Kulaje 22

1«Ngakɔnʼmje, bɔydede, ooje naji ləm kə̂ mâ ta kɔru karəse nəənn.» 2Dooje Pɔl kə̂ aw pa tar arəde kə tar ebərə le a, lo to nyɛnɛnɛ uta ye kə̂ dɔngɔr. 3«M-to Jiipi, dujum Tarsə nangə tə̂ kə̂ Silisi. A n̂-ngəməm Jerujalɛm nəənn. M-ndo nɛ̂n kɔ Gamaleyɛl tə̂ dɔ tar ngəm ndu tə̂ lə kajeje. Munn rɔm tɔyn marə Lubba tokə aw ddaje bbokənɛn nəənn. 4M-dda singa kə dəwje kə̂ unnje ‹ddəw lə Əbbə-dəwje› ndərəng marə dingaje yo. Marə duwa dingawje kə dɛnɛ̂nje n̂-tɔde dungude kəy-kula tə̂. 5Tɔkə nje-polo Lubba kə mbɔn-naan lə tɔkəje lə Jiipije gərəje to tar kə̂ tɔkɔrɔ njaa maw pa nəənn. Mba dede njaa darəmje makəturu kə ri ngakɔnje Jiipije kə̂ isije Damas karə maw muwa njê-mə-kunnje m-tɔde m-ddee kə de Jerujalɛm karə dula kəmde ndoo tə̂.»

Pɔl ɔru gəl bbar kə̂ Əbbə-dəwje bbarɛ̂

6«Maw nja ddəw-boô ngaâ m-tee ngɔsi kə Damas ngaâ kar to ngɔsi ta kar dannâ a, a ta koo a, tɔkə lo-karɛ in darâ gukum. 7M-tee moso nangə̂ ngaâ moo marə ndu pa səm tar nan: ‹Sɔl, Sɔl, mba ddi bba ə-dda səm singa wa?› 8Milɛ̂ tə̂ m-pa nan: ‹Əbbəmje, əi nân wa?› Ndu le pa nan: ‹Əman Jeju kə̂ Najarɛtə â aw dda səm singa nəənn.› 9Njê-buwa lo-kawje ləm ooje lo-karɛ̂ le kə majɛ̂, a dooje ndu dəw kə̂ aw pa səm tar le ang. 10M-duju tar m-pa nan: ‹Ddi â mâ dda wa Əbbəmje?› Əbbə-dəwje le pa arəm nan: ‹In taar aw Damas. Lo tə̂ nunn, dâ tɔji nɛ̂n tɔyn kə̂ to tar ləi ta dda.› 11A lo le ndoko nya arə moo lo ang ngaâ njê-buwa-njaje ləm le uwaje jim to kuwa bba awje səm Damas.»

12«Marə dingaw kə̂ ria nan Ananiyas ee nunn, n̂-to dəw kə̂ aw bbəəl Lubba, naw ngəm ndu lə Mɔyijə. Jiipije tɔyn kə̂ mə bbe tə̂ənn aw paje tar laa maji. 13N̂-ddee ningam ngaâ n̂-pa narəm nan: ‹Ngokɔnʼm Sɔl, ə-təl oo lo!› Kar tə̂ənn njaa kəm uja ngaâ mooe. 14Ananiyas le pa arəm nan: ‹Lubba lə kajeje bbari undai dang karə ə-gərə nɛ̂n kə̂ məɛ̂ ndiki, karə ta oo Jeju kə̂ to dəw kə̂ gatə gatə, karə ta oo ndue kə mbii. 15Mba maji karə ə-təl to nje-tar-naji laa ta ə-pa tar nɛ̂n kə̂ oo kə mbii ddəm kə kəmi ddəm nɔn dəwje tə̂ tɔyn. 16A mba ddi bba aw tila bbay wa? In taar bbo inga batɛm, ə-bbar ria arə tar majang ləi ɔru dɔi tə̂.›

Pɔl ɔru gəl kula kə̂ Lubba ulɛ̂ rɔ dəwje tə̂ kə̂ toje to Jiipije ang

17«Go təl tə̂ kə̂ m-təl Jerujalɛm ngaâ marə ndɔ maw duju Lubba mə kəy-polo Lubba tə̂ a, moo marə nɛ̂n tokə lə ninjeenn. 18Moo Əbbə-dəwje ngaâ n̂-pa səm tar nan: ‹Ə-tee Jerujalɛm njangə kə ddang, mba naji ləm kə̂ a kɔru le dəwje a ndikije tə̂ ang.› 19Mila tə̂ m-pa nan: ‹Əbbəmje, n̂-gərəje kə majɛ̂ to maw maw kəy mbɔn-naanje tə̂, marə duwa dəwje kə̂ ooje məde tə̂ səi, daw dilade kəy-kula tə̂ ddəm n̂-tundade kə ndəy ddəm.› 20Kar tə̂ kə̂ daw tɔl nɛ̂n Etiyɛnn kə̂ to nje-tar-naji ləi le mee loe tə̂ tɔ, m-ndiki tə̂ kə de ngaâ m-ngəm kubbuje lə njê kə̂ tɔlɛ̂je le. 21A Əbbə-dəwje le pa arəm nan: ‹Aw, mba mâ kulai ddəw əw horo dəwje tə̂ kə̂ toje to Jiipije ang.› »

Tar lə Pɔl kə mbay lə mbambaje kə̂ Rɔm

22Jiipije ooje tar laa ndərəng teeje dɔ tar tə̂ənn a, uruje əkii nan: «Ə-tɔlje dingaw nəənn kə ddang! Maji karə n̂-nayn kəm baa ang!» 23Daw duruje əkii, daw tɔruje kubbuje rɔde tə̂ ngaâ daw sanrɛje əbaburu kə taar. 24Yeenn bba, mbay lə mbambaje le unn ndu karə dandə kə Pɔl mə ndoko tə̂ lə mbambaje, karə n̂-tundɛ̂ darə n̂-pa gəl nɛ̂n kə̂ dəwje aw uruje nɛ̂n əkii dɔɛ̂ tə̂ le. 25Daw tɔje Pɔl le ta kundɛ̂ a, n̂-pa narə mbay lə mbambaje kə̂ ee tə̂ənn nan: «Darəse ddəw ta karə undaje ngonn nje-bbe kə̂ Rɔm kə̂ n̂-gangə sariya dɔɛ̂ tə̂ ang wa?» 26Baw-ddɔ lə mbambaje le oo tar nəənn le a, ɔtu aw pa arə mbay lə mbambaje nan: «Ddi â ta dda wa? Dingaw le to ngonn nje-bbe kə̂ Rɔm.» 27Mbay lə mbambaje le ddee duju Pɔl nan: «Tɔkɔrɔ njaa ə-to ngonn nje-bbe kə̂ Rɔm wa? Ə-pa arə moo!» Pɔl pa nan: «Tɔkɔrɔ njaa.» 28Mbay lə mbambaje le pa nan: «Muka narɛ bo nya bba m-ddee to ngonn nje-bbe kə̂ Rɔm.» Pɔl ilɛ̂ tə̂ nan: «Əman Pɔl, dujum to ngonn nje-bbe kə̂ Rɔm njaa.»

29Dəwje kə̂ a ta tundɛ̂je karə n̂-pa tar kə̂ tɔkɔrɔ le tuseje inyɛ̂je kə ngɔru. Mbay lə mbambaje le gərə to Pɔl to ngonn nje-bbe kə̂ Rɔm bba narə duwɛ̂ n̂-tɔɛ̂ le a, n̂-bbəəl.

Daw kə Pɔl lo gangə sariya tə̂

30Lo arɛ a, mbay lə mbambaje le ndiki ta gərə gəl nɛ̂n kə̂ Jiipije undaje nɛ̂n tar dɔ Pɔl tə̂ le kə majɛ̂. Yeenn bba, narə n̂-tutu kula njamji gɔlɛ̂ tə̂ ngaâ narə mbayje lə njê-poloje Lubba uwaje dɔ naan kə njê-gangəje sariya ngaâ narə n̂-ddee kə Pɔl nɔnde tə̂.

Currently Selected:

Kulaje 22: KabbaDkS

Highlight

Copy