Kulaje 27

Dula Pɔl Rɔm

1Dunn ndu karə junn tɔkə to jaw Itali a, jinya Pɔl kə marə dəwje kə̂ duwade mə ji mbay tə̂ lə mbambaje kə̂ Rɔm kə̂ ria nan Juliyus. Dunda ri mbambaje le nan «mbambaje le tɔkə mbay.» 2Junn tɔkə to kə̂ Adramitə kə̂ a ta kaw bbeje tə̂ kə̂ Aji kə̂ to kar maann tə̂ ngaâ jaw. Aristarkə kə̂ to dəw kə̂ Tesalonikə, nangə tə̂ kə̂ Maseduwann aw kə je. 3Ndɔ kâra goe tə̂ a, n-tee Sidɔn. A Juliyus kə̂ aw dda Pɔl maji le inyɛ̂ arə naw rɔ njê-buwa-kuraje tə̂ laa mba karə darɛ̂ marə nɛ̂nje kə̂ due. 4Jin lo tə̂ənn, junn ddəw kə̂ tee giri Sipərə tə̂, mba ləl aw tila kəmje. 5N-gangə ba-katə kə̂ to mbɔr Silisi kə Pampili tə̂ ngaâ n-tee Mira nangə tə̂ kə̂ Lisi. 6Lo tə̂ənn, mbay lə mbambaje le oo marə tɔkə to kə̂ Alɛkəjandiri kə̂ aw kə Itali ngaâ arəje jaal.

7Jaw jann jann baa ndɔ banya ngaji arə n-dda to kula-ddaje bba n̂-tee Kinidə. A ləl ɔkuje ddəw karə n-nday kə ddəw kə̂ junn le. Yeenn bba, n-nday mbɔr Krɛtə tə̂ ər kə Salmɔnne. 8N-dda to dda bba n-nday mbɔr dɔ dərə-ba tə̂ le ngaâ n-tee lo tə̂ kə̂ daw bbar nan «Lo-kar lə tɔkə Toje kə̂ Maji». Lo le to ngɔsi kə Laje.

9A ndɔ nday nya ngaa, arə nja dɔ maann tə̂ to nɛ̂n-bbəəl nya, mba ndɔ kɔku rɔ nɛ̂n-kusa kə̂ dɔ nɛyn tə̂ nday mban.#27:9 Kɔku-rɔ nɛ̂n-kusa nəənn le to marə kusu lə Jiipije kə̂ daw dda kɔsu kɔyn kalkɔn tə̂, tɔ bbay nja dɔ maann tə̂ to nɛ̂n-bbəəl nya ɔju dɔ bamburanbo kə̂ aw ula. Yeenn bba, Pɔl ndəjə njê-yəlje tɔkə to le nan: 10«Ngakɔnʼmje, moo a, lo-kaw ləje nəənn a maji ang. Tɔkə to le ddəm nɛ̂n-kotoje ddəm a tujuje nya. Jeje njaa kara jee ta yo tə̂ tɔ.» 11A mbay lə mbambaje le tar lə nje-yəl tɔkə to le kə tar lə nje-tɔkə to le â ndiki ta koo uta tarje lə Pɔl. 12Tɔ bbay, lo-kar lə tɔkə tojeenn le to lo kə̂ maji karə dəw isi tə̂ nɛyn-kul tə̂ ang. Mba yeenn bba, nya lə dəwje kə̂ mə tɔkə to tə̂ le ndikije ta kɔtu lo tə̂ənn le. N̂-ndikije karə ddəw to a, n̂-tee Penikisi, kə̂ to lo-kar lə tɔkə toje kə̂ Krɛtə. Lo le aa lo kə dagoo ddəm bəər ddəm ər kə lo kandə tə̂ lə kar. N̂-ndikije ta kisi tə̂ənn karə nɛyn-kul nday dɔde tə̂.

Bamburanbo ula dɔ ba-katə tə̂

13Marə ləl kə̂ ula kə singa ang in dagoo, a dəwje kə̂ mə tɔkə to tə̂ le əjəje to dâ kaw teeje lo tə̂ kə̂ dundaje məde ta tee tə̂ le. Yeenn bba dɔruje tɔkə andə kə̂ daw dila maânn karə to le nja ang ngaâ duwa kar ba kə̂ Krɛtə. 14A njangə njangə baa, marə bamburanbo kə̂ dunda ria nan «Erakilɔn» in ər dɔ dərə-ba tə̂ le ingade. 15Bamburanbo le unn tɔkə to le ta kaw nɛ̂n arə ddəw kə̂ ta nar nɛ̂n to le goto ngaâ jinya jarə to le aw kə je. 16N-nday giri ngonn dɔ dərə-ba tə̂ kə̂ ria nan Koda. N-dda to kula-ddaje bba juwa ngonn to kə̂ n̂-tɔ mbɔr tɔkə to tə̂ le mba kaji nɛ̂n njê kə̂ maann a ta kuwade. 17Njê-yəlje tɔkə to le unnje ngonn to ilaje mə tɔkə to tə̂ le ngaâ tɔje kula kar tɔkə to tə̂ le tɔyn. N̂-bbəəlje mba kin karə tɔkə to le aw ar kə̂ de dɔ ənangara tə̂ kə̂ Libi. Yeenn bba, dunnje marə nɛ̂n kə̂ ɔɔy kə̂ n̂-tɔ tɔkə to tə̂ le dilaje maânn ngaâ dinyaje tɔkə to le darə ləl aw saa. 18Bamburanbo le yəkəje kə singa nya. Yeenn bba lo arɛ a, dunnje kutu tila nɛ̂n-kotoje maânn. 19Ndɔ mota laa a, dede njaa dotoje nɛ̂n-kulaje kə̂ mə tɔkə to tə̂ le kə jide n̂-tilaje maânn. 20Ndɔ banya nya, dəw oo kəm kar ang ddəm oo əndɛtɛrɛndɛnje ang ddəm. Bamburanbo le aw yəkə lo to bbəəl nya. Junda məje to ja kaji ang ngaa.

21Dəwje kə̂ mə tɔkə to tə̂ le usaje nɛ̂n ang ndɔ banya nya. Yeenn ngaâ Pɔl ar taar nɔn dəwje tə̂ le tɔyn ngaâ pa nan: «Namʼmjedede, bbo ooje tar ləm ngaâ arəje n-naynje Krɛtə a, nɛ̂nje a tuju be ang ddəm nɛ̂nje a nayn kə kɔrɔ̂ be ang ddəm. 22A kə bbasinɛn nəənn, m-pa marəse: Ə-bbəəlje ang, mba dəw kâra horose tə̂ a koy ang. Tɔkə to le kâra baa njaa a tuju. 23Til tə̂ nəənn, Lubba kə̂ m-to dəw laa ngaâ maw pole arə marə anjə laa tee ingam, 24ngaâ pa arəm nan: ‹Ə-bbəəl ang Pɔl. Maji karə ar nɔn tɔkə mbay tə̂ kə̂ Rɔm arə gangə sariya ləi. Lubba a ngəm dəwje tɔyn kə̂ eeje səi mə tɔkə to tə̂ nəənn ɔju dɔi.› 25Yeenn a, uwaje arə ngəng, njê-buwa-kuraje ləm! Munda məm dɔ Lubba tə̂. Nâ dda nɛ̂n tokə n̂-pa narəm. 26Tɔkə to le a kaw kar kə je ta marə dɔ dərə-ba tə̂.»

27To til dɔku gire sɔ laa â bamburanbo le aw yəkəje dɔ tɔkə ba-katə tə̂ kə̂ Mediterane tə̂ənn. Lo aw to mɔngu nyɛnɛnɛ a, njê-yəlje to le ooje tokə nɛ̂n kə̂ jaw tee ngɔsi kə nangə. 28Dilaje kula kə̂ n̂-tɔ andə kə̂ ɔɔy gəle tə̂ maânn mba gərə nɛ̂n kuru laa ngaâ dingaje kilometere dɔmota gire siri. Daw ngaji ngaâ n̂-təlje dilaje bbay a, dingaje kilometere dɔjoo gire jijoo. 29N̂-bbəəlje karə tɔkə to le in unda ər. Yeenn bba, dunguje andə-narɛje kə̂ ɔɔy sɔ maânn kutu tɔkə to tə̂ le karə nja ang ngaâ n̂-ndingaje karə lo arɛ kə tɔkɛ̂. 30Kar tə̂ənn, njê-yəlje tɔkə to le sangəje ddəw ta tee mə to tə̂ le kayn. Dunnje ngonn to dilaje maânn ngaâ dərəje gusu to dâ ta tilaje nɛ̂n andə-narɛje kə̂ ɔɔy nɔn tɔkə to tə̂ le. 31Yeenn bba, Pɔl pa arə mbay lə mbambaje kə mbambaje le nan: «Bbo dəwje nəənn naynje mə tɔkə to tə̂ nəənn ang a, sese â kajije ang.» 32Yeenn ngaâ mbambaje le gangəje kulaje kə̂ n̂-tɔ nɛ̂n ngonn to le ngaâ dinyaje darə aw.

33Kete bba karə lo arɛ a, Pɔl ndəjə dəwje tɔyn karə usaje nɛ̂n. N̂-pa nan: «Ndɔ dɔku gire sɔ bbokənɛn ngaa kə̂ aw ngəbbəje karə dɔ maann to ddekeke, a usaje nɛ̂n ang. 34Yeenn bba, m-dujuse karə usaje nɛ̂n mba kaji nɛ̂n. M-pa marəse bbay to bin dɔ marə dəw kâra horose tə̂ a koso nangə̂ ang.» 35Go tarje tə̂ənn a, nunn mapa, narə wooyo Lubba kəm dəwje tə̂ tɔyn, n̂-tətə ngaâ nunn kutu kusa. 36Yeenn ngaâ dəwje tɔyn ingaje singa ngaâ usaje nɛ̂n tɔ. 37Kɔrje tɔyn kə̂ jisi mə tɔkə to tə̂ le kɔr joo kə dɔsiri gire misan. 38Jusa nɛ̂n jarə məje ndann ngaâ n-tila bbɔl bleje maânn jarə tɔkə to le ɔlɛ.

Dəwje kə̂ mə tɔkə to tə̂ tɔyn teeje ta yo tə̂

39Lo arɛ a, njê-yəlje to le ooje dɔ nangə, a gərəje ang. Dooje ta maann kə̂ to ənangara ngaâ n̂-ndikije karə bbo ddəw to a, kaw kə tɔkə to le tɛɛ̂ tə̂. 40Mba yeenn bba, n̂-tutuje kula kə̂ n̂-tɔ nɛ̂n andə-narɛje kə̂ ɔɔy le darə oso mə maann tə̂. Kar tə̂ənn njaa tɔ â n̂-tutuje kula nɛ̂nje kə̂ aw tɔjuje ddəw tɔkə to le. Goe tə̂ a, n̂-tɔje tɔkə bəl-kubbu nɔn tɔkə to tə̂ le karə ta ləl uta nɛ̂n tɔkə to le ngaâ dunnje ddəw ər kə dɔ ənangara tə̂ le. 41Daw teeje dɔ ənangara tə̂ kə̂ tee dann maann tə̂ kə̂ uru ngaâ uwa tɔkə to le ar nɛ̂n lo kâra. Ta tɔkə to le andə mə ənangara tə̂ arə ddəw kə̂ nâ ngəsə nɛ̂n goto. Maann le ləngə ngaâ unda kutu to le kə singa arə tətə. 42Mbambaje ndikije ta tɔlje dəwje kə̂ duwade le nan karə marɛ̂ kâra alɛ maann tee ayn. 43A mbay lə mbambaje le ndiki ta kaji Pɔl arə nɔkude ddəw karə n̂-ddaje nɛ̂n tokə baann. Narə ddəw dəwje kə̂ gərəje ta kalɛ maann karə gaynje maânn dɔngɔr ta alɛje teeje ddaka. 44Kəsə dəwje a naanje kar kakəje tə̂ kə gaji tɔkə to tə̂ kə̂ guru le mba kɔru gode. N-dda tokə baann ngaâ jeje tɔyn n̂-tee ddaka kə majɛ̂.

Currently Selected:

Kulaje 27: KabbaDkS

Highlight

Copy