Kulaje 7

Etiyɛnn ɔru gəl tar nɔn njê-gangəje sariya tə̂

1Tɔkə nje-polo Lubba duju tar Etiyɛnn nan: «Tar kə̂ daw paje dɔi tə̂ nəənn to ye njaa wa?» 2Etiyɛnn ila tə̂ nan: «Ngakɔnʼmje, bɔydede, ooje tar nəənn. Kete bba karə bɔjeje Abaraham ddee dda bbe Karan le, Lubba kə̂ to nje-piti tee ingɛ̂ kar tə̂ kə̂ nisi nɛ̂n nangə tə̂ kə̂ Mejopotami 3ngaâ n̂-pa narɛ̂ nan: ‹Ɔtu nangə tə̂ ləi, nujuje tə̂ ləi ta aw nangə tə̂ kə̂ mâ tɔji.›#7:3 Jənɛsə 12:1 4Yeenn bba, Abaraham ɔtu nangə tə̂ lə dəwje kə̂ Kalde aw dda bbe Karan. Go yo tə̂ lə bɔɛ̂je a, Lubba arə n̂-ddee nangə tə̂ kə̂ ə-ddaje bbe tə̂ bbasinɛn nəənn. 5Lubba arə marə lo Abaraham kâra nangə tə̂ nəənn ang, ngonn lo kə̂ asə karə dəw ila gɔlɛ̂ tə̂ njaa kara narɛ̂ ang. Ngonn goto jia tə̂ njaa, a Lubba unn ndue ta karɛ̂ nangə le, ne kə njê kə̂ gəle tə̂. 6Lubba pa nan: ‹Ngakai a ddaje bbe nangə tə̂ kə̂ dang. Dâ kuwade bbərə tə̂ ngaâ dâ kula kəmde ndoo tə̂ bbal kɔr dɔsɔ. 7A əman Lubba, mâ gangə sariya dɔ njê-bbeje tə̂ kə̂ uwajede bbərə tə̂ le. Goe tə̂ bba dâ teeje bbərə tə̂ le ta dâ polomje lo tə̂ nəənn.›#7:7 Jənɛsə 15:13-14 8Lubba ɔsu saa dɔnɔn ddəw kuja ganja tə̂. Yeenn bba, Abaraham uju Ijakə ngaâ ndɔ jijoo laa a, ujɛ̂ ganja. Ijakə dda tokə baann kə Jakobbo ngaâ Jakobbo dda tokə baann kə ngannɛ̂ kə̂ dɔku gire joo kə̂ toje to kajejedede.

9«Mə dda kajejedede le dɔ ngokɔnde Jojɛpə tə̂ ngaâ duwɛ̂je n̂-labbɛ̂je darə daw saa Ejipitə. A Lubba ee saa. 10Nɔrɛ̂ dann nɛ̂n kəm-to-ndooje tə̂ dang dang kə̂ ingɛ̂ ngaâ narɛ̂ kəm-karɛ ddəm narə Parawɔn kə̂ to tɔkə mbay kə̂ Ejipitə ooe maji kəmɛ̂ tə̂ ddəm. Tɔkə mbay le undɛ̂ to nje-kɔn dɔ nangə kə̂ Ejipitə ddəm nje-ngəm nɛ̂nje tɔyn kə̂ mə kəy tə̂ laa ddəm. 11Tɔkə bbo oso nangə tə̂ kə̂ Ejipitə kə nangə tə̂ kə̂ Kanaan arə kəm-to-ndoo dda dəwje nya. Kajejedede ingaje nɛ̂n ta kusa ang. 12Jakobbo oo nan nɛ̂n-kusa to Ejipitə a, nula kajejedede gɔl kâra. 13Gɔl joo laa kə̂ nulade a, Jojɛpə tɔju rɔɛ̂ arə ngakɔɛ̂nje le gəreje. Yeenn ngaâ Parawɔn gərə nujuje lə Jojɛpə le. 14Yeenn bba Jojɛpə ula arə n̂-ddee kə bɔɛ̂je Jakobbo kə njê-nujuje laa tɔyn. Kɔrde tɔyn asə dɔsiri gire min. 15Jakobbo aw Ejipitə le ngaâ, ne kə kəsə kajejedede le tɔyn doyje nunn. 16Doto niinnde daw nɛ̂n bbe tə̂ kə̂ Sisɛm n̂-dubbude buwa-yo tə̂ kə̂ Abaraham ndoko kə narɛ ji ngann lə Amɔr tə̂ kə̂ to dəw kə̂ Sisɛm.

17«Kar kə̂ Lubba a ta dda nɛ̂n kə̂ nunn ndue narə Abaraham ta dda le ddee ngɔsi a, kɔr ngann Ijarayɛlje kə̂ Ejipitə le aw kə kete kete 18ndərəng ndɔ kə̂ marə tɔkə mbay kə̂ siki kə̂ gərə Jojɛpə ang unn kutu kɔn dɔ nangə kə̂ Ejipitə. 19Tɔkə mbay le ərə njê kə̂ ləje ngaâ dda kajejedede maji ang. Nuwade kə singa narə n̂-tusuje ngann əngutayje ləde dinyade darə oyje. 20Dɔ ndɔɛ̂je tə̂ənn le â duju Mɔyijə, n̂-kura kəm Lubba tə̂. N̂-ngəmɛ̂ kəy lə bɔɛ̂je mba nɛyn mota. 21Goe tə̂ a, n̂-tuse dinyɛ̂. A ngonn lə Parawɔn kə̂ dɛnɛ̂n unnɛ̂ ngəmɛ̂ tokə ngonnɛ̂ njaa. 22N̂-tɔju Mɔyijə kəm-karɛ lə dəwje kə̂ Ejipitə arə tar-pa laa kə nɛ̂n-dda laa tɔju to n̂-to dəw kə̂ ngəng.

23«Bbalɛ̂ tee dɔsɔ a, kəjə kaw koo ngakɔɛ̂n ngann Ijarayɛlje ddee dɔɛ̂ tə̂. 24Naw a, noo marə ngokɔɛ̂n kə̂ marə dəw kə̂ Ejipitə aw ddɛɛ̂ maji ang, a nayn ngɔru-ddɔ laa ngaâ nunda dəw kə̂ Ejipitə le n̂-tɔlɛ̂. 25Nəjə to ngakɔɛ̂nje a gəreje to ddəw tə̂ laa bba Lubba a kaji nɛ̂n de bbərə tə̂. A ngakɔɛ̂nje le gərəje ang. 26Ndɔ kâra goe tə̂ a, Mɔyijə oo ngann Ijarayɛlje joo kə̂ aw ddɔje naan. N̂-ndiki ta dda karə ddekeke to horode tə̂. N̂-pa narəde nan: ‹Ngakɔnʼmje, ə-toje to ngakɔn-naan, a mba ddi bba aw ddaje naan maji ang wa?› 27A ne kə̂ naw dda nje-marɛ̂ maji ang le nuta Mɔyijə le kə ddang ngaâ n̂-pa nan: ‹Nân bba undai to mbay ddəm nje-gangə sariya ddəm dɔje tə̂ wa? 28Ə-ndiki ta tɔləm tokə ə-tɔl dəw kə̂ Ejipitə takənɛn le wa?› 29Mɔyijə oo tar le baann a, ayn aw iya rɔɛ̂ bbe-mba tə̂ nangə tə̂ kə̂ Madiyan ngaâ nuju ngannje kə̂ dingaw joo lo tə̂ənn le.

30«N̂-dda bbal dɔsɔ a, marə anjə tee ingɛ̂ mə kɔr tə̂, ngɔsi kə ddingiri kə̂ Sinayi. Anjə le ee mə bər-kam tə̂ kə̂ puru aw ɔn tə̂. 31Nɛ̂n kə̂ Mɔyijə oo le gangə singɛ̂. N̂-ddee ngɔsi ta tənn koo a, noo ndu Əbbə-dəwje kə̂ aw pa tar nan: 32‹M-to Lubba lə kaijedede, Lubba lə Abaraham, lə Ijakə kə lə Jakobbo.› Mɔyijə le isa ngaâ ndiki ta kaa lo kə nɛ̂n tə̂ le ang ngaa. 33Yeenn bba, Əbbə-dəwje pa arɛ̂ nan: ‹Ə-tɔru nɛ̂n-gɔl kə̂ gɔli tə̂, mba lo kə̂ ar tə̂ nəənn to lo kə̂ maji tɔyn. 34Tɔkɔrɔ moo ndoo kə̂ dəwje ləm aw ooje Ejipitə ngaâ moo ndu sɔm ləde arə m-ddee ta kɔrude bbərə tə̂. Kə̂ bbasinɛn nəənn, aw, m-ndiki ta kulai Ejipitə.›#7:34 Ɛkəjodə 2:14–3:10

35«Mɔyijə kə̂ ngann Ijarayɛlje mbəteje ngaâ paje arɛ̂je nan: ‹Nân bba undai to mbay ddəm nje-gangə sariya ddəm dɔje tə̂ wa le›, ne â Lubba ulɛ̂ to mbay ddəm nje-kɔrude bbərə tə̂ ddəm ddəw tə̂ lə anjə kə̂ Mɔyijə ooe mə bər-kam tə̂ le. 36Ne â nɔrude n̂-tee kə de nangə tə̂ kə̂ Ejipitə kə ddang ddəw nɛ̂n-mɔrije tə̂ kə nɛ̂nje kə̂ dum dɔ koo tə̂, mə bbe tə̂ kə̂ Ejipitə ddəm mə ‹Ba-katə Kasɛ› tə̂ ddəm mə kɔr tə̂ kə̂ n̂-ddaje bbe tə̂ bbal dɔsɔ ddəm. 37Ne Mɔyijə le â n̂-pa narə ngann Ijarayɛlje nan: ‹Lubba a kula marə ngokɔnse karəse to nje-kila mbər tar lə Lubba tokə əman nəənn.›#7:37 Dəteronɔm 18:15 38Kar kə̂ dəwje kə̂ Ijarayɛl aw mbɔnje naan mə kɔr tə̂ le Mɔyijə tɔ â ar horo kajejedede tə̂ kə anjə kə̂ aw pa saa tar dɔ ddingiri tə̂ kə̂ Sinayi. Ne â ninga tarje kə̂ aw arə təbbə dəwje mba ndaji karəje.

39«A kajejedede le ndikije ta koo ta Mɔyijə ang, n̂-mbəteje ngaâ n̂-ndikije ta təl kaw Ejipitə. 40N̂-paje darəje Arɔn nan: ‹Ə-dda marə kɔrje kə̂ a kɔruje nɔnje arəje, mba ne Mɔyijə kə̂ n̂-tee kə je nangə tə̂ kə̂ Ejipitə kə ddang le, n-gərə nɛ̂n kə̂ ingɛ̂ ang.›#7:40 Ɛkəjodə 32:1,23 41Yeenn bba, n̂-ddaje ngonn mangə to kɔr ləde dɔ ndɔɛ̂je tə̂ənn ngaâ darɛ̂je nɛ̂n-polo ddəm dɔsuje gaji nɛ̂n kə̂ n̂-ddaje kə jide le kə rɔ-nəəl ddəm. 42Mba yeenn bba, Lubba inyade arə n̂-poloje nɛ̂nje kə̂ aw ndoko mə dara tə̂ tokə n̂-dda tarɛ̂ makəturu tə̂ lə njê-kilaje mbər tar lə Lubba nan:

‹Ngann Ijarayɛlje, bbal dɔsɔ kə̂ ə-ddaje mə kɔr tə̂ le, əman â ə-ddeeje kə daje kə nɛ̂nje to nɛ̂n-poloje arəmje wa?

43Nɛ̂n kâra ang. Otoje kəy-tande lə kɔr ləse kə̂ ria nan Molokə.

Otoje əndɛtɛrɛndɛn lə kɔr ləse kə̂ ria nan Repan,

to nɛ̂nje kə̂ ə-ddaje to kɔrje ta polode.

Mba yeenn bba, mâ kaw kə se giri Babilɔnn tə̂ nu ddəw əw.›#7:43 Amɔs 5:25-27

44«Mə kɔr tə̂ nu le, kajejedede eeje kə kəy-tande kinga-naan kə̂ makəturu dɔnɔn to tə̂. Mɔyijə dda kəy-tande le arə to ddəw kâra baa kə ye kə̂ Lubba unn ndu arɛ̂ karə n̂-dda le. N̂-dda narə to ddəw kâra baa kə ye kə̂ noo le. 45Njê kə̂ go kajejedede tə̂ ingaje kəy-tande le. A kar kə̂ Jɔsuwe ɔru nɔnde arə daw duwa nangə lə dəwje kə̂ toje to Jiipije ang kə̂ Lubba tubbade nɔnde tə̂ le n̂-taaje a, dawje kə kəy-tande le jide tə̂. Kəy-tande le nayn tə̂ənn ndərəng kɔn-mbay tə̂ lə Dabbiti. 46Lubba oo Dabbiti maji kəmɛ̂ tə̂. Yeenn bba Dabbiti duje karə narɛ̂ ddəw karə n̂-dda kəy mba Lubba lə Jakobbo. 47A Salomɔn â dda kəy le arə Lubba.

48«A Nje-kisi ddutu dara tə̂ isi mə kəy tə̂ kə̂ ji dəw dda ang. Ddəw kâra baa tokə nje-kila mbər tar lə Lubba pa nan:

49‹Əbbə-dəwje nan: Dara to ngende-mbay ləm,

nangə to lo kungu gɔləm

a kəy ddi bba a ta ddaje karəm wa?

Wase lo ddi bba a to lo kuwa-rɔ ləm wa?

50Əman njaa m-dda nɛ̂njeenn tɔyn kə jim ang wa?› »#7:50 Ejayi 66:1-2

51«See njê-dɔ-kətərəje, sese kə̂ Lubba bbarse, a arəje məse kətərə ngaâ ooje nɛ̂n-bbar laa ang, a aw mbətəje tar lə Ndil-mə-nda kə ndɔ tɔyn. Ə-toje ddəw kâra baa kə kasəse. 52Marə nje-kila mbər tar lə Lubba kə̂ kaseseje ddaje saa singa ang to nân wa? Kaseseje tɔlje njê kə̂ aw ilaje mbər lə dəw kə̂ gatə gatə kete bba karə n̂-ddee. A bbasinɛn sese njaa kara ə-labbəje dəw kə̂ gatə gatə le ngaâ ə-tɔlɛ̂je. 53Ingaje ndu kə̂ Lubba ula nɛ̂n anjəje kə majɛ̂, a ə-ddaje kula kə turu ndu le ang.»

N̂-tila Etiyɛnn n̂-tɔlɛ̂

54Njê kə̂ eeje lo gangə sariya tə̂ le ooje tarjeenn le a, wungu ɔnde dɔ Etiyɛnn tə̂ ngaâ n̂-ngəərje ngangəde. 55A ne Etiyɛnn kə̂ Ndil-mə-nda dduse le, kəmɛ̂ to kə darâ. Noo ndoko lə Lubba ngaâ noo Jeju kə̂ ar dɔ ji-kɔl Lubba tə̂. 56N̂-pa nan: «Ooje, maw moo dara kə̂ təəyn kə Ngonn lə dəw kə̂ ar taar dɔ ji-kɔl Lubba tə̂.» 57Dəwje le utuje mbide uruje nɛ̂n əkii kə taar. Goe tə̂ a, dede tɔyn njaa dinje naan tə̂ duruje dɔɛ̂ tə̂. 58N̂-ndɔrɛ̂je n̂-teeje saa mə bbe tə̂ kə ddang ngaâ dunnje kutu tilɛ̂ kə ər ta tɔlɛ̂. Njê-tar-najije kə̂ undaje tar dɔɛ̂ tə̂ le unguje kubbuje ləde dɔ naan tə̂ nɔn marə basan tə̂ kə̂ ria nan Sɔl karə n̂-ngəm. 59Kar tə̂ kə̂ daw tilaje Etiyɛnn kə ər le a, Etiyɛnn le duju Lubba nan: «Əbbəmje Jeju, ə-taa kəwn ləm.» 60Goe tə̂ a, Etiyɛnn le ungu məkəjə-gɔlɛ̂ nangə̂ ngaâ uru əkii kə taar nan: «Əbbəmje, unda tar majang nəənn dɔde tə̂ ang.» Go tar tə̂ənn njaa a, noy.

Currently Selected:

Kulaje 7: KabbaDkS

Highlight

Copy