Luuka 21

Isadaakha ya mufwile umupiina

(Maluko 12:41-44)

1UYeesu pina wáali mu lukeeke lwa nanda imbaagule iya kifuunyila, wávaajile avanya wusi viihumya isadaakha saanave mu shombo sha kihumisa isadaakha. 2Baheene wámwaga umufwile yumonga umupiina iiponya mula isilinje sivili#21:2 Isilinje sivili: Uluhaavi ulo sikhandi hela ndoodo mandu kishila ihela soona. hela. 3Apo, uYeesu wáaja, “Shiyooli nikivajovela, uwashimaayi uyu umufwile, khanji mupiina, wáahumya kishila woona. 4Kiiva avanji woona awo vaahumya fisheefu mu fiinu fyanave ifinshi. Leelo uwashimaayi umufwile uyu mu wupiina waakwe, wáahumya fyona fina ikiyihuviilila mu wiikhasi waakwe!”

Inanda imbaagule iya kifuunyila yikhanangwa

(Mataayo 24:1-2; Maluko 13:1-2)

5Baheene avamanyisiwa vamonga va Yeesu vakhandi viijova ulwa nanda imbaagule, shina yisenjiilwe na mangʼanga amanofu, lumo ni fiinu fya hela nyinshi fina avaanu vahumyaga kwa Nguluvi. Baheene uYeesu wáaja, 6“Lukhayinsa uluhaavi, aga goona gina mukigaaga lino gakhagwisiwa. Kusiina ilingʼanga lina likhasigala pashaanya ya lingʼanga liyine!”

Amalava amakhome gina gakhayinsa

(Mataayo 24:3-14; Maluko 13:3-13)

7Avaanu vala vamuposa uYeesu vaaja, “Mumanyisaaji, ago gakhayinsa yooli? Khanji, shimanyilo shishi shina shikhatuwulanisa kiija gali nkholeela kisenjekha?” 8Wávajovela wáaja, “Muveesaje meeho, baheene musikhajanjilisiwaagwa! Kwa kiiva vakhayinsa avaanu vinshi kwa litaawa lyangu vakhajova, ‘One yuune Mukulusaaji!’#21:8 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Khanji viija, ‘Uluhaavi luli nkholeela!’ Avaanu awo, musikhavafwataji! 9Omwe pina mukhapulikha imola sa wulugu, nu lugalukho lwa vaanu, musikhatungumalaji. Ago goona tangusiina mbakha gawoneshe, leelo uluhaavi ulwa wudugo lukhava lushaanali.”

10UYeesu wáyitenekha kilogola kiija, “Inyi yimo yikhalwa ni nyi iyinji, uwutwa wumo wukhalwa nu wutwa uwunji. 11Imbali nyinshi kukhava mudegenkho mukhome, injala inkhome na matamu aga kiyambuhisa. Khanji, kukhava kuna fiinu fya kitiisa ni shimanyilo shikhome kihuma kushaanya.

12“Leelo, pina gasinawoneshe ago goona, avaanu vakhavakhata omwe na kivalafya. Vakhavatwala kihigwa mu nanda isa kifuunyila, na kivadindila mu shifungo. Khanji vakhavatwala kwa vatwa na kwa vanya wutawulilwa baheene muhigwe, kwa kiiva omwe muli vamanyisiwa vangu. 13Leelo, ulo lulwene lukhava luhaavi lwenyu ulwa kivabedela ilihuuvi lyenyu ilya one. 14Lino, musikhaveesaji nu muninu muninu kiija, mukhajova shi. 15Kwa kiiva one nikhavapeela uluhala na maswi gina mukhajova, mbakha avalugu veenyu vakhagombola kivakhaana hata kivasivila.

16“Khanji, mukhadoolelwa na vasafi veenyu, avayeenyu, avalukholo lwenyu, hata na vamanyi veenyu, khanji avamonga vakhabudwa. 17Avaanu woona vakhava vikivakhalalila kwa kiiva omwe muli vamanyisiwa vangu. 18Leelo lusikhayaga hata luyele lumo mu matwe geenyu! 19Omwe nda mukhagugumila, apo mukhayanushila uwuumi wa shiluta.

UYeesu ipavila kiija ilijumbi lya Yelusalemu likhanangwa

(Mataayo 24:15-21; Maluko 13:14-19)

20“Uluhaavi luna mukhalyaga ilijumbi lya Yelusalemu lipiliimwe na vatovanaaji va wulugu, baheene mumanyaje kiija uluhaavi ulwa kinangwa ilijumbi ilyo luli nkholeela. 21Ino, vina vali ku nyi ya Yudeya vasijilaje ku fidunda, na vina vali mu lijumbi lya Yelusalemu, vapoolaje kunja na kisiga, na vina vali mu magunda, vasikhatinaga mu lijumbi. 22Kwa kiiva, uluhaavi ulo lukhava lwa malava, baheene amaswi goona gina gayandiikhwe mu Mayandikhwa aManofu gasenjeshe. 23Leelo aka, avashimaayi vina vakhava vana lwanda na vina vakhava viyonsa mu nsiku iso! Kwa kiiva yikhava lukhamu mandu mu nyi iyo, inkhalasi ya Nguluvi yikhayinsa ku vaanu va shisafi ishi. 24Avaanu avanji vakhabudwa kwa panga, avanji vakhatwalwa mu wuvanda wa nyi isinji. Baheene avaanu vina vasili Vayahuudi, vakhayinsa kitema ilijumbi lya Yelusalemu, mbakha uluhaavi lwanave ulwa kitema pina lukhava lwasila.

Kiyinsa khanji kwa Lusawo lwa Muunu

(Mataayo 24:29-31; Maluko 13:24-27)

25“Fikhawonekha ifimanyilo mu lijuva, mu mwesi na mu nondwe. Na pa nyi panu, ibahali sikhava na mavingu makhome amanya lugiino, ulo lukhavaviikha avaanu va nyi soona, kiiva na malava makhome na kitiila mandu. 26Ago goona, pina gakhava giyinsa mu nyi, avaanu vakhasilikha inumbula kwa kiiva ya kitiila mandu. Vakhava vihiiva kiija giyinsa amalava amakhamu, kwa kiiva, ifiinu fina fili kushaanya fikhadegenkha.

27“Baheene woona vakhanyaaga, one Lusawo lwa Muunu niyinsa mu mafunde, nina ngufu nu wutupikho wukhome.#21:27 Yimba mu litaafili lya Daniyeli 7:13. 28Ago goona pina gakhava giyansa kisenjekha, yiimaji, mukhangalaje na kishendeeva, kwa kiiva ago giwonensa kiija uNguluvi ali nkholeela kivakulusa!”

Ishihwano sha mujombe

(Mataayo 24:32-35; Maluko 13:28-31)

29Baheene uYeesu wávajovela avamanyisiwa vaakwe ishihwano, wáaja, “Loleeli ilipishi lya mujombe na mapishi aganji goona. 30Pina mukigaaga amapishi gayansiise kilembula, nyangu mwimanya kiija uluhaavi lwa mingo luli nkholeela.

31“Shiisho ndeeno, na yuumwe pina mukhagaaga ago goona gisenjekha, manyaji kiija, uWutwa wa Nguluvi wuli nkholeela kiyinsa. 32Shiyooli nikivajovela kiija, ishisafi ishi shisikhashila mbakha aga goona pina gakhava gasenjekha. 33Uwulanga ni nyi fikhashila, leelo amaswi gangu gakhava ga shiluta.

Muveesaje meeho

34“Muveesaje meeho! Musikhamenwagwa nu wupafu, uwugaasi na malava ga mu nyi iyi, baheene ilijuva ilyo ilya wudugo lisilaave liyinse kwa kivatinuhisa. 35Kwa kiiva ilijuva ilyo likhavatinuhisa avaanu woona mu nyi yoona. 36Lino, muveesaje meeho uluhaavi loona, mukimufuunya uNguluvi, baheene avapeelaje ingufu isa kishila mu goona gina gakhayinsa, baheene muve mukiyikhangasa kiyiima pamwandi yangu, one Lusawo lwa Muunu mu lisiku ilya kihigwa inyi.”

37Wiila paminsi, uYeesu akhandi imanyisa avaanu mu lukeeke lwa nanda imbaagule iya kifuunyila. Wiila paashilo akhandi iiluta kigona ku shidunda sha Miseyituni. 38Shila lijuva, avaanu woona vakhandi vilamukha ulwamilaawu mandu na viiluta mu lukeeke lwa nanda imbaagule, kiija vamupuliise.

Currently Selected:

Luuka 21: Shisangu

Highlight

Copy