Kulaje 9

Əbbə-dəwje Jeju bbar Sɔl

1Kar tə̂ənn, kəjə dda singa kə kəjə tɔl njê-njaje go Əbbə-dəwje tə̂ dɔrɔ â nayn mə Sɔl tə̂ kə ndɔ tɔyn. Yeenn bba naw rɔ tɔkə nje-polo Lubba tə̂, 2naw duju makəturuje ta kaw nɛ̂n karə njê kə̂ kəy mbɔn-naanje tə̂ kə̂ Damas. Makəturu le a karɛ̂ ddəw karə bbo ninga marə dɛnɛ̂nje wase dingawje kə̂ aw unnje «ddəw lə Əbbə-dəwje» a, n̂-tɔde n̂-ddee kə de Jerujalɛm.

3Sɔl unn ddəw aw kə Damas ngaâ tee ngɔsi kə bbe le a, kəm naan tə̂ nəənn njaa lo ndoko darâ uru dɔɛ̂ tə̂ guke tɔyn. 4N̂-tee noso nangə̂ ngaâ noo marə ndu dəw pa saa tar nan: «Sɔl, Sɔl, mba ddi bba aw dda səm singa wa?» 5Sɔl le ilɛ̂ tə̂ nan: «Əbbə-dəwje, əi nân wa?» Ndu dəw le ilɛ̂ tə̂ nan: «Əman Jeju, əman â aw dda səm singa nəənn. 6A in taar andə mə bbe tə̂ le, a dâ tɔji nɛ̂n kə̂ to ta karə ə-dda.»

7Njê-buwa kaw-loje laa arje baa nding ngaâ bbəəl uta dɔde. Dooje ndu dəw kə̂ aw pa tar le, a dooje dəw kâra ang. 8Sɔl in taar təəyn kəmɛ̂, a noo lo ang. Duwa jia bba dandə nɛ̂n mə bbe tə̂ kə̂ Damas. 9Ndɔ mota njaa, noo lo ang ddəm nusa nɛ̂n ang ddəm nay maann ang ddəm.

10Marə nje-nja go Jeju tə̂ kə̂ ria nan Ananiyas ee mə bbe tə̂ kə̂ Damas le. Əbbə-dəwje tee ingɛ̂ kə nin ngaâ pa nan: «Ananiyas!» N̂-ndiki tə̂ nan: «Əman â nəənn Əbbəmje!» 11Əbbə-dəwje pa nan: «Aw ddəw tə̂ kə̂ daw bbar nan ddəw kə̂ Ndɔju, ta andə mə kəy tə̂ lə Judas, ə-duju marə dingaw kə̂ bbe tə̂ kə̂ Tarsə, ria nan Sɔl. Naw duju Lubba kar tə̂ nəənn 12ngaâ noo marə dəw tokə nɛ̂n kə̂ naw nin to nin, ri dəw le nan Ananiyas kə̂ andə kəy ngaâ ila jia dɔɛ̂ tə̂ karə noo lo.» 13Ananiyas le ila tə̂ nan: «Əbbəmje, dəwje nya paje tar nɛ̂nje kə̂ maji ang tɔyn kə̂ dəw nəənn dda kə dəwje ləi Jerujalɛm. 14Lo tə̂ nəənn njaa kara, mbayje lə njê-poloje Lubba arɛ̂je ddəw karə n̂-ddee nuwa dəwje tɔyn kə̂ aw bbarje rii.» 15A Əbbə-dəwje pa nan: «Aw, mba dəw le to dəw kə̂ mundɛ̂ dang karə n̂-dda narə dəwje kə̂ toje to Jiipije ang kə tɔkə mbayje ləde kə ngann Ijarayɛlje gərəje rim. 16Əman njaa mâ tɔjɛ̂ nɛ̂n kəm-to-ndooje tɔyn kə̂ a kingɛ̂ mba rim.»

17Yeenn bba Ananiyas le aw ngaâ andə kəy le aw ila jia dɔɛ̂ tə̂ ngaâ pa nan: «Sɔl, ngokɔnʼm, Əbbə-dəwje Jeju kə̂ ingai kə ddəw ddee tə̂ ləi le ulam rɔi tə̂ karə ə-təl oo lo ddəm karə Ndil-mə-nda ddusi ddəm.» 18Kəm naan tə̂ nəənn njaa, marə nɛ̂n tokə lə gondo in kəmɛ̂ tə̂ oso nangə̂ ngaâ noo lo. Nin taar ngaâ ninga batɛm. 19Nusa nɛ̂n ngaâ n̂-təl ninga singa.

Sɔl ila mbər Tar kə̂ Maji bbe tə̂ kə̂ Damas

N̂-dda ndɔ ngaji rɔ njê-njaje go Jeju tə̂ bbe tə̂ kə̂ Damas 20ngaâ njangə baa a, Sɔl aw ila mbər kəy mbɔn-naanje tə̂ lə Jiipije pa nan Jeju to Ngonn lə Lubba. 21Dəwje tɔyn kə̂ ooje tar lə Sɔl le dɔde ayn ngaâ paje nan: «Dəw nəənn â aw ula kəm dəwje kə̂ aw bbarje ri Jeju ndoo tə̂ mə bbe tə̂ kə̂ Jerujalɛm le ang wa? N̂-ddee nəənn ta kuwa njê-mə-kunnje tɔde kaw kə de karə mbayje lə njê-poloje Lubba ang wa?»

22A Sɔl le aw ubba singa kə kete kete ddəw tarje tə̂ kə̂ naw tɔju ngaâ Jiipije kə̂ Damas ooje tar kâra ta pa ang, kar tə̂ kə̂ naw pa kə ddaka nan Jeju to Kristə njaa le.

23Ndɔ nya nday ngaâ Jiipije unguje tar mə naan tə̂ ta tɔl Sɔl 24ngaâ tar le oso mbi Sɔl tə̂. Daw ngəmje ta-ndokoje kə̂ dila n̂-guku nɛ̂n dɔ bbe le til kə kar ta tɔlɛ̂. 25A marə ndɔ til tə̂, njê-njaje goe tə̂ uwɛ̂je ilɛ̂je mə karɛ tə̂ ngaâ ulɛ̂je ddaka kə dɔ ndoko.

Sɔl aw Jerujalɛm

26Sɔl le tee Jerujalɛm a, sangə ddəw ta kandə horo njê-njaje go Jeju tə̂, a dede tɔyn njaa n̂-bbəəleje to bbəəl mba dooje to n̂-to nje-nja go Jeju tə̂ kə̂ tɔkɔrɔ ang. 27Barnabas unn Sɔl le aw saa rɔ njê-kaw-kulaje tə̂ ngaâ pa tar koo kə̂ Sɔl oo Əbbə-dəwje ddəw-boô kə tar kə̂ Əbbə-dəwje pa saa le arəde. N̂-pa gusu kə̂ Sɔl pa nɛ̂n tar lə Jeju kə bbəəl ang arə dəwje mə bbe tə̂ kə̂ Damas le narəde. 28Unn kute karɛ tə̂ənn, mə bbe tə̂ kə̂ Jerujalɛm, lo tɔyn kə̂ njê-kaw-kulaje aw awje tə̂ a, naw kə de naan tə̂ naan tə̂. Naw tɔju tar kə ri Əbbə-dəwje kə bbəəl ang. 29Naw pa tar kə Jiipije kə̂ aw paje ndɔn-tar gɛrɛkə ngaâ naw mayn tar kə de, a dede daw sangəje ddəw ta tɔlɛ̂. 30Njê-mə-kunnje gərəje tarɛ̂ ngaâ awje saa Sejare arə naw Tarsə. 31Dɔ ndɔje tə̂ənn, ddekeke to mə Egilisije tə̂ tɔyn kə̂ toje nangə tə̂ kə̂ Jude, Galile kə Samari. Egilisi aw ubba singa kə kete kete, naw bbəəl Əbbə-dəwje ngaâ kɔr njê-mə-kunnje aw kə kete kete ddəw singa tə̂ lə Ndil-mə-nda.

Piyɛr aji Ene

32Piyɛr aw nja nangə tə̂ le tɔyn ngaâ marə ndɔ, naw tee dɔ njê-mə-kunnje tə̂ kə̂ bbe tə̂ kə̂ Lida. 33Lo tə̂ənn, ninga marə dingaw kə̂ dəbbə rɔɛ̂ oy ngaâ to tuwa rɔ-to tə̂ nangə̂ bbal jijoo. Ria nan Ene. 34Piyɛr pa nan: «Ene, Jeju-Kristə ajii. In taar bbo ə-dda dɔ tuwa ləi.» Kəm naan tə̂ nəənn njaa nin taar. 35Dəwje tɔyn kə̂ Lida kə dəwje tɔyn kə̂ ndakə lo tə̂ kə̂ Sarɔn ooje məde tə̂ kə Əbbə-dəwje.

Piyɛr ndol Tabita kə̂ oy

36Mə bbe tə̂ kə̂ Jope, marə dɛnɛ̂n kə̂ to nje-nja go Jeju tə̂ ee tə̂ənn. Ria nan Tabita. Daw bbar Tabita le kə ndɔn-tar gerekə nan Dɔrkas. Kandə ri le nan: Dul. Kula kə̂ maji dɔrɔ â n̂-dda ngaâ naw narə nɛ̂n njê-ndooje naw numan nɛ̂n de tɔ. 37Dɔ ndɔje tə̂ənn, rɔɛ̂ toe ngaâ noy. N̂-toko niinnɛ̂ dunda mə kəy tə̂ kə̂ to dɔ marɛ̂ tə̂ taar. 38Njê-njaje go Jeju tə̂ kə̂ eeje bbe tə̂ kə̂ Jope ooje nan Piyɛr ee bbe tə̂ kə̂ Lida kə̂ əw kə Jope ang. Yeenn bba, dulaje dəwje joo darə Piyɛr le nan: «N-wali nya, ə-ddee njangə rɔje tə̂ bba.» 39Piyɛr aw kə de kə ngɔru ngaâ n̂-tee a, darə naw mə kəy tə̂ kə̂ to dɔ marɛ̂ tə̂ taar le. Dɛnɛ̂n-ndubbaje aw nɔnje ddeeje nɛ̂n rɔ Piyɛr tə̂. N̂-tɔjɛ̂je kubbuje kə̂ to dɔɛ̂ kə kubbu kulje kə̂ Dɔrkas le uju kar tə̂ kə̂ n̂-nayn nɛ̂n kə de baa bbay. 40Piyɛr arə dəwje tɔyn teeje ddaka ngaâ ungu məkəjə-gɔlɛ̂ nangə̂ duju Lubba. Goe tə̂ a, n̂-turu rɔɛ̂ kə rɔ niinn tə̂ le ngaâ n̂-pa nan: «Tabita, in taar.» Tabita le təəyn kəmɛ̂. Noo Piyɛr le a, nin nisi taar. 41Piyɛr ula jia uwɛ̂ nɛ̂n arə nin taar ngaâ bbar njê-mə-kunnje kə dɛnɛ̂n-ndubbaje tɔjude Dɔrkas le kəm baa. 42Dəwje kə̂ Jope tɔyn ooje tar nəənn ngaâ dəwje nya ooje məde tə̂ kə Əbbə-dəwje. 43Piyɛr nayn ndɔ banya nya Jope rɔ Simɔn tə̂ kə̂ to nje-kula əndaar.

Currently Selected:

Kulaje 9: KabbaDkS

Highlight

Copy