Kulaje 8

1Tɔl kə̂ n̂-tɔl Etiyɛnn le Sɔl ndiki tə̂.

Nɛ̂n-singa kə̂ inga njê-mə-kunnje

Ndɔɛ̂ tə̂ənn njaa, dəwje unnje kutu kula kəm Egilisi kə̂ Jerujalɛm ndoo tə̂. Njê-mə-kunnje sanrɛje naan dɔ nangə tə̂ kə̂ Jude kə Samari, a njê-kaw-kulaje â naynje. 2Dəwje kə̂ aw bbəəlje Lubba dubbuje Etiyɛnn ngaâ n̂-nɔɛ̂nje nya. 3A Sɔl unn kutu tuju Egilisi. Nandə mə kəyje tə̂, nuwa dingawje kə dɛnɛ̂nje kə singa nungude kəy-kula tə̂.

Pilipi tɔju Tar kə̂ Maji Samari

4Dəwje kə̂ sanrɛje naan le aw ilaje mbər tar lə Lubba to Tar kə̂ Maji loje tə̂ kə̂ daw ndayje tə̂. 5Yeenn bba, Pilipi tee aw marə bbe tə̂ kə̂ Samari ngaâ ila mbər tar lə Kristə. 6Njê-bbeje kə̂ ddeeje tokə banya le tɔyn njaa aw tukaje mbide aw ooje nɛ̂n tar lə Pilipi le, mba dooje tar nɛ̂n-mɔrije kə̂ naw dda kə mbide ddəm dooje nɛ̂nje le kə kəmde ddəm. 7Ndilje kə̂ maji ang nya nya teeje mə dəwje tə̂ kə ddang, dundaje əkii bba n̂-teeje nɛ̂n ngaâ dəwje nya kə̂ dəbbə rɔde oy kə njê-mətəje ajije. 8Rɔ dəwje kə̂ mə bbe tə̂ənn le nəəlde nya.

9Marə dəw kə̂ ria nan Simɔn isi mə bbe tə̂ənn ləw baa. N̂-to nje-əmbili ngaâ naw dda nɛ̂nje kə̂ aw dum dɔ dəwje tɔyn kə̂ nangə tə̂ kə̂ Samari. N̂-dda rɔɛ̂ to dəw kə̂ ngəng nya. 10Dəwje tɔyn aw tukaje mbide aw ooje nɛ̂n tar laa, unn kute dɔ dəwje tə̂ kə̂ ngaji ndərəng dɔ njê kə̂ tɔkə tə̂. Dəwje paje nan: «Dəw nəənn to singa-mɔngu kə̂ in rɔ Lubba tə̂ kə̂ daw bbar nan Tɔkə singa-mɔngu.»

11Daw tukaje mbide daw dooje nɛ̂n tar laa, mba n̂-dda nɛ̂nje kə̂ dum dɔde bbal banya nya ddəw nɛ̂n-mɔrije tə̂ laa kə̂ naw dda. 12A dəwje tɔyn, dingawje kə dɛnɛ̂nje kə̂ ooje məde tə̂ kə Tar kə̂ Maji kə̂ Pilipi tɔju dɔ Bbe-kɔn tə̂ lə Lubba ddəm dɔ tar tə̂ lə Jeju-Kristə ddəm ingaje batɛm. 13Simɔn njaa kara oo məɛ̂ tə̂ tɔ ngaâ n̂-ddɛɛ̂ batɛm. Ninya go Pilipi ang ngaa. Noo tɔkə nɛ̂n-mɔrije kə nɛ̂nje kə̂ dum dɔ koo kə̂ Pilipi aw dda le a, dɔɛ̂ ayn.

14 Njê-kaw-kulaje kə̂ Jerujalɛm tə̂ ooje nan dəwje kə̂ Samari taaje tar lə Lubba. Yeenn bba dulaje Piyɛr kə Jan darəde. 15N̂-teeje Samari le a, n̂-dujuje Lubba mba dəwje kə̂ Samari le karə dingaje Ndil-mə-nda. 16Mba Ndil-mə-nda ddee dɔ marə dəw tə̂ kə̂ Samari kâra ang bbay. Nɛ̂n kə̂ dingaje njaa â to batɛm kə̂ n̂-ddade kə ri Əbbə-dəwje Jeju. 17Yeenn bba, Piyɛr de kə Jan dilaje jide dɔde tə̂ darə dingaje Ndil-mə-nda.

18Simɔn oo Ndil kə̂ njê-kaw-kulaje ilaje jide dɔ dəwje tə̂ arə dingaje le a, n̂-ddee kə narɛ narəde 19n̂-pa nan: «Arəmje singa nəənn tɔ ta bbo dəw njaa mila jim dɔɛ̂ tə̂ a, inga Ndil-mə-nda.» 20A Piyɛr ilɛ̂ tə̂ nan: «Maji karə oy kə narɛ ləi tɔyn, mba əjə to â kasə ndoko nɛ̂n kə̂ Lubba aw arə dəw baa kə narɛ. 21Marə nɛ̂n kə̂ to mbai wase nɛ̂n kə̂ osoi tə̂ kâra to nəənn ang. Mba kəjə ləi to gatə gatə kəm Lubba tə̂ ang. 22Inya kəjə ləi kə̂ maji ang le ta ə-duju Əbbə-dəwje arə ddəw to a, nɔru tar kəjəje kə̂ maji ang le dɔi tə̂ kə ddang. 23Mba moo a, bbo kə̂ maji ang kə̂ to ənga kinga nɛ̂n ddusu məi ngaâ ə-to bbərə lə nɛ̂n-dda kə̂ gatə gatə ang.» 24Simɔn le ila Piyɛr de kə Jan tə̂ nan: «Sese njaa, ə-dujuje Əbbə-dəwje mbam karə nɛ̂n kə̂ ə-paje nəənn ingam ang.»

25Piyɛr de kə Jan n̂-paje tar-naji lə Əbbə-dəwje, dilaje mbər tar laa ngaâ n̂-təlje kə Jerujalɛm. Dilaje mbər Tar kə̂ Maji mə bbeje tə̂ nya nya kə ddəw ddəw nangə tə̂ kə̂ Samari.

Tar lə Pilipi kə dəw kə̂ Etiyopi

26Marə anjə lə Əbbə-dəwje pa arə Pilipi nan: «Unn ddəw kə̂ aw kə dagoo, kə̂ in Jerujalɛm aw kə Gaja. Kar tə̂ənn dəw aw nja ddəw tə̂ le ang.» 27Pilipi le ɔtu kə ngɔru aw ngaâ inga marə dingaw kə ddəw. Dingaw le to enuku, n̂-to dəw kə̂ Etiyopi. N̂-to tɔkə dəw kə̂ aw ngəm nɛ̂n-kingaje lə Kandas kə̂ to tɔkə mbay-dɛnɛ̂n kə̂ Etiyopi. Dingaw le ddee Jerujalɛm mba polo Lubba 28ngaâ aw təl kə bbeê laa. Nisi sarɛtə tə̂ laa naw tura makəturu lə Ejayi kə̂ to nje-kila mbər tar lə Lubba. 29Ndil pa arə Pilipi le nan: «Aw kə ngɔru aw inga sarɛtə toonn.»

30Pilipi ayn ngɔru aw inga sarɛtə le ngaâ oo ndu dingaw kə̂ Etiyopi le kə̂ a aw tura makəturu lə Ejayi kə̂ to nje-kila mbər tar le. Pilipi duju tar enuku le nan: «Ə-gərə tar kə̂ aw tura makəturu tə̂ nəənn njaa wa?» 31Dingaw le ila tə̂ nan: «Bbo marə dəw umanʼm ang a, mâ gərə tar le tokə baânn wa?» Yeenn bba, n̂-bbar Pilipi le karə aal sarɛtə le isi mbɔrɛ̂ tə̂. 32Tar kə̂ makəturu tə̂ kə̂ naw tura le tokə be:

«N̂-to ddəw kâra baa kə batə kə̂ daw saa kə lo tɔl daje tə̂,

n̂-to tokə ngonn batə kə̂ daw duja biiɛ̂n, a nɔn ang.

Nɔru tɛɛ̂ n̂-pa nɛ̂n tar ang.

33N̂-ddɛɛ̂ darə n̂-ddee to nɛ̂n ang ngaâ darɛ̂ naji laa ang.

Nân bba a pa tar lə ngannɛ̂ wa?

Mba n̂-dda darə təbbə laa kə̂ dɔ nangə tə̂ unda ngangɛ̂.»#8:33 Ejayi 53:7-8

34 Enuku le pa arə Pilipi nan: «M-wali nya, ə-pa arəm moo. Nân njaa gatə bba nje-kila mbər tar lə Lubba le aw pa tar laa nəənn wa? To tar laa ne njaa wase tar lə marə dəw kə̂ dang wa?» 35Yeenn ngaa, Pilipi unn kutu tar dɔ tar tə̂ kə̂ enuku le tura makəturu tə̂ nəənn le bba tɔjɛ̂ nɛ̂n Tar kə̂ Maji lə Jeju. 36Daw dawje bbay a, n̂-teeje ta marə maann tə̂ ngaâ enuku le pa nan: «Maann â nəənn, a ddi bba ɔku ddəw karə minga batɛm wa?» [37Pilipi le pa nan: «Bbo oo məi tə̂ kə Jeju a, â kasə kinga batɛm.» Dingaw le ilɛ̂ tə̂ nan: «Moo məm tə̂ to Jeju to Ngonn lə Lubba.»#8:37 Dɔngɔr makəturuje tə̂ kə̂ duja kə jide, tar nəənn to tə̂ ang.] 38Goe tə̂ a, narə Sarɛtə le ar lo kâra ngaâ de kə Pilipi le joo kəm n̂-ddisije dawje mə maann tə̂ le ngaâ Pilipi ddɛɛ̂ batɛm. 39Dinje mə maann tə̂ le n̂-teeje a, Ndil lə Əbbə-dəwje unn Pilipi ɔtu nɛ̂n arə enuku le ooe ang. A naw lo laa kə rɔ-nəəl. 40Pilipi le ubba nangə tə̂ kə̂ Ajotə ngaâ tɔju Tar kə̂ Maji mə bbeje tə̂ tɔyn kə ddəw ddəw tee nɛ̂n bbe tə̂ kə̂ Sejare.

Currently Selected:

Kulaje 8: KabbaDkS

Highlight

Copy