Luuka 20

UYeesu iposewa ulwa wutawulilwa waakwe

(Mataayo 21:23-27; Maluko 11:27-33)

1UYeesu akhandi ikivamanyisa avaanu mu lukeeke lwa nanda imbaagule iya kifuunyila, na kivajovela avaanu iMola iNofu. Ilijuva limonga, avatambule avakhome, avamanyisaaji va ndaji sa Musa na vakhome va Vayahuudi vamulutilaga. 2Vamuposiise kiija, “Tujovela, aga gina wiigaha, wiigaha kwa wutawulilwa wa naani? Yu naani yuna wákupeela uwutawulilwa uwo?”

3Wávajovela wáaja, “Na yuune nisivapose. Munijovele, 4uwutawulilwa wa Yohana uwa kitwinia avaanu wahumaga kwi? Wahumaga kwa Nguluvi awu kwa vaanu?” 5Baheene vaposania veene vaaja, “Nda timuyanshe kiija, wahumaga kwa Nguluvi, asitupose kiija, ‘Lino kwashi musikhamuhuviliile?’ 6Leelo nda tijove wápelwagwa na vaanu, avaanu woona ava, vasituhude, kwa kiiva vakhandi vihuviilila kiija uYohana akhandi mukuwamalago.” 7Kuunyuma, vamujovela vaaja, “Tisimeenye uwutawulilwa uwo kuna wahumaga.” 8UYeesu wávajovela wáaja, “Na yuune, nisikivajovela kiija yu naani anipeelile uwutawulilwa uwa kisenga aga.”

Ishihwano sha valimaaji avadehi

(Mataayo 21:33-46; Maluko 12:1-12)

9Baheene uYeesu wáyansa kivajovela avaanu ishihwano ishi, wáaja, “Akhandi akwali umuunu yumonga yuna wálimaga umugunda gwakwe na kivyala amasabiibu. Wávakhoodesa avalimaaji umugunda gula, baheene umwene wáshuula, wáakhala nsiku nyinshi. 10Pina lwafikha uluhaavi ulwa kiyava amasabiibu, wámufilikha umuvanda kwa valimaaji vala, kiija amutoolele iligawo lyakwe ilya nkungulo. Leelo avalimaaji vala vamutova na kimudaga, bila kimupeela shiinu.

11“Umuunu yula wámufilikha khanji umuvanda uyunji. Uyo woope vamutova na kimuyegula, khanji vamudaga bila kimupeela shiinu. 12Baheene wámufilikha uwa wutatu. Uyo woope vamutesa, vamudaga kunja ya mugunda.

13“Kuunyuma, umunya mugunda wáaja, ‘Lino nisiigahe shishi? Uluhaavi ulu nisimufilishe umwanangu umugani! Pamonga uyu vasimutiile.’ 14Umwanaakwe wáwuukha iiluta, leelo avalimaaji vala pina vamwaga, vajovelana vaajova, ‘Uyu yumwene umunya kihaala umugunda ugu. Lino, timubude, baheene uwuhaasi waakwe wuve weesu.’ 15Vamudaga kunja ya mugunda, vamubuda.”

Baheene uYeesu wávaposa, “Lino, muhiiva umunya mugunda yula asivagahe shi avalimaaji vala? 16Asiyinse kivabuda, nagu mugunda gula asivakhoodese avaanu vanji!” Avaanu vaganaga kipulikha amaswi ago, vaaja, “Ago gasikhawonekhaga hata lijuva limo!” 17Leelo uYeesu wávaloleela, wávaposa wáaja, “Lino, aMayandikhwa aga gana luganulo lushi?

‘Ilingʼanga lina avasengaaji valikhaanaga,#20:17 Ilingʼanga lina avasengaaji valikhaanaga: UYeesu pina ilogola amaswi aga Lufingo uLukuulu, apo iiva ikiyijova yumwene.

lilyene liveele lingʼanga likhome ilya ku mbogonyo ya luutu lwa nanda.’#20:17 Lingʼanga likhome ilya ku mbogonyo ya luutu: AVayahuudi vakhandi visenga inanda saanave kwa matofaali ga mangʼanga gina gakhandi gahongwelwe. Ilingʼanga ilikhome ilihongole ilya ku mbogonyo likhandi lina nsengo nkhome iya kikhangasa uluutu, ndeeno kukhandi kuna mangʼanga mu mbogonyo soona isa nanda pina inyengo sivili sitangaana. Ilingʼanga ilikhome ilyo ilya ku mbogonyo, likhandi ligolosa amangʼanga aganji goona gina gisengwa mu luhengo ulwa nanda. UYeesu lingʼanga likhome ilya nanda imbaagule imya iya Nguluvi. Inanda iyo, shihwano sha shipuga shina shikimuhuviilila Nguluvi. Yimba mu litaafili lya Vaefeso 2:19-21; Isaaya 28:16; Sabuli 118:22.

18“Umuunu nda agwile pa lingʼanga ilyo, asidenyenkhane, khanji umuunu yoyoona yuna lisimugwile, lisimuhaawule mandu.”

19Baheene avamanyisaaji va ndaji sa Musa na vatambule avakhome, vaamanya kiija ishihwano shila shikhandi shikivajova vaveene. Baheene vaava visakula kimukhata bahala, leelo vavatiilaga avaanu.

Kihomba ikhoodi kwa Kayisaali

(Mataayo 22:15-22; Maluko 12:13-17)

20Baheene avakhome va Vayahuudi vaava vikimusigama uYeesu. Vavafilikhaga avaanu vina vayigahaga ngaja vagolofu, kiija vamuyangalilaje gina iigaha. Vakhandi viigaha ilyo kiija vamanye amahiiva gaakwe, baheene vamukhate na kimutwala kwa mukhome wa nyi vamuhije.

21Baheene avaanu vala vamuposa uYeesu vaaja, “Mumanyisaaji, timeenye kiija wiijova na kimanyisa aga shiyooli. Khanji usikimutiila hata muunu yuna ana nsengo nkhome, leelo wimanyisa ishiyooli kwa vaanu kiyinatila shina isakula uNguluvi. 22Wuli, indaji sa Musa sikitutawula kihomba ikhoodi kwa Kayisaali, umutwa wa Valuumi, awu ndaali?”

23Leelo uYeesu wáamanya uwumyansi waanave, wávajovela wáaja, 24“Muniwonense isilinje iya dinaali. Ishimanyilo ishi na mayandikhwa aga gina gakwali mu silinje iyi ga naani?” Aveene vamugomosesa vaaja, “Ga Kayisaali, umutwa wa Valuumi.” 25Baheene uYeesu wávajovela wáaja, “Lino, ifya Kayisaali mupeelaji uKayisaali, ifya Nguluvi mupeelaji uNguluvi.”

26Avaanu vala vaswigaga mandu iliyankho lya Yeesu, vasisima tototo. Vapootwa ulujowo ulwa kimukhatila, kwa kiiva ya maswi gina wávajovaga pa vaanu.

Ulufyukho lwa vaanu vina vafwile

(Mataayo 22:23-33; Maluko 12:18-27)

27Baheene aVasadukaayo#20:27 AVasadukaayo: Yimba iliswi Vasadukaayo mu Maswi aMahensa. vina vakhandi viija kusiina kifyukha vina vafwile, vaaluta kwa Yeesu vamuposa vaaja, 28“Mumanyisaaji, uMusa wátuyandishilaga indaji kiija, umuunu nda afwe na kimulekha umudala angaya mwana, yisakulwa umaame amuhaale umufwile uyo, baheene amusavile avaana umaame yuna wáfwisaga.#20:28 Yimba mu litaafili lya Luuju lwa Ndaji 25:5-6. 29Lino, vakhandi vakwali avanyalukholo fungati, vina vakhandi vaana va wiihe yumo. Uwa wutasi wátoola umudala, wáafwa angaya mwana. 30Uwa wuvili, [wámuhaala umufwile yula, woope wáafwa angaya mwana].#20:30 Amaswi aga, gakusiina mu mayandikhwa agamonga amakuulu. 31Kuunyuma uwa wutatu, woope wámuhaala, wáafwa. Yaava shishila ku woona fungati. Avaanu woona vala vamutoolaga umudala yula, leelo woona vafwisaga bila kilekha umwana. 32Baheene kuwudugo, uwashimaayi yula woope wáafwa. 33Lino wuli, ilisiku lya kifyukha avaanu woona, umufwile yula akhava mudala wa naani? Kiiva wátolwagwa na vagoosi woona fungati!”

34UYeesu wávajovela wáaja, “Avaanu va lino, vitoola na kitoolwa. 35Leelo avaanu vina uNguluvi ikivaaga kiija visakulwa kifyusiwa kihuma kwa vina vafwile na kikhala mu nyi imya, awo vasikhatoola, wala kitoolwa khanji. 36Lumo na ago vasikhafwa khanji, kwa kiiva vakhava ngaja avamalayikha. Viiva vaana va Nguluvi, kwa kiiva vafyusiwa kihuma kwa vina vafwile.

37“Woope uMusa wájovile kiija vina vafwile vakhafyusiwa. Wájovile ilyo pala pa musita guna gukhandi guveekha, wámutambulaga uMutwa uNguluvi, ‘Nguluvi wa Abulahamu, Nguluvi wa Isaaka, khanji Nguluvi wa Yaakobo.’#20:37 Yimba mu litaafili lya Kihuma 3:6. 38Umwene asili Nguluvi wa vina vafwile, leelo Nguluvi wa vina wuumi. Kiiva, kunyaakwe avaanu woona wuumi.”#20:38 Umwene asili Nguluvi wa vina vafwile, leelo Nguluvi wa vina wuumi. Kiiva, kunyaakwe avaanu woona wuumi. Uluganulo lwakwe kiija, uAbulahamu, uIsaaka, nu Yaakobo vapili wuumi, vali lumo nu Nguluvi kushaanya.

39Apo, avamanyisaaji avanji va ndaji sa Musa vaaja, “Mumanyisaaji, walogola wunofu!” 40Kiyansa apo, vaava vitiila kimuposa.

UMukulusaaji mwana wa naani?

(Mataayo 22:41-46; Maluko 12:35-37)

41Baheene uYeesu wávaposa wáaja, “Aasi, kwashi avaanu viijova, uMukulusaaji yuna uNguluvi wátahisaaga kimufilikha,#20:41 UMukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Lusawo lwa mutwa uDawudi? 42Kwa kiiva uDawudi yumwene, wáyandikhaga mu litaafili lya Sabuli, wájovile ndeeni,

‘UMutwa uNguluvi wámujeele uMutwa wangu,

“Khala ku liwokho lyangu ilya kundiilo,

43mbakha pina nikhava nakutanga

uvamene avalugu vaakho na kivatema.”’#20:43 Yimba mu litaafili lya Sabuli 110:1.

44“Lino, nda uDawudi ikimutambula uMukulusaaji kiija, Mutwa waakwe, uMukulusaaji akwiliile wuli kiiva mwanaakwe?”

Ilipavilo lya vamanyisaaji va ndaji sa Musa

(Mataayo 23:1-36; Maluko 12:38-40; Luuka 11:37-54)

45Avaanu woona pina vikimupuliisa uYeesu, umwene wávajovela avamanyisiwa vaakwe wáaja, 46“Muyivavalaje na vamanyisaaji va ndaji sa Musa. Vidobokha kijenda jenda vafwalile inkhansu inali na kihunjilwa na vaanu kwa kitiilwa pa munaada. Pina vali mu nanda isa kifuunyila, visakula kikhala mu fitengo ifya kumwandi. Mu fiwungo, viikhala mu fitengo ifya kitiilwa. 47Avaanu ava viipokha ifiinu ifya vina vafwiliilwe! Khanji mu wumyansi waanave, vifuunya amafuunyo matali, baheene avaanu vave vikivaaga vagolofu. Ilijuva lya mukhole, uNguluvi akhavalafya mandu!”

Currently Selected:

Luuka 20: Shisangu

Highlight

Copy