Luˊka 4

Yesuˊ pun Eun ri hkamˊ hk'aˊ copˊlong

1Yesuˊ kueˊ Eun Citˊ seungaˊ chakˊ naˊ htonnuk. Yam ingˊ Eun neum klongˊ Yawˊdan naˊ, Citˊ seungaˊ naˊ a va Eun heulˊ nang vang hk'ohˊhk'oengˊ naˊ. 2Tehˊ naˊ, cawoˊ ka seucaˊ rai naˊ a copˊ Eun ri ka punˊkulˊ seunyi. Seunyi yam awnˊ na, Eun unˊ hk'a keunhawˊ. Yam seunyi awnˊ eucˊ ka naˊ, Eun sumˊ somˊ.

3Yam awnˊ na, cawoˊ ka seucaˊ rai naˊ a lahˊ a ri Heun, “Mi lawn meuh Konˊ aiˊ Eun Peucawoˊ koˊ, tuilˊ leukahˊ Mi ri seumu aenˊ na kah a meuh kuˊ hk'a reuˊ.”

4Daecti Yesuˊ Eun topˊ a, “Nang htawm Seungaˊ naˊ temˊ a ri yeuhkiˊ, ‘Peue unˊ aˊyu imˊ peue ri kuˊ hk'a naˊ palkoe.’ ”#4:4 Sawnˊ leukahˊ munˊ 8:3

5Hawcˊ koˊ, cawoˊ ka seucaˊ rai naˊ a tang va Eun hukˊ nang vang lhungˊ naˊ. A tuilˊ Eun nawk kuingˊ utˊ nang lok naˊ gawmˊeucˊ hk'aˊnaee ti yam naˊ. 6A lahˊ, “Anˊnya naˊ maeeˊ hk'aˊ meuneum aenˊ ce gawmˊeucˊ ka, kaw uiˊ tuilˊ a ri Mi. Aenˊ ce kopti ap a ri meuh isˊ uiˊ hawcˊ naˊ, uiˊ sumˊ tuilˊ aˊnhawˊ isˊ a koˊ, uiˊ tuilˊ a pun. 7Kop awnˊ na, Mi lawn faeeˊ uiˊ koˊ, aenˊ ce gawmˊeucˊ a kaw meuh isˊ Mi.”

8Daecti Yesuˊ Eun topˊ a ri ka, “Nang htawm Seungaˊ naˊ temˊ a ri yeuhkiˊ, ‘Kaw mi kah ri faeeˊ Cawoˊ Peucawoˊ ri naˊ Eun, yeuh mhaiˊ Eun naˊ palkoe.’ ”#4:8 Sawnˊ leukahˊ munˊ 6:13

9Hawcˊ koˊ, cawoˊ ka seucaˊ rai naˊ a tang va Eun hukˊ nang veng Yeruˊsalaem naˊ. A kah Eun cawng pang seubul ka nya hk'oˊ munˊ keuting naˊ. A lahˊ a ri Heun, “Mi lawn meuh Konˊ aiˊ Eun Peucawoˊ koˊ, yawtˊ Mi hk'uicˊ reuˊ. 10Kopti nang htawm Seungaˊ naˊ temˊ a ri yeuhkiˊ,

‘Peucawoˊ kaw Eun tuilˊ leukahˊ ri inˊhpom ri naˊ ce.

Eun kaw kah ce roksaˊ Mi.

11Punta cung Mi naˊ kaw a unˊ cang pen seumu naˊ,

inˊhpom naˊ ce kaw koˊ ri cem Mi.’ ”#4:11 Sukˊseunˊ 91:11, 12

12Yesuˊ Eun topˊ a, “Nang htawm Seungaˊ naˊ temˊ a ri yeuhkiˊ, ‘Pawlaee long Cawoˊ Peucawoˊ mi naˊ Eun.’ ”#4:12 Sawnˊ leukahˊ munˊ 6:16

13Hawcˊ cawoˊ ka seucaˊ rai naˊ copˊlong ka Eun ri ku ceu naˊ, a pucti heulˊ hk'aiˊ Heun. A jing yam kaw htukˊ lai naˊ ti vut ti yam.

Yesuˊ la Eun ri yeuh kanˊ munˊ nang kuingˊ Galilaeˊ

14Yesuˊ Eun keutah ingˊ nang kuingˊ Galilaeˊ. Tiˊca ka Citˊ seungaˊ chakˊ naˊ a htonnuk hk'aˊnaee Heun. Lawng Eun naˊ a seutuin seutan lawsˊ heulˊ nang kuingˊ caonaoˊ naˊ ku duihˊ ka. 15Eun sangsawnˊ nang saˊla vang hk'oˊ munˊ ce naˊ heunˊ duihˊ. Peue sukˊseunˊ Eun gawmˊeucˊ ri.

Peue Nasaraetˊ naˊ unˊ rap ce ri ti Yesuˊ Eun

16Eun keutang rot nang veng Nasaraetˊ vang keuting ri naˊ. A rot seunyi Sinˊ#4:16 Seunyi Sinˊ naˊ meuh a seunyi keuluiˊ ce peue Yuˊda naˊ. Ce kamˊ hk'aˊnaee seunyi aenˊ na. Seunyi Sinˊ ce peue Yuˊda naˊ meuh a les seunyi naˊ. A meuh seunyi tisutˊ ka vung ce peue Yuˊda naˊ. naˊ, Eun lec nang saˊla vang hk'oˊ munˊ seunˊ kuˊ tawn yeuh Eun naˊ. Punta kaw Eun lip htawm Seungaˊ naˊ, Eun kuhˊ cawng. 17Hawcˊ koˊ, ce tuilˊ bawlˊ htawm eun peue suip leukahˊ Eun Peucawoˊ htawm Iˊsayaˊ naˊ ri Heun. Eun glas a, Eun sok ri nyu vang temˊ a ri yeuhkiˊ naˊ,

18“Citˊ seungaˊ Eun Peucawoˊ naˊ kueˊ a hk'aˊpang Uiˊ.

Punta kaw Uiˊ suip ri tuilˊ leukahˊ munˊ renˊkawn naˊ ri peue hk'oˊtukyak naˊ ce naˊ,

Eun leuk ri ti Uiˊ hawcˊ.

Eun saecˊ cusˊ Uiˊ heulˊ naˊ meuh a punta kaw Uiˊ paoˊ peue hk'awngˊ ri naˊ kaw ce ploeˊ ri,

maeeˊ peue ngaiˊ lecˊ naˊ kaw ce nyu hk'aˊ ri baee,

maeeˊ peue pun ri hkamˊ hk'aˊ keunhapˊ nokneh naˊ kaw ce ploeˊ ri,

19maeeˊ kaw Uiˊ paoˊ lawng rot a meuyam Cawoˊ kaw eun htut peue ri naˊ ce.”#4:19 Iˊsayaˊ 61:1, 2

20Hawcˊ koˊ, Eun tang bawlˊ ri tuilˊ htawm awnˊ na ri kuˊ yeuh kanˊ nang saˊla vang hk'oˊ munˊ naˊ eun. Hawcˊ koˊ, Eun mokˊ. Ngaiˊ ce peue utˊ nang saˊla vang hk'oˊ munˊ naˊ a keueˊ ri Heun ku peue ri. 21Eun tang lahˊ a ri ce, “Leukahˊ htawm Seungaˊ pun peˊ ri mhawngˊ naˊ htonnuk a seunyaenˊ hawcˊ.”

22Peue gawmˊeucˊ naˊ ce sukˊseunˊ Eun. Ce amˊ ri leukahˊ hk'oˊ leuceng mun pucti lih hk'aiˊ moeng Eun naˊ. Ce lahˊ a ri puri, “Hkaenˊ unˊ meuh a konˊ me eun Yoˊsaep naˊ Eun aw?”

23Yesuˊ Eun lahˊ a ri ce, “Yawng Uiˊ naˊ peˊ sumˊ lahˊ leukahˊ lat aenˊ a ri Uiˊ yeuh keutitˊ yeut, ‘Cawoˊ baiˊ, baiˊ vang suiˊ mi naˊ meun reuˊ. Seunˊ mhawngˊ ye kuˊ yeuh Mi hk'aˊnaee veng Kapeniˊum naˊ yeuh a vang utˊ Mi naˊ yeut reuˊ.’ ”

24Yesuˊ Eun tang suip ri lahˊ, “Kaw Uiˊ lahˊ a ri peˊ neumneum, vang utˊ Eun peue suip leukahˊ Eun Peucawoˊ naˊ unˊ rap ce ri ti Eun. 25Daecti kaw Uiˊ lahˊ a ri peˊ neumneum ri baee, cu eun Eˊliˊya naˊ nang kuingˊ ce Iˊsarelaˊ naˊ a lheuˊ ri aˊya seunao. Yam maoˊ naˊ sawngˊ a ri a unˊ lheˊ pun loeˊ neum paiˊ naˊ, kuingˊ naˊ gawmˊeucˊ ka a meuh utˊ ngeupˊ keuting. 26Peucawoˊ Eun hkuinˊ kah Eˊliˊya eun heulˊ ri aˊnhawˊ saecˊ ti peue. Daecti Eun kah eun heulˊ ri aˊya seunao utˊ nang kuingˊ Siˊdon veng Sarehpatˊ naˊ ka koe.#4:26 1 Hkunˊhawˊhkamˊ 1:1-16 27Saecˊ meuh cu eun Eˊliˊsaeˊ kuˊ meuh peue suip leukahˊ Eun Peucawoˊ naˊ, nang kuingˊ ce Iˊsarelaˊ naˊ, a ku kueˊ peue peuyhat naw heunˊ peue yeut. Daecti ce hkuinˊ kueˊ nang kaw pun ri cuin saecˊ ti peue. A meuh yawo peue kuingˊ Suˊriˊ muis Naman eun ti peue koe pun eun ri cuin.”#4:27 2 Hkunˊhawˊhkamˊ 5:1-14

28Yam peue utˊ nang saˊla vang hk'oˊ munˊ naˊ pun ce ri mhawngˊ kuˊ lahˊ Eun naˊ, ce seungeuengˊ nyawkˊ gawmˊeucˊ ri. 29Ce yuk ri kuhˊ, ce ra Eun heulˊ hk'aˊnok ka veng naˊ. Ce va ri kaw heulˊ cutˊ Eun hk'uicˊ hk'aiˊ leuangˊ ri gong ka veng naˊ. 30Daecti Eun lec nang seunaˊ ce naˊ. Eun pucti lawt mawnˊ naˊ heulˊ.

Peue seucaˊ hk'awˊjeuk lec

31Hawcˊ koˊ, Eun lih nang veng Kapeniˊum kuingˊ Galilaeˊ naˊ. A rot seunyi Sinˊ naˊ, Eun sangsawnˊ ce. 32Ce amˊ ri kuˊ sangsawnˊ Eun naˊ, kopti leukahˊ sangsawnˊ eun naˊ kueˊ a tiˊca naˊ.

33Nang saˊla vang hk'oˊ munˊ awnˊ, a kueˊ peue ti peue. Seucaˊ hk'awˊjeuk a lec eun. Eun taˊulˊ ri lahˊ, 34“Oˊ, Yesuˊ peue veng Nasaraetˊ, Mi ciˊ kaw ingˊ hkvi ye meuh keunhawˊ? Kaw Mi ingˊ yeuh ye lu aw? Yawng uiˊ meuh Mi peue seungaˊ chakˊ Eun Peucawoˊ yeut.”

35Hawcˊ koˊ, Yesuˊ Eun haeˊ eun. Eun lahˊ, “Ditˊ mi. Puc mi heulˊ hk'aiˊ heun reuˊ.” Naˊ hawcˊ koˊ, seucaˊ awnˊ a yeuh peue awnˊ eun htangˊmeul nanggalˊ ce naˊ. A pucti heulˊ hk'aiˊ heun. A unˊ yeuh eun suiˊ saecˊ peunaeˊ.

36Ce amˊ nyawkˊ gawmˊeucˊ ri. Ce lahˊ a ri puri, “Leukahˊ awnˊ na, a ciˊ meuh leukahˊ keunhawˊ? Eun tuilˊ leukahˊ ri seucaˊ rai awnˊ ce hk'aˊnaee munhpungˊ tiˊca ri naˊ, ce ku pucti heulˊ.” 37Lawng Eun naˊ a seutuin seutan lawsˊ heulˊ keunam caonaoˊ ka mawnˊ naˊ hk'awpˊ.

Yesuˊ baiˊ Eun peue peuyhat heunˊ ceu naˊ cuin

38Yam puc Eun ri lih neum saˊla vang hk'oˊ munˊ naˊ, Eun ingˊ lec nang nya eun Siˊmon naˊ. Aˊoeˊ eun Siˊmon peuyhat kucˊ haˊlok ka nyawkˊ. Ce hk'oˊ Yesuˊ Eun hpotˊ ka. 39Yesuˊ eun cawng keunam ka aˊya naˊ. Eun kah peuyhat kucˊ haˊlok ka naˊ pucti lih. Peuyhat kucˊ halok naˊ a raiˊ. Ka keulawnˊ kuhˊ nghawmˊ ce hk'asomˊ.

40Yam seunyi lec ka naˊ, peue va peue peuyhat heunˊ ceu naˊ ce ingˊ ri Yesuˊ Eun. Eun tangˊ tiˊ ri hk'aˊpang ce ku peue ri. Ce cuin gawmˊeucˊ ri. 41Saecˊ meuh seucaˊ naˊ ce pucti heulˊ hk'aiˊ peue heunˊ naˊ ce. Ce taˊulˊ ri lahˊ, “Mi ri meuh Mi Konˊ aiˊ Eun Peucawoˊ.” Daecti Yesuˊ Eun haeˊ ce. Eun unˊ kah ce leukahˊ baee, kopti yawng ce Yesuˊ meuh Eun Hkrit naˊ.

Yesuˊ sangsawnˊ Eun leukahˊ munˊ heunˊ duihˊ

42Yam cengˊ sumsam ka naˊ, Yesuˊ Eun pucti heulˊ neum mawnˊ naˊ. Eun heulˊ vang yenˊyong naˊ. Peue cum heunˊ naˊ ce sok Eun. Yam hk'eupˊ ce Eun naˊ, ce unˊ sumˊ ploeˊ Eun. 43Daecti Eun lahˊ a ri ce, “Uiˊ ku kaw kah ri eoˊ sangsawnˊ leukahˊ munˊ renˊkawn lawng kuingˊ Eun Peucawoˊ naˊ nang veng seubu naˊ ce yeut. Kopti Peucawoˊ cusˊ Eun Uiˊ kaw lih yeuhkiˊ naˊ.” 44Kop awnˊ na, Eun eoˊ sangsawnˊ leukahˊ munˊ renˊkawn naˊ nang saˊla vang hk'oˊ munˊ ce peue kuingˊ Yuˊda naˊ.

Currently Selected:

Luˊka 4: blrPL

Highlight

Copy