Kulaje 10

Marə anjə pa tar kə Kɔrnɛy

1Marə dingaw ee bbe tə̂ kə̂ Sejare, ria nan Kɔrnɛy, n̂-to nje-kɔn dɔ mbambaje kə̂ dunda ri mbɔn-naan ləde nan «mbɔn-naan kə̂ Itali». 2Ne de kə njê kə̂ kəy laa tɔyn daw bbəəlje Lubba, naw numan Jiipije kə̂ toje to njê-ndooje ddəm naw duju Lubba kə kar tɔyn ddəm. 3Marə ndɔ kə gɔl kar mota, noo marə anjə lə Lubba tokə nɛ̂n kə̂ naw ninjeenn. Anjə le andə kəy laa ngaâ bbarɛ̂ nan: «Kɔrnɛy!» 4Kɔrnɛy le ɛɛ̂ kə kəm bbəəl ngaâ pa nan: «Əbbə-dəwje, nan ddi wa?» Anjə le pa arɛ̂ nan: «Lubba oo duju ləi kə kuman kə̂ aw uman njê-ndooje. Məɛ̂ oy dɔi ang. 5Bbasinɛn nəənn njaa, ula bbe tə̂ kə̂ Jope arə marə dəw kə̂ ria nan Simɔn kə̂ daw bbarɛ̂ nan Piyɛr ddee. 6N̂-to kəy lə marə dingaw kə̂ ria nan Simɔn tɔ. N̂-to nje-kula əndaar, kəy laa to mbɔr ba-katə tə̂.»

7 Anjə kə̂ pa tar le ɔtu a, Kɔrnɛy le bbar njê-kulaje laa joo kə marə mbamba laa kâra kə̂ aw bbəəl Lubba. 8Nɔru gəl nɛ̂nje le tɔyn narəde ngaâ nulade Jope.

9Lo-karɛ kə̂ daw njaje ddəw-boô bbay ngaâ n̂-teeje ngɔsi kə Jope a, Piyɛr aal aw dɔ kəy tə̂ mba duju Lubba, ngɔsi kə gɔl kar dɔku gire joo tə̂. 10Bbo ddɛɛ̂ arə n̂-ndiki ta kusa nɛ̂n. Kar tə̂ kə̂ daw dda nɛ̂n-kusa ta karɛ̂ a, noo nɛ̂n tokə nin â naw nin. 11Noo kəm dara təəyn ngaâ noo marə nɛ̂n in mə dara tə̂ le aw ddisi. Nɛ̂n le to tokə lə bəl-kubbu kə̂ tatə kə̂ duwa tɛɛ̂ kə̂ sɔ. Nɛ̂n le aw ddisi kə nangə̂. 12Daje dang dang tɔyn njaa toje tə̂: Daje kə̂ gɔlde sɔ, daje kə̂ aw akəje nangə̂ kə əəlje dang dang. 13Marə ndu dəw pa arɛ̂ nan: «Piyɛr in taar, ə-tɔl ɔn.» 14A Piyɛr ila tə̂ nan: «Baann ang! Əbbəmje. Nɛ̂n kə̂ ndu mbətə kə nɛ̂n kə̂ maji ang, musa ndɔ kâra ang.» 15Ndu dəw le təl pa arɛ̂ nan: «Maji karə nɛ̂n kə̂ Lubba dda arə ddee maji mban, oo to nɛ̂n kə̂ maji ang kəmi tə̂ ang.» 16Nɛ̂ɛnn le to tokə baann gɔl mota ngaâ dunn nɛ̂n le n̂-təl nɛ̂n darâ.

17Piyɛr sangə ddəw ta gərə gəl nɛ̂n kə̂ noo kə nin le pin. A karɛ̂ tə̂ənn njaa dingawje kə̂ Kɔrnɛy ulade le sangəje kəy lə Simɔn ingaje ngaâ arje ta-kəy tə̂ le. 18N̂-bbarje nɛ̂n n̂-dujuje nan: «Simɔn kə̂ daw bbarɛ̂ nan Piyɛr to nəənn wa?»

19Piyɛr nayn aw əjə dɔ nɛ̂n tə̂ kə̂ noo le bbay a, Ndil pa arɛ̂ nan: «Oo, dingawje mota aw sangije. 20In taar, ə-ddisi aw kə de bbo arə məi sangi ang, mba əman â mulade.» 21Piyɛr ddisi inga dingawje le ngaâ pa arəde nan: «Əman kə̂ aw sangəmje le â mar nəənn. Ə-ddeeje nəənn mba ddi wa?» 22Dilaje tə̂ nan: «Kɔrnɛy kə̂ to nje-kɔn dɔ mbambaje â ulaje. N̂-to dəw kə̂ gatə gatə ngaâ naw bbəəl Lubba. Jiipije tɔyn aw paje tar laa maji. Anjə lə Lubba pa arɛ̂ karə n̂-bbari mə kəy tə̂ laa, karə noo tar kə̂ a ta pa karɛ̂.» 23Piyɛr arə dandə kəy ngaâ arəde lo n̂-toje tə̂.

Piyɛr aw rɔ Kɔrnɛy tə̂

Lo-karɛ̂ a, nunn ddəw naw kə de. Marə njê-mə-kunnje kə̂ Jope dannɛ̂je. 24Lo-karɛ̂ kə̂ goe tə̂ a, n̂-teeje Sejare. Kɔrnɛy bbar njê-nujuje laa kə njê-buwa-kuraje laa kə̂ n̂-ndikide nya naw ngəbbə nɛ̂n Piyɛrdede le. 25Piyɛr a ta kandə kəy le be a, Kɔrnɛy tila kəmɛ̂ ngaâ oso nɔn gɔlɛ̂ tə̂ ta walɛ̂. 26A Piyɛr uwɛ̂ kə taar ngaâ pa nan: «In taar, mba əman kara m-to dəw mari.» 27Piyɛr aw pa tar kə Kɔrnɛy andə nɛ̂n kə kəy a, noo dəwje tokə banya kə̂ mbɔnje naan. 28Piyɛr pa arəde nan: «Ə-gərəje kə majɛ̂ to darə ddəw Jiipije karə uwaje buwa-kura kə dəwje kə̂ gəlde dang ang ddəm ta kubba mə kəy ləde ang ddəm. A əman, Lubba tɔjum to, to maji karə moo dəw to dəw kə̂ maji ang kəmʼm tə̂ ang wase m-yabbə dəw ang. 29Mba yeenn bba ula ə-bbarəm a, m-ddee bbo məjə tar kâra ang. M-ndiki ta gərə gəl nɛ̂n kə̂ ə-bbarəm mbɛɛ̂ le.» 30Kɔrnɛy pa arɛ̂ nan: «Dda ndɔ mota bbokənɛn ngaa, mee mə kəy tə̂ ləm maw duju Lubba gɔl kar mota tə̂. A â ta koo a, marə dəw kə̂ ula kubbu kə ndɔnrɛn ar nɔnʼm tə̂ 31ngaâ pa nan: ‹Kɔrnɛy! Lubba oo duju kə̂ ə-duje ngaâ ole məɛ̂ dɔ nɛ̂nje tə̂ kə̂ aw arə njê-ndooje. 32Maji karə ula bbe tə̂ kə̂ Jope ə-bbar Simɔn kə̂ daw bbarɛ̂ nan Piyɛr. N̂-to bbeê lə Simɔn kə̂ to nje-kula əndaar, kəy laa to ta ba-katə tə̂.› 33Kar tə̂ənn njaa mula mari, a ə-ndiki tə̂ â ə-ddee nəənn. Bbasinɛn, jeje tɔyn jee nɔn Lubba tə̂ ta koo tar kə̂ Əbbə-dəwje unda tai tə̂ karə ə-pa arəje.»

Tar kə̂ Piyɛr pa kəy lə Kɔrnɛy

34Piyɛr ila tə̂ nan: «Bbasinɛn m-gərə ngaa to tɔkɔrɔ njaa Lubba ɔru kəm dəw ang. 35Horo gəl-dəwje tə̂ tɔyn, dəw kə̂ bbəəl Lubba ddəm dda nɛ̂n kə̂ gatə gatə ddəm a, a ddee maji kəm Lubba tə̂. 36Nula kə tar laa narə ngann Ijarayɛlje, to Tar kə̂ Maji kə̂ arə mə-wul-lɔm ddəw tə̂ lə Jeju-Kristə kə̂ to Əbbə-dəwje tɔyn. 37Sese, ə-gərəje nɛ̂n kə̂ tee nangə tə̂ kə̂ Galile ngaâ taa dɔ nangə Jude tɔyn go batɛm tə̂ kə̂ Jan ila mbəre le. 38Ə-gərəje ddəw kə̂ Lubba ula nɛ̂n singa-mɔngu kə Ndil-mə-nda dɔ Jeju kə̂ Najarɛtə tə̂ kə majɛ̂. Narə n̂-dda maji kə dəwje tɔyn kə lo lo ddəm naji dəwje tɔyn kə̂ Əsu uwade bbərə tə̂ ddəm mba Lubba ee saa. 39A jeje n-toje to njê-tar-naji nɛ̂nje tɔyn kə̂ n̂-dda dɔ nangə tə̂ lə Jiipije ddəm bbe tə̂ kə̂ Jerujalɛm ddəm. Ne kə̂ n̂-tɔɛ̂je kakə-dəsə tə̂ n̂-tɔlɛ̂je le. 40A ndɔ mota laa a, Lubba ndole ngaâ arə n̂-tɔju rɔɛ̂. 41N̂-tɔju rɔɛ̂ dəwje tɔyn ang. Njê-tar-najije kə̂ Lubba mbərəde kete kə jeje kə̂ jusa saa nɛ̂n ngaâ jay saa nɛ̂n â go ndol tə̂ laa le n̂-tɔju rɔɛ̂ narəje. 42Nunn ndu narəje karə jila mbər Tar kə̂ Maji jarə dəwje, ta n-pa jarəde to Lubba undɛ̂ to nje-gangə sariya dɔ dəwje tə̂ kə̂ isije kəm baa ddəm dɔ dəwje kə̂ oyje ddəm. 43Njê-kilaje mbər tar lə Lubba tɔyn paje tar laa nan: ‹Dəw kə̂ unn məɛ̂ arə Jeju a, Lubba ɔru tar majang laa dɔɛ̂ tə̂ kə ri Jeju le.› »

Ndil-mə-nda ddee dɔ dəwje tə̂ kə̂ toje to Jiipije ang

44Piyɛr nayn aw ɔru gəl nɛ̂njeenn bbay a, Ndil-mə-nda ddee isi dɔ dəwje tə̂ tɔyn kə̂ aw ooje tar le. 45Njê-mə-kunnje kə̂ toje to Jiipije kə̂ dannje Piyɛr le dɔde ayn, mba dooje a, Lubba arə Ndil-mə-nda dəwje kə̂ toje to Jiipije ang tɔ. 46Dooje dəwje kə̂ toje to Jiipije ang aw paje tar kə ndɔn-tarje kə̂ dang dang ddəm aw ɔsuje gaji tɔkə-mbangə lə Lubba ddəm. Yeenn ngaâ Piyɛr pa nan: 47«Dəwje le ingaje Ndil-mə-nda tokə jeje tɔ, a marə dəw a kasə kɔku ddəw karə dingaje batɛm maann wa?»

48Piyɛr le arə ddəw karə n̂-ddade batɛm kə ri Jeju-Kristə ngaâ dəwje le dujuje Piyɛr le karə dda ndɔ rɔde tə̂ ngaji bbay.

Currently Selected:

Kulaje 10: KabbaDkS

Highlight

Copy