Kulaje 28

Pɔl tee dɔ dərə-ba tə̂ kə̂ Maltə

1Go yo tə̂ kə̂ n-tee tɛɛ̂ tə̂ bba n̂-pa darəje nan ri dɔ dərə-ba le to Maltə. 2Njê-bbeje le taajeje kə majɛ̂ nya. N̂-yəlje tɔkə puru ngaâ n̂-bbarjeje darə n-ndibbi mba ndi unn kutu kərə arə kul ɔn nya. 3Pɔl oto ngann ngəw ta kungu purô. A li tee məɛ tə̂ mba puru le ɔbbɛ̂ ngaâ n̂-tɔn ji Pɔl n̂-tinya tə̂. 4Njê-bbeje le ooje li kə̂ tinya ji Pɔl tə̂ le a, n̂-paje tar horode tə̂ nan: «A du ang, dingaw nəənn to nje-tɔl dəwje. Maann a ta kuwɛ̂ bba n̂-tee tɛɛ̂ tə̂. A nɛ̂n kə̂ gatə gatə lə Lubba a kinyɛ̂ karə n̂-nayn kəm baa ang.» 5Pɔl tusu li le arə oso purô. A nɛ̂n kâra njaa dda Pɔl ang. 6Njê-bbeje le aw nginanje ta koo rɔɛ̂ kə̂ a ti wase koso kə̂ nâ koso watə koy. A n̂-nginanje pin dooje marə nɛ̂n kâra kə̂ dda Pɔl ang. Yeenn bba n̂-təlje n̂-turuje ndude nan: «N̂-to marə lubba.»

7Ngɔsi baa lo tə̂ənn, lo lə marə tɔkə dəw kə̂ dɔ dərə-ba tə̂ le kə̂ ria nan Pubiliyus ee tə̂ənn. Nuwaje kə rɔɛ̂ tə̂ kə majɛ̂ ngaâ n-to rɔɛ̂ tə̂ ndɔ mota. 8Bɔ Pubiliyusje le to tuwa rɔ-to tə̂. Rɔɛ̂ tunga nya ddəm n̂-ndəngə məsə ddəm. Pɔl aw ooe, duju Lubba dɔɛ̂ tə̂, ila jia dɔɛ̂ tə̂ ngaâ naji. 9Goe tə̂ a, marə njê-bbeje kə̂ Maltə kə̂ rɔde tode ddee ooeje ngaâ najide tɔ.

10Njê-bbeje le waljeje nya ngaâ kar tə̂ kə̂ ja ta kunn tɔkə to a, darəjeje nɛ̂nje kə̂ a kumanje ddəw-boô.

Pɔl tee Rɔm

11N-dda to nɛyn mota dɔ dərə-ba tə̂ le nunn bba goe tə̂ a, junn tɔkə to kə̂ in Alɛkəjandiri tə̂ ddee. Ri tɔkə to le nan «lubbaje kə̂ toje to ndungaje».#28:11 Kastɔr de kə Poluksə toje to kɔrje lə gɛrɛkəje kə̂ toje ndungaje. Njê-ddaje kula tɔkə to tə̂ unnjede to lubbaje ləde kə̂ aw ngəmjede Tɔkə to le ar tə̂ənn karə nɛyn-kul nday bba ta kɔtu. 12N-tee Sirakus a, n-dda ndɔ mota lo tə̂ənn. 13Jin tə̂ənn juwa kar mbal n̂-tee Rejiyo. Lo arɛ a, ləl kə̂ dagoo ula nya ngaâ ndɔ joo a, n̂-tee Pujɔl. 14Jinga marə ngakɔnje mə bbe tə̂ənn ngaâ n̂-dujuje karə n-dda ndɔ siri rɔde tə̂. Tokə baann â jaw nɛ̂n Rɔm. 15Ngakɔnje kə̂ Rɔm ooje tar ləje ngaâ tilaje kəmje ndərəng ingajeje lo nɛ̂n-labbə tə̂ kə̂ Apiyus kə lo tə̂ kə̂ daw bbar nan «Kəy-to-mbaje kə̂ Mota.» Pɔl oode a, arə wooyo Lubba ngaâ təl inga singa. 16N-tee Rɔm a, darə ddəw Pɔl karə uwa kəy laa dang. Dunn marə mbamba kâra karə ngəmɛ̂.

Pɔl pa tar lə Lubba bbe tə̂ kə̂ Rɔm

17Ndɔ mota goe tə̂ a, Pɔl bbar tɔkə dəwje lə Jiipije kə̂ isije Rɔm ta-kəy tə̂ laa. N̂-mbɔnje naan a, n̂-pa narəde nan: «Ngakɔnʼmje, m-dda marə nɛ̂n kə̂ maji ang kə dəwje ləje ang ddəm m-mbətə nɛ̂n-ji-bbe lə kajeje ang ddəm. A duwam Jerujalɛm ngaâ dinyam mə ji dəwje tə̂ kə̂ Rɔm. 18Go tar tə̂ kə̂ njê kə̂ Rɔm dujumje ooje tɔyn a, n̂-ndikije ta kinyam mba dooje marə tar dɔm tə̂ kə̂ a kasə karə n̂-tɔləmje nɛ̂n ang. 19A Jiipije mbətəje. Mba yeenn bba, m-duju ta ddee kə tar le nɔn tɔkə mbay tə̂ kə̂ Rɔm, bbo to tar â m-ndiki ta kunda dɔ dəwje tə̂ kə̂ bbeê ləje ang. 20Tar nəənn njaa m-duju ta koose mbɛɛ̂, ta tɔn kə se tam. Mâ kərəse ang, n̂-tɔm kə kula njamjije nəənn ɔju dɔ tar nɛ̂n kə̂ dəwje kə̂ Ijarayɛl undaje məde dɔɛ̂ tə̂.» 21Dilɛ̂je tə̂ nan: «Jinga marə makəturu kə̂ in nangə Jude tə̂ dɔi tə̂ ang ddəm marə ngakɔnje kara ddee pa tar dɔi tə̂ arəje wase pa tar ləi maji ang arəje ang ddəm. 22A jaw duji karə əi njaa ɔru gəl nɛ̂n kə̂ aw əjə arəje, mba n-gərə to loje tə̂ tɔyn, dəwje aw mbətəje kuwa-dɔ-naan kə̂ ee məɛ tə̂ nəənn to mbətə dɔrɔ.»

23Dɔjuje ndɔ darə Pɔl ngaâ ndɔ le asə a, n̂-ddeeje tokə banya dingɛ̂je lo-toe tə̂. Pɔl pa tar arəde kə əndɔɔ ndərəng lo-kul. N̂-pa tar kɔn-mbay lə Lubba narəde. Nunn tar Ndu lə Mɔyijə kə tar lə njê-kilaje mbər tar lə Lubba n̂-pa nɛ̂n tar lə Jeju karə n̂-ndikije tə̂. 24Marɛ̂je ndikije tə̂ kə tar kə̂ naw pa le, a marɛ̂je mbətəje. 25Horode tə̂ tar ləde aw naan tə̂ ang ngaâ kar tə̂ kə̂ dâ ta kɔtuje a, Pɔl pa tar kâra nan: «Tar kə̂ Ndil-mə-nda unda ta Ejayi tə̂ kə̂ to nje-kila mbər tar lə Lubba arə pa arə kajejedede le to tar kə̂ tɔkɔrɔ. Ndil-mə-nda pa nan:

26‹Aw inga dəwje nəənn

ə-pa arəde ə-pa nan:

â kooje tar kə majɛ̂,

a â gərəje kandɛ̂ ang,

a kaaje lo kə majɛ̂,

a â kooje nɛ̂n ang.

27Mba mə dəwje le kətərə,

dutuje mbide,

n̂-bbirije kəmde

baann bba ta karə kəmde oo lo ang ddəm

ta karə mbide oo tar ang ddəm

ta gərə nɛ̂n ang ddəm

mba n̂-ndikije ta təl rɔm tə̂ karə majide ang.› #28:27 Ejayi 6:9-10.»

28Pɔl pa arəde bbay nan: «Maji karə ə-gərəje to Lubba ula kə tar kaji nəənn arə dəwje kə̂ toje to Jiipije ang. Dede dâ ndikije tar tə̂ le.»

[29Go tar tə̂ kə̂ Pɔl pa le a, Jiipije maynje naan tar ɔtuje nɛ̂n.] 30Pɔl dda bbal joo tɔyn njaa kəy tə̂ kə̂ nuka kə narɛ laa njaa. Naw taa dəwje tɔyn kə̂ ddeeje aw ooeje kə rɔɛ̂ tə̂. 31Nila mbər kɔn-mbay lə Lubba ngaâ n̂-tɔju nɛ̂n dɔ Əbbə-dəwje Jeju-Kristə tə̂ kə bbəəl ang. Marə dəw ɔkɛ̂ ddəw ang.

Currently Selected:

Kulaje 28: KabbaDkS

Highlight

Copy