˊ Hparaeˊ.
Hparaeˊ eun meuh konˊ Yuˊdah. 34Yuˊdah eun meuh konˊ Yakopˊ.
Yakopˊ eun meuh konˊ Iˊcakˊ. Iˊcakˊ eun meuh konˊ Abraham.
Abraham eun meuh konˊ Tera. Tera eun meuh konˊ Naho.
35Naho eun meuh konˊ Seruˊ. Seruˊ eun meuh konˊ Reˊu.
Reˊu eun meuh konˊ Peleˊ. Peleˊ eun meuh konˊ Ebeu.
Ebeu eun meuh konˊ Chelahˊ. 36Chelahˊ eun meuh konˊ Kaiˊnan.
Kaiˊnan eun meuh konˊ Afasatˊ. Afasatˊ eun meuh konˊ Chem.
Chem eun meuh konˊ Noˊah. Noˊah eun meuh konˊ Lameˊ.
37Lameˊ eun meuh konˊ Metuselaˊ. Metuselaˊ eun meuh konˊ Eˊnawkˊ.
Eˊnawkˊ eun meuh konˊ Yaretˊ. Yaretˊ eun meuh konˊ Mahalalel.
Mahalalel eun meuh konˊ Kaiˊnan. 38Kaiˊnan eun meuh konˊ Eˊnosˊ.
Eˊnosˊ eun meuh konˊ Setaˊ, Setaˊ eun meuh konˊ Adam.
Adam eun meuh konˊ Peucawoˊ.
Currently Selected:
Luˊka 3: blrPL
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
