Kulaje 23

1Pɔl aa kəm njê-gangəje sariya kə̂ uwaje dɔ naan le ngaâ pa nan: «Ngakɔnʼmje, kəjə kə̂ maji â maw nja nɛ̂n nɔn Lubba tə̂ ndərəng bbokənɛn nəənn.» 2A Ananiyas kə̂ to tɔkə nje-polo Lubba unn ndu arə njê kə̂ arje mbɔr Pɔl tə̂ le karə dundaje tɛɛ̂. 3Yeenn ngaâ Pɔl pa arɛ̂ nan: «Əi kə̂ ə-to tokə kar kəy kə̂ dɔru pɔr tə̂, Lubba a kundai. Isi nəənn ta gangə sariya dɔm tə̂ ddəw ndu tə̂, a inya ndu le a arə kunda â dundam wa?» 4Dəwje kə̂ arje ngɔsi kə Pɔl paje arɛ̂je nan: «Aw taji tɔkə nje-polo Lubba wa?» 5Pɔl pa nan: «Ngakɔnʼmje, m-gərə to n̂-to tɔkə nje-polo Lubba ang, mba makəturu lə Lubba pa nan: ‹Mbay kə̂ bbeê ləi, a pa tar kə̂ maji ang dɔɛ̂ tə̂ ang.› »#23:5 Ɛkəjodə 22:27

6Pɔl gərə to dəwje kə̂ aw uwaje dɔ naan mba gangə sariya le marɛ̂je toje to Sadusinyɛje, a marɛ̂ toje to Parijinyɛje. Yeenn bba n̂-pa tar kə taar horo njê-gangəje sariya tə̂ le nan: «Ngakɔnʼmje, m-to Parijinyɛ, m-to ngonn lə marə Parijinyɛ. Gəl nɛ̂n kə̂ daw ta gangə nɛ̂n sariya dɔm tə̂ nəənn, to məm kə̂ munda to dəwje kə̂ oyje a ndolje.» 7N̂-pa tar nila nangə̂ ang bbay a, kɔl in horo Parijinyɛje tə̂ kə Sadusinyɛje ngaâ tin-naan to mə mbɔn-naan tə̂ le. 8Mba Sadusinyɛje paje nan: «Ndol lə dəwje kə̂ oy goto ddəm anjəje gotoje ddəm ndilje gotoje ddəm.» A Parijinyɛje paje nan nɛ̂njeenn toje tɔkɔrɔ. 9Tɔkə bula in horode tə̂. Marə njê-gərəje-Ndu kə̂ toje to Parijinyɛje inje taar ngaâ paje tar kə singa nan: «Joo marə nɛ̂n kâra kə̂ asə karə jundaje nɛ̂n tar dɔ dingaw tə̂ nəənn ang. To marə ndil wase marə anjə â pa saa tar a, n-gərə wa?» 10Tar le aw kə kete kete arə mbay lə mbambaje le bbəəl mba kin karə dəwje le inje uruje dɔ Pɔl tə̂ jakatɛ̂je. Yeenn bba, nunn ndu narə mbambaje aw ɔruje Pɔl horode tə̂ teeje saa aw saa mə ndoko tə̂ lə mbambaje.

11Lo ndul a, Əbbə-dəwje tee inga Pɔl ngaâ pa arɛ̂ nan: «Uwa arə ngəng, ə-pa tar-naji ləm Jerujalɛm mban, a maji karə ə-dda tokə baann Rɔm tɔ.»

Jiipije gɔlje tar mba tɔl Pɔl

12Lo arɛ a, marə Jiipije unguje tar mə naan tə̂ ngaâ undaje-yo nan: «Ja kusa nɛ̂n ang ddəm ja kay maann ang ddəm ndərəng njaa n-tɔl Pɔl bba.» 13Kɔr dəwje kə̂ unguje tar mə naan tə̂ le nday dɔsɔ. 14Daw dingaje mbayje lə njê-poloje Lubba kə tɔkəje n̂-paje darəde nan: «Junda yo kəm dəwje tə̂ tɔyn n-pa nan: Nɛ̂n a kɔru taje ang ndərəng njaa n-tɔl Pɔl bba. 15Yeenn a, maji karə ooje ta naan kə njê-gangəje sariya ta ə-dujuje mbay lə mbambaje arəje n̂-ddeeje kə Pɔl darəse. Ərəje gusu to nâ ddee karə uruje gəl tar laa kə majɛ̂ ooje. A jeje ja kiya baan ta tɔlɛ̂ kete bba karə n̂-tee nəənn.»

16A ngonn-nann Pɔl kə̂ dingaw oo tar baan kə̂ dâ ta kiya le ngaâ aw andə mə ndoko tə̂ lə mbambaje aw pa arə Pɔl le. 17Pɔl bbar marə mbay lə mbambaje pa arɛ̂ nan «Aw kə ngonn basan nəənn nɔn mbay lə mbambaje tə̂, mba nee kə marə tar ta pa karɛ̂.» 18Mbay lə mbambaje le unn ngonn basan le aw saa nɔn tɔkə mbay tə̂ lə mbambaje ngaâ pa nan: «Pɔl kə̂ duwɛ̂ le bbarəm ngaâ dujum karə m-ddee kə ngonn basan nəənn rɔi tə̂, mba nee kə marə tar ta pa kari.» 19Tɔkə mbay lə mbambaje le uwa ngonn le aw saa ngangə lo tə̂ ngaâ duje nan: «Tar ddi bba ee nɛ̂n ta pa karəm wa?» 20Ngonn basan le pa arɛ̂ nan: «Marə Jiipije ooje ta naan ta duji karə bara a, arə daw kə Pɔl lo gangə sariya tə̂ ləde. Dâ ta kərəje gusu to daw ta kuru gəl tar laa le kə majɛ̂ koo. 21A dang bba oo tar ləde ang, mba dasəje nɛ̂n kə̂ dɔsɔ gire ngaâ diyaje baan. Dundaje yo ta kɔku rɔde nɛ̂n-kusa kə nɛ̂n-kay ndərəng ta tɔl Pɔl bba. N̂-gɔlje rɔde tɔyn mban, ndui njaa daw nginanje.» 22Mbay lə mbambaje le ndəjə ngonn basan le nan: «Ə-pa arə marə dəw kâra to uku mə tar nəənn arəm ang.» Goe tə̂ a, ninyɛ̂ narə nɔtu.

Dula Pɔl nɔn ngonn mbay Peliksə tə̂

23Goe tə̂ a, mbay lə mbambaje bbar marə ngann mbayje lə mbambaje joo ngaâ pa arəde nan: «Ə-gɔlje mbambaje kɔr joo, njê-sundaje dɔsiri, njê-ningaje kɔr joo arə n̂-toje ngɔsi ta dawje Sejare kə kar jikara kə̂ til tə̂. 24Ə-gɔlje marə sundaje karə unnje Pɔl aw saa kə majɛ̂ nɔn ngonn mbay Peliksə tə̂.» 25Goe tə̂ a, mbay lə mbambaje dda makəturu arə Peliksə le nan: 26«Əman Kolodiyus Lisiyas m-dda makəturu nəənn mari, əi ngonn mbay Peliksə kə̂ ə-to dəw kə̂ bo. M-ddai lapiya! 27Jiipije uwaje dingaw kə̂ mulɛ̂ mari nəənn ta tɔlɛ̂. A moo nan n̂-to ngonn nje-bbe kə̂ Rɔm arə maw kə mbambaje maw mɔrɛ̂ nɛ̂n jide tə̂. 28M-ndiki nya ta gərə gəl nɛ̂n kə̂ dundaje nɛ̂n tar dɔɛ̂ tə̂ ngaâ maw saa nɔn njê-gangəje sariya tə̂ ləde. 29Moo a, dunda tar dɔɛ̂ tə̂ mba mayn naan tar dɔ nduje tə̂ ləde. A minga tar kə̂ asə karə n̂-tɔlɛ̂ nɛ̂n wase dilɛ̂ nɛ̂n kəy-kula tə̂ ang. 30Moo nan dâ ta kiya baan ta tɔlɛ̂. Yeenn bba, mulɛ̂ rɔi tə̂ ngaâ m-pa marə njê kə̂ undaje tar dɔɛ̂ tə̂ le karə daw kə tar laa le nɔin tə̂.»

31Mbambaje le ooje ndu mbay le ngaâ unnje Pɔl til tə̂ awje saa ndərəng Antipatris. 32Lo arɛ a, mbambaje kə̂ toje to njê-gɔlje təlje mə ndoko tə̂, a njê-sundaje le awje saa. 33N̂-teeje Sejare be a, darəje makəturu le tɔkə mbay ngaâ n̂-tɔjɛ̂je Pɔl le. 34Mbay le tura makəturu le a, duju ta gərə se Pɔl to dəw kə̂ nangə tə̂ kə̂ dda wa? N̂-pa darɛ̂ nan Pɔl to dəw kə̂ nangə tə̂ kə̂ Silisi. 35Mbay le pa nan: «Ndɔ kə̂ dəwje kə̂ undaje tar dɔi tə̂ le ddeeje bba mâ koo tar ləi.» Nunn ndu karə n̂-ngəm Pɔl mə kəy-mbay tə̂ lə Erodə.#23:35 Kəy-mbay: Kəy-mbay kə̂ Erodə dda kar tə̂ kə̂ nɔn nɛ̂n bbe.

Currently Selected:

Kulaje 23: KabbaDkS

Highlight

Copy