Kulaje 26

Pɔl ɔru naji laa nɔn Agiripa tə̂

1 Agiripa pa arə Pɔl nan: «Mari ddəw karə ɔru naji ləi.» Pɔl ula jia ngaâ ɔru naji laa nan: 2«Tɔkə mbay Agiripa, rɔm nəələm bbokənɛn nya ta kɔru naji ləm nɔin tə̂ dɔ tarje tə̂ tɔyn kə̂ Jiipije undaje dɔm tə̂. 3Mba ə-gərə nɛ̂n-ji-bbeje lə Jiipije tɔyn kə majɛ̂ ddəm ə-gərə nɛ̂nje tɔyn kə̂ daw maynje naan tar dɔɛ̂ tə̂ ddəm. Yeenn bba, m-duji karə ə-tɔ wuri oo tar ləm.

4«Jiipije tɔyn gərəje pa-nja ləm kə kasəm baa. N̂-gərəje kisi ləm horo dəwje tə̂ kə̂ bbeê ləm kə kisi ləm Jerujalɛm. 5N̂-gərəmje ləw baa. Bbo n̂-ndikije a, dâ kasəje ta pa kari to, kisi tə̂ ləm, misi to Parijinyɛ, dəw kə̂ uwa tar lə Lubba ngəng nya. 6A bbasinɛn, n̂-səkəmje mba munda məm dɔ ndu Lubba tə̂ kə̂ unn arə kajejedede. 7Gəl-dəwje ləje kə̂ dɔku gire joo undaje məde to nɛ̂n kə̂ Lubba unn ndue ta dda a ddee to nɛ̂n kə̂ tɔkɔrɔ. Yeenn bba daw poloje Lubba til kə kar, a singade ɔru ang. Tɔkə mbay, əman kara munda məm dɔ nɛ̂n tə̂ənn le tɔ. Mba yeenn bba Jiipije undaje nɛ̂n tar dɔm tə̂. 8See Jiipije, ooje to Lubba asə ta ndol dəwje kə̂ oy ang mba ddi wa?

9«Əman kara məjə m-pa nan to maji karə m-dda singa nya mba koo ri Jeju kə̂ Najarɛtə nəənn kə mbim ang. 10M-dda nɛ̂ɛnn le Jerujalɛm. Mbayje lə njê-poloje Lubba arəmje ddəw arə əman kə da-rɔm njaa mungu njê-mə-kunnje nya kəy-kula tə̂ ngaâ bbo daw ta tɔlde a, m-ndiki tə̂ tɔ. 11Maw mandə kəy mbɔn-naan tə̂ tɔyn kə ndɔ ndɔ maw mula kəmde ndoo tə̂. Maw muwade kə singa marə n̂-tajije ri Jeju. Bbo wungu ɔnʼm nya a, m-ndole gode ndərəng dɔ bbe tə̂ kə̂ dang.»

Pɔl təl ɔru gəl bbar kə̂ Əbbə-dəwje bbarɛ̂ arə Agiripa

12«Marə ndɔ mbayje lə njê-poloje Lubba arəmje ddəw karə maw Damas kə ride maw muwa njê-mə-kunnje. 13Tɔkə mbay, mee ddəw-boô maw maw ngaâ kar ar dannâ a, moo marə lo-karɛ in darâ uru dɔm tə̂, əman kə njê-buwa lo-kawje ləm. Lo-karɛ le ndoko laa uta ndoko lə kar. 14Jeje tɔyn n-tee joso nangə̂ a, moo marə ndu pa tar arəm kə tar aramenyɛ nan: ‹Sɔl, Sɔl, mba ddi bba ə-dda səm singa wa? A to ngəng səi nya ta dda dingaw tokə da kə̂ əbbeeje ɔsɛ̂ kə kakə a, aw dda dingaw.› 15Milɛ̂ tə̂ nan: ‹Əi nân wa? Əbbə-dəwje.› Əbbə-dəwje pa nan: ‹Əman Jeju â aw dda səm singa nəənn. 16A in taar. Gəl nɛ̂n kə̂ m-tee mingai nɛ̂n tokə be: M-tee mingai karə ə-təl to nje-kula ləm ddəm karə ə-pa tar koo kə̂ oom nəənn arə dəwje ddəm ta karə ila mbər nɛ̂nje kə̂ mâ tɔji bbay. 17Mâ kɔri ji Jiipije tə̂ kə ji dəwje tə̂ kə̂ toje to Jiipije ang kə̂ mulai kə rɔde tə̂. 18Mulai rɔde tə̂ karə ə-təəyn kəmde ta ɔrude lo ndul tə̂ ə-tee kə de lo-karɛ tə̂. Karə ɔrude ji Satan tə̂ kə̂ ɔn dɔde ə-ddee kə de rɔ Lubba tə̂. Yeenn bba Lubba a kɔru tar majang ləde dɔde tə̂ ngaâ dâ kingaje lo horo dəwje tə̂ kə̂ ooje məde tə̂ səm kə̂ majije tɔyn.› »

Pɔl ɔru gəl nɛ̂n kə̂ n̂-dda

19«Tɔkə mbay Agiripa, mba yeenn â, m-tusu nɛ̂n kə̂ in darâ kə̂ moo tokə lə ninjeenn le minya m-dda nɛ̂n kə̂ dang ang. 20A dəwje kə̂ Damas kə Jerujalɛm â mila mbər tar nəənn marəde dɔngɔr. Goe tə̂ a, mila mbər marə dəwje kə̂ Jude kə dəwje kə̂ toje to Jiipije ang. M-pa marəde karə n̂-turuje məde ta daaje lo kə rɔ Lubba tə̂ ngaâ ta n̂-ddaje nɛ̂n kə̂ tɔju to n̂-turuje məde mban. 21Mba tar nəənn le â Jiipije uwamje nɛ̂n kar tə̂ kə̂ mee kəy-polo Lubba tə̂ ngaâ n̂-sangəje ddəw ta tɔləmje. 22A Lubba njaa ngəməm ndərəng bbokənɛn karə mɔru gəle nɔn dəwje tə̂ tɔyn, njê kə̂ tɛn wase njê kə̂ bo kara m-nayn maw pa tar-naji laa bbay. Nɛ̂n kə̂ a ta ddee kə̂ njê-kilaje mbər tar lə Lubba kə Mɔyijə n̂-paje tarɛ̂ le njaa maw pa tarɛ̂. Mila marə nɛ̂n dɔɛ̂ tə̂ ang. 23N̂-paje nan Kristə a koo ndoo. Horo dəwje tə̂ kə̂ oyje nâ to dɔngɔr dəw kə̂ a ndol ngaâ nâ kila mbər lo-karɛ karə Jiipije kə dəwje kə̂ toje to Jiipije ang.»

Pɔl duju Agiripa karə oo məɛ̂ tə̂

24Pɔl nayn aw ɔru naji laa baann a, Pestus uru əkii nan: «Pɔl, ə-to nje-wooy! Nɛ̂nje kə̂ ə-ndo nya le ilai wooy tə̂!» 25A Pɔl pa nan: «Pestus, dəw kə̂ bo, mayn wooy ang. Tar kə̂ tɔkɔrɔ kə tar kəm-karɛ â maw pa. 26Tɔkə mbay Agiripa oo tarje nəənn kete mban arə mâ kasə pa tar nəənn nɔɛ̂n tə̂ kə bbəəl ang. M-gərə to n̂-gərə nɛ̂njeenn tɔyn, mba nɛ̂njeenn le teeje lo-kiyɛ̂ tə̂ ang. 27Tɔkə mbay Agiripa, tar kə̂ njê-kilaje mbər tar lə Lubba paje le ə-ndiki tə̂ wa? M-gərə to ə-ndiki tə̂ njaa.» 28Agiripa pa arə Pɔl nan: «Oo to â dda karə m-ddee to dəw lə Kristə kə ngɔru baa be wa?» 29Pɔl pa arɛ̂ nan: «Kə̂ bbasinɛn nəənn wase marə ndɔ tə̂ kâra, mâ duju Lubba karə əi ddəm see dəwje tɔyn kə̂ aw ooje tar ləm bbokənɛn nəənn ddəm ə-ddeeje tokə əman. A m-ndiki ta karə n̂-tɔse kə kula njamji tokə əman nəənn ang.» 30Tɔkə mbay Agiripa ddəm tɔkə mbay Pestus ddəm Berenis ddəm dəwje kə̂ isije kə de ddəm dinje taar. 31Dɔruje rɔde kə guku ngaâ n̂-paje tar horode tə̂ nan: «Dingaw nəənn dda marə nɛ̂n kə̂ asə yo wase marə nɛ̂n kə̂ asə kilɛ̂ nɛ̂n kəy-kula tə̂ kâra ang.» 32Agiripa pa arə Pestus nan: «Bbo dingaw nəənn duju ta kaw nɔn tɔkə mbay tə̂ kə̂ Rɔm ang a, ja kinyɛ̂.»

Currently Selected:

Kulaje 26: KabbaDkS

Highlight

Copy