Yohana 8

Uwashimaayi yuna wákhatwagwa uwugoni

1Leelo uYeesu wáwuukha mu lukeeke lwa nanda imbaagule iya kifuunyila, wáaluta ku shidunda shina shikhandi shitambulwa shidunda sha Miseyituni. 2Ulwamilaawu njine pina kwasha, uYeesu wáaluta khanji wáyinjila mu lukeeke lwa nanda imbaagule iya kifuunyila. Avaanu woona vaaluta kunyaakwe, baheene wáakhala na kiyansa kivamanyisa. 3Avamanyisaaji va ndaji sa Musa#8:3 Avamanyisaaji va ndaji sa Musa: Yimba iliswi Vamanyisaaji va ndaji sa Musa mu Maswi aMahensa. na Vafalisaayo, vamutwala kwa Yeesu uwashimaayi yumonga yuna wákhatwagwa uwugoni, vamuviikha paakhati naakhati ya shipuga sha vaanu. 4Lino vamujovela uYeesu vaaja, “Wee Mumanyisaaji, uwashimaayi uyu wáakhatwa uwugoni. 5UMusa mu ndaji saakwe, wátulajisaaga kimubuda uwashimaayi ngaja uyu, kwa kimuhuda na mangʼanga.#8:5 Yimba mu litaafili lya Njowo sa Valaawi 20:10; Luuju lwa Ndaji 22:22-24. Lino owe wiija wuli?” 6Aveene vakhandi vikimuposa ndeeno kwa kimujela, kiija vapate insila iya kimusitaakha. Leelo uYeesu wásungama wáyandikha nu ludole lwakwe pansi pa nyi. 7Pina vikiyitenekha kimuposa, uYeesu wáyiinukha wávagomosesa wáaja, “Nda kuna muunu yoyoona kunyeenyu, yuna asinajelaje kigaha uwunansi hata gwalimo, uyo ave wa wutasi kimuhuda ni lingʼanga uwashimaayi uyu.” 8UYeesu wásungama khanji pansi, wáyandikha pa nyi.

9Avaanu vina vamusitaakhaga vaganaga kipulikha ago, vayansa kiwuukha yumo yumo, kiyansisa avagosiivaha mbakha avajeleelo. Kuwudugo uYeesu wásigala mwene duguli nu washimaayi yula, yuna akhandi ayiimile pamwene. 10Baheene uYeesu wáyiima, wámuposa uwashimaayi wáaja, “Vali kwi vina vikikusitaakha? Wuli, kusiina yoyoona yuna wásigala, kiija akuhije?” 11Wámugomosesa wáaja, “Eena mutwa, kusiina yoyoona.” Lino uYeesu wámujovela wáaja, “Na yuune nisikikuhiga. Lutaga, leelo kiyansisa iminsiyaano, usikhagahaga khanji uwunansi.”]#8:11 Amaswi aga, gakusiina mu mayandikhwa agamonga amakuulu.

UYeesu wuvalafu wa nyi soona

12Lino uYeesu wáyitenekha kilogola khanji ni shipuga shila wáaja, “One nili wuvalafu kwa vaanu woona. Umuunu yoyoona yuna ikinifwata one, asikhaluta mu nshiisi kaa, leelo akhava nu wuvalafu wuna wukimulongosa mu wuumi wa shiluta.” 13AVafalisaayo vamujovela uYeesu vaajova, “Uwubedelo waakho wusili wa shiyooli, kwa kiiva owe ukiyibedela yuuwe.” 14UYeesu wávagomosesa wáaja, “Hata nda nive nikiyibedela yuune, uwubedelo wangu wa shiyooli, kwa kiiva nikumeenye kuna nihumile, khanji nikumeenye na kuna niiluta. Leelo omwe musikumeenye kuna nihumile na kuna niiluta. 15Omwe mukinihiga one kwa mahiiva ga vaanu, leelo one nisikimuhiga yoyoona. 16Leelo one nda nikimuhiga umuunu, nikimuhiga kwa shiyooli, kwa kiiva nisili yuune duguli, leelo niiva nu Daada yuna anifiliishe. 17Mu ndaji seenyu yiyandiikhwe kiija, uwulunjikhaaji wa vaanu vavili, wuhuviililwa kiiva wa shiyooli.#8:17 Yimba mu litaafili lya Luuju lwa Ndaji 19:15. 18One nikiyibedela yuune, woope uDaada yuna anifiliishe, ikinibedela.”

19Baheene aVafalisaayo vamuposa uYeesu vaajova, “Wuli, uDaada waakho ali kwi?” UYeesu wávagomosesa wáaja, “Musinimeenye one, nayu Daada wangu woope musimumeenye. Mwamuveesaje munimeenye one, ndi mwava mumumeenye nayu Daada wangu.” 20UYeesu wálogolaga goona ago, pina akhandi imanyisa mu lukeeke lwa nanda imbaagule iya kifuunyila, pa luvala luna vakhandi viviikha amasandikho ga hela. Leelo kukhandi kusiina umuunu uwa kimukhata, kwa kiiva uluhaavi lwakwe lukhandi lusinaafishe.

UYeesu ilogola ulwa mfwa yaakwe

21Ndeeno, uYeesu wávajovela khanji aVafalisaayo vala wáaja, “One niiluta, omwe mukhanisakula, leelo omwe mukhafwa musinalambiisile uwunansi weenyu. Omwe musikwiliile kiyinsa kuna nikhava nikwali.” 22Lino aVayahuudi vayansa kiposania viijova, “Kwashi ilogola kiija tisikwiliile kimufwata kuna iiluta? Wuli, iiluta kiyibuda mwene?” 23UYeesu wáyitenekha kivajovela wáaja, “Omwe muhumile pansi panu, leelo one nihumile kwa Nguluvi. Omwe muli va mu nyi iyi, leelo one nisili wa mu nyi iyi. 24Lulwene luna nikivajovela kiija, mukhafwa musinalambiisile uwunansi weenyu. Lino nda musikinihuviilila kiija, ‘One Yuune,’#8:24 One Yuune: Apa uYeesu ikiyijova ngaja shina uNguluvi ikiyijova mu Lufingo uLukuulu. Yimba mu litaafili lya Kihuma 3:14; Isaaya 43:10. mukhafwa musinalambiisile uwunansi weenyu.”

25Ino vamuposa uYeesu vaajova, “Owe yuuwe naani?” UYeesu wávagomosesa wáaja, “Kihuma ulwamwandi pina nimanyisa, navajovela kiija, one yuune naani. 26Ninago minshi gina naali nikwiliile kivajova na kivahiga omwe, leelo nisiigaha ndeeno. Kiiva one nikivajovela avaanu woona imola sila hela, sina nipulikha kihuma kwa Daada. Uyo yumwene yuna wánifilikhaga, khanji wa shiyooli.”

27Aveene vasikhandi vameenye kiija, uYeesu akhandi ilogola nawo ulwa Daada, uNguluvi waakwe. 28UYeesu wákuviilisa wáaja, “Pina mukhamunyenyula uLusawo lwa Muunu kiija mumubude, baheene mukhanimanya kiija yuune. Khanji mukhamanya kiija goona gina nikigasenga, nisikigasenga kwa wutawulilwa wangu, leelo nikigalogola hela gala gina uDaada wánimanyisaaga. 29Uyo yuna anifiliishe ali lumo noone. Asinileshile yuune duguli, kwa kiiva uluhaavi loona nisenga gina gikimushendeefya.”

30UYeesu wáganaga kilogola ago, avaanu vinshi vamuhuviilila.

UNguluvi ikivapeela avaanu uwuyeeshelo

31Baheene uYeesu wávajovela aVayahuudi vala vina vamuhuviliile wáaja, “Nda mukigayinatila amaswi gangu, shiyooli musiive vamanyisiwa vangu. 32Khanji musishimanye ishiyooli. Lino kwa nsila ya shiyooli isho, uNguluvi iyinsa kivapeela uwuyeeshelo.”

33Baheene aveene vamuposa vaajova, “Ose tili shisafi sha Abulahamu.#8:33 Abulahamu: Yimba iliswi ili mu Maswi aMahensa. Tisinajelaje kiiva vavanda va muunu yoyoona. Lino, kwashi ukitujova kiija tisiyiyeeshele?” 34UYeesu wávagomosesa wáaja, “Shiyooli nikivajovela kiija, umuunu yoyoona yuna ikiyitenekha kigaha uwunansi, iiva muvanda wa wunansi.#8:34 Yimba mu litaafili lya Valuumi 6:12-23. 35Umuvanda asiikhala mu nanda ya mutwa waakwe nsiku soona, leelo umwana wa mutwa uyo, yumwene isigala na kikhala mu nanda nsiku soona. 36Lino nda one Lusawo lwa Nguluvi, navapeela uwuyeeshelo mu wunansi weenyu, musiiva vavanda khanji, leelo musiive nu wuyeeshelo wa shiyooli. 37Nimeenye kiija omwe muli shisafi sha Abulahamu, leelo mwisakula kinibuda one, kwa kiiva mwikhaana kigahuviilila gina nikivamanyisa. 38One nikivajovela gina nikigaaga kwa Daada wangu, leelo omwe mukigasenga gina uwiheenyu avamanyiise.”

39Aveene vamugomosesa uYeesu vaajova, “Ose, uwiheesu yu Abulahamu.” UYeesu wávajovela wáaja, “Nda shiyooli muli vaana va Abulahamu, ndi mukigasenga gina uAbulahamu akhandi ikigasenga. 40Lino leelo, mwisakula insila ya kinibuda, hata nive navajovela ishiyooli shina napulikhaga kihuma kwa Nguluvi. UAbulahamu asagahile ngaja gina mwisakula kinigahila one. 41Injendo seenyu sina munaso, siihuma kwa wiheenyu uyunji.” AVayahuudi vala vamugomosesa uYeesu vaajova, “Ose tisili vaana vina tasawaagwa kwa wugoni, leelo uNguluvi mwene duguli yu Wiheesu.” 42UYeesu wávagomosesa wáaja, “Nda uNguluvi wáali ave Wiheenyu, lino mwali mwiva munigeene. Kiiva one nahumaga kwa Nguluvi, lino nili panu. One nisikhayinsile kwa wutawulilwa wangu, leelo yu Nguluvi yuna wánifilikha. 43Kwashi musiimanya gina nilogola? Kwa kiiva mwikhaana imola sangu. 44Omwe muli va wiheenyu uShetaani, shiisho khanji na yuumwe, mwisakula kisenga gina uwiheenyu isakula. UShetaani mubudaaji wiila, khanji asigeene kiyinatila ishiyooli, kwa kiiva angaya shiyooli mu numbula yaakwe. UShetaani ilogola wudehi, iyo ngʼoma yaakwe kwa kiiva umwene mudehi, khanji yu wihaanave wa vadehi woona. 45One nikivajovela aga shiyooli, kwa kiiva ya ilyo, musikinihuviilila.

46“Yu naani mu omwe yuna akwiliile kiwonensa kiija, one nili munansi? Nda gina nikivajovela ga shiyooli, lino kwashi musikinihuviilila? 47Umuunu yuna wa Nguluvi ipulikha amaswi ga Nguluvi, leelo omwe musikigayinatila gina uNguluvi ilogola, kwa kiiva omwe musili vaanu vaakwe.”

UYeesu mukhome kishila uAbulahamu

48AVayahuudi vamuposa uYeesu vaajova, “Wuli, tisiijova shiyooli kiija owe uli Musamaliya, khanji una lilungu?” 49UYeesu wávagomosesa wáaja, “One nigaya lilungu. One nikimutiila uDaada wangu, leelo omwe musikinitiila one. 50One nisisakula kiija omwe munitupishe, leelo akwali yuna isakula kinitupikha, khanji yumwene yuna akhava Muhigaaji wa shiyooli. 51Shiyooli nikivajovela, umuunu yoyoona yuna ikigayinatila amamanyiso gina nimanyisa, uyo asikhafwa shiluta.”

52Ino aVayahuudi vamujovela uYeesu vaajova, “Lino taamanya kiija owe una lilungu! UAbulahamu wáfwisaga, avakuwamalago woope vafwile. Leelo owe wiijova, ‘Umuunu yoyoona yuna ikigayinatila gina nimanyisa, asikhafwa shiluta.’ 53Wuli, owe ukiyigaha mukhome kimushila umbuyeesu uAbulahamu? Umwene wáfwisaga, woope avakuwamalago vafwisaga. Wuli, owe ukiyigaha yuuwe naani?” 54UYeesu wávagomosesa wáaja, “Nda nikiyitupikha yuune, kiyitupikha kwangu kungaya nsengo yoyoona. Leelo uDaada, yuna omwe mwijova kiija yu Nguluvi weenyu, yumwene yuna ikinitupikha one. 55Hata lino musinamumanye uNguluvi, leelo one nimumeenye. Nda nijove kiija nisimumeenye uNguluvi, lino hambi niiva mudehi ngaja omwe. Leelo one nimumeenye uNguluvi, khanji na gina ilogola, nikigayinatila. 56Umbuyeenyu uAbulahamu wáshendeevile mandu wáganaga kimanya kiija, one nikhayinsa. Akhandi ngaja anyaajile, wáshendeevile mandu.”

57Baheene aVayahuudi vamujova uYeesu vaaja, “Owe usinaafise maakha mashumi gasaanu, lino ukhamwajile uAbulahamu shihwana wuli?” 58UYeesu wávagomosesa wáaja, “Shiyooli nikivajovela, one nikhandi nikwali kihuma uAbulahamu asinaasawe.”#8:58 One nikhandi nikwali kihuma uAbulahamu asinaasawe: Apa uYeesu wálitambulaga ilitaawa lya Nguluvi ngaja shina liyandiikhwe mu litaafili lya Kihuma 3:14; Isaaya 43:10. 59AVayahuudi vaganaga kipulikha ago, vatoola amangʼanga kiija vamuhude na kimubuda, leelo uYeesu wátyega, wápoola mu lukeeke lwa nanda imbaagule iya kifuunyila.

Currently Selected:

Yohana 8: Shisangu

Highlight

Copy